Pandecarme (Cangues d'Onís) - Camín de la Maera - Gurbiñales - H.ungumia - Vegarredonda - H.uente Prieta (Cangues d'Onís)

20 de Xunu de 2020

Track: Pandecarme (Cangues d'Onís) - Camín de la Maera - Gurbiñales - H.ungumia - Vegarredonda - H.uente Prieta (Cangues d'Onís)

Munches vegaes, creyemos que la nuesa esistencia nesti mundiu, tien cierta importancia, tien un desendolque capaz de facer, que dalgo seya importante al traviés de los nuesos actos y de les nueses viviencies.

Al menos, eso queremos tresmitir dende l'algame d'unes actividaes, que nun dexen de ser un puntu d'egocentrismu vital, un engrandecer una miseria de capacidá de compromisu, pa perder el to tiempu personal, en lluchar por una sociedá o un país del que tas namoráu y nagües pol so porgüeyu.

Y nesi sen, creyemos que con militar económicamente nun partíu, nun sindicatu, escribir y compartir quince mierdes diaries peles redes sociales, con comentarios ocurrentes y que la xente lo llea, tamos faciendo un llabor, pero al final, eso ye la mesma puxarra del que nun fae na por camudar les coses, más que votar y sentase delantre del televisor a criticar.

Otres persones, xente como mi compañera de proyeutu políticu durante años, Yolanda Huergo, recién finada pol cáncanu, qu'esta vegada sí que llévase a los meyores, gastaba esa fuercia vital en meyorar un país como Asturies o una ciudá como Xixón.

Toos falen de la so sorrisa, de la so capacidá d'axuntar, más que d'estremar, nes diferencies qu'había n'aquella dómina, pente los partíos políticos asturianos. Los que somos simplemente deportistes o montañeros, más que rescamplar una cara amable, embaxo quiciás, d'una especie de timidez, veíemos un fuercia xabaz, un sorrisa enllena d'enerxía ya fuera tomando una botella sidre, falando de política, música, cultura o topándola nel ximnasiu yendo a facer bici, llevantar peses y faciendo una vida activa nun de los sos piores momentos físicos cola so enfermedá.

Marchó, esa fuera la pallabra usada pol so compañeru, Rubén. Marchar quier dicir n'asturianu, dexar de tar nun sitiu pa dir a otru y quiciás ye la pallabra más afayaiza. Porque nin abandonó, nin fuxó, nin dexó de lluchar pola vida que-y tocó vivir, mesmamente que nun dexó de lluchar por tolo que la pudiera esmolecer: la llingua, la cultura, el mediuambiente, Asturies, Xixón, los drechos humanos, el trabayu dignu... tantes coses qu'a munchos de nós, que namás valemos pa ocupanos de garrar una roca con más fuercia o xubir un monte más apriesa que los demás, déxanos con mui pocu que dicir al respectu so los nuesos llogros personales.

Namái, que siéntome cola necesidá d'espresar agradecimientu pol tiempu compartíu, ya fuera en reuniones de partíu, pegando cartelos con tola illusión o echando una botellina sidre dempués d'un actu. El restu de los mortales que miramos pal nuesu ombligu y pal nuesu mini mundiu personal, quedámonos ermos d'un referente de llucha pol país, por Asturies..., ermos d'una persona integra y solidaria y non sólo d'una sorrisa, que sí, yera presente, por fuera, pero por dientro esa fuercia que la fizo lluchar tanto pola so vida, rellumaba más que la so sorrisa.

A l'alcordanza de Yolanda Huergo, que llugares tan guapos de l'Asturies qu'amasti, como los que conocí nesta ruta, t'acueyan pa siempre.

---------------------------------------------------------------------------

Partimos de Pandecarme (1065 m)

Dempués del confinamientu, teníemos na tiesta facer un finde pel Cornión dende cuantayá, pero'l nuesu compañeru Carlos, nun pudo asistir y tuvimos que facer dellos cambios nel plan, lo que nun quitó que sacásemos actividá con un vivac na fastera de Vegarredonda.

Son siempre, munches les rutes que voi guardando na carpeta de "Pendientes" y siempre me dió un pocu de pereza acceder a Vegarredonda pel mesmu percorríu de siempre, poro decidimos que'l propiu accesu fuera la ruta en sí y col pasu del día ver, que planes podríemos dir cumpliendo.

Averámonos a conocer el camín de la Maera

Pa entamar, salimos de Pandecarme pasaes les 9 la mañana, con un ambientazu nel aparcaderu, anque nós al altor de la fonte Verdayes, vamos abandonar el camín clásicu a Vegarredonda y descenderemos hacia'l calce del rigu Pomperi, col envís de pasar pela Xatera la Piedra y nos Llanos del Burdiu, empatar col camín que vien dende la Vega la Piedra y que nun ye otru que'l Camín de la Maera, xusto el que queremos conocer.

Esti camín, valía antaño pa sacar maera del fayéu la Ciarda y alcuéntrase anguaño en bon estáu, esfrutando d'un agradable paséu pente bonos exemplares, nun percorríu que va colgáu penriba del valle del rigu Pomperi, en direción hacia la mecederu col rigu Pelabarda.

Aportamos al increyible fayéu de la Ciarda dando vistes al Dobra

Esfrutaremos con calma del camín de la Maera, atentos siempre a nun perder la traza, pa terminar por salir al fayéu de la Ciarda, onde si ya veniemos relaxaos, un llugar así ya te da tola paz del mundiu, aportando amás, con tan sólo averase un pelín hacia'l norte unes vistes brutales hacia'l Dobra.

Tamién, como non, eché un vistazu a la salida de la canal de la Muyada, la cual sigue en pendientes jeje. Coles mesmes, facemos un xiru de 180 y entamamos a percorrrer tol fayéu en sentíu ascendente col envís d'empobinanos a la Vega Corrales.

Travesamos la xerra Los Gurbiñales dando vista al rigu H.ungumia

Nel intre, andamos percorriendo la xerra los Gurbiñales, de la que va un timpín ya ficiera la so cota más alta, poro nun contemplamos encumarla, sobretou cuando'l borrín tien a bien acompañanos nel nuesu andar pela Cuenye Corrales hacia los h.oos del Cuevón.

Travesarémoslos per onde meyor podemos y daremos vista a la fin al valle del rigu H.ungumia, xustu nun collaín a la manzorga del picu Les Vidrioses. Equí, sentámonos, recuperaremos fuercies y falaremos de que plan siguir, siendo'l más sensatu ascender pel rigu H.ungumia hacia Vegarredonda.

Descendemos hacia'l rigu H.ungumia o Gusteguerra pa xubir hacia Vegarredonda

Con casi 3 hores y media de camín de guapu camín, si siguimos hacia Ordiales pela canal de Chicide, díbasenos muncho de tiempu, poro relaxámonos y entamamos un guapu descensu per una amplia vallina, primeru más a pinchu y a partir d'un hombru, en diagonal ascendente nel sen del cursu'l rigu p'aportar casi al calce na Vallinona.

Darréu, alcontramos bon senderu con vaques na fastera pero vemos un senderín que baxa hacia'l rigu y nun podemos facer otra cosa qu'averanos hasta'l H.ungumia, quedando alloriaos con ún de los llugares más guapos que viera nos últimos tiempos, un doble tabayón con poces increyibles y un ciertu tastu a llugar máxicu.

El H.ungumia amuésanos tola so belleza según vamos descubriéndolu

Magar d'unos minutos refrescantes, tornamos a xubir al senderu, siempre a la manzorga'l rigu y vamos dir siguiéndolo, topándonos con llugares bien guapos hasta pasar a la otra fastera'l rigu, pa siguir cenciello hasta alcontrar un tabayón en forma de cola de caballu, increyible dafechu... ensin pallabres.

Pocu más alantre, tendremos un tramu nel que perdemos la pista de senderu y toca bregar, sumándose'l borrín a la folixa, costándonos albidrar si debemos xubir muncho más o non, teniendo muncho curiáu en dellos pasos con cayída al rigu, saliendo finalmente hasta un pasu llateral sol rigu, onde ya entramos en tarrén menos gafu y con más caliza, onde ya tendremos avance más seguru y cenciellu.

Perpasamos un tramu abegosu onde toca bregar a salir a fastera más llimpia

El tramu cenciellu axústase al pasu a la manzorga'l rigu una vegada más, al altor de la Inxiesta los Meraos, coincidiendo amás, col soníu de los cencerros de les vaques de nuevu, lo qu'indícanos que tamos en tarrén más abiertu, non como l'anterior onde'l H.ungumia embarráncase enforma.

Dende equí, ya vamos caleyando cada vegada más apriesa y voi reconociendo llugares, de l'anterior incursión pela xerra Los Gurbiñales, sobremanera al pasar ya pela mayada H.ungumia, onde damos pasu a los Güeyos del rigu, saliendo pali pali, hacia'l refuxu de Vegarredonda.

Damos a la mayada y güeyos del H.ungumia aportando a Vegarredonda

Los que me conocen, saben bien, que m'encanta esti tipu d'aventures, estos terrenos d'ayalgues acuátiques en forma de tabayones escondíos, foces, beyos, pasos penriba'l rigu, vamos qu'esfruté como un guah.e, anque dellos compañeros nun diesen créditu de tardar n'aportar a Vegarredonda, casi 8 hores, jajaja.

Cuanto más enrevesáu'l camín, cuanta más aventura, más lo esfruto, asina como esfrutamos d'unes cerveces nel refuxu y media horina llarga de descansu, enantes de continuar el nuesu camín hacia'l puntu de vivac en H.uente Prieta col restu del grupu, que prefirió xubir pela normal a Vegarredonda.

Facemos con provisiones el tramu de Vegarredonda a H.uente Prieta onde vivaquearemos

El restu del camín, más que conocíu, fízonos pasar pela Llampa Cimera, baxo l'atenta mirada del Porru Bolu primeru y más tarde del Requexón, de camín al colláu Les Merines. Ellí, Carla y yo, esperaremos a Benjamín, al que-y fízose durina l'aventura y a Mario que lu acompañaba, pa siguir xuntos hasta H.uente Prieta.

Magar de tomar posiciones, fadríemos una cena a base de picotéu, bocatas y demás, más dalguna cervecina del refu pa metenos nel sacu y descansar baxo les estrelles, de les 10 hores y media de ruta, con 1600 m de desnivel positivu y casi 14 km d'intrincáu camín pelos Gurbiñales... una gozada pa los montañeros aventureros y que nos presta camudar el camín de continuu.

Camudando'l Camín dende H.uente Prieta