Fresneo (Quirós) - Pena Xerragallos

23 de Payares de 2013

Track: Fresneo (Quirós) - Pena Xerragallos

Dalgo avezáu nesti añu, ye xuntanos un bon garrapiellu nes salides del GM Xuan de la Borrina y na programada por Pangua nun diba ser distintu. Tocábanos dir hasta'l pueblu de Fresneo en Quirós, onde díbemos intentar una llarga ruta hasta'l Picu Barzanalgas.

Esti picu quedáranos nel tinteru va un par d'años (como pasa'l tiempu) cuando ficimos la Pena Sobia y la Siel.la y por mor del fuerte vientu, decidiéramos nun tentar a la suerte dexando esti cumal pa otra vegada dende la fastera quirosana envede la del conceyu Teberga.

Partimos del pueblu de Fresneo (574 m)

P'aportar a Fresneo, salimos dende Xixón pela autovía hasta Uviéu, saliéndonos pela A-63 a Grau, hasta'l desvíu pa Trubia. Llueu siguimos camín parando en Proaza a almorzar, pa siguir hacia Quirós, per Caranga Baxo, Caranga Riba,Valdemurio, Las Agüeras, Arroxo, La Fábrica y enantes de San Salvador, garramos a la mandrecha la carreterina que pasando per Faedo, déxanos a la fín en Fresneo.

Salimos caleyando pente ablucantes exemplares de castañales

El coche quedará unos metrinos enantes de la ponte col ríu Fresneo y dende ellí, saldremos a cruciar les cais del pueblu, pa tomar una pista pente grandes castañales, que fadrános pasar per Valdecastro primeru y baxo les Crespes, empobinaranos hacia les cabañes de Tabladiel.lo.

Xubimos hacia'l Collaón pasando pela braña La Felguera

Equí, una vegada que llibramos les crespes que baxen de las Peñas de Turiezo, ascenderemos per un rectu y pindiu camín, hacia'l Collaón pasando enantes pela braña La Felguera. Tol camín, ta siendo mui cómodu y gayoleru no falatible del día y aportamos a los 1089 m del Collaón con hora y media de ruta.

Dexamos atrás las Peñas de Toriezu viendo al fondu'l nuesu oxetivu: el Barzanalgas

Nun ye que seya que fuéramos despaciu, sinon qu'agüeyando la hora de partida de Fresneo, les diez y media, dábanos más bien, poques posibilidaes d'algamar el nuesu oxetivu, que ya teníemos a lo lloñe, demasiáu lloñe: el Barzanalgas.

Bordiamos el picu la Oxa, averándonos hacia la Pena Xerragallos

Cola vista puesta n'él y sin que la xente diérase cuenta de que nun dibemos llegar, siguimos un embarráu camín, bordiando'l picu la Oxa pela mandrecha, pal menos facer otru monte de la zona que tenía na tiesta, la Pena Xerragallos.

Pali pali, topámonos con más ñeve nel ascensu

Pasín ente pasu, vamos alcontrándonos con más y más ñeve, y lo que primeru yera pisar un pocu, acabó siendo facer buelga, pente una viesca de carrascos y demás árboles, cola cuerrespondiente griesca a bolones de ñeve.

Aportamos al cumal del Xerragallos con mala pinta pa la Sobia

Con casi otra hora y media de ñeve, dende'l Collaón, encumamos la Pena Xerragallos de 1379 m, lo que diz a les clares, que nun tuviemos poca cantidá y que'l camín y la gueta d'esti fízose más duro de lo camentáu.

Semeya de grupu na Pena Xerragallos (1379 m)

Claro ta, que según fuimos arribando al cumal, un tres d'otru, fuí-yos desplicando que diba costanos casi dos hores intentar el Barzanalgas y que viendo la hora, la una y media, y que taba zarrándose'l día no alto la Sobia, lo meyor yera completar la ruta faciendo una baxada circular pel otru llau del valle del Fresneo.

Decidimos baxar hacia la braña La Espina

Pa ello, baxamos al colláu contrariu al de xubida y de secute, siguimos descendiendo hacia la braña La Espina, onde aparte de xintar dalgo baxo la ñeve, pudimos facer unes semeyes bien prestoses coles sos cabañes y la viesca ñevao.

Facemos una preciosa travesía pela ñeve hacia la Braña'l Ríu

Magar de la xinta rápida, facemos quiciás la meyor parte de la ruta, siguiendo la buelga los corcios per una sienda que traviesa pente guapos exemplares de fayes y demás viesca autóutono. Ye una maraviya, esfrutar caleyando per un llugar tan máxicu, ivernal y si nun fuera por dir un grupu grande hasta solitariu.

Esfrutamos pela ñeve pente Las Varas y la Braña'l Ríu

Salimos de la viesca y xubimos un pelín al puertu Varas, onde hai una bona capa ñeve virxe, na que Kíla foza como una lloquina. D'esti colláu, baxamos a la guapa braña'l Ríu, más moza que l'anterior y con un usu ganaderu anguaño evidente.

Equí tuvi'l sustu del día, ya que ficimos la tontería de mirar si'l xelu de les llagunes yera consistente, y al tirar una piedra a Kíla, nun se-y ocurrió otra cosa que tirase a la llaguna, rompiendo'l xelu. Menos mal que salió solina, porque ya taba tirándome a por ella, jajaja.

Garramos pista hacia Las Morteras de Bustramonde

D'equí p'abaxo, baxaremos per una pista, despidiéndonos nel descensu, de la ñeve, del borrín y de la lluvia demientres, aportamos a las Morteras de Bustramonde. Nesti llugar, equivocámonos nuna de les sos envueltes y nun garramos el camín que naguábemos, ya que si seguimos pola pista, daríemos al pueblu de Faedo, teniendo que tragar un bon ratu carretera hasta Fresneo.

De Bustramonde perdemos el camín, pero alcontrámoslo de nuevu

Anque nel track igüé l'erru, nós siguimos un pelín más de pista, teniendo que travesar bona parte de los praos de las morteras de Bustramonde, pa tornar al camín bono, anque costónos nel intre, alcontrar un bon pasu d'una sebe al camín.

Baxamos per camín hacia los L.lamargones

Bien empobinaos, ficimos el restu de la ruta per bon camín, hasta'l prau de los L.lamargones, onde tres d'una cabaña, tocónos restolar la sienda bona, que pente un fayéu daría fadríanos descender bonos metros hasta otra pista que ya n'envueltes diríanos averando hacia Fresneo.

Garramos siendes pela viesca hasta'l camín hacia'l ríu Fresneo

Por una vegada, pude resarcime d'esa especie de creyencia que siempre faigo les rutes al debalu, ya que'l track que marqué penriba los mapes, llevónos defechu hasta'l mesmu coche faciendo una circular perfeuta, inclusu despistándonos nas Morteras de Bustramonde, jeje.

Fresneo coles peñes de Cotu Negru que baxen del Gurrión

En resume, anque nun pudimos da-y preste al Barzanalgas, quedámonos con otra cota de Proaza, el Xerragallos, faciendo un percorríu pela ñeve de casi 13 kms, durante 6 hores y 20 min con un ascensu acumuláu d'unos 920 ms.

Camudando'l Camín nel iviernu

Nesta primer toma contactu cola ñeve ficimos: la Pena Xerragallos (1384 ms) segunda cota de Proaza

Ver progresos en: Retos montañeros