Las Llucias (Cabrales)

6 de Payares de 2021 y 30 d'Abril de 2022

Tornábemos a Las Llucias, llueu d'una visita pelín infructuosa a finales del 2021, onde probáremos per primer vegada, El Velcro, un 7b en tola so dimensión, qu'asegura una escalada finísima nun pañu con una calidá de roca superior.

Esi día, metíerame nun 6c o así, dalgo húmedu que terminara por desesperame y desgatar yemes ensin xacíu y los pegues al Velcro fueren de too menos bonos, asína que col rabu pente les pates, coláremos de la escuela, ensin llevar nin una vía pal bolsiellu.

Díes de sol pero mui fresquete pelas Llucias

El puente del 1 de Mayu, dexamos de trabayar nes nueses ocupaciones profesionales y tiramos un bon garrapiellu de collacios hasta Cabrales, col envís de visitar delles escueles, pero a la fín, ficimos una visita de sábadu a las Llucias y el restu los díes, anduvimos apretando en Po.

En Las Llucias, diviéramos los grupos pente'l seutor cobalto y la segunda aguya, onde plantáremonos ellí, Anna y yo, vinieno a probar dalguna vía, Suco, Iso y Rubén, demientres el restu del grupu llimpiaba dafechu'l seutor.

Como siempre la roca y les vistes son el mayor atrautivu d'esta escuelina

El día, fresquín de primeres foi tornándose más y más calurosu, teniendo unes hores centrales, nes que yera casi imposible trepar. Enantes, montara Anna, un gran oxetivu como yera'l Velcro (7b), probándola dempués yo, viendo que col deu con esparadrapu por mor d'un siete que ficiérame en Villanueva de Xueves, diba ser imposibledar pegues decentes.

Asina que con tola solana, metíme a dar un pegue a vista al 7a que faltábame, pringando na placa fina d'abaxo, quedando mediu tontu del pegue al solano. Según fue pasando la tarde, tomándonoslo con munchísima calma, fuimos dando pegues tanto Anna como yo, turnando colos collacios que diben averándose hasta ellí, dando dos pegues finales perbonos Anna, dexándola la vía vista pa sentencia.

Kíla esfrutando d'un estupendu día de sol y relax en pié de vía

Pela mió parte, llueu de flashear Cabeza Nido (7a) a Suco e Iso, animéme a dar un últimu pegue, pringando casi na placa y saliendo ya hasta cadena ensin mayores problemes. Dicir que ye un 7a más sele que Cortejo Masivo, que podría averase al 7a+, pero paga la pena igualmente sofrir na placa pa esfrutar de la parte superior de la vía.

Agora ya sólo queda tornar a la escuela, con yemes y ganes d'escalar finu nel Velcro.

Las Llucias

 
Croquis de Las Llucias por mor del trabayu del guía de montaña Juan Luis Guilluy, los collacios Pepa y Jose, Edu. Gracies y col so permisu.

18, 19 de Setiembre 2021

Finde cabraliegu, una vegada más y ye que fueron ya, delles vegaes les que decidimos venir esti branu hasta Cabrales y la so redolada a esguilar. Nesti finde, díbemos centrar un par d'oxetivos claros, conocer la nueva escuela de las Llucias en Carreña y terminar cola escuelina de Las Cabadas, que ya diba siendo hora.

Tastiando la roca cabraliega de las Llucias

Siempre con amenacia de tormenta a la tarde, xubimos tanto'l sábadu como'l domingu hasta Las Llucias, caleyando con calma nel so prestosu accesu. Prestosu, cuando nun ties que baxar a por Kíla hasta Carreña, porque-y dió por llargase pa la furgoneta y volver a xubir... coses de perra vieya.

Averamientu llarguín pero mui agradable de caleyar

 

El casu ye qu'al igual que pal Cuetu La Corona, agora, l'averamientu ye llargu pero'l camín bien marcáu faise bien, asína qu'aportamos a los seutores d'arriba (Las Aguyas) onde teníemos dalgo más de xuegu p'apretar un pocu, siendo los tres primeros de graos más cenciellos que quedarán pa otres visites relaxaes.

Perbona roca nos seutores de las Aguyas qu'esguila con gustu Andrea

El primer día, xubimos a la segunda aguya los tres (Andre, Anna y yo), probando'l 6a+, 6b y un 6c+ atómicu de nome, Sodomizáu en Covadonga. Nun quiero saber que-yos pasó a los equipadores colos cures u hosteleros de la zona.

 

El segundu día, calenté nuna vía cenciella y metíme con xeitu a dar un pegue a vista a Cortejo Masivo, un 7a de lo meyor que probé nos últimos tiempos. La pena fue, qu'equivoqueme na placa gris xustu al final y nun pude lluchar la vía na parte de roca colorada, anque viéndola a posteriori, fácil que pringase na parte alta.

 

Esfrutando a tope de la caliza cabraliega

Nun mos dió tiempu a más nel finde, ya que la lluvia siempre apaeció de tarde, asina que dempués de baxar a Carreña a por Kíla y volver a xubir, metí-y un segundu pegue a Cortejo Masivo, encadenándola al corte dafechu, pero esfrutándola una barbaridá.

 

Con ganes de tornar per ellí a probar dalguna vía más...