Cabruñana (Grau) - Picu Sollera

6 Ochobre de 2024

Track: Cabruñana (Grau) - Picu Sollera

Continuamos desesperaos coles previsiones meteorolóxiques, abortando una ruta potente pal sábadu, por mor de les condiciones que nun se cumplieron y preparamos entós, pal domingu una mini ruta por dar un paseín nuna supuesta ventana mañanera, que tampoco cumplióse. Ye dicir, alcontrámonos con un día brutal de sol, cielos espeyaos, pero ensin dar tiempu pa preparar dalgo más potente, pues siguimos adelantre col plan.

Salimos de Cabruñana (355 m) nel conceyu de Grau

Asina pues, quedáramos en Grau p'almorzar cola calma, viendo'l día guapu que teníemos y siguimos en coche hasta Cabruñana, onde díbemos tener el nuesu puntu de partida. Preparámonos y saldremos caleyando pel Sampedru, pasando al llau d'un llavaderu pa continuar per pista, per una viesca bastante guapa que tien de dexanos nel colláu de L'Ascura, baxo la faldera del picu Subarrionda.

Ascendemos hacia L'Ascura onde tendremos crucie de caminos

Dende equí, ya tendremos cláramente vistes hacia'l nuesu oxetivu, el picu Sollera, que ta estráu de pistes madereres, pudiendo escoyer una más direuta o como nel nuesu casu, siguiendo la principal a la mandrecha, pa llueu facer una envuelta a esquierda pa enllazar más tarde cola direuta. Nesti puntu, andábemos arrepintiéndonos de nun preparar dalgo más curioso a facer, porque'l día taba siendo brutal, pero ya nun quedaba otra que caleyar allégremente y pensar en dir a tomar el vermú.

Siguimos camín empobinándonos hacia les antenes y vértice del Picu Sollera

Con pocu más, aportaremos a la cumera'l monte, pudiendo esfrutar d'amplies vistes de tola redolada, ya seya pa la Degollada o pa los caberos montes visitaos hacia'l conceyu de Miranda, como'l Pedroriu o el Couríu a la boquera'l valle. Desviarémonos unes decenes de metros de la pista, pa sacar la semeya nel vértice xeodésicu del picu Sollera (606 m) y decidimos continuar ya que nun tenemos muncho más que facer, nun monte que cláramente ye munchu más atrautivu pa facer en bici de monte.

Cume del Picu Sollera (605 m)

Cola mesma, siguiremos pista en direición norte, algamando vistes hacia la mar y más en concretu, hacia la desembocadura del Nalón y fadremos un xiru de 180º hacia'l Candanón, pa siguir faldiando pel monte la Solana de nuevu, hacia'l colláu L'Ascura, onde esta vegada sí, vamos ascender al picu Subarrionda, onde atopamos antenona y cabaña forestal de tiempos d'antaño.

Volveremos pel monte la Solana p'ascender al picu Subarrionda

Dende Subarrionda, descenderemos per un cortafueos bastante pindiu, que va facenos xubir un pequeñu entepechu hasta'l picu Valdrín, onde garraremos un camín a la manzorga, per Tresvaldrín, que va dexanos a posteriori nos Carbaínos, onde ya toparemos pista más amplia hasta aportar a un area recreativa, pelín en desaniciu en la Regueirina.

Baxamos hasta Valdrín pa descender hasta l'area de la Regueirina y tornar a Cabruañana

Dende la Regueirina ya per camin asfaltáu, entraremos de nuevu pela Campa Riba a Cabruñana, onde piesllamos esta pequeña circular de 2 hores y 45 minutinos, que súponos a poca cosa, viendo'l día que tuviemos, ya que los 10 km de percorríu y los +/- 340 m de desnivel, casi nun mos dió, pa gananos el vermú.

La prósima... más y meyor