jueves, 7 de noviembre de 2013

Ruayer (Ayer) - Pena La L.laguna

13 d'Ochobre de 2013

Track: Ruayer (Ayer) - Peña La L.laguna


Siguimos fartucándonos de retirar del mercáu rutes d'años anteriores. Esta que mos ocupa güei, foi puesta l'añu pasáu por Canta y pa la ocasión axuntámonos un montón de xente: vieya del grupu, nueva y ensín ser del grupu inda como Marcos y la so moza ...

Teniemos munches ganes de conocer el valle del Ayer al completu, y que meyor que salir de la nuesa ruta dende'l so final, Ruayer. P'aportar a esti pueblín facemos la ruta davezu dende Xixón, pela autovía minera hasta Mieres del Camín, onde garramos la A-66, hasta'l desvíu al corredor del Ayer.

Entama'l camín nel pueblu de Ruayer (777 ms)


Pela As-112, pasaremos per Morea, L'Escuyu, Los Estrul.lones y Cabanaquinta, siguiendo pela AS-253 per L.levinco, Entepenes y Col.lanzo onde malpenes somos a tomar un triste café. Esti valle ta malditu p'almorzar bien fuera de temporada d'esquí.

Así qu'ensin más, siguimos pela AE-6, travesando dellos pueblos como Cuergo, L.lamas, Rumañón, Casomera, La Paraya y magar de conocer en coche les foces del ríu Ayer, aportamos al nuesu aniciu de ruta, Ruayer.

Cruciamos el pueblu de Ruayer pa garrar el val.le L'Orria per pindies pistes

La xente vien preparao pa sofrir, ya que quiciás nos correos de la selmana fuí un pelín pesimista colos tiempos y la llargura la ruta, pero más val que la mente vaya primeru pa que'l cuerpu actúe dempués. Nun se si esto, fizo que saliésemos con fuercia peles cais de Ruayer pa baxar hacia la riega L'Orria.

Namái baxar hasta riega, tendremos una pista per delantre, de les más pindies que xubí nunca. Menos mal que'l llugar ye guapu dende l'entamu, travesando llugares como Reconco, la Orellina o'l Rebel.lao, hasta baxar un pelín al crucie de riegues: la de L'Orria y la de Braña Foz.

Siguimos xubiendo hacia'l Bescón

Nesti puntu dexaremos el val.le de L'Orria y otra vegada per un gran desnivel, xubiremos pela Revuelta, hacia la cabaña del Bescón, onde atoparémonos colos picos Cuayos y la Campana, que llevábemos viendo cuantayá con un toque imponente.

Pocu más alantre del Bescón, alcontrarémonos con una de les brañes más guapes, na que tuvi oportunidá de tar: Braña Foz. Pel momentu, acolumbrámosla a lo lloñe, pero según vamos averándonos a ella, paeznos más guapa, amestándose amás les vistes al circu calizu del Morgao y tres nuesa la Pena Reonda amuésase ablucante.

Pasín a pasu hacia Braña Foz les vistes son impresionantes

Sele, caleyaremos pela braña, con ciertu puntu d'envidia, camentando qu'a toos prestaríanos tener una cabaña nesti requexu qu'alienda paz. Dexaremos braña Foz, p'ascender pelos Pedregales, hacia les brañes de Mediu y Dios.

Pa ello, namái tenemos que siguir el cursu de la riega'l Braña Foz, qu'a tramos pindios, dirá ganando altor hacia unos amplios mayaos, onde tocará camudar de valle, ya que si siguimos de frente, aportaremos al col.láu la Campona y nós tenemos que dir hacia'l del Morgao.

Siguimos camín siempre n'ascensu hacia'l col.láu Morgao

Poro, más menos a mediu mayáu, saldremos per un senderu hacia la madrecha, faldiando el picu las Llanosas y penriba de la riega'l Morgao, viendo al fin, el col.láu del mesmu nome. Llevamos dos hores y media de ruta y los 2000 ms d'altor dícenmos que vamos mui bien de tiempu.

Tamos faciendo un ascensu rápidu y duru de desnivell, con un ritmu demasiáu esixente, pero la xente ta respondiendo perbien. Asína qu'un pocu más d'esfuerzu y plantámonos nel col.láu Morgao (1770 ms) que danos vista al fín a la escondida Peña La L.laguna tres del Picu Morgao y más lloñe a la Peña Riañu, na mole del Cuetu Millaró o Brañacaballo.

Ascendemos al Picu Morgao con vistes increyibles hacia l'oriente

Nel intre, demientres decidimos si xubimos al Morgao o lo bordiamos, baxen hacia nós dos mastines mozos y tola reciella cabres tres d'ellos. Llevo a Kíla y nunca sé como van reaccionar, poro caltengo les distancies ya inclusu garro a la perrina, pero los probes son tan inofensivos como fame tienen.

Con tola pena del mundiu, nun-yos damos na de comer, ya que pegaríense a nós tol restu la ruta y siguimos camín cenciellu nel ascensu al Picu Morgao, el cúal tien unes vistes increyibles hacia tol conceyu de Casu, Ayer, tierres llioneses.... y hasta Picos al fondu.

Cumal nel Picu Morgao... onde les neñes ficieron el so puntu máximu d'altor (1954 ms)

Nos 1954 ms d'altor del Picu Morgao, les neñes del grupu deciden que ya tuvieron abondo de xubir nel día de güei y faense la semeya oficial nel Morgao, pa entamar la baxada hacia la Vega la L.laguna, onde un corru peñes, va servi-yos de luxu pa echar un pigacín a la espera'l restu'l grupu.

Casi 1200 ms de desnivel direutu y a bon ritmu, foi un actividá increyible, sobretou pa xente qu'inda tan entamando nel monte, poro despedímonos d'elles y siguimos durante pocu menos de media hora crestiando del Morgao a la Peña La L.laguna.

Facemos la crestina hacia la Pena La L.laguna

La baxada del Morgao al colláu pente les dos peñes, ye fácil, anque llueu preferimos bordiar la cresta de xubida a la L.laguna pela mandrecha y metímonos nun tarrén pelín más incómodu, anque ensín mayores problemes fuimos aportando ún a ún a los 1967 ms de la Pena la L.laguna.

Cumal de la Pena La L.laguna (1967 ms)

Tira un pocu l'airín, pero igualmente paga a pena tar un ratín esfrutando de vistes hermoses al Oriente y Occidente, destacando'l Picu Torres, penriba la Fitona o L'Esturbín casi cerquina nueso. La verdá ye que'l día ta respetándonos y anque hai ñubes que vienen amenazantes nun creyemos que vaya tocar moyase.

Acolumbrando al oriente y al occidente

Con 4 hores de ruta, y a sabiendes que tenemos una llarga baxada, nun facemos esperar a les collacies del grupu, y baxamos hacia la vega La L.laguna, cola vista puesta nel color verde d'esta pequeña pero guapa l.laguna.

Casi a los sos pies y cola compaña, d'un de los mastines, xintaremos durante unos venti minutinos y anque nun quiero meter muncha priesa, viendo les ñubes y la baxada que queda, llevantamos el campamentu y tiramos p'abaxo.

Baxamos sele hacia la Vega la L.laguna onde xintamos a la compaña del mastín

Como non, magar de da-y dalgo al probe animalín, al que se-y pue contar les costielles, percorremos la vega la L.laguna empobinándonos hacia la riega la Carbazosa, la cual siguiendo'l so cursu dexarános n'otra guapísima braña del mesmu nome, Carbazosa.

Siguimos descendiendo pasando pola perguapa braña de Carbazosa

Ye una pasada dafechu, ver cabanes caltenies en estáu aceptable coles llabanones nel teyáu, poro taremos un ratín agüeyandoles ensín más, hasta siguir un guapu senderu al llau d'una muria que pocu a pocu va dir metíendonos nuna viesca na que los collores de la seronda va tomando protagonismu.

Entramos poquín a pocu a la viesca de Cochoro

El senderu ye claru y el fayéu pel que caleyamos ye... indescriptible. Tamos baxando desnivel y nin siquiera enterámonos d'ello, ya que nun somos a mirar más que d'un árbol a otru entrando nuna especie de tranquilidá máxica.
Ablucante fayéu... de los máxicos, máxicos

Munches vegaes la verdadera ayalga d'una ruta son estos requexos nun monte, munches vegaes más que'l propiu picu. Nesta ruta llevamos brañes precioses como la de Foz y Carbazosa y esta viesca pela qu'avanzamos embobaos hasta alcontranos de frente con una enorme cuerria de llábanes... tamos en Cochoro.

Braña de Cochoro

En Cochoro, esfrutaremos d'esti increyible mayáu enmediu d'una viesca frondosa, viendo penriba nuesa'l Picu L'Esturbín y tol cordal de Cuaña que va hasta él. Dexaremos Cochoro per una pista apta quads, que con munchísimu desnivel báxanos pel monte los Cuayos hacia Yananzanes.

Llarga baxada hacia Yananzanes

Si tol camín d'antes de Cochoro foi peragradable de caleyar y casi nun notamos el desnivel, tola parte hasta'l pueblu de Yananzanes, va facese pelín pesáu y les rodielles al retener van sofrir lo suyo, anque al menos anque non tan espeutacular, la viesca sigue siendo guapa, al igual que dalgún claru con vistes a la pena Reonda.

Caleyamos dende La Paraya al llau del canal hasta les foces del ríu Ayer

A la fín, aportaremos a Yananzanes, onde entrugamos per un chigre nel pueblu o na Paraya, pa que gran parte nuesa, nun tenga que comese los aproximaos 3 kms qu'hai ente La Paraya y Ruayer. Nun hai hasta Casomera o Ruayer, así que parte'l grupu tendrá que tomáselo con calma.

Los conductores, baxaremos apriesa pela asfaltada pista hasta La Paraya, onde pa nun garrar carretera, tomamos un camín paralelo al ríu Ayer, que dexaranos nuna ponte, xustu al entamu de les foces del ríu Ayer, les cuales esfrutamos con tranquilidá hasta aportar a los coches en Ruayer. 

Foces del ríu Ayer hacia Ruayer

En resume, rutón de los de quedar n'alcordanza, nos que ficimos un total de 17.7 kms de percorríu en casi 7 hores y media, teniendo que superar un desnivel acumuláu d'unos 1450 ms, lo cuál fai una ruta de lo más completa.

Dicir como denuncia, qu'esti prubín mastín, baxó con nós hasta la mesma Paraya, onde ya lu conocíen los paisanos del pueblu, diciéndonos que yeran de nun se quien, que venía pocu... nun fai falta que lu digan.... taben los dos mastines que daben pena miralos.

Aún así, tengo la sensación que yeren a turnase pa facer igualmente'l so trabayu... ya qu'un d'ellos siguió cola manada cabres y esti otru baxó con nós, llevándose dalgo al estómagu... en fín, muncha pena... nun hai drechu a tener a unos perros nesti estáu.

Camudando'l Camín con esti probe mastín famélicu

6 comentarios:

  1. Perguapa y dura ruta Berto. La L.laguna yo fícela desde La Paraya baxando llueu por Pedrafita. Alcuérdome que hasta la braña de Cochoro xubionos un pastor "to tieso". Nun m´estraña te prestasen tanto eses brañes. Nun conozco Braña Foz, pero cuando fui a la Fitona, pase cerca y quedé prendau d´un mayain qu´hay cerca el col.lau la Maera. Pa mi ye la braña más guapa que viera nunca.
    Igual te copio el recorriu, porque quiero tornar a la L.laguna y conocer Braña Foz.
    Un saludu

    ResponderEliminar
    Respuestas
    1. Ties que facela, Braña Foz ye un llugar guapísimu, la viesca d'enriba Cochoro bufff y la ruta en xeneral ye una circular perfeuta. Nin siquiera faese tan pesáu'l camín dende la Paraya a Ruayer poles foces, sobretou llibrando como ficimos lo máximu de carretera posible.

      Un abrazu

      Eliminar
  2. Recorrido de envidia, a ver cuando vuelvo por ahí de braña en braña a recorrer esos picos.
    Pena de perros. No dan ni miedo.

    Un abrazu. vémonos.

    ResponderEliminar
    Respuestas
    1. Apúntate esta Fernan... porque ye de les buenes, si señor.

      Lo de los perros... ensín pallabres

      Un abrazu

      Eliminar
  3. Muy guapa Berto, me queda cerca de casa y la conozco aunque de haz años, habrá que volver pronto.
    La subida a la Laguna, mejor por la izquierda, si no recuerdo mal, está jitao incluso.
    Lo de los perros, como le dices tu a Fernan, sin palabres...
    Un saludo amigo

    ResponderEliminar
    Respuestas
    1. La baxada tomela d'un track tuyu col grupu montaña que veníeis de Piedrafita... y fue toda una ayalga esa viesca de Cochoro.

      Guapísima la ruta.

      Un abrazu

      Eliminar