lunes, 3 de febrero de 2014

Altu San L.lorienzu (Teberga) - Pena Michu - Pena Prieta


8 d'Avientu de 2013

Track: Altu San L.lorienzu (Teberga) - Pena Michu - Pena Prieta


Cuantayá que nun taba nel Altu San L.lorienzu, y daquella fuera en bici con Jose y César, poro munches yeren les ganes de conocer en condiciones esta parte del Camín de la Mesa. Práuticamente, pente la ruta que vos voi cuntar y la nuesa ascensión a los Bígaros, conocí too aquella ruta en bici, na que por culpa la borrina, nun vimos res.

P'aportar al Altu San L.lorienzu, salimos de Xixón pela Y griega, pa enllazar n'Uviéu cola A-63, saliéndonos pal Valle'l Trubia como ye vezu, en munches de les nueses rutes. Travesaremos, los conceyos de Santu Adrianu y Proaza, tomando'l ramal hasta Teberga, entrando por Entragu y parando p'almorzar en Samartín.

Salimos del Altu San L.lorienzu (1353 ms)

Llueu de los cafetinos, siguimos pela Plaza pa garrar la Te-1, que xubirá hasta l'Altu San L.lorienzu, pasando pelos pueblos de La Obra, Quintanal, Vil.lanueva y Braña Tuíza enantes d'aportar al aparcaderu onde mudámonos de ropa, con un día ablucante pa caleyar pela ñeve.

Unos minutinos enantes de les diez, tamos ya saliendo del altu, y nel intre, ya tamos pisando ñeve, pescanciando que ta duro y que los que trayimos crampones y piolé, tenemos bien ganáu'l pesu estra na mochila.

Caleyamos pel camin de la Mesa cola ñeve perdura hacia Piedraxueves

Ta frío, pero ceo entamamos a calecer nes primeres rampes hacia la venta Piedraxueves. Somos munchos y dir falando con unos y otros, fai qu'ensín danos cuenta, plantémonos delantre les cabañes y sobretou delantre del nuesu primer oxetivu, la Pena Michu.

De Piedraxueves ascendemos al colláu L'Estaca

Les vistes del camín de la Mesa hacia'l col.láu del Xuegu la Bola, son una pasada y la ñeve duro, faime camentar delles opciones p'ascender a la Pena Michu. Como nun tenemos tol mundiu crampones, lo meyor será dir al colláu más baxo, pa ganar l'arista y esperar que la ñeve tea en condiciones p'avanzar con seguridá.

El Cornón afaláganos al aportar al colláu L'Estaca (1634 m)

Asína facémoslo, empobinándonos hacia'l col.láu que ta penriba la braña L'Estaca (1634 m), onde algamamos unes guapes vistes de tolos montes de Somiedu, fixándonos como non, nel Cornón, que paez destacar so los demás.

Ablucantes vistes de Somiedu demientres entamamos l'arista de la Pena Michu

Nesti colláu, decidiremos los que tenemos crampones, que lo meyor será usalos, anque nun paezan pernecesarios. Ye tontería, nun garrar esperiencia, tanto en ponelos, como n'andar con ellos y saber movese, pa otres rutes nes que si seyan dafechu obligatorios.

Esfrutamos de la guapa y llarga arista del Michu

Tanto los cramponaos, como los non cramponaos, esfrutamos d'una llarguísima arista, que si nun fuera pola llende allambrada de Somiedu y Teberga, qu'afea un pelín les semeyes, podríamos dicir que tamos en cualesquier gran montaña alpina.

Cumal de la Pena Michu (1770 m)

De toes formes, fué una maraviya, caleyar durante más d'un kilómetru per tol filu de la Pena Michu, aportando al so cumal de 1770 m en menos de dos hores y media dende l'altu San L.lorienzu. Camiento, que si la ñeve tuviese muncho más blandino, sedría una paliza percorrer tola arista, pero nesti estáu, simplemente tuvimos placer y diversión.

Baxamos de la Michu hacia'l col.láu del Xuegu la Bola non ensín dificultaes

Col macizu de Penaubina de fondu, siguimos otru tramín d'arista muncho más ampliu, hasta tar más menos enriba'l col.láu del Xuegu la Bola. Equí en diagonal, vamos baxando, alcontrándonos como yera d'esperar, con un tramu de ñeve perduro, que fízonos curiar fondamente'l descensu, ya qu'un resbarión llevaría a baxar munchos metros más aína de lo naguao, jaja.

Averámonos del Xuegu la Bola al siguiente oxetivu... Pena Prieta

Faciendo la buelga, lo más fonda posible, pasando primeru los que teníemos crampones, baxamos más menos bien, hasta'l Xuegu la Bola, onde al fondu, esperábanos l'ataque al siguiente finxu del día: la Pena Prieta.

Garramos con xeitu la guapa pala de Pena Prieta

Averámonos hacia la braña la Corrá, siguiendo'l camín, pero enantes d'aportar a ella, preferimos garrar un senderu que va pela faldera l'Altu'l Cuernu, y ensín perder desnivel dengunu, aportamos al Cuetu Chubisnera, onde dexamos les mochiles pa intentar xubir a la Pena Prieta.

Poquín a pocu, con una bona pala de ñeve más blandín, magar del sol recibíu, vamos ganando ún tres d'otru, el primer de los cumales de Pena Prieta. Prietu n'asturianu, ye negru del collor del carbón, poro paez raru, qu'en dellos mapes nomen de les dos formes a la pena, lo que paezme llevó nun erru a dixebrar como dos montes distintos.

Ascendemos hasta'l primer cumal de Pena Prieta (1818 m)

Xubimos toos, hasta'l más separtáu de los otros 3 cumales qu'en filera, formen la parte más alta de la Prieta. Llueu, Pau, Dani y yo, fuimos per un guapu canalizu de ñeve, hasta'l primer de los cumales d'enfrente.

Dende él, con diez metros más altu que nel que ficimos semeya de grupu, vemos los otros dos cumales, paeciendo l'últimu pelín más altu, que nel que tamos. La hora, les 3 de la tarde y la dómina del añu na que tamos, aconséyanmos, que si queremos xintar con tranquilidá, lo meyor ye baxar, porque tol restu'l grupu ta dende un ratín nesa xera.

Facemos un pequeñu canalizu p'ascender al segundu cumal de la Prieta (1828 m)

Quedéme coles ganes de dir hasta l'otru, pero nun quise dexar a Pau y Dani, baxando'l canalizu solos, y l'amiestu de peña y plaques de ñeve, pocu segures, tamién ficiéronme torgar les intenciones d'aniciu... ya tendré ocasión de comprobar si ye más altu los otros que nel que ficimos cume.

Baxamos hacia'l Cuetu Chubisnera y d'ehí a la braña La Corrá

Lo malo, del iviernu, ye les hores de lluz que tenemos pa facer les rutes, poro la xinta, tuvo que ser más apriesa de lo normal, y a sabiendes de qu'entá quedábanos tol camín de la Mesa de vuelta al coche, pusímonos en marcha unos minutinos enantes de les 4.

Na Braña La Corrá cola Pena Prieta al fondu

Baxamos dende'l colláu del cuetu Chubisnera, lo más direutu posible al camín, y pa ellos tiramos de culuski, que ye una forma mui afayadiza, pa nun perder tiempu. Nel camín, tocónos ascender hasta la Braña la Corrá, onde con un collor de cielu increyible pudimos sacar delles semeyes, siguiendo darréu ascensu hasta'l Xuegu la Bola.

Apretamos el pasu baxo la solombra de la Pena Michu

Nesti colláu, escaeceremos el calorín del sol, y la Pena Michu, cola so solombra, fadrános sacar tola ropa de la mochila. A bon ritmu, ganaremos la Venta Piedraxueves y col cansaciu de munches hores so la ñeve, entamaremos el descensu final hacia l'altu San L.lorienzu.

Pasamos de nuevu per Piedraxueves, pa baxar finalmente a San L.lorienzu

Pau y yo, quedámonos atrás a poner ropa, y fuimos alcanzando a tol restu'l grupu femenín, colos que fuimos acolumbrando'l camudar de la lluz nel cielu. Pa cuando aportamos al aparcaderu, dafechu yera l'atapecer y el color roxizu del cielu, acompangónos demientres poníamos ropa seco.

Mudámonos de ropa, demientres escápense les últimes lluces del dia

En resume, ruta peragradecida, si les condiciones de ñeve son favoratibles. Sinon, los casi 15 kms, pudieren ser una paliza grande, a nun ser que llevemos marañones pa nun fundir nella. En total, quedaron casi 8 hores de ruta y un desnivel acumuláu de 750 ms y lo más importante, unes vistes y un día de ñeve, perfeutos.

Camudando'l Camín na Pena Prieta

Nesta ruta dimos preste a 2 picos prestosos d'Asturies: Pena Prieta (1828 m) y Pena Michu (1770 m) que tamién ye vértice xeodésicu de Somiedu

Ver progresos en: Retos montañeros

10 comentarios:

  1. Cuando vi'l títulu tamién entamé a pensar per onde taría esa pena Prieta.
    Al siguir lleendo yá me decaté que ye namái una y que ye la que conozo.
    Mui bona descripción y perguapes semeyes.
    Un saludu.

    ResponderEliminar
    Respuestas
    1. Gracies, el día taba pa sacar bones semeyes, y pa pasalo de luxu, pela ñeve.

      Un abrazu

      Eliminar
  2. Hola Berto Xuan:
    Yá que nisti tiimpu vais facer rutes per nieve, quiero recordavos un términu que nun veo nunca per nengún sitiu y ye mui güepu y apropiéu pa el.lo. Ye ábanu, y tien el signifiquéu d'argayu/derrabe de nieve.
    Un sinónimu pue ser trabe, anque esti tien la connotación tamién d'arestes de nieve o muries de nieve.
    Un saludu y p'alantre cola páxina que ye mui guapa.
    Bertu.

    ResponderEliminar
    Respuestas
    1. Los trabes son más muries de ñeve, qu'acaben argayando, pero ábanu nunca lo oyera. Mil gracies por esti términu nuevu, que tan bien afáyase pa la montaña.

      Un abrazu

      Eliminar
  3. Tuvisteis meyor suerte que yo col Michu, que van tres vegaes que arrimo per allí y nun hay forma de esfrutar les vistes. Borrína, ñeve, vientu, ... voy tornar, pero la próxima vegada voy facelu dende Vil.lamor, que dixéronme que yera perguapo tamien. a Pena Negra (Prieta) va cuanta yá que nu voy. Esa, pa otra.
    Un saludu

    ResponderEliminar
    Respuestas
    1. A la Prieta tendré que tornar, pa ver cuala ye la cume más alta, pero sedrá pela foz de la Güérgola. Y lo de les vistes, pensé que yeren los Bígaros, los que llevábense'l vientu ya'l borrín, jaja. Un saludín Javi

      Eliminar
  4. Vaya día perfecto para subir al Michu, menos mal que no fuimos el domingo pasado si no terminamos fundidos tanta distancia con nieva mala.
    Ya te acompañaré e la Prieta, que tiene muy buena pinta.

    Un abrazu.

    ResponderEliminar
    Respuestas
    1. Dende'l valle de Saliencia sal una rutina bien guapa y cortina, pasando por munches brañes somedanes.

      Un abrazu

      Eliminar
  5. Muy guapa Berto, lo conozco bien y se lo duro que resulta con tanta nieve y si no está en condiciones para ello. El problema alguna vez, viene al bajar al Xuegu La bola desde el Michu -si está dura la nieve-
    Por otra parte, sobre Peña Negra/Prieta, la más alta es la que hicisteis, la primera. Y si vuelves a ella, te recomiendo que lo hagas desde Arbellales y por La Güergola.
    Muy buena descripción
    Un saludo

    ResponderEliminar
    Respuestas
    1. Efectivamente, el mayor problema tuvo nesa baxada, lo demás fue pasalo estupéndamente pola arista. Que guapa que ye!!.

      Acabes de dame un allegrón con que ficimos la más alta, la primera de les tres. Aún así, como vi que la Güergola tien mui bona pinta, nel to blogue, de xuru que diré otra vegada hasta la Prieta.

      Un abrazu

      Eliminar