Tarna (Casu) - Tabayón del Mongallu

19 d'Abril de 2015

Track: Tarna (Casu) - Tabayón del Mongallu

A finales de marzu y l'iviernu sigue en plena forma n'Asturies... el nivel de ñeve baxó muncho, pero camiento que nun tolo necesariu pa facer la ruta que teníemos na tiesta: Peña Ten dende la Uña en Llión.

Con esi envís saliéramos de Xixón bien ceo pela autovía minera, saliéndonos al corredor del Nalón como ye vezu, travesando Llangréu, Samartín del Rei Aurelio, Llaviana y almorzando nel chigre de Rusecu en Sobrescobiu.

Magar del cafetín, siguimos alantre travesando'l conceyu de Casu, pasando pelos pueblos del Campu, Bezanes, la Foz entre otros empobinándonos hacia'l puertu Tarna, onde delles envueltes enantes, pónese a trapiar quedando ablucaos dafechu.

Salimos del pueblu casín de Tarna (1017 m)

Aún asína, baxaremos hasta la Uña, echando un vistazu hacia Peña Ten, viendo que yera imposible aventurase hacia aquella fastera dende Llión, onde tamién el tiempu andaba revueltu como pa tal xera.

Con esti ruxerux na mollera, por mor del madrugón pa na, xubimos hasta'l puertu de nuevu, onde alcuérdome qu'entá nun conozo'l Tabayón del Mongallu. Ensín más, ya tenemos dalgo que facer... una rutina curtia que si-y da por chubasquiar al menos nun mos moyaremos durante munches hores.

Caleyamos per pista formigonada hacia'l valle de la Requexada

Preparámonos y salimos pel marcáu PR, pente les cais de Tarna, pueblu d'entamu de la ruta, empobinándonos per una pista formigonada hasta'l desvíu pente'l Llanu'l Toru y el Tabayón del Mongallu.

El día sigui murniu, pero tien ciertu rellumu'l cielu, dándonos un pelín d'esperanza pa non acabar pingando. D'esta miente, siguimos caleyando, esfrutando del mugor, la humedá y el verdor d'Asturies nesta dómina del añu, na que los fayeos nun tan nel so másimu esplendor, pero les canes desnudes tamién tienen el so puntu de guapura.

Pasiamos pel fayéu de les Cabanielles

Travesaremos la riega la Requexada nuna envuelta pel so valle y ascenderemos al fayéu de Cabanielles, onde la ruta algama les cotes quiciás más grandes de relaxación nun llugar con tanta belleza.

Namái, la visión del Tabayón del Mongallu, a lo lloñe al final de la viesca, faínos salir d'esa especie de trance que ye caleyar nestes viesques autóutones asturianes. Tamos ante una de les cayides d'agua más impresionantes d'Asturies y amás el momentu ye perfeutu por mor del desxelu avanzáu de los montes.

Ensín perder de vista'l Tabayón del Mongallu (monte de gallos monteses), baxaremos hacia la Campona, mayáu que caltien delles construcciones ganaderes, pa llueu ascender per un guapu senderu hacia la base del saltu.

Col tabayón a la vista... averámonos pela Campona

Nun conocía'l Tabayón a estes altures y nun me defraudó n'absolutu. A vegaes, el tiempu quítanos unes coses y ufreznos otres, anque seya faciendo una ruta muncho más sele y curtia de lo que teníemos preparáu.

En resume... ruta imprescindible pa cualesquier senderista, na que caleyaremos per viesques ablucantes col toque final del tabayón del Mongallu, que si lu conocemos en dómina d'agües n'Asturies sedrá más espeutacular si cabe.

Y too ello, pol módicu preciu de caleyar durante 3 hores aproximáu, un percorríu de 9 km y superando tan sólo un desnivel d'unos 400 ms d'acumuláu.

Que vos preste!!

Camudando'l Camín nel Tabayón del Mongallu