jueves, 16 de febrero de 2023

Villanueva (Santu Adrianu)

11 de Febreru de 2023

Pues cuntar, cuntábemos con nun tornar per Villanueva, pero... siempre hai xente afanosa con munches ganes de trabayar, que dá-yos por equipar otru seutorín nes muries penriba'l rigu Trubia. Va tiempu que viera los croquis peles redes y tenía pendiente arrimame hasta'l seutor, más que nada, porque préstame muncho dir a llugares nuevos y sobretou porque tenía una inmensa necesidá de trepar en graos más relaxaos.

 
Kíla asitiándose nel pie de vía... desbrozáu con procuru
 

Asina qu'averámonos hasta ellí, Silvia, compañera de carreres pel monte y yo, aportando un pelín más tarde Lau y Suco, que tamién animábense a conocer el seutorín. Entamamos, faciendo un quintín a la manzorga del too, yendo con curiáu ya que tovía puen romper cosines, pa siguir per un 6a a la so mandrecha prestosín, pasándonos a un 6a+ de diedru a la mandrecha del too, que bien pudiera ser más, fácil 6b pa min.

 
Suco y yo probando los dos 6cs del seutor
 
 Xustu a tiempu, aporten Lau y Suco, dexándo-y un toprropín a Lau pa que fogaease un pocu, viendo tamién que yera durina pa 6a+, pasándonos dempués a probar un 6c y un 6c+, a la manzorga y mandrecha d'una covarata, siendo les dos de bloquín na parte alta, que si nun sabes a lo que vas, son pringables dafechu.
 
 
Un par de detalles de los nomes de les víes

Como final del día, metíme nun 7a Hedera Helix a vista, como a toles demás, pero pringué esta vegada, nel pasu y ye que tien un puntu bloqueru, nel que nun ties mui clares les preses hasta que nun toques un pocu y garres postura pa salir del techín, siendo per una vegada dalgo más dura si yes mui altu y nun te da pa xubir un pie drechu clave.

 
Lau sigue apretando a tope en top-rope

En resume, bon día per Villanueva, onde ya pensaba que nun diba volver, pudiendo facer toles víes a vista-flash menos el 7a que tuve que da-y un segundu, completando una vegada más la escuela, anque nun sedrá la visita final al conceyu de Santu Adrianu, ya que tovía nin trepé en Valdolayés nin conozo la Cueva'l Mar y la placa nueva equipada... asina que tenemos trabayu.

Villanueva (Seutores visitaos)
 
Croquis modificaos por mi de la escuela d'escalada de Villanueva, por mor de Piratas Free. Gracies y col so permisu.

13 de Mayu de 2022

Más de dos años dempués, tornábemos pela escuela de Villanueva en Santu Adrianu, más que nada por acompañar a Anna que tenía en mente facer los dos 7a+ y aprovechando que tenía por allí a Iso ya Iván probando Villanueva City, la última vía que faltábame nel seutor, probela un pelín sacando los movimientos de forma cenciella esta vegada.

Anna rematando'l so segundu 7a+ del seutor

Equí ya entró la motivación por finar el seutor y les visites fueron llegando sobretou nel últimu mes, onde ya tábemos pa encadenar la vía aprosimádamente nel octavu pegue, pero un pire d'un pié fízome destapinar y tar con un deu vendáu casi un par de selmanes.

Dándo-y cera y metiendo pegues a Villanueva City (7b+)

Si a esto-y sumamos les mios dificultaes pa encadenar los proyeutos con cierta facilidá, alcontréme nun procesu mental, que llevóme a cayer nel décimu pegue, saliendo a cadena dempués facer tolo duro y onde enxamás pensara que pudiera cayer.

Díes de pié de vía tranquilos en Villanueva

Dende equí viniera la cuesta abaxo, con díes de mui mala condición por temperatures y retropegues, cayendo nel primer pasín de la vía, hasta en cuatru ocasiones, hasta encadenala nel tercer pegue del día, xustu nun momentu, nel que taba pensando ya en dexala pa otra temporada.

Con esto piesllamos la escuela, ya que tenemos toles víes de los dos seutores encadenaos, asina que mis hores nesti pie de vía tan guapu, ya pasaron al escaezu y ye que tocará siguir abriendo frentes notres escueles onde tengamos un abanicu de víes más ampliu.

Lau encadenando la Cus (6c/+) y xubiendo grau pali pali

La verdá ye que prestaron munchísimu les tardes de pie de vía, viendo como los collacios diben encadenando los sos proyeutinos y consiguiendo la motivación p'apretar entre toos y animando a probar coses más dures caún nel so grau.

--------------------------------------------------------------------------------------------------------------

25 Xineru de 2020

Paez mentira, pero llevaba muncho ensin visitar Villanueva con ambición como pa tornar a vieyos proyeutos. Añu y mediu atrás, ventilara tol seutor de la mandrecha y cuantayá qu'entamara a probar Bailando con Gaitas (7b+), teniendo munchos problemes nel bloque d'entrada al segundu llargu.

El equipín apretando nos 7a+ de Villanueva

Cola entrada del añu 2020, averéme un día pela escuela y sorprendentemente, fuí a repetir y algamar el bloque d'abaxu con cierta facilidá, poro con esta primer premisa fecha, ya podíemos entrar a la parte d'arriba con posibilidaes d'encadenar la vía. Pero esto fue namái qu'un pequeñu espeyismu, ya que na parte alta, tocó bregar, ganar resistencia a la vía, xestionar l'únicu reposu y matizar mui en serio los movimientos de la travesía final.

Delles semeyes faciendo'l primer llargu nun quintín bien guapu

La verdá ye qu'a la fín, tuve que facer métodos distintos a los iniciales, pero acabaron siendo los correutos ya que me llevé Bailando con Gaitas dempués de munchos pegues, suponiendo l'encadene d'esta vía, el cierre d'un ciclu escalador, anque ya tuviera otra vía más nesti grau del branu anterior.

Bregando na parte cimera de Bailando con Gaitas (7b+)

Con esto, despedímonos una migayina d'esta escuela, ya qu'esi mesmu día del encadene, tamién monté y probé l'otru 7b+, única vía que me queda en Villanueva y siendo sinceros, guapa nun ye, jaja así que va costame un pelín tornar a tastiar la perbona caliza de Santu Adrianu.

--------------------------------------------------------------------------------------------------------------

19 y 21 de Xunu de 2018

Esto de la escalada al final, trátase de pasalo bien colos collacios, fuera de graos, encadenes y xornaes más o menos motivantes. Unu nun tien la necesidá d'escalar con cualquiera, por suerte, pudiendo tener un grupín de collacios colos que compartir cuerda, pié de vía y les cerveces de dempués.

Siempre prestóme muncho la escuela de Villanueva en Santu Adrianu, quedándome nel seutor principal, namás que dos 7b+, teniendo unu bien probáu con varies llegaes a cadena, que diéronme a entender qu'había que ponese en serio pa intentar llevámelo y xubir de grau.

Poques víes y concentraes

Esti añu, nun me metí nin un día a probar el proyeutu, pero si que fuimos dos o tres díes hasta'l seutor más desconocíu onde tuvimos echando unes rises, sobretou colos pegues a les víes de 6c+, 7a y 7a+ que na realidá son les que pagan la pena.

En plenu baxón físicu, nun par de xornaes pude llevame los dos sétimos que me faltaben, quiciás en más pegues de los debíos, teniendo incluso que xubir un día mediu orbayando con Orlando, en plenu día de motivación.

Por suerte, pude sacala al primer pegue del día y colar a tomar unes cerveces dempués... Por eso digo que nun escalo con cualquiera... hai que tener ganes de pegar el patéu moyándose p'asegurar a un compañeru y volver a baxar moyándose.

Nel vidiu echando unes rises con Suco y Álvaro otru día de pegues y rises

-----------------------------------------------------------------

24 d'Avientu de 2016 y 27 de Xineru de 2017


Tamos en procesu de volver a garrar motivación y ganes d'apretar de verdá y Villanueva fué mi escuela preferida esti branu, poro prestóme volver pa ver si veíemos collor a dalguna de les víes que me queden por encadenar nel seutor cimeru.


El primer día, averéme hasta ellí con Silvia, que ta volviendo a esto de trepar y ta faciéndolo perbien, llevándose a vista casi tolos sestinos baxos de la mandrecha'l seutor, lo cual ye una pasada dempués de tanto tiempu sin facer nin cuerda nin roca.


Probando'l 7b+ Bailando con Gaites

Yo daría-y caña a Bailando con gaites,un 7b+ que nos primeros croquis taba casi de 7c, pero decotóse. Yo nin fú nin fá, ye duru enforma y sería mi máximu grau, asína que tomámoslo como lo que ye un retu brutal.

El casu ye que nel primer día, pali pali, fuimos ganando-y tarrén a la vía, aportando a la cadena, lo cual da munchísima moral, ya qu'al menos sé que los pasos salen individualmente y que soi capaz de dir poniendo les cintes, con unos vuelos coyonudos... too seya dicho jeje.

Camudando'l Camín en Villanueva


La siguiente visita un mes más tarde sería un vienres tarde, nel que xubí corriendo con Kíla hasta'l seutor onde ya taben per ellí dellos collacios y tuve la suerte que dalguien taba probando la vía y dexó les cintes puestes... así qu'otru pegue curiosín pude da-y enantes de que la nueche aportara y mandáronos p'abaxo.

Como siempre, la visita a los chigrinos tienda de Villanueva y tastiar una Cotoya ye un vezu que nunca perderemos ya qu'esti pueblu tienmos ganaos pa les post-escalades.




7, 15, 20, 28,29 de Xunetu y 23 d'Agostu de 2016

Otru pequeñu capítulu del asediu a esta escuela y ye qu'esti branu garrámos-y gustu a Villanueva por munches coses: la calidá de les víes, l'ambiente soleyeru pero con solombra tola tarde y sobretou les cerveces de dempués de la escalada.

Kíla encantada como siempre con Villanueva

Así fué que plantámonos ellí, Richar, Haritz, Alberto y yo munchos díes de tarde, tanto nel seutor principal como'l secundariu que ta pa la mandrecha y muncha menos xente conoz. Nel secundariu, tuviemos un día llevándome al final la segunda vía pela manzorga que tará cotada de 6c+ más o menos anque hai xente que-y da más.

Dándo-y duru y encadenando Cabrafigal (7a+)

Tola actividá centrámosla nel guapu paré principal onde siempre tuviemos bon ambiente con muncho escalador apretando, foriatu y llocal. Haritz centróse en facer tolos 6a+ de primeru algamando bona confianza na so escalada y Richar dempués de facer lo mesmu, tuvo que metése con graos más altos.

Haritz y Richar trabayando en delles víes de Villanueva

Na rialidá los dos acabaron apretando más, sacando Richar Los Fugaos, 6b+ y tamién Merucu Xusticieru (6c) que díes dempués Haritz tamién fuera a sacalo, dempués de varios pegues y acondicionamientos previos a la vía.

Encadenando'l segundu llargu de L'Arceyada (6c+/7a)

No personal, seguí trabayando víes, xuntándonos un día con Orlando y compañía y volviendo a meteme nun séptimu dende nin se sabe, dándome cuenta que ya taba pa ello otra vegada, probando Cabrafigal, quedándome nun bon primer pegue con dos cuelgues pero sacando tolos pasos.

Matándome col 7a+ nomáu El Melandru

Esi mesmu día, nel cuartu pegue, dempués de dos pegues que paecíen meyores que l'últimu, enchufé Cabrafigal colando de Villanueva más que contentu y permotiváu pa siguir trabayando la vía que xurde a la manzorga.

En reposu enantes de meteme nel pasu infernal

Al día siguiente púnxeme con ella y fuí ganándo-y los movimientos, anque personalmente paecíame más dura que Cabrafigal de la cual tan sólo que tenía un movimientu de bloquéu duru arriba los cuales suelen dárseme bien.

Baxando con unos chines finos... hasta que salió

Trece pegues, en varios díes, dempués d'aquel primer pegue, col encadene pente medies del segundu llargu de L'Arceyada (6c+/7a), fuí a sacala, non sin enantes dar bon espectáculu de vuelos y llances equivocaos por mor d'un métodu erróneu.

Pa finar una Cotoya como siempre

L'últimu día, antes de colar pa Soria, gracies a Haritz pude volver per ellí, cola suerte de poner les cintes y que la probase un rapaz más altu que yo, saliendo primeru d'esquierdes envede mi llance de dreches y con sólo probalo ya vi que yera más cenciello... otru pegue a muerte, lluchada y al sacu de les encadenaes.

Dos 7a+ en Xunetu en Villanueva... daben pasu a una travesía pel desiertu d'Agostu n'adelantre... pero presta remembrar aquel grandiosu mes nel que pente collacios, trepábemos, tomábemos cerveces en terraces al baxar del paré y peles mañanes trabayábemos un pelín... que gran branu.

----------------------------------------------------------------------- 

1 d'Abril y 28 de Xunu de 2016

Entama la temporada d'escalada a muerte dende la primavera a la seronda, faciendo un par de visitines a la escuelina de Villanueva nel Conceyu de Santu Adrianu, teniendo tiempu pente les dos visites pero colando d'elles con grandes sensaciones.

Esti añu, tenemos a tres gallos na quintana, con ganes d'apretar duru y xubir nivel: Alberto, Haritz y Richar, siendo Richar el que más puxu trae y ganes de reventar les víes. Va sobráu de cabeza y eso ta dándo-y grandes resultaos, ensín dengún mieu a volar.

Richar en La Gancera (6a+ )

El primer día, aportamos pelín tarde pa ser Vienres y anduvimos dalgo cotaos pel tiempu, pero aún así Richar pudo apuntase La Gancera a vista (6a+) y Bailando con Gaitas (V). Alberto anda desiguáu de los deos de los pies y los gatos abránsenlu asína que pocu pudiera facer más que sufrir.

Encadenando Cus o más bien Cus-Cus (6c+) que fue al segundu pegue

Pela mió parte, salí a forzar a vista con Merucu Xusticieru, apuntándome si toi bien de la memoria, mi tercer 6c a vista. Presta pola vida, andar motiváu y bien de la cabeza ya tan ceo, cuando tovía tamos afinando l'entamu la temporada.

Richar nel V de Bailando con Gaitas

Esti añu, l'oxetivu cimeru ye xubir a 6c+ el grau a vista, ya que veo munchu trabayu p'algamar un 7b+, pero bono poquín a pocu, habrá que dir centrándose n'apretar duru en sétimos baxos y ver como vamos avanzando.

Kíla esfrutando d'un día soleyeru

Ya que tábemos metíme en Cus, que ye un 6c/+ preciosu y fuí con tol enfotu d'enchufalu a vista, a ver si xubía mediu gradín a vista y faltó'l cantu un duru pa ello. Pifié por moveme un pocu mal y nun yera nel pasu más esixente siquiera, ya que na parte alta hai un bloquéu preciosu, quedándose l'encadene pal siguiente pegue.

Alberto lluchando cola Gancera tamién
 
El segundu día, tiraba a Villanueva col oxetivu d'intentar facer el segundu llargu de L'Arcellada (6c+/7a) pero una pareya de páxaros, asemeyaos a les andurines, atacónos nel primer llargu y tuvimos que descolganos, pa nun molestar el ñeru que teníen nel segundu llargu.

Echufando a vista Merucu Xusticieru (6c)

Colamos al otru seutorín onde nunca fuera a esguilar tovía, faciendo a vista los dos (Richar y yo) el 6b de la manzorga. Llueu lluchara col 6c de la mandrecha, del que nun sabía graos nel intre, encadenándolo al segundu pegue ensin prestame res... nun creo que lu repita enxamás... nun ye'l tipu de vía nel qu'esfrute precisamente.

Richar sacando a vista'l 6b de la mandrecha del segundu seutor

Pa finar, metíme nuna vía ensín saber el grau, al final yera 6c y cuando taba saliendo del pasu clave, partí una presa de pié, con dos metros de cuerda na man pal chapaxe, pegándome'l mayor vuelu de mi vida... ensin consecuencies... más que la sangrina de dalgun roce.

Pa la próxima al sacu... y siguiremos col 7a y 7a+, ya que vi-yos una pinta increyible a les dos víes, el 7a pa forzalu a vista y el 7a+ como primer proyeutu seriu de cara a entrenar la xubida de grau entrenáu.

 -----------------------------------------------------------------------

2 de Xineru de 2016

Hai díes que más vale quedar en casina y nun salir a la roca o dir sólu y reventar blocando, porque lo guapu de la escalada ye, aparte de pegase con tola fuercia que tienes y tol puxu posible cola vía en cuestión, la compañía.

D'esti xeitu, pues tener les meyores sensaciones del mundiu y dir con tola motivación a apretar como un putu animal y salir d'esti pozu de mala forma y baxa motivación, alcontrándote con que los tos collacios de cordada tan que nin ganes d'esguilar y nin de tar ellí.

Seutor a la mandrecha del principal

Coles mesmes, dempués de preparar tres víes de sestu grau baxu pa calecer, col envís de que los demás esfrutasen, cansé de ver l'ánimu col que tábemos y pasé de probar nada de lo que tenía pensao y coles mesmes recoyí los trastos y echar una cerveza.

Si hai dalgo que me caracteriza, ye la mala hostia cuando les coses nun van asigún lo planiao... asína qu'enantes d'españar, tomo aliendu, dexo lo que toi faciendo y me voi a tomar vientos... lo dicho... hai díes que ta meyor unu... cagando, que coño.

P.D: Nota positiva, fice una visitina a otru seutor de Villanueva y piáronme los croquis los cuales espublizaré magar de dir a esguilar y sacar dalguna vía.

-----------------------------------------------------------------------

27 d'Avientu de 2014, 4 de Xineru y 7 de Marzu de 2015
Nueva ayalga n'Asturies pa esguilar sele, nun llugar perguapu ya ensín pies de vía estraos de xente. Esti llugar ta nel valle'l Trubia, penriba de la capital del conceyu de Santu Adrianu: Villanueva. El paré vese dende'l propiu pueblu y tendremos un senderín bien prestosu p'aportar nunos quince minutos hasta elli.

 
Conociendo esti guapu paré

El primer día que tuviemos ellí, namái probamos los dos V's y metí-y un par de pegues con vuelu incluyíu a un 6b+ de muncha calidá y un pasín n'equilibríu preciosu. Como yera un primer tantéu, nun ficimos más víes y colamos Pau y yo a xintar a Prubaza.

El segundu día que fuimos hasta Villanueva, tuviemos esguilando fuerte, faciendo yo los cuatru 6a+ de la mandrecha'l paré toes elles a vista, completando'l día sacando'l 6b+ de los Fugaos nel primer pegue quedándome con un tastu estupendu.

Pau probando un 6a+ en toprope

El siguiente día, fuí con munches ganes d'apretar pero bono, nun siempre se tien esi puntu de forma o eses ganes de sofrir que siempre son necesaries pa facer grandes encadenes. El casu ye que tuvi pegándome col 6c+/7a de L'Arcellada con xeitu, pero nun fuí a alcontrar el métodu correutu pa salir penriba'l techu.

Otru día será...


------------------------------------------------------------------------------------

No hay comentarios:

Publicar un comentario