miércoles, 15 de abril de 2009

Les Campes de Tolivia (Llaviana) - Peña Mea

27 de Setiembre de 2008 

Track: Les campes de Tolivia - Peña Mea

Vamos p'alante con otra ruta del añu pasáu que voi comentando equí, y que por ciertu ye una de les rutes más guapes que se pue facer. Tien desnivel abondo, pero la rellación tiempu-esfuerzu ye mui bona, ya que con dalgo d'esfuerzu y de bon fondu físicu en 4 hores ta más que fecha. 

Amás si sumamos que ye una ruta circular, apórtase inda si cabe, un granu más d'ánimu a facela, ya que les dos vertientes d'esti picu son bien guapes y distintes a la mesma vegada. Per onde xubimos, la collada de Pel.luno ye pal entamu bien soleyera tando'l día bono, y la baxada facémosla per la collada de Doñango, qu'hasta qu'arribamos nella, ye una zona más tapecía al sol y fresca. 


 
Campa de Pel.luno

Entamamos en Les Campes de Tolivia, llegándose dende esti pueblu (el de los grandísimos Berrones) tomando la carretera de Fresnéu, y dempués d'un ratín xubiendo ya veremos la Ermita de Les Campes (781 m), a lo que ya podemos aparcar el coche y preparanos a caleyar, siguiendo la mesma direición de la carretera hasta que llega'l cruce onde tomar ún u otru camín. 

Nós como ya dixe, tiramos en direición a la campa o collada de Pel.luno, too ello, caleyando por camín bien visible que pasa pente una paré llamada Les Crepes y les cabañes del Bayu, pa pocu dempués llegar a un ziszas del camín nel Llanu Pachón (casa bien guapa como referencia), que nos dexará casi na Campa Pel.luno.

Canal de Cueves y a la so fin, l'ablucante Arcón de Peña Mea
 
Una vegada asitiaos n'esta guapa collada, con vistes bien guapes de los valles, ellí garramos un senderu a la manzorga que nos llevará paralelos a les parés del monte y a les cabañes de Cerréu, hasta unes canales, que nos empobinarán hacia'l L'Arcón de Peña Mea, ún de los llugares más impresionantes d'Asturies ya que tamos falando d'un furacu na roca d'unos 12 metros d'altor y d'unos 15 ms de diámetro de copa. 
 
 
Echando una trepada pa xubir al centru del Arcón

Equí hai dos posibilidaes: xubir pola Canalón del Arcón o pola Canal de Cueves un pelín más al fondu del camín. Lo normal, ye xubir pola del Arcón, pero nós por equivocación xubimos pola siguiente, que ta un pelín menos marcada, y personalmente encamiento a xubir pola de Cueves ya qu'anque seya un pelín más dura, la recompensa del final ye muncho más grande, al tar la canal encerrada ente parés y solo cuando llégase a la fin vese de sopetu l'arcón, lo cual impresiona sobromanera.

 
Xubiendo con bon desnivel hacia la cume
 
Rialmente solu por agüeyar esti peazu furacu, ya merez la pena facer esta ruta, pero bono, hai que siguir alantre dempués de munches semeyes y lo que toca como en tola ruta ye siguir xubiendo metros d'altor, ya que l'arcón ta a unos 1327 ms, polo que ascendemos poquín a pocu por un senderu bien marcáu, acolumbrando al fin, tol valle del Nalón.  

Na cima de Peña Mea tol grupu
 
Ensín más, con dalguna qu'otra trepaduca y abondo desnivel y cansanciu ya nes pates llegamos a la cume de Peña Mea de 1557 ms, y que mos ufrez unes vistes de fasteres d'Asturies bien dixebraes, como son los cordales de Peña Mayor, El Sueve, montes de Ponga y Amieva, Picos d'Europa, el Cuera, montes de Somiedu, así como Peña Ubiña en L.lena ... debíu a lo central d'esta peñona.
 
Collada de los Palombos (1320 m) y baxada hacia la Canga'l Mayaón
 
La baxada, como bien diximos enantes, vamos facela pela otra cara de la peña, pa dar finalmente na Collada de Doñango. Poro, dempués de xintar nun día bien soleyeru pocu más abaxo de la cume en Trozos de Mea, entamamos a baxar en direición a la collada de los Palombos, bordiando pola so mandrecha'l Picu Bollica (1462 m), pa dar en dicha collada onde hai una cabaña bien guapa y bon sitiu, pa parar un ratín enantes de siguir.
 
 
Collada de Doñango y Picu Prau Bra (1176 m) colo que paecen 4 implacables xueces dende la Canga'l Mayaón
 
Agora siguimos descendiendo per una zona bien distinta de la que xubimos, con bona vexetación, muncha sombra y humedá, y con dellos resbalones en consecuencia dello, hasta la siguiente parada na Canga'l Mayaón. Dende equí acolumbramos ya la Collada de Doñango na que tenemos una bona fonte pa echar un triagu y llegar al coche pa cambianos y atalantar reposádamente, lo que pue ser una de les rutes más prestoses de facer n'Asturies.  

10 comentarios:

  1. Ta muy guapu esti sitiu, na mas una cosa y sin ánimo de faltar: ye que ta perespadío el nome de "ojo de buey de Peña Mea" y n' algunos casos como ye el vuestru deciis el "güeyu de güe". Nun creo que los de Pel.luno y tola redolada vieren munchos ventanos de barcu pa da-y esi nome a esi llugar. Por eso los d' ellí concen esi llugar como L'Arcón. Lo de "ojo de buey" dicen que fue cosa de los montañeros que pasaron munchu tiempu depués de que el sitiu ya tuviera un nome y abondo mas afayadizu.
    Un saludu. Marisa.

    ResponderEliminar
  2. Munches gracies Marisa, tengo agüeyáu lo de L'arcón. Camúdolo agora mesmu, nun se pue pecar d'hiperasturianismu, jaja.

    En fin, lo dicho un saludu y gracies.

    ResponderEliminar
  3. Yo, anque nun soi d'esi conceyu, siempre escuché El Furacón de Peña Mea. Nun sé si sedrá esi'l nome llariegu o'l de L'Arcón, pero coincido con que "Ojo de Buey" ye un neoloxismu de va poco y que, como too nesta vida, l'españolismu garra como topónimu orixinal.
    Perguapu'l site, ha siguir.

    ResponderEliminar
  4. Por ciertu, yo fui una vegada per Pel.luno y taba restolando l'otru camín pela fastera'l Nalón pa comparar l'ascensión.
    Gracies pola info, Bertu.

    ResponderEliminar
  5. Soi'l d'enantes otra vegada...
    Mirando la toponimia de la rodiada ye verdá qu'hai dos nomes que son L'Arcón y Mayá L'Arcu colo que ta más que claro que'l nome ye L'Arcón.

    ResponderEliminar
  6. Gracies polos comentarios. La verdá que faise una xera abegosa l'intentu de poner la toponimia como tien de ser. En toles entraes pégome con mapes de toa triba hasta que quedo contentín col nome de los llugares, tanto pueblos, como riegues, montes,... Poro, cuando dalguien manda un mesaxe corrixiéndome agradézcolo fonderamente.

    Gracies pol ánimu y los comentarios

    ResponderEliminar
  7. Pues sí, ye una xera perabegosa. Tola toponimia mayor ta camudada y parte de la menor tamién, anque ye la que meyor se caltién.
    Yo caleyo tamién tolo que pueo pel monte y pásame lo mesmo. Los mapes traen los nomes como-yos da la gana y garren siempre los foriatismos españoliegos como los orixinales. Y esos siempre paecen ser llueu los correutos en vez de los nuesos. Un pu*tu desastre.
    Dalgo que t'animo de verdá ye que, cuando teas unes cuantes rutes -y yá tienes delles-, des el pasu a la publicación. Home, ye un pasu de munchu trabayu pero yá tienes el guañu col que siguir, non col qu'entamar cuidao que yá tienes una parte fecha, sinon col que continuar.
    Tienes les idees clares de que te gusta'l monte y, sobremanera, tienes ganes de cuntalo y n'asturianu. Qué más quies? Tienes tolos ingredientes pa facelo.
    Tienes yá varies rutes y les fotos pues nun tán nada mal. Faltaría qu'imprimas la to personalidá nel llibru nel formatu, les esplicaciones, los conteníos, les rutes per toa Asturies, etc. como a ti te presta.
    De verdá, anímote fonderamente a que pases del blog y lo fagas en papel. Nun quiero dicir con ello qu'escaezas el blog, sírvete como ferramienta cola qu'esperimentar los testos y les descripciones, pero cuando vayas teniendo les rutes afitaes has dir a una editorial.
    Animu Berto Xuan, faen falta llibros n'asturianu pa dir de monte y tu pues danos ún d'ellos.
    Atentamente, Bertu.

    ResponderEliminar
  8. Munches gracies collaciu.

    Esa idega rondábame la tiesta cuando entamé con esto del blog, ya que tola información aparte de nel blog, voi guardándola curiosina pa un posible llibru nel futuru.

    Vémonos pelos montes Bertu.

    Un saludu

    ResponderEliminar
  9. Ye una idea perbona, ánimu.
    Si quies y te peta, yo pueo chate un gabitu no que te paeza porque teo esperiencia nello.
    Otru saludu, Bertu.

    ResponderEliminar
  10. Escaecióseme enantes. El mio correu por si quies contautar ye: bordialesg@yahoo.es

    ResponderEliminar