Collía (Parres) - Xerra'l Cabalgadoriu - Calabrez (Ribeseya)

25 d'Abril de 2026 

Track: Collía (Parres) - Xerra'l Cabalgadoriu

Dempués de la ruta a la Forcá, teníemos más que claro que díbemos volver más ceo que sero, ya que ver tola crestería del Cabalgadoriu, llámonos l'atención enforma, asína qu'ensin más, viendo que nun s'apuntara muncha xente a la ruta pal finde, vimos la oportunidá de cabalgar tola crestería con un númberu amañosu de persones. Asina que plantámonos un finde más en Les Arriondes, capital del conceyu de Parres p'almorzar y tomar un cafetín, axuntándonos nun coche pa conducir unos pocos kilómetros hasta Collía, onde tendremos el puntu de partida de la ruta.

Entamamos ruta nel pueblín parresanu de Collía (155 m)

Aparcamos el coche nuna placina onde nun molestamos, preparamos mochila y entamamos a restolar per onde podemos atacar la crestería, siguiendo un tomáu ya imposible camín, hasta'l depósitu d'agua, onde atopamos pasu d'un prau al siguiente. Dicir que'l camín ta imposible, fuimos pel prau de la esquierda y cruciamos esi camín y una sebe pa dar pasu al siguiente prau, que sacónos hacia una viesca, pela que ya pudimos dir siguiendo dalgo de senderu hasta garrar la crestería al altor de la Peña Los Curones.

Buscámonos la vida p'alcontrar pasu hacia la xerra'l Cabalgadoriu

Una vegada metidos na crestería, alcontraremos tramos de senderu pela yerba y otros nos que nos metemos a la caliza pa dir garrando ritmu peles continues trepaes y equilibrios pel calizu, cosa que vien mui bien, ya que sedrá un continuu durante los 6 km de crestería que tenemos per delantre. La verdá ye que nesta primer parte, les opciones son munches, ya querramos trepes divertíos o llibrar pelos senderos más baxos los distintos pasos.

Entamamos la diversión col crestéu restolando pasos divertíos pela caliza hacia la Peña Les Corones

Continuamos avanzando pel cresteríu averándonos a la Peña Les Corones, puntu más altu de la xerra, alcontrándonos a un par de mastinos mozos, amigables y dalgo miedosos, ya que nin siquiera arrimáronse a saludar del too, tando bien curiaos y con gps, de xuru de la Salgar o dalgún pueblín del valle norte. El casu ye que siguimos per senderu o pel propiu filu na parte cabera hasta los 599 m de la Peña Les Corones. 

Facemos cume na Peña Les Corones (599 m)

Falamos de lo guapu d'esti monte, con una crestería de dalgo más de kilómetru y mediu, con vistes increyibles de Picos, que nós nun vamos tener la suerte de tener ya que ta la ñube metío nos montes más altos, ya que nun somos nin a ver delantre nuesa la parte alta del Sueve. Por suerte, si podemos echar un vistazos a montes pocu ascendíos y mui interesantes como la Corona'l Castiellu y tola so guapa crestería, asitiada penriba'l rigu Seya.

Siguimos crestéu alcontrándonos con un destrepe per un canalizu vertical

Pel momentu nun tuvimos dengún puntu téunicu en tola ruta, faciendo per onde meyor vemos los pasos ya incluso tirándonos muncho a la caliza, ya que pisar sobre tarrén cabreru como ésti, fai que nun sepas bien onde tas metiendo la pata pente la yerba llargo y el calizu. Perpasaremos un par de morres nel descensu de Les Corones, alcontrándonos un primer destrepe vertical, per un canalizu que tien bono sofitos de manos y pies y destrépase ensin mayores problemes.

Sigue la crestería con pasinos llibrables y un descensu téunicu y espuestu hacia la collada'l Porrón

El crestéu col xube-baxa ye de continuu, aportando hasta un cuetu, xustu enantes d'una collada pela que vese descensu hasta les Cases de les Corones, siendo esti puntu el más delicáu de la crestería, teniendo que destrepar per tarrén amestáu, un tramu vertical calizu pa salir hacia la fastera sur, per terraceos nos que tendremos qu'alcontrar el meyor pasu, saliéndonos a la amplia collada, nuna travesía llateral.

Perpasamos la collada pa ganar l'ascensu al picu'l Porrón

Como puede vese nes semeyes anteriores la porra que toca destrespar impone un pocu, pero alcuéntrase pasu y tando d'andar per estos tarrenes, nun supón muncho problema. De la collada'l Porrón, pasaremos a garrar otru tramu de guapu cresteríu calizu hasta poder encumar otra cota de la xerra, como ye'l Picu'l Porrón (549 m), allugándonos nel intre, a metá de la crestería y ye que l'actividá, pese a lo divertíu ye llarga.

Encumamos el Picu'l Porrón (549 m) y continuamos disfrutando de pasos divertidos

Paezme increyible, que nun haya dengún escesu d'información, porque paezme una de les cresteríes más guapes y llargues, ya que sigún avanzamos vamos acolumbrando la mar y tamién lo lloñe que tenemos entá el final. Eso sí, vuelvo a reiterar que nun hai que despistase nin un segundu, ye tarrén cabreru enforma y cualesquieres despiste, podemos tener un accidente metiendo la patuca en dalgún furacu, poro tolos sentíos sollertes durante tola crestería.

Llarguísima crestería que va empobinándonos hacia la mar y al so final

El cuerpu va notando'l cansanciu por mor de la tensión en cada pasu, saltando de peña en peña o pisando pente llastries, si tener mui claru onde ponemos el pie, pero d'agasayu final, a partir de la Peña La Xunca (462 m) la crestería afílase con malpenes una anchura d'un par de metros con cayida pa dambos llaos, pero con una caliza escepcional, pasámoslo podre pel filu la navaya.

Pero como siempre lo buenu termínase y tocó restolar per onde descender hacia les cases del Cabalgadoriu, teniéndoles a vista de páxaru, asina como'l restaurante en Calabrez pa echar una birra, pero alcontrámonos con una faldera ensin rastru de senderu y con una cotoya mediana, qu'abrasaba llevares pantalón curtiu o non, pero a los que vinimos en mou primaveral fue un auténticu infiernu. 

Descensu infame tomadísimu ensin senderu hacia les cases del Cabalgadoriu

Dempués de media hora de pinchazos, gritos y cagamentos, aportamos a los praos de la primer casa, onde recibiónos un rapaz que vivía allí, que confirmónos que nun había senderu pa baxar, que'l xubía tamién de cualesquier manera a ver les cabres bien protexíu, con polaina y pantalón duro.

A posteriori, diría que lo meyor quiciás ye siguir crestería hasta'l final onde pudiéramos aportar a la riega L'Acebu, onde veíase dalgo de mayáu onde pastiaben vaques o podríase volver en xubida al Cabalgadoriu con mayor tranquilidá, pero ensin saber como ta la parte final del cresteríu, pero bueno, dempués de 6 km d'arista nun creo qu'hubiese munches dificultaes superiores. 

Caleyamos hacia Calabrez onde nos damos un descansu pa siguir per carretera hasta Collía de nuevu

Pararemos nel restaurante L'Acebu media hora bien ganada a tomar unes birres, quitar pinchos y descansar les pates, enantes de caleyar per primer vegada na nuesa vida, bien felices pela carretera de vuelta hacia Collía, los 6 km de vuelta, que ficimos per tol cresteríu, un percorríu permontañeru, divertíu, non aptu pa xente que nun tea de movese pel calizu y nel que tendremos que tar sollerte en cada pasu que demos, porque tamos nun cordal costeru y Cuera sedría una bona referencia pa los avezaos al monte astur.

En resume, actividá perguapa, onde lo peor ta nel accesu a la cabalgadura y en la descabalgadura de la Xerra'l Cabalgadoriu, que diónos pa tar entreteníos durante 7 hores y 45 minutos, nos 14 km de percorríu (anque facelo en travesía ye una opción pa nun facer la carretera de vuelta), superando un desnivel acumuláu de +/- 915 m, que diz muncho del quebrapates en cumales de malpenes 500 m d'altor.

Camudando'l Camín cabalgando sol mar