miércoles, 8 de enero de 2020

La Puente (Morcín) - Peña Manteca

2 de Setiembre 2019

Track: La Puente (Morcín) - Peña Manteca


Llevábemos munchos meses ensin xuntanos pa facer monte cola compañerina montuna, Ana. Cuantayá, quedara la meyor actividá ivernal que ficiera enxamás, cola canal de Ría y pente pitos y flautes, nun xurdieren planes en tola primavera nin en branu, poro aportó casi la seronda y enantes de finar l'horariu de branu, tuviemos la oportunidá de conocer el cresteríu de Peña Manteca.

Yera dalgo que rondábenos la tiesta dende va tiempu y díbemos dexándolo pali pali pa prau, anque ye ciertu, que namái qu'eches el güeyu dende una escalada n'Otura nun pues escaecer esi picor de percorrer esa crestería tan atrautiva.

Partimos de la Puente (239 m) hacia Peña Manteca

Hai delles opciones pa encolingase na cresta, pero nós, gracies a un paséu nun día de zanganismu esguilador en La Puente, conocíemos un accesu rápidu y nun duldamos en tomar esta opción, poro plantámonos nesti pueblu de Morcín, al qu'apórtase como tantes vegaes travesando los conceyos d'Uviéu y La Ribera pa entrar en Morcín, desviándonos hacia Riosa pasando per Les Maces enantes d'aportar a la Puente.

Nel pueblu, llueu de garrar agua nun grifu d'una casa de la Puente, onde amáblemente nos diéronmos permisu, siguiremos un camín pegaos a la riega'l Valle. Dempués d'ascender dellos metros, entamaremos a ver dellos parés de color blanquecín hasta dar al altor d'una cabaña, onde tendremos de buscanos la vida un pelín pa garrar el meyor senderu hacia'l paré.

Averámonos al cresteríu pel norte al traviés de Cualladrona

La idega ye algamar la base'l paré y dar con una rampla que nos fae ascender hacia una covacha nomada como Cualladrona, la cual nos fadrá perpasar per un furacón hacia una vira un pelín aérea que nos sacará pente tarrén dalgo tomáu hasta una clara forcada al entamu del crestéu de Peña Manteca.

La verdá ye que nun tenemos grande referencies sobre muncha xente pasando per esti cresteríu y ye que namái que tamos na cuerda cimera, vemos que nun ye una crestería tan continua como querríemos y va tocar navegar en tou momentu y lluchar con burdiu abondosu.

Entamamos el cresteríu de Peña Manteca con un tramu bien prestosu

Namás qu'asomo'l focicu nel cresteríu entamo a riime solu, a lo que la mala hostia davezu d'Ana retruca con un... de que coño te ríes? Menos mal que l'avisara de que dábame sensación de bardial superior en tola crestería y apaez con un pantalonzucu de barbie montañera jajaja... les rises taben aseguraes.

Garraremos con puxu l'entamu de la cresta, teniendo quiciás los pasos más guapos, que non difíciles de tol cresteríu y ye qu'al menos nesti tramu, la cresta yera más continua y siempre per calizu y con toque picantín de patiu nos caltenía entretenidísimos con trepes y destrepes ensin lluchar muncho cola broza.

Dellos pasinos espeutaculares pente muncha broza

Magar d'algamar una cota bastante alta (635 m), el cresteríu relaxará n'ascensión y caltendrá más menos la cota, teniendo un tramu más herbosu pero mui guapu, teniendo que superar dellos xerros con dalguna aguya peratrautiva y trepes verticales teniendo un puntu superdisfrutón la cabalgada pela crestería.

Hasta equí, díbemos esfrutando a tope, pero alcontrámonos con un caberu tramu que tenía que danos pasu al colláu Buguriza, tomándose munchísimo la cresta y teníendo que restolar per dambes cares cual sedría la meyor baxada, que finalmente ficimos pela fastera norte, tirando muncho d'esperiencia, de destrepes complexos y d'agarranos a los ablanos a mou de rapel vexetal.

Facemos l'ascensión a la Peña Manteca (763 m) per tarrén dafechu tomáu

Nel intre, nun hai que dicir que ya díbemos coles pates escayaes enforma, sangrando per delles partes de les pates, pero como siempre, felices por facer monte xabaz, ya sea pelo téunico o pelo físico, pero que seya cañero ye la nuesa seña d'identidá.

Dende'l colláu pasaremos a la fastera sur y alcontraremos un canalizu p'algamar la cresta final al cumal de Peña Manteca (763 m), que como pudimos ver, aparte de tomáu enforma, amosaba poques señales de muncho pasu montañeru.

Baxamos cola calma dende'l colláu Pandu hasta La Puente

Con pocu más, destrepamos pente escayos hacia la faza sureste de la peña Manteca y bien ceo, aportamos a dellos praos que nos dexen na pista que bordea la Manteca pel sur pa dar al colláu Pandu, onde descenderemos casi corriendo hacia los pueblos de la Figar y el Praiquín, enantes d'arribar a la Puente, coles últimes lluces del día.

En resume, cresteríu atrautivu a lo lloñe, como podéis ver na semeya inferior, pero que metíos en farina, nun tien nin una continuidá prestosa de caliza, qu'anque sí qu'aporte bonos y guapos pasos de trepaes, la llucha colo xabaz y tomáu de la vexetación résten-y muncho valir montuno.

Pa una actividá braniega de tarde pudiera tar bien, pero meyor con pantalón llargu jeje... eso sí, los 6,5 km son de puru entretenimientu, con un desnivel que cuesta dase cuenta de ganar de 680 m y que malpenes debería llevanos 3 hores y 45 minutinos, pero como ya dixi, ye actividá pa xente motivao y con ganes d'escayase y pinchase per casi tolos llaos.

La crestería de Peña Manteca dende la escuela d'Otura

No hay comentarios:

Publicar un comentario