L'Altu La Cobertoria (L.lena) - Bildeo - Brañavalera - Monte Mofusu

29 d'Ochobre de 2023

Track: L'Altu La Cobertoria (L.lena) - Bildeo - Brañavalera - Monte Mofusu 

Continuamos a la gueta de rutes pa tolos gustos, que vayan poniéndonos un pelín a tonu, que nun lo pase yo mui mal cola cadera y que de pasu, sírvame pa intentar conocer dalgo nuevo y tachar dalgún oxetivu de los miós llistaos, como ye nesti casu l'últimu vértice xeodésicu del conceyu de Quirós, como ye'l Picu Bildeo.

Pa ello, tamién voi repetir esta vegada, monte principal del día, col picu Brañavalera al que ya xubiera dende Tiós en solitariu va dellos años nuna ruta bien potente y guapa y tamién, averaríame hasta esti maraviyosu mirador, en plena carrera de Güeyinos del Diablu, aportando hasta'l cumal con una fundida física increyible.

 

Partimos del Altu La Cobertoria (1218 m)

Nel día de güei, un día preciosu con una lluz increyible, pero con un vientu fríu terrible, vamos salir hacia Brañavalera dende L'Altu La Cobertoria, poro, quedamos pa xuntar coches en Mieres del Camín y averámonos hasta la Cobertoria pel conceyu de L.lena, onde entamamos a caleyar cómodamente per pista con vistes al conceyu de Quirós.

 

Grandes vistes hacia'l macizu de Penubina y L'Aramo dende'l Picu Bildeo (1245 m)

Al pocu de facer los primeros 500 metros, abandono un ratín al grupu y voi restolar a la manzorga la pista, un senderu que seya a averame hasta'l vértice xeodésicu del Picu Bildeo. D'entrada alcontraremos sienda, pero llueu toca dir a lo xole penriba d'una pequeña traza pente escayos y felechos, una pena ya que les vistes de L'Aramo y de tol macizu de Penubina son bien guapes.

 

Continuamos camín pel L.lanu L.largu hacia Cua'l Puercu

Coles mesmes, torno a la pista de nuevu, más menos pel mesmu sitiu y sigo pista alantre pel L.lanu L.largu, siempre con unes vistes ablucantes del macizu Penubina, destacando la fastera del Güertu'l Diablu y la Pena Ruea en primer planu, p'atayar per pista hasta alcontrar al restu de compañeros aportando a Cua'l Puercu, puntu esautu onde aporta una pista dende la Qu-5, carretera que baxa hasta L.lindes dende la Cobertoria.

 

Ascendemos hacia'l Picu La Balsa descendiendo al mayáu de Brañavalera

Tol grupu reuníu y alloriáu col vientu, a la fín vamos bordiar el picu la Balsa pel L.lan de los Fresnos, siempre en fuerte pendiente, pero al abellugu'l vientu lo que fai esfrutar un pelín más del patéu pelas Chafarizas hasta'l mayáu Brañavalera, onde tornamos a sofrir la ventolera, pero con vistes de nuevu hacia la Ruea y la Foiz Grande que tan guapes alcordances nos traen.

 

Facemos camín hacia'l picu Brañavalera nun día rellumante de sol

Equí vemos un tramu de monte baxu pel que crestiar, pero nun tenemos munches ganes d'embardialanos, asína que siguimos pista pelos Porciles, caleyando con calma penriba val.le Zurea, hasta ganar de nuevu la parte alta de la Mortera de Brañavalera, onde ya atacaremos enmediu d'un furacán al cumal del picu Brañavalera.

 

Últimu esfuerzu pente'l vientu p'aportar al guapu cumal del picu Brañavalera

Aguantando l'equilibriu como podemos con raches perfuertes de vientu, facemos cumal nos 1483 m del picu, que nun mos va dexar esfrutar d'esti increyible mirador de tola fastera central astur. A dicir verdá, si un monte tendría merecíu ser cimeru d'Asturies, sedría Brañavalera pola dominancia en vistes que tien, pero por 5 metrinos nun algama la primer categoría.

 

Semeya de grupu en Brañavalera (1483 m) así de la manera col vértice y corriendo p'abaxo

Llueu de dos hores y media de patéu, nun tenemos nin mediu minutu d'aliendu y tenemos que colar del picu Brañavalera, descexado ascender a los cumales de la Pena L.lagu y Manolete, que ya conozo de l'anterior ascensión y descendemos pela mortera Zurea Cimera col envís de parar al sol, en dalgún abellugu a xintar un pelín y recuperar fuercies pal descensu.

 

Averámonos hacia L'Abedular col envís de conocer el monte Mofosu

Magar del descansu, continuamos descendiendo un pelín restolando una entrada hacia L'Abedular, una vallina que controlara pa descender hacia'l val.le Naveo, pero vamos charrando y pasámonos al Oxiegu la Zurea, otra vallina, pela que nun damos baxada y perdemos munchísimu tiempu a la gueta d'una baxada, por mor de lo zarráu de la viesca y el bardial, poro decidimos tornar un pocu so los nuesos pasos, ya intentar pasar a la vallina contigua, enantes de tener qu'ascender unos 300 metros de desnivel pa tornar a la Mortera de nuevu.

Somos a alcontrar una traza llateral y pasamos a la vallina que tenía marcada penriba'l mapa, alcontrándonos con que yera muncho más transitable per un fayéu más llimpiu, pero dempués de perder casi hora y media pela otra, decidimos, siguir en traviesa hacia un camín que vemos nel mapa, na fastera d'Ordás.

 

Algamamos un pelín d'esfrute pela viesca Mofosu con muncha aventura travesando riegues

Nel track, déxovos la baxada pela vallina correuta que tenía preparada, pero sabéis que ye tarrén d'aventura, como así lo vivimos travesando un par de riegues, nel que tuvimos qu'alcontrar pasu, hasta ya dar al camín n'Ordás, alcontrándonos colo qu'a primer vista paecía un camín madereru, ameyorando pali pali hasta alcontrar una pista más modernes, hasta atopar les primeres bocamines de lo que yera la mina Julita, parada non va munchos años atrás.

 

Salimos per pistes del monte Mofosu p'algamar de nuevu la pista hacia la Cobertoria

Atrás dexamos les ansies de conocer tol valle Naveo hasta'l pueblu de Tablao, que tendremos de dexar pa otra ocasión, pero tenemos que ser consecuentes col tiempu de lluz que teníemos, asína que facemos los últimos pasos de pista pel monte Mofosu, con un puntu feliz d'ésitu por nun tener que dar vuelta hasta Brañavalera casi, empatando cola pista nel L.lan de los Fresnos, pela que ya caleyáremos unes hores enantes.

 

 Aportaremos de nuevu hacia L'Altu la Cobertoria coles últimes lluces casi

Dende equí, tendremos ya menos d'una hora de nuevu hasta la Cobertoria, aportando a los coches coles ñubes metíes y con non munchu tiempu de lluz, lo que diónos a entender la bona decisión que tomamos, al nun seguir baxando hacia Naveo, pero bono, personalmente siempre quédame una espinina, porque mió estáu físicu, faime pensar más en non tener munchu dolor qu'en tar atentu al trazáu que tenía en mente, pasándonos de vallina por dir caleyando cómodu pelos praos de la Mortera Zurea Cimera.

En resume, algamamos una circular a Brañavalera distinta, anque nun yera lo planiáu que túvonos bien entreteníos durante 6 hores de camín, con un total d'unos 16 km aprosimáu y un desnivel de +/- 750 m, anque nun cuento les munches vueltes que dimos pel Oxiegu la Zurea pa pasanos a L'Abedular... tornaremos de xuru a non mui tardar, pa conocer el restu'l valle.

Camudando'l Camín n'arba pente Quirós y L.lena