miércoles, 12 de febrero de 2014

El Portalgo (Uviéu)

23 d'Avientu de 2013

Como ya dixe, la falta de motivación nesta dómina del añu, llevónos inclusu a preferir dar un paséu a la gueta d'antigues zones d'esguilada, qu'a siguir apretando en proyeutos del branu. Poro, Vicen, Celso y yo, magar de que colasen Diego y Pilar y que xintásemos daqué, baxamos hasta'l cercanu pueblu d'El Portalgo dende Manzanea.

Hasta que llegues a les cueves, nun yes a saber que tan ellí

Na mesma curva n'El Portalgo, sal un camín hacia la vía'l tren, la cual debemos cruciar y siguir un camín durante un bon ratu pela mandrecha, hasta que fina nuna finca. Ehí, travesaremos otra vegada la vía'l tren y caleyaremos un ratín pela manzorga, teniendo que metenos inclusu pela vía un tramu curtiu nuna ponte.

Delles formaciones y gateres nes Cueves del Portalgu

Pocu enantes d'un túnel, sal una sienda abondu zarrada, que baxa hacia'l ríu Nalón. Cuando baxamos nós, taba fatal, pero llueu de tar embaxo, ya vese que'l senderu ye usáu polos pescadores y ta en bon estáu, aportando a les escondides cueves.

Víes mui desplomaes y equipación ferruñenta na so mayoría

Ye un sitiu cuanto menos curiosu, prestando muncho, ver onde metíase la xente a trepar va unos añinos. Toles víes son desplomaes, y polo que pude mirar a simple vista, poques delles deben tar practicables debíu a l'equipamientu ferruñentu, anque albidrábase un par qu'entá pudieren ser esguilables.

Vicen, Celso, Kíla y yo pasando la tarde

Ye perinteresante, topanos con cantos tallaos, preses de rocódromu pa poder salir de la cueva, hacia les chorreres... too ello mui artificial, pero dando sensación de tener que tar mui fuerte, pa siquiera pegase con dalguna d'estes víes.

La escuela de Navalones enfrente

Supongo que tornaré per equí en branu, cuando tea too más sequino y nun se pare en dengún llau de calor pa prebar les que teníen pinta de tar en condiciones y axústense al mió grau. Como curiosidá, xustu enfrente, tenemos l'ablucante paré de la escuela de Navalones, la cual tien pinta de ser del mesmu xeitu d'esguilada qu'estes Cueves del Portalgo.

6 comentarios:

  1. Vaya sitiu más prestosu pa dir a echar un ratín y tirar delles semeyes. Nun lu conocía y mira que al otru llau del riu si que tuve, que per ehí pasa la sienda a Olloniegu. Gracies por enseñalu.
    Un saludu

    ResponderEliminar
    Respuestas
    1. Ya ves... hai llugares, que nun se creen que puean tar ehí. Tengo pendiente una revisión más montañera d'esa fastera y acabar xubiendo al vértice d'Arnea. Va ser un paseín bien curiosu pa una mañana.

      Un saludu

      Eliminar
    2. Ayeri arrimé po la tarde a echar un güeyu al situ. Guapu, guapu, pero ta malu de llegar. Diba haber llevao a la fía y menos mal que a la fin fiu solu. Agora, el sitiu ye una pasada.
      Un saludu

      Eliminar
    3. La verdá que cuando fuí taba bien gochu y zarrao pa baxar... llueu la sienda a la vera'l ríu taba meyor.

      Sorprende un montón, onde metióse la xente a equipar pa esguilar.

      Un abrazu

      Eliminar
  2. Que sitio tan curioso......ahora entraronme ganes de conocelo

    ResponderEliminar
    Respuestas
    1. Pues sí... ya pues dici-y a Jose que tire d'estribos y caña jajaja y p'arriba

      Eliminar