Vall d'Ordesa (Sobrarbe) - Senda Los Cazadores - Faixa Pelay - Cul de Soaso

16 de Xunu de 2022

Track: Vall d'Ordesa (Sobrarbe) - Senda Los Cazadores - Faixa Pelay - Cul de Soaso

Como ya cuntaremos nel resume del viaxe al Pirinéu, dempués d'algamar l'oxetivu n'ascensión a la Tuca d'Aneto, colábemos hasta'l parque d'Ordesa en Sobrarbe, con munchos frentes abiertos pero mui poques oportunidaes de facer dalguna ascensión curiosa.

Descartáremos, el mesmu día del Aneto, revisando les previsiones, qu'ante asemeyada fola de calor, aventurase a una ascensión potente al Comachibosa, sería dafechu un suicidiu y ya lo pasara yo mui mal, na travesía hasta la Renclusa, como pa volver a metese na boca'l llobu.

Salimos a conocer un pelín el Vall d'Ordesa (1322 m)

El día de descansu, lo pasamos de solombra en solombra y de xarra de birra frío en xarra de birra frío, dándonos bona cuenta de lo que nos esperaba al día siguiente. Aparte, les facilidaes qu'amosáronmos nel Vall de Benás, nun fueron nes mesmes n'Ordesa, nun pudiendo acceder a la piscina del camping si nun yéremos clientes.

Al día siguiente, xubimos a la Pradera d'Ordesa, madrugando muncho, facemos un cafetín, xintamos daqué que teníemos pela furgo y a les 8 tábemos entamando a caleyar col envís de facer una circular qu'al menos diese pa conocer un pelín tola redolada d'Ordesa y Mont Perdito.

Garrando desnivel pela Senda los Cazadores

Garraremos senderu míticu hacia Soaso y bien ceo desviámonos hacia la Senda Los Cazadores, clásica ascensión calificada de peligrosa pa los senderistes, qu'a nós sirviónos pa danos cera y mirar como taben los motores, xubiendo los 600 m de desnivel en menos d'una hora, llevando a Mario como si fuera duchándose jaja y adelantando a tola xente más madrugadora.

 

La verdá ye que yera un camín perfeutu pa dase caña y ver si les males sensaciones de los díes anteriores yeren series, pero vimos que yera una pena la fola de calor, porque tábemos en bona forma. Aportamos al mirador de Calcilarruego, onde tomamos aliendu y charramos un ratín con dellos senderistes, metiéndonos na Faixa Pelay ya sin Carla, que decidiera baxar ya que nun tenía ganes de siguir estos ritmos.

Esfrutamos del preciosu senderu de la Faixa Pelay con vists hacia la Breca Roldán y les Tres Serols

El restu del camín, siguimos a bon ritmu, pero esfrutando munchísimu de les vistes, intentando contá-y a Mario tolo que conocía d'esta fastera del Pirinéu. Señalándo-y onde ta los circos de Carriata, Cotatuero y sobretou encantáu ya ilusionáu de conocer pa otra vegada la Breca de Roldán y poder intentar l'ascensión a les Tres Serols (Celindro, Mont Perdito y Añisclo).

Vistes de Soaso y les Tres Serols

Continuamos charrando, ya incluso, viniéndonos arriba con idea de quedar un día más, pagar camping, pero según van pasando les hores y averámonos hacia'l Cul de Soaso, el calor faise casi insoportable, asina que vamos apurando'l pasu pa entamar la baxada d'esta preciosa faixa Pelay hacia la mítica Coda de Caballo.

Aportamos a la Coda de Caballo onde pararemos un ratín a facer semeyes

Magar de les semeyes de rigor, entraremos en tarrén conocíu por mí, de cuando xubiera a Góriz asina que vamos descendiendo demientres ascienden los graos de calor, hasta alcontrar a Carla, que baxara a Ordesa y xubiera pela normal al altor de las Gradas de Soaso.

Tiramos abaxo apriesa demientres la xente esfruta de les poces y el frescu del fayéu

Nós, vamos col pilotu automáticu y queremos baxar apriesa y ella diz que va dir pegando dalgún refresquín, asina que seguimos en mou casi correnderu, sacando cuatro semeyes a los distintos saltos hasta entra nel guapu fayéu pa pasar al otru llau del rigu na Puent Arripas, tornando a la padrera d'Ordesa los últimos kilómetros per camín desconocíu.

La verdá ye que paezme una circular increyíblemente guapa y dafechu necesaria pa dar conocencia a la fastera d'Ordesa, viendo los montes más nomaos y situando toles posibles rutes. La pena, fue que nun pudiéramos namái que facer estos 20 km, con +/- 785 m en 4 hores y media en tola nuesa visita a Ordesa.

Dende equí, fue tomar una xarra frío los tres en Ordesa y despedinos pa dir faciendo la vuelta p'Asturies, ya que les temperatures rondaben los 40 graos y así, lo único que díbemos facer ye gastar perres de chigre en chigre o tar tiraos nel camping y nun ye la mió idega d'unes vacaciones.

Despedímonos d'Ordesa hasta otra... nun pudo ser