El Puertu (Cangas del Narcea) - Picu Los Penones

12 de Febreru de 2023

Track: El Puertu (Cangas del Narcea) - Picu Los Penones

Continuábemos d'ivernada, saliendo parte del grupu a facer esquí de monte y otros decidímonos, anque fuéramos pocos, a conocer un puquiñín más el suroccidente, esi gran desconocíu pa facer monte. Nun ye xera cenciella aportar a los montes d'esta fastera astur, ya qu'al ser muncho más ancha, los viaxes en coche faesen pelín pesaos, sicasí, a sabiendes que díbemos tar más tiempu nel coche que caleyando, averámonos hasta'l Puertu L.leitariegos.

Nin que dicir tien, que xuntanos Carlos, Haritz, Kíla y yo, yera como remembrar tiempos d'antaño, asina que llueu del almuerzu en Cangas del Narcea, continuaremos viaxe hasta'l Puertu L.leitariegos, onde atopamos "gran cantidá" d'esquiadores na estación y xente animosa de dar dalgún pateín pela ñeve, pero lloñe, mui lloñe de toles aglomeraciones nel centru asturianu.

Partimos d'El Puertu (1522 m) con ñeve dende les cais del pueblu

  

Casi a les 12 arrancaremos a caleyar, escapando un pocu del fríu mañaneru, saliendo per pista pegaos a la riega las Eras, alcontrándonos la ñeve ensin transformar, polvu, dafechu distinta a les idegues que teníemos poles temperatures reinantes, cola mochila cargada colos crampones y el piolé y dexando los marañones en casa.

 

 

Entamamos a calecer músculos pela blanda ñeve esfrutando de les vistes

Nun pasa na, tamos motivaos y vamos alternando l'apertura de buelga, faciendo un espeutáculu de quitar y poner capes, según azota'l vientu o vamos abellugaos per dalguna llomba y cocemos col sol. La verdá ye que'l día ye de postal y tamos esfrutando del cenciellu camín hacia la col.lada la L.lana, na qu'una vegada más, tenemos que tornar a poner ropa, por mor del fríu vientu.

 

Aportamos a la col.lada la L.lana con vistes al valle de Riutuertu

Nesti colláu, abrigámonos ya intentamos aldovinar que montes tenemos en frente, siendo tola fastera dende'l Cogol.lu Cebol.léu al Cornón col Muxivén un pelín más a la mandrecha que ficiéramos l'añu pasáu, tamién nuna ivernal bien guapa. La verdá ye que tamos pocu avezaos a tar pel suroccidente y cuéstanos enforma asitiános, poro ente cábalas, siempre vásenos la vista pal Cuetu d'Arbas, col que nun hai fallu jaja.

 

Llarga pendiente hacia'l chanu y picu Los Penones

Nesti puntu la ruta, namái tendremos que siguir la valla que dixebra Asturies con Llión y durante un bon tramu d'abrir buelga con pendiente seliquina, daremos preste a esta enorme llombona que ye'l Picu Los Penones (1865 m), onde atoparemos una vistes de primera de tola redolada, destacando montes como'l Chanu los Bueyes, el Cabril o más lloñe'l Rabu l'Asnu, eso sí, toos ellos separaos per guapísimos y llargos valles, como'l de L.lamera, Cacabiechu...

 

Facemos cumal nesti mirador del suroccidente: el picu Los Penones (1865 m)

Con un cutu de restallu, escapamos del cumal cola idega d'abelluganos del vientu baxando apriesa hacia'l col.láu la L.laguna, onde vamos acometer un pequeñu repechu hasta facer cume nel Picarín (1805 m), llugar de crucies de siendes marcaes hacia'l Puertu L.leitariegos y pal val.le Cibea, onde tuviéramos va pocu tiempu nel picu Sigueiru.

 

Averámonos hasta'l Picarín (1801 m) pa siguir baxada hacia'l Chanu

El día nun da pa más, ta perfríu y paez que la ventisca va a más, asina que nun damos más vueltes y baxaremos pel camín marcáu, que dando una llarga envuelta penriba'l val.le de Trapeyina llevándonos hacia'l col.laín del Chanu, onde la ñeve polvu ye una delicia pa que Kíla revuélquese y nosotros focemos un ratín más, cola ñeve peles rodiyes.

 

Pista de vuelta hacia'l Puertu L.leitariegos con una sele xubidina que pica nes pates

Dende equí garraremos una pista pelín incómoda, por mor de les antigües buelgues ya transformaes na ñeve, que faen que vayamos fundiendo de distintes maneres, faciéndose los dos kilómetros un pelín llargos y con cierta pendiente positiva, hasta dar vista al Puertu de nuevu, siempre cola preciosa compaña del Cuetu d'Arbas a la nuesa mandrecha.

En pocu más de 3 hores, terminábemos esta circular, perfeuta pa los marañones, anque nun los llevásemos nós, faciendo casi 8 km de percorríu con +/-365 m de desnivel, lo que dexa a les clares lo cenciellu de la ruta pa una raquetiada o esquiada de monte, siendo lo verdadéramente importante, les vistes qu'ufreznos esti monte cimeru asturianu: Los Penones.

Camudando'l Camín nos altos de Cangas del Narcea