Entragu (Teberga) - Canal de Calmerín- Cordal de Sobia - Valdecreizales

27 de Xunu de 2020

Track: Entragu (Teberga) - Canal de Calmerín - Cordal de Sobia - Valdecreizales

Col branu ya entráu, tocaba dir unos cuantos díes hasta Teberga y como nun too va ser esguilar, diónos por salir a dar un patéu y conocer un accesu a la Sobia dende'l desfiladeru de Valdecreizales, dalgo que ya nos amosara'l collaciu Cienfuegos va unos mesinos, enantes xustu del confinamientu.

Saldremos del aparcaderu d'Entregu, onde pasamos munchos díes del añu y caleyaremos pela senda L'Osu, como non, falando d'escalada, de parés onde equipar, de prohibiciones, de restricciones y de milenta hestories que tan asocediendo nel mundín de la escalada nos caberos tiempos.

Salimos del aparcaderu d'Entragu (430 m)

Nestes hestories andamos, ya ensin danos cuenta salimos de la sienda, pa cruciar la carretera y entrar a la canal de Calmerín, onde tenemos varios seutores d'escalada, pero mui pocu visitaos. Aún así, hai traza de senderu y pesie a lo pindio del tarrén, avanzamos apriesa ganando altor y vistes pela canal.

Caleyaremos pela senda L'Osu hacia la entrada de la Canal de Calmerín

Sele, caleyamos pero tamién vamos parando, esfrutando de los parés y echando una güeyada a los ñeros d'aguila prieta que sabemos qu'esisten nestos parés de la canal de Calmerín. En hora y cuartu tamos no alto de la canal, xubiéndonos a una peña a mou de mirador de la guapa Pena Gradura.

Avanzamos sele siguiendo'l senderu pela canal pente ablucantes parés

Güei, aparte d'Orlando, collaciu d'escaladas y Mario, tenemos con nós pateando a Richie Patterson, autor de les guíes de Roca Verde, el cual abluca a cada pasu que vamos dando pente asemeyes muries. La pena como siempre, el pateu, quien va xubir a esguilar equí arriba colo zánganos que son los escaladores.... bien ciertu ye, jejeje.

Finamos la canal de Calmerín con paradina nuna peña a mou de mirador hacia la Pena Gradura

Colaremos del mirador y volvemos al colláu onde saldremos a la manzorga pa camudar de canal, averándonos un segundín hasta la cueva Los Fugaos, echando un vistazu a los restos cabreros d'otros tiempos. Tocará descender un pelín de nuevu y saldremos per un rampla ascendente que tien de dexanos nuna guapa forcada con un patiu ablucante sol desfiladeru.

Visitamos la cueva los Fugaos pa salir a una forcadina

Dende la forcadina, entamaremos una travesía penriba'l desfiladeru, tomando como referencia unes aguyes de piedra al fondo la travesía. Si na xubida tocó bregar con ablanos y yerba llarga, agora vamos conocer a les nueses archianemigues, les cotoyes baxes, siendo una auténtica maraviya sentiles nes pates, pa los que vamos en pantalón curtio.

Facemos una traviesa sol desfiladeru de Valdecreizales

Terminamos tola traviesa, na que tenemos traces de senderín, aportando a les aguyes, onde entamará en realidá tola ascensión per un espolón amestáu de caliza y broza ensin xacíu. Dicir, que la canal namái que nos fae llibrar 400 metros de desnivel, poro, tendremos otros tantos hasta la parte alta de la Sobia.

Esfrutamos al fin d'un agradable paséu peles vegues del cordal de Sobia

Nun hai un meyor camín qu'otru, asina que vamos siguiendo "les siendes" que vamos alcontrando, topándonos un par de vegaes con víbores, col tremendu sustu ya que yeren bien curioses. Con munchu esfuerciu somos a salir a la fín a la parte alta, entrando pela veiga Solosa primeru, pasando dempués por L'Estoupu pa empobinanos, agora sí, a fasteres bien conocíes como la Veiga d'Adientru, onde podríemos facer cualquier ascensión ya seya al Barzanalgas, Pena Sobia o la Siel.la.

Salimos de la Sobia pasando per Bustremundi hacia la Pena Xerragallos

Travesaremos les veigues, pasando de les d'Adientru a les d'Afuera, onde despedímonos de Richie que decide baxar pela pista hasta Sobrevil.la onde van dir buscalu. Nun sabe na, l'inglés ya que pa nós, va entamar l'aventura de descender pel valle Valdecreizales de nuevu a la senda L'Osu.

Entamamos el descensu del valle Valdecreizales

De primeres, fadremos camín conocíu per mí, saliendo del entornu de la Sobia, hacia les cabañes de Bustremundi, como ficiéramos n'ascensión al Barzanalgas. Ensin mayores problemes, siguiremos hacia la pena Xerragallos, onde nel so mayáu descansaremos y xintaremos daqué, echando un vistazu a la salida hacia Valdecreizales.

Siguimos los restos de senderos alcontrándonos llugares de gran belleza

Contemplamos varies opciones, pudiendo una d'elles baxar al llau de la riega Zarameo pa salir a les brañes y descender pel valle San Isteban o inclusu siguir hasta la Collada pa descender a Santa Marina. Sicasí, decidimos dir penriba la riega Zarameo, per senderu de vaques hacia'l colláu Acebéu onde baxo los parés del Barzanalgas, diremos ganando camín hacia'l Valdecreizales.

Nun abegosu descensu alcontrámonos cola braña Valdecreizales

Siempre poquín a pocu, vamos siguiendo senderos más menos tomaos, más menos marcaos, pero vamos alcontrando dalgun rastru va siguir conociendo tol valle. Un valle, con exemplares d'árboles increyibles pero con un nivel d'enmarañamientu como poques vegaes pude ver, ya cada cien metros qu'avanzamos sedrá con esfuerciu, saltando rames, pasando pembaxo d'elles, llibrando ortigues, escayos... en fin... hai munchu tiempu qu'esti valle nun tien vida humana, siendo los únicos rastros la braña Las Cintas na parte alta, con restos d'una cabaña y la de Valdecreizales mui a lo baxo ya, onde topamos guapes costrucciones xugando colos bloques de la contorna.

Tenemos el pior final posible destrepando hasta la carretera onde garramos la Senda L'Osu de vuelta

El tema nun meyora en dengún momentu, alcontrándonos requexos más guapos y otros más odiosos pa llibrar, aportando a la fin a una fonte ya cerca del fin del valle, onde siguimos lo que paez un antiguu camín, aportando a una especie de vertederu clausuráu que déxanos penriba de la carretera con difícil baxada.

Personalmente, destrepamos el muru per una malla anticaída de piedres pa dar a la carretera y tampoco vimos una meyor opción, anque creo que lo meyor diba ser, salir de Valdecreizales hacia'l Furáu, colláu que daríanos pasu a la braña la Cuesta, onde ya tranquilamente descenderíemos pel camín del seutor d'escalada, pero tendré qu'averame un día a comprobalu.

En resume, ruta permontañera, de camín duru, pindiu y abegosu a tramos pa l'ascensión y la baxada sólo apta pa xente motivao, con ganes d'aventura y de bregar pel monte. A nós, saliónos 16,5 km de percorríu con 1685 m de desnivel positivu acumuláu, nun total de 8 hores y media de ruta aprosimáu.