jueves, 13 de septiembre de 2018

El Coutu (Somiedu) - Mumián - Peña Gúa - Picu L'Altu - Sousas

3 Xunu de 2018

Track: El Coutu (Somiedu) - Mumián - Peña Gúa - Sousas


Seguimos con una primavera pasada per agua, na que cuesta muncho decidise a caleyar, por mor de les previsiones meteorolóxiques. Pero como siempre diximos, hai que salir al monte siempre y llueu veremos que nos alcontramos.

Esta vegada la previsión yera mui incierta y pa nós, que tábemos nel valle de Teberga, teníemos un día bien murnio, pero fue travesar l'Altu San L.lorienzu y según díbemos cayendo pa Somiedu los claros yeren más abundantes que les ñubes prietes.

Partimos del pueblín d'El Coutu ( m)

Aportaremos a La Riera, con cara d'esperanza pol tiempu, pasando dempués per Recueva, Castru y almorzaremos dalgo na Pola, pa siguir dempués pela carretera qu'asciende hacia'l Val.le, anque esta vegada vamos salinos hacia'l Coutu, onde entamaremos la ruta.

Con ñubes y claros travesaremos les cais d'El Coutu, empobinándonos pel pernomaú PR de la ruta a a la braña Mumián. Paez mentira, pero nunca me diera personalmente por conocer esta braña, asína que diba encantáu pela pista que nel intre taba amosándonos unes vistes de las Peñas d'Urria ablucantes.

Ascendemos pel míticu percorríu hacia la Braña Mumián

Llueu, pasaremos a travesar una viesca autóutono brutal, siempre siguiendo'l camín obligatoriu, ya que tamos nuna fastera, onde la gran mayoría de los crucies a la pista cimera, son pasos prohibíos por mor la población osera qu'esiste nesti tarrén somedanu.

Siempre cuesta arriba y a bon ritmu, vamos ganando km a la pista, hasta aportar a la cul.lada Fondera, onde netamaremos a descender hasta la braña de Mumián, onde taremos un bon ratu, mirando cada cabana que vamos alcontrando.

Travesámosla y ascenderémos per una canal hacia la Peña Gúa

Magar de travesar Mumián, onde falamos con dellos paisanos, siguimos camín hacia una marcada canal pedrosa, pela que tendremos qu'ascender hacia'l nuesu cimeru oxetivu: La Peña Gúa. Por suerte, casi nun tocaremos la llera y diremos llibrando pali pali, hasta salir a tarrén pindiu herbosu, enantes d'acceder a una guapa arista que depositaríenos nel cumal de la Peña Gúa.

Cume de la Peña Gúa (1687 m)

Esti cumal de 1687 m, ye un gran mirador sol valle del rigu Somiedu, pero la borrina nun quiso amosanos estes vistes. Fué una pena, pero tanto'l pasu por Mumián como l'ascensión a esta peña, prestónos muncho y siguimos camín gayoleros, albidrando que'l día tenía pinta d'aguantar coles ñubes xugando colos claros.

Siguimos crestéu hacia'l Picu L'Altu (1844 m) con precioses vistes

Nun acabáramos coles ascensiones y magar d'una pequeña baxada, enllazamos cola cuerda que tendría d'entretenenos durante un bon ratu hasta los 1844 m del picu L'Altu. Cuando digo entretener, ye que nun pudimos para de sacar semeyes, cola borrina xugando colos cortaos a dambes fasteres de la cuerda.

Quiciás, fué ún de los momentos más máxicos del día, onde amestábense los potentes collores de la peña y la yerba na tierra col blancu y azul del cielu. Son coses que les semeyes nun acaben d'amosar del tou, pero la tranquilidá del grupu, sacando semeyes y dexándose asoleyar, col ambiente calecíu del sol, daba pa tar bien agustu nes praderes de L'Altu. 

Pasaremos per Valdecuélabre hacia la Franca

Magar d'un pequeñu parón pa xintar, con siesta que nun me sentó na bien, siguimos descendiendo hacia la braña y mayáu de Valdecuélabre, onde sal un camín hacia la viesca prohibía de la Enramada. Como hai que ser respetuOsu con estos temes, vamos siguir camín hacia la Bobia la Franca, pasu pente les peñes de la Franca y Valdecuélabre... ascendíes ambes, nuna ruta que ficiera va años cola Pena Salgada.

Fadremos la pindia ascensión y tendremos de frente un alloriante paisaxe con tol valle Salgada, verde a más non poder. Enxamás coincidiérame tar nesta fastera, con tal nivel de collor, siendo increyible  dar pasos penriba d'esta alfombra, que travesaba una riega que ximielgábase como un esculibiertu. 

Preciosu descensu hacia'l valle La Salgada y baxada hacia Solapeña

Saldremos de la Salgada hacia la Bobia Fuxaldinas, na que'l borrín tien a bien, acompañanos na nuesa baxada particular hacia les dixebraes brañes del camín. Entamaremos pela de Solapeña, la cual pudiera ser un bon abellugu pa la práutica del bulder, anque los bloqueros suelen ser mui zanganos como pa llegar hasta equí, jeje.

De Solapeña pasaremos per Tabladiel.lu, onde garramos el camín a la vera de la riega Sousas, que como non, tien de llevanos hasta la braña de Sousas, otra de les nomaes en Somiedu. Dende Sousas, siguiremos el camín que baxa hacia'l Val.le, pero al altor de la Pena'l Castiel.lu, tendremos que buscar un camín que sal hacia'l val.le de Sousas.

Siguimos camín per Tabladiel.lu y Sousas hacia'l Castiel.lu

Asína que magar de la mítica semeya cola Pena Furada, garraremos camín a la escontra pa descender hacia'l val.le de Sousas, siendo la primer parte más abierta, hasta empozanos nuna viesca d'un valir increyible, con tramos realmente preciosos.

Tengo que dicir que nun me lo esperaba y al igual que los mios collacios, fuimos caleyando casi en silenciu alloriando con tanta guapura. Perpasaremos esti tramu de viesca increyible, plantándonos embaxo de la Pena'l Castiel.lu, dando vista a la Furada per ambos llaos.

Increyible baxada pel valle de Sousas... una ayalga de viesca

Pocu más alantre, tocará cruciar el rigu Sousas, per una guapa ponte na Vagúa, pa garrar la manzorga'l rigu y nun soltalo hasta'l final. Dende esti puntu hasta'l pueblu d'El Coutu, ya siguiremos ensin perda nenguna delles cómodes pistes, dando final a una prestosa ruta.

En xeneral, la ruta, ensin dificultá ye una preciosa caminata conociendo munchos llugares perguapos de Somiedu y ye que nos sos 17 km de percorríu, veremos brañes, mayaos, viesques y peñes de gran valir paisaxísticu.

Siguiremos valle alantre pela Vagúa hasta'l Coutu de nuevu

Pa ello, aparte d'esos 17 km, tendremos de superar 1120 m d'ascensu acumuláu, que quiciás sacante del ascensu hasta Mumián y Peña Gúa, son mui llevaderos, faciendo finalmente un total d'unes 7 hores de ruta, lo que ye totalmente variable dependiendo del ritmu gayoleru que llevemos.

Ta la próxima xente montuno...


No hay comentarios:

Publicar un comentario