16 d'Abril de 2026
Track: Geras (Gordón) - Meleros - La Silla - La Carba - Boyariza - Palanco
Tornamos al monte col GM Xuan de la Borrina, dempués de los díes per Soria de vacaciones y facémoslo con una ruta propuesta por Charly, que diba llevanos hasta la comarca de Gordón, onde la casa conceyu ta faciendo un esfuerzu perimportante p'atrayer turismu deportivu de monte, ya seya con escueles d'escalada, como percorríos de BTT o senderismu y podemos comprobalo per cada pueblu que visitemos.
Nel nuesu casu, vamos averanos hasta Geras, pueblu bien guapu nomáu pol so embutíu y pegáu al rigu Casares, con bien d'ambiente en casi tol añu y que conocemos de visites a esguilar a les foces de Palanco y la Boyeriza ya inclusu tamién a Beberino, qu'alcuentrase bien cerquino, pente la Pola y Geras. Sicasí, nunca tuviera, pela redolada patiando y eso qu'alcontrámonos con bien de rutes marcaes con munchu ciñu y con montes y foces bien guapes.
Sadremos de Geras caleyando pela carretera pasando al llau de la ermita'l Santu Cristo, pa siguir a la vera'l rigu Casares hasta la puente Arnizas onde entraremos na foz de la Boyeriza, perbien indicada, tanto pa rutes como pa la so escuelina d'escalada, la cual perpasamos y continuamos pel guapu camín hasta'l desvíu hacia'l valle la Boyariza o a la Foz de Meleros, el nuesu oxetivu del día, poro garramos senderu a la manzorga entrando nun fayéu, pegaos al rigu Meleros, increyible dafechu.
Pali pali, avanzamos pel fayéu, cruciando la riega Meleros en dalgun puntu y adientrámonos na foz de Meleros, tupiéndose les peñes, fayes d'un mugor verde primaveral ablucante, garrando la ñatura nun puntu d'espoxigue xabaz, esfrutando munchísimu del camín, hasta asomar el focicu nuna resquiebra y peganos de frente con un tabayón d'altor considerable, imposible dafechu de llibrar.
Ehí ye onde entramos nel "chikipark" o "aula d'aventures ñaturales" que desendolcaron nesta foz, pero tengo que dicir que pesie a non prestame estes coses, los sofitos artificiales tan nos puntos xustos, sin ser descomanaos y nun ye sólo facilitar los distintos pasos, ye facelos posibles, ya que mui al pesar de los montañeros, sedría tan sólo una foz de barranquismu en descensu, imposible dafechu d'ascender, ya que los parés en dellos puntos son nidios y la peña ye resbariosa enforma.
Dicho, esto nun pueu dar munches indicaciones, ye un llugar pa montañeros, sobretou si vas con tantísima agua como garramos nosotros, que da muncha más belleza pero tamién muncha más dificultá, ya que piérdese la cuenta de les vegaes que crucies el rigu, de peña en peña xugándose dalgún fostión, poro digo que ye una actividá pa montañeros y non senderistes, porque cualesquier resbarión ye posibilidá de mancase y sacar a dalguien d'equí con mancaura, nun diba ser fácil pa los rescataores, asina que toca ser consciente de les nueses habilidaes pa metese nesta foz.
Nós, siguimos ablucaos cola belleza del percorríu, siendo de lo más guapo que ficimos nos últimos tiempos y ye que nun tamos falando d'una pequeña foz con cuatru pasos a superar, sinon que vamos tar dientru de la foz, buscando per onde cruciar el rigu, garrando escalones o xubiendo per escaleres, durante una hora aproximáu y casi durante un kilómetru y mediu, lo qu'indica la llargura y el tiempu de diversión que vamos esfrutar.
Sinon tenemos munchu nivel montañeru, quiciás lo meyor ye esperar que tea un pelín más secu el calce, pa, sacante los pasos obligaos con "sofitos artificiales", tener les peñes más seques y xugárnosla menos nos distintos pasos. Según vayamos avanzando, podemos dicir que l'escobiu va abriéndose un pelín pero los nuesos pasos van siguir calce alantre, ya qu'a dicir verdá, nun hai munches opciones d'escapatoria y debemos continuar esfrutando y xugando cola peña y el mugor.
Por indicar un pocu y que nun haya pérdides, siempre tener na tiesta que debemos siguir el calce del rigu y anque veamos dalgún senderu que xuba pel monte, debemos siempre restolar a un llau o al otru los distintos pasos y siempre siguir alantre pela foz, hasta'l so puntu final, que nun podía ser más guapu, terminando con texu enclaváu enmediu'l calce de la riega Meleros y dándonos pasu hacia'l valle más abiertu.
Una vegada que salimos de la foz, hora y media dempués de salir de Geras, aldericamos so lo increyible de la foz y restolamos per onde salir hacia la xerra d'Arniza, anque a dicir verdá vemos como sal una segunda foz más abierta, que podría llevanos hacia la Vegasillada o los puertos de la Cuencha. La verdá ye que quedamos con ganes de más foz, pero teníemos en mente ascender a los picos de la Silla y la Carba, asina que vamos salir per una vallina a la mandrecha, alcontrando pocu rastru de senderu, pero pela que podemos ascender sin demasiaos problemes.
Daremos al colláu pente dos cumales de la xerra d'Arniza y dexámonos cayer un pelín hasta vadiar un afluente del Meleros, pa entamar a ascender per otra amplia vallina y nesta vegada más cómoda que l'anterior, que va dir llevándonos per pindiu tarrén hacia'l picu La Silla. Dicir que ye un tarrén que da munches posibilidaes, tantes que caún fuimos per un llau, hasta aportar a l'arista oriental de la Silla, onde algamamos vistes hacia la foz de los Calderones y los sos montes de la redolada en Piedrasecha, que ye de lo pocu que conozo per esta fastera.
A la fin encumamos los 1850 m de la Silla, ganando vistes al occidente, col Cuetu Pedrosu enriba del banzáu de Caldas de L.luna y tamién al fondu tol macizu de Penubina, Taremos unos pocos minutos nesta cume y entainamos a baxar ya que tira un airín frescu, asina qu'un tragu d'agua y descendemos al colláu, pa subir un pequeñu entepechu hasta los 1820 m de la Carba.
Nesta cume, acolumbramos el banzáu de Casares, con peñes tan guapes como la Barragana y las Tres Marías enriba y decidimos baxar un pelín pela arista oriental onde abelluganos del vientu y xintar dalgo que ya diba siendo hora. Ye la una y media la tarde y ya tamos en descensu, lo qu'indica una vegada más los ritmos que tamos teniendo nestos tiempos, pero éntranos la idega de tomar el vermú en Geras y non lo duldamos, en siguir apriesa abaxo hacia'l fayéu de la Boyariza.
El descensu pesie a lo pindio, faise bien per una vallina, hasta dar al mayáu previu al fayéu, el cual travesamos nun par d'envueltes, primeru a la manzorga y nun colláin a la mandrecha, alcontrando un guapu camín con dalgun pasu armáu, que fainos esfrutar munchu de los collores del fayéu, que casi fáesenos curtiu la verdá, ya que salimos aína a Collarriondo, onde ya empobinaríamonos hacia la foz de Palanco.
Una vegada que tamos en Collarriondo, vamos descender hacia'l valle de Palanco allugáu pente la xerra la Peña la Cueva y el cresteríu del Cellerón que tenemos a la nuesa mandrecha. Baxaremos pelos praos hasta aportar a la riega Palanco, onde saludamos a unos senderistes, viendo tamién una guapa posibilidá, como sedría'l descensu de la parte alta de la riega Foceseñal pente'l fayéu la Boyariza y ye que nun veo más que posibilidaes d'ampliar la ruta que tamos faciendo, paecíendome que quédase un pelín coxa, ante tantes coses que conocer.
Pero bono, ye lo qu'hai, preparamos esta ruta y ensin danos cuenta ya tamos nel ampliu camín que va percorrer tola foz de Palanco, mui del estilu de la Boyeriza, con camín carreteru y con tramos perguapos, sobretou na parte más estrecha, onde tenemos a la mandrecha increyibles aguyes de l'arista del Cellerón y a la manzorga parés de la escuela d'escalada de la riega Palanco.
Con pocu más, siguimos camín alantre, camentando lo que pudimos esfrutar d'esta ruta qu'ensin sabelo, ta convirtiéndose nuna mañanera, saliendo pela foz de Palanco, colos caberos vistazos a la escuela d'escalada y como non, a los cartelos indicadores finales y ya empobinámonos pel tramu final de la foz, pa salir a los praos, nos que podemos echar un vistazu atrás hacia'l Palanco y tol crestón de la Peña La Cueva.
Ensin más, siguimos per camín hasta les primeres cases de Geras y ya baxaremos pegaos a la carretera hasta aportar a la puente sol ríu Casares, onde atopamos un ambientazu de vermú, que fainos entainar a cambianos de ropa y garrar una mesa enantes de quedanos sin poder tomar algo y picar una tablina d'embutíos.
En resume, rutón superdivertíu, que percorre tres foces, como son la Boyariza y Meleros, que ye impresionante n'ascensu y la de Palanco en descensu, con un par de cumales pa completar, nun total de pocu más de 11 km, anque son munches les posibilidaes p'ampliar, superando un desnivel acumuláu de +/- 800 m nun total de menos de 5 hores nel nuesu casu.
No hay comentarios:
Publicar un comentario