martes, 25 de febrero de 2014

Purón (Llanes) - Cuera Oriental - Villanueva (Ribedeva)

30 d'Avientu de 2013

Track: Purón (Llanes) - Cuera Oriental - Villanueva (Ribedeva)


Como tolos años, nel fin d'añu, Pangua y yo preparamos la mítica xatada navidiega. Esti añu, metiósenos na tiesta conocer la parte oriental de Cuera, y pa ello, preparé una travesía pelín xabaz pente'l pueblu llaniscu de Purón y el de Villanueva en Ribedeva.

Magar, del desayunu a altes hores de la mañana n'Unquera (a Pangua nun se-y ocurrió otru llugar), averámonos pela As-344 travesando Colombres hasta Villanueva, ellí dexaríemos el mió coche, y nel de Pangua, tiramos, nun erru pergrande, As-344 alantre hasta que dexónos mui cerquina de Purón, pero na N-634.


Entamamos en Purón a 36 ms d'altor

Asína que, dexáivos d'hestories y nun perdáis tiempu como nós. Lo meyor, garrar la N-634 hasta la salida a Purón, mui cerquino del desvíu al ídolu del Peñatu. D'esta miente, aportamos a Purón pela Ll-5, magar de dalgo menos de 5 kms.

El pueblu tien dos barrios, El Candal, onde dexamos el coche enfrente d'una casona ablucante y La Zorera, a la qu'aportamos per carretera, y enantes de la ponte la riega Barbalín, salimos per una pista n'ascensu hacia Cuera.

Averámonos pali pali al entamu del Cuera calizu

Xubiremos per pista formigonada, n'envueltes, topándonos con delles cabañes nel nuesu camín, como'l Cobaxín o la Llosuca, pero taremos siempre cola vista puesta, na muria, que zarra'l ríu Tornu. Esti ríu que vien de la Llosa Viangu, súmese dientru d'esi guapu valle y dependiendo la dómina l'añu, apaez casi aportando a Purón.

Siguiremos ascendiendo dexando a la nuesa manzorga, la Peña H.ortigosu,  hasta facer una amplia envuelta, nos praos del Cuetu L'Agua, onde al traviés de delles llamargues, averámonos hasta una cabaña, onde entama'l nuesu infiernu hacia'l Picu Lliñu.

Entramos na pior parte de la ruta... Cuera xabaz dafechu

Detrás de la cabaña, metémonos nuna vallina a la mandrecha de la Peña Texera, y siguiremos un senderín más menos curiosu, hasta la fastera los Castros. Equí la vallina, tórnase más xabaz, y paez querer llevanos hacia'l collaín d'Entrecuetos.

Sinceramente, anque llevemos un track d'un valiente supongo conocedor d'estos requexos, ye perdifícil siguilu nun llugar tan complexu. Averámonos a esi collaín, ya intentamos tornar hacia la vallina, pente mediu de fayes enriscaes y cuchielles de caliza.

Vamos saliendo del marrón y avanzando más cenciello

Ensín querer, siguiendo lo qu'albidramos restos de yerba pisao, metémonos nun marrón de tres pares. Tamos arrodiaos de torques, grietes y h.oos profundísimos, onde tan sólo la yerba alto y delles fayes son capaces d'enraigase.

Toi pelín esmolecíu pola perrina, ya que nun ye un llugar bono nin pa ella, nin pa nós. Mirando pal track, sabemos que fizo una envuelta pela vallina más llarga que la nuesa y que torna a la manzorga unos 50 ms d'altor penriba nuesa.

Salimos a la fín a la parte cimera cola fonte y cueves de Lliñu

Dedicimos probar suerte, y tiramos lo más de frente que podemos, garrando en dalgunos pasos a Kíla, al llombu, colos lloros de la probe perra. Trepamos, pente cuchielles de caliza, llibrando les torques y grietes, saliendo a la fín, d'esti llugar nomáu La Cueva... que nun quiero saber onde tien la entrada, pero que de xuru que tolos peligros que llibramos diben a ella.

Llueu, paez que'l tarrén asela, y topámonos con un Cuera, más amable y más conocíu pa nós con munches siendes de cabres, onde paez qu'al menes hai vida andante, anque seya con chiba y cuatru pates.


Vistes tapecíes como yera d'esperar, malpenes Torbina, los Urrieles y Ándara

Nun alcordábemos, tar nun llugar tan malu d'andar, dende la otra ruta pol Cuera, na fastera la H.aba y los Cuervos. Escaeceremos esto, y col tiempu pegáu nel culu, xubimos a fueu pela fonte Lliñu, plantándonos nel cumal del Picu Lliñu en 3 hores.

Hai que dicir que durante, les nueses pescancies sol camín correutu, teníemos una llende horaria pa siguir alantre o non, y yeren eses tres hores, porque tan sólo algamamos, un ascensu direutu d'unos pocos metros sol nivel del mar a los 1171 ms del Lliñu... darréu, venía tola travesía del Cuera Oriental.

Cumal del Lliñu (1171 m)

Son les 12 la mañana y tenemos una auténtica burrada per delantre. Echamos un güeyu a tola rodiada, y camentamos que ye l'únicu llugar d'Asturies onde podemos facer monte, ensín tar moyándonos, al menos nel intre.

Pero ya vien la ñube pal occidente, poro salimos como tiros baxando del Lliñu, hasta garrar un senderu que faldea pel norte nel Reondo Morea. A bon ritmu, siguimos baxando altor, hasta bordiar la Pica Moveda pela manzorga, parando a beber agua Kíla, qu'andaba pelín seca.

Escaecemos el Lliñu y siguimos Cuera alantre per bonos senderos

Pel momentu, avanzamos a bon ritmu, y Cuera paez ser hasta amable con nós. Los senderos esisten, y tan nunes condiciones estupendes pa casi correr pel monte. Pero ceo, camudaremos d'opinión, ya que los h.oos y el tarrén calizu de Cuera, siempre acaba por enguedeyar l'avance.

Ésto, pasarános nel averamientu al Picu La Corona, el cúal, pidirános bordiar pela mandrecha, y nesta fastera sur, perderemos tiempu, escoyendo los pasos. Una vegada que salimos del bordéu, metémonos una vallina pente la Corona y el Cantu'l H.ortigosu, viendo a la fín, el nuesu siguiente oxetivu: el Picu Paisanu.

Bordiamos el Picu La Corona empobinándonos a los cumales del Paisanu

Tamos nel Valle Altu de Peñamellera, poro sabemos que les sos cotes más altes tan pal Sur. Con ello, na tiesta, en tola travesía oriental de Cuera, nun quisimos facer más cumes de les necesaries, pero'l Picu Paisanu, ye un monte nomáu d'esti conceyu y bien pagaba la visita.

Pa ello, siguimos al mayor pasu que podemos, contando que'l tarrén ye un xube baxa desesperante, y magar de conocer la llaguna y braña de Cuerres, entamamos l'ascensión al segundu de los tres cumales del Paisanu.

Pasamos pela braña Cuerres p'ascender al Paisanu (820 m)

El primeru, desdexámoslo, por nun ser nin el más altu, nin el que tien la capiella nel so cumal, poro, xubimos hasta los 820 ms del central y baxamos al colláu pa xubir hasta la capiella de San Antonio, onde tendremos abellugu, pa xintar que son les 3 y cuartu de la tarde.

Llevamos 6 hores de ruta y quédanos munchísimu Cuera per delantre y poques hores de lluz. D'otra miente, o paramos a descansar y xintar daqué o vamos pasalo realmente mal físicamente. Lo que mos faltaba, sedría entamar con calambres y demás molesties musculares.

Paramos ensin remediu a descansar na Capiella San Antonio

Kíla, tamién ta cansadina y nun se separa de mí, pa garrar dalgo fuercies na xinta. Compartimos dos bocatas, barrines enerxétiques y bebemos agua pa un cuartu d'hora dempués, cola lluvia enriba nós, tornar a l'actividá, que va ser más dura y llarga de lo camentáu.

Nel picu Paisanu, camudamos de conceyu, pasando al valle bah.u de Peñamellera, travesando na baxada delles brañes como La Pipa, el h.oyu'l Teh.u y Estenes, viendo a la lloñe, quiciás, un siguiente oxetivu non planiáu... el Picu Llueres coles sos antenes.

Baxamos a la braña la Pipa, cola lluvia amenazante

Vamos col pilotu automáticu puestu, poro les paraes son les xustes, casi pa sacar una semeya y garrar aliendu. Anque, con asombru miramos atrás intentando acolumbrar d'onde venimos y.... vemos mui lloñe'l Lliñu... ablucántemente lloñe.

Vaya soba pensamos... en fín, tamos en mediu Cuera, nun queda otra que siguir hasta Villanueva. El día va terminándose y la lluz quier escasiar, pero tiramos con xeitu a pol Llueres, magar d'echar unes semeyes a les antigues mines del Pilar, na fondonada anterior.

Pasamos peles mines d'El Pilar hacia'l Picu Llueres (704 m)

Alcanzamos los 704 m del picu Llueres, y damos vista cercana a Alevia y Panes al sur. Más al oriente, vemos lo que sería'l nuesu caberu finxu, la Peña Xana, y albidramos que sería factible, anque enantes queremos saber si la baxada hacia Villanueva sería cenciella de nueche.

La baxada del Llueres a los Praos del Mediu, faese más abegosa y pindia de lo deseáu, pero salimos a la pista pa llueu salinos d'ella, corriendo hacia un cordalín allargáu, pel que pasamos esnalando por cotes como la Pesa y la Pica.

Corremos hacia'l nuesu últimu destín... la Peña la Xana

Como nun sabemos si tamos en Ribadeva o non, cotamos los cumales, nun vaya ser que tachemos daqué. Llueu a posteriori, miraré y daréme cuenta que la llende va pela faldera... manda coyones, colos que ficieron les divisiones de conceyos.

Vamos reventadísimos, llevamos más 8 hores y cuartu, cuando pasamos corriendo pel Farmal d'Abaxu, pero cola nueche casi presente, l'adrenalina de finar lo planeáu xube y tiramos les mochiles nel colláu echando a correr los tres al cumal de la Xana (595 m).

Ascendemos a la Xana (595 m) nel atapecer

Agora sí, acabamos la travesía. Vemos les lluces de Noriega y Villanueva al norte, y tovía somos a pescanciar les pistes que tienen que llevanos hacia los pueblos. Baxaremos hasta les mochiles y bordiaremos el Picu'l Rei, pela manzorga, pa garrar una vallina per onde cuerre un regueru hacia'l Coteru Poveriza.

Kíla siente que nun ye mui normal lo de güei, y nun se separa nin media de nós. Va caminando enmediu de Pangua y mía, raru nella, pero va tan cansada como nosotros y cuando sacamos los frontales, ya nin siquiera los ruios de la nueche, faen que s'interese por ellos.

Baxamos al pueblu de Villanueva cola nueche ciega

En las Llanas, garraremos la pista, que tien de baxanos pela Cuesta Piñera. Anque nun les veamos casi, pasamos al llau de cabañes y de dalguna vaca que nun entiende mui bien que facemos ellí. Ensín más, toparémonos cola primer lluz de la casa La Corea y saldremos a la carretera na Teyera, travesando'l barriu d'El Barrial y garrando'l coche na Bolera, nel pueblu de Villanueva.

Finalmente, tamos nel coche a les 7 menos diez de la tarde, caleyando casi una hora de nueche. Ta claro, que pa una ruta de 9 hores y 40 minutos, la hora que perdimos cola lloxística de coches, echámosla en falta al final.

Aún así, quedamos mui agustu, colos 28 kms de percorríu y 2100 ms de desnivel positivu acumuláu, dignu d'una ruta per Picos. Que nos llegase la nueche y sacásemos los frontales, namái fué un pelín más d'aventura pa un cordal tan xabaz como ye Cuera.

Cansadísimos los 3 (Pangua, Kíla y Berto), recoyimos el coche en Purón y dexamos a Kíla durmiendo, pa poder hidratanos con una cerveza y espabilar con un café pa conducir hasta casa.... la xatada navidiega taba finada.

Camudando'l Camín col clásicu birra-café (hidratante y despertante)

2 comentarios:

  1. Vaya xatada. La subida por esa vertiente tenía pensao hacela, pero ya oí que era muy mala, y vosotros me lo confirmais. Esa caliza ye muy traicionera. No obstante el resto del recorrido guapisimo. Eso si.... xatada total.

    ResponderEliminar
    Respuestas
    1. Con un bon día, y más hores de lluz, el percorríu ye una pasada, pero como ves 3 hores dende Purón al Lliñu, ya dicen que ye un sitiu más bien complicáu d'andar.... llueu tola travesía, déxase facer perbien.

      Un abrazu

      Eliminar