lunes, 20 de abril de 2009

El Mazucu (Llanes) - Peña Blanca

19 d'Abril de 2009

Track: El Mazucu (Llanes) - Peña Blanca

Siempre hai una hestoria de la que deprender dalgo nos díes que tenemos la posibilidá de vivir y como non esti domingu foi otru día. Simplemente quiero dexar esto como una caxigalina, pa saber un pelín más de la nuesa hestoria, ya que d'un simple comentariu d'una señorina de la que tábemos camudándonos la ropa embarrada de dir de monte, tuvi la posibilidá d'interesame por esta batalla, qu'acaeció nel pueblu llaniscu d'El Mazucu: Batalla d'El Mazucu

Ehí vos lo dexo, porque tien abondo interés y quiciás n'esta dómina na que vivimos, sabemos mui puquiñín de lo que nuesos güelos tuvieron que padecer. Nesti casu, ye la batalla de 5000 asturianos contra 33000 facistes na redolada d'El Mazucu y los sos montes. Inda güei siguimos lluchando escontra'l facismu, como en Cangues d'Onís nel 2005, cola pitición de 35 años de prisión pa 14 mozos por protestar nuna concentración facista col beneplácitu de la delegación de gobiernu.


Pueblu d'El Mazucu

En fin, ya sea en Setiembre de 1937 o el 20 d'Abril del 2009, siguimos y siguiremos lluchando escontra'l facismu y poles llibertaes. Dende equí, l'alcordanza pa los combatientes asturianos que morrieron polos montes nos que tuve caleyando y como non, otru saludu y la norabona pa los 14 de Cangues qu'a la fin, a día de güei, retiróse-yos los cargos de prisión y serán multaos con delles perres por simplemente espresar lo que toos pensamos: PUXA ASTURIES LLIBRE DE FACISMU.

Bono, darréu diré a comentar esta ruta de montaña, tan prestosa, sinon fuera pola zuna que nos tien el cordal del Cuera, que siempre ufreznos una "hermosa" ñebla nes sos cumes, la cual atapeznos les vistes costeres de Llanes y los Picos d'Europa. En fin, ye lo qu'hai nos cordales costeros.


Valle d'El Mazucu y Peña Blanca enriba delli

Entamamos nel pueblu d'El Mazucu, aparcando cerca d'una pequeña capilla qu'hai averada a la cimera carretera, pero ya entrando hacia'l pueblu. D'ellí atravesamos el pueblu xubiendo a la so parte d'enriba para tornar a baxar hacia una zona de praos de pación nomada La Bobia. Siempre iremos por una pista bien marcada hasta qu'esta acábase pa entamar a xubir pel monte ente cotoyes hasta llegar a lo que nómase El Prau, onde dexaremos una cabaña con muria, a la nuesa manzorga, pa siguir xubiendo y pasar ente dos zarros de finques nomaes Las Llastrias nel Picu Sen del Calvo.


Xubiendo al Prau y dende enriba de Las Llastrias: La Bobia y el Mazucu

Equí depués de garrar resuellu ya que xubimos de 340 m d'altor nel pueblu a unos 560 m nun cachín piquiñín, vamos desvianos un pelín a la nuesa mandrecha hacia'l Jou Sabieyu col envís de nun superar tanta dificultá de desnivel. Magar que dexamos esti jou a la nuesa manzorga y les cabañes de La Grandiella a la mandrecha, siguimos xubiendo hacia'l siguiente descansu que sería nes cabañes del Reburdiayu. Pa ello siguimos caleyando ente praos y muries dexando'l Picu Cotayu (756 m) a la drecha, y faciendo bono l'esfuerzu vamos garrando altor hasta los 860 m del Reburdiayu.


Nes Cabañes del Reburdiayu y ya entainando hacia Peña Blanca

A partir d'equí ya quédanos l'esfuerzu final, pero como suel pasar nestos casos, nun hai un camín nidiu, ye dicir, xubas per onde xubas, da la impresión de qu'hai un sitiu más fácil per onde xubir, poro si tuviera qu'aconseyar, pues diría, que s'intente xubir ente'l pequeñu valle que fai Peña Blanca y una paré paralela a esta e intermedia de la Cabeza Bubena y el Picu Tiedu, los cuales queríemos facer pero la ñublina, nun mos dexó, ya que por momentos poníase zarrada, y preferimos dexalu pa otra vegada.


Llanes dende les crestes de Peña Blanca

Aún así, nós preferimos xubir pela parte más cercana a la costa, crestiando averaos a la paré norte de Peña Blanca (1176 m), acolumbrando siempre tola costa llanisca y el Pueblu de Llanes, demientres que nos daba un descansín la ñebla pa poder ver dalgo. Inclusu, nun istante de bona suerti, fuimos a columbrar el Picu Urriellu pente les ñubes, pero nun mos dio tiempu nin a sacar la cámara pa facer la semeya.


Nun había quien s'asitiase pa sacar la semeya... agora sí, nueu discu de los raperos montañeros

Déxovos como siempre'l track cola suxerencia de que si'l tiempu lo permite, depués de xintar en Peña Blanca, facer otra tiradina hasta la Cabeza Bubena con cruz y el Picu Tiedu, que tien vértice xeodésicu, y dempués de facer cume, baxar hasta el Reburdiayu, pa siguir hasta El Mazucu, y completar un pelín más esta guapa ruta.


Polos combatientes del 37 y los 14 de Cangues


P'abaxo que nos come la ñebla

7 comentarios:

  1. Muy bueno el comentario de la batalla.

    ResponderEliminar
  2. La próxima en el Cuera tendremos que tener un buen día, que va siendo hora.
    Peña Ubeña desde Cabrales pal inverno que viene.

    La nota de la batalla muy acertada.

    Raperos montañeros???? jejejjejeje jodidos de frio eso sí que describiría la imagen.

    ResponderEliminar
  3. Esos lugares tan sagrados tendrían que estar señalizados para que cuando pasemos por ahí lo hiciéramos con más respeto.La zona esa me queda cerca de mi casa, habrá que visitarla.
    Por otra parte quisiera pedirte un favor Berto,me gustaría subir al Tiatordos y disponer de esos comentarios a que acostumbras sería una gran ayuda para subirlo.
    Un abrazo y a seguir caminando. Ikusi arte.

    ResponderEliminar
  4. Jejeje, lo de raperos, es por la pose, que paez de discu, y colos gorros, pues que quies. Pero si friu abondo.

    Lo de la Cabeza Bubena pa la prósima dende Cabrales, toi d'alcuerdu, y tuve enterándome aparte del nome correutu que ye Bubena, que'l d'al llau ye'l picu Tiedu, ye que nun te creas que vienen demasiáu completos los mapas, en fin, ye lo qu'hai

    ResponderEliminar
  5. Nun t'esmolezas Jose, que pa Mayu en cuanto que baxe la ñeve, xubimos al Tiatordos. Tamos esperando al momentu adecuáu, pero de toes, toes en Mayu tenemos planeáu xubir.

    Un saludu

    ResponderEliminar
  6. buena idea la de comentar la batalla acontecida, ye parte de la historia. pero buenísimo lo de losRaperos montañeros, que grande, je,je,je,je,je.

    ResponderEliminar
  7. El tiatordos cae en mayo.
    Hay q dir pensando en les siguientes.
    D´esti añu quedennos Ordiales-Cotalba (pa mayu-xunu, cuando baxe la ñeve,
    Peña Main , que tien q facer to cristo que ye sencillina.
    .....
    Y nun queden más de esta vegada. Que facer peña mayor y xintar en la campa gües pal añu q vien q tien poca altitud y pue facese cuando fae mal tiempu.

    ResponderEliminar