Baños de Benás (Ribagorza) - Ibón d'Alba - Llausía - Paderna - La Renclusa (Ribagorza)

13 de Xunu de 2022

Track: Baños de Benás (Ribagorza) - Ibón d'Alba - Llausía - Paderna - La Renclusa (Ribagorza)

Dempués de la gran ascensión a la Tuca Vallhibierna, el plan d'aniciu yera día de descansu nel viaxe pirenáicu, con xubida namás qu'hasta'l Cubilar de Renclusa, de cara a l'ascensión al día siguiente de la Tuca d'Aneto. Pero como siempre, los planes cámbiense sobro la marcha y sentíame bien como pa intentar otra ascensión en solitariu, ya que los collacios si pensaben en descansar.

Los que me conocen, saben que nel monte nun dexo les coses al debalu y preparo los tracks, con munches alternatives, escapatories y dellos planes por lo que pueda pasar. Esta vegada, nun lo fice así y saqué un track d'interné col envís de facer travesía pente Baños de Benás y la Renclusa, pasando pela   Tuca d'Alba.

D'entamu, por nun facer madrugar de más a los collacios pa que me dexasen en Baños, salimos tarde y llueu d'almorzar nel Camping Aneto, xubimos en furgo a Baños, al llau del malrolleru y desaniciáu edificiu, onde entama la senda que xube hasta los ibones d'Alba, con un cartelu de "solo espertos", que nun ye tan distante de la realidá.

Partimos de Baños de Benás (1680 m)

Digo esto, porque'l senderu hacia los ibones va a la madrecha de la canal del Turonet d'Alba y si andes apijotáu y xubes a fueu como yo, pues metete nel barrancu y enriscate con un mochilón, botes de ñeve colgando y más pesu na mochila de lo que diba prestame.

 

Asina, que yendo sollerte de siguir los finxos y marques, aportaremos al Turonet d'Alba, perguapu mirador de la fastera del Llardana, al que va siendo hora de volver. Dende equí, tendremos un claru camín al traviés del Vall d'Alba, que tien de llevanos al Ibón d'Alba, puntu perguapu de la ruta y primer descansu, onde atopé per última vegada a dalgún ser humanu.

Pindiu camín hacia los ibons d'Alba ampliando vistes hacia la fastera del Llardana

Nel intre, el calor y l'esfuerzu del enrisque nel barrancu, fízome nun sentime mui bien, asina que paré a xintar daqué y mirar el móvil col track y el gps per otru llau, cola idega d'albidrar el percorríu hacia la Tuca d'Alba, viníendome a la tiesta, que lo mesmu yera meyor facer la travesía hasta La Renclusa ensin ascender dengún monte.

 

Nestos camientos andaba, según ascendía penriba del ibón inferior d'Alba y sin dame cuenta, fui perdiendo unes marques azules pa terminar xustu pembaxo de la Coma d'Alba. El track ta modificáu pa facer la travesía pel llugar correutu, pero al "montañeru espertu" tocó-y pegar una navegada, pembaxo de crestes ensin salida evidente, baxo un sol d'un día d'espatarrar y tirando de gps a la gueta d'una escapataria más o menos digna, que nun fuera dar la vuelta.

 

Perguapu pasu pel ibón inferior d'Alba hacia la baxera del la Tuca d'Alba

Dicir que la navegada penriba del ibón d'Alba y pembaxo la Tuca Blanca de Paderna, nun ye mal tarrén, con munchu terracéu pa facer la travesía, pero'l calor y quiciabes nervios, por nun alcontrar fitos y dir en solitariu per tarrén dafechu desconocíu, fízome entrar nun mou de supervivencia estraña, na que sólo bebía agua y caminaba lo más apriesa posible.

 

A la fín, arrodiaba la Tuca Blanca, monte bien guapu, que n'otres condiciones nun dudaría n'ascender, pero la mió tiesta sólo pensaba en empobiname correutamente hacia la Renclusa. D'esti xeitu, ponía vista hacia'l colláu de Llausía (2722 m), onde esperaba alcontrar una baxada y devolar a la fastera contraria.

 

El calor insoportable faime buscar alternatives pel colláu Llausía

 

Por suerte, tenía baxada, pero nun ye pa tolos públicos nin muncho menos, ya que tuve que tirame per una pindia llerona, dexándome esnidiar con munchu control pa dir baxando pali, pali. Una vegada qu'aporté a la baxera del barrancu d'Alba, onde entamé a ver mi ansiada salida, tomé aliendu y traté de xintar daqué, pero taba col estómagu mediu trancáu de los nervios.

Lo dicho, el cuerpu furrula de maneres estrañes y la tiesta pior aún, asina qu'intenté hidratar y continué caleyando ensin media solombra, travesando a mediu altor, hacia'l colláu de Paderna, onde tendría una cenciella ascensión a la Tuca de Paderna, monte dominante so la Renclusa, pero tan sólo quería descender y baxar al refuxu, poro continué descendiendo pel barrancu d'Alba hasta atopar l'Ibón de Renclusa, llugar bien guapu onde parar y relaxame, puesto que veía nel gps que'l refuxu ya taba a tiru piedra.

Baxada bien guapa dende la Paderna hacia'l Ibón de la Renclusa

Pero nin con eses, pasé per ellí, ensin esfrutar de lo guapísima que taba siendo la travesía y siguí descendiendo al fin, por bon senderu hasta que na baxera del ibón agüeyé per primer vegada'l Cubilar de la Renclusa, sentándome baxo un árbol a la solombra dellos minutos ya intentando relaxar la tiesta, que llevaba munches hores dando vueltes.

Casi 6 hores dempués de salir de Baños, taba na Renclusa, con una insolación de llibru, sentándome a la solombra ensin poder facer na, nin casi pensar, demientres los collacios comentábenme que ficiera un día terrible de calor y que tuvieron qu'esperar a última hora pa poder xubir hasta'l refuxu.

Los casi 8 km de percorríu nun amuesen lo que sofrí, quiciás los 1120 de desnivel positivu y 650 de negativu tampoco, pero'l calor, la insolación y la continua toma de decisiones en solitariu nun tarrén dafechu desconocíu pa min, fizo que me plantegase munches coses que daba por sentaes, so les capacidaes montañeres que caún cree tener y la importancia de los compañeros nel camín, pa que la tiesta nun vaya al debalu metiéndote nun bucle negativu, nel que salir alantre ye la única opción, ensin parar a pensar les coses con cierta calma.

Camudando'l Camín nel centru del macizu Maladeta