martes, 28 de octubre de 2014

Xuntanza Asturvasca 2013 - 2014

17 y 18 de Mayu de 2014

Una xuntanza más y van 4 años siguíos, anque esta vegada retrasámosla de la dómina ivernal a la primavera, por mor de los munchos compromisos que'l club Alpino del Baskonia tenía nel so centenariu.

Acoyonante qu'un grupu montaña algame una cifra d'años tan espectacular y ye que 100 años, son munchos años, amosando la tradición vasca montañera y nesti casu la gran afición qu'hai al monte nel pueblu basauritarra.

Mui a gustu na casina rural que recomendónos Naciu'i Riguilón

Esti añu tocaba xuntanos n'Asturies y decidimos visitar ún d'esos conceyos que siempre namora cada vegada qu'avéreste hasta ellí: Somiedu. Poro la Xuntanza Asturvasca (Eusko-Astur Biltzarra) 2014-2014, diba llevanos a facer un par de rutes tomando como campu base, el pueblu del Val.le, capital turística de Somiedu.

Dende equí dar les gracies a Naciu, rexente del Hotel Rural Somiedu qu'aparte de proporcionanos la casa rural pa facer la xuntanza, preparónos mui bonos almuerzos pa enantes d'entamar les rutes de monte con tola amabilidá del mundiu.


Sábadu 17 de Mayu 2014:

Viendo'l madrugón descomunal que tendrían de pegase los collacios vascos, el vienres prefirieron facer el viaxe hasta Somiedu, aprovechando la estancia na casa rural, xuntándonos toos el sábadu a la puerta de la casa.

Semeya de grupu nel Val.le en Somiedu

Dende Euskadi vendrían Fernan, Bittor, Amaia y Juanan, siendo los asturianos: Carlos, César, Paulina y yo, dando la mayoría vasca Haritz, anque ya tien muncho d'asturianu, así que podríemos dexalu nun empate, pa esti primer día de xuntanza montañera.

Val.le (Somiedu) - Pena L.lana

Magar de facer la guapa ruta a la Pena L.lana, baxamos hasta'l coche duchándonos por turnos mientres tomamos una cerveza. Llueu, preparamos parte de la cena de cara a poder ver el final de liga pente l'Atlético y el Barça con tola tranquilidá y munches rises.

Cola vitoria del Atlético, tiramos de nuevu pa la casa, onde cenamos unos cachopos de restallu que fizo Paulina, hasta que'l cuerpu ya nos pidió dir pal sobre, qu'al día siguiente teníemos otra ruta qu'anque más curtia tamién tenía un bon desnivel a superar.

Domingu 18 de Mayu 2014:

Al día siguiente, llevantámonos y vamos almorzar hasta'l Hotel Rural Somiedu, p'agradecé-y el tratu a Naciu y despedínos d'él, ya que teníemos por delantre la siguiente ruta de la Xuntanza y diba facese dende El Puertu de Somiedu.

Semeya de grupu n'El Puertu Somiedu

Poro, baxaremos del Val.le hacia la Pola Somiedu y dende ellí, xubiremos con calma pal Puertu, onde alcontrámonos los mesmos participantes de la Xuntanza con Pangua, qu'animóse a facer al menos una de les rutes d'esti fin de selmana.

El Puertu (Somiedu) - La Penouta

Con otru día ablucante de bon tiempu, esfrutamos de la ruta pa dempués xintar nel Hotel El Coronel, onde pusimos puntu y final a una Xuntanza Asturvasca atípica pola dómina na que la ficimos, pero que resultó de lo más prestosa como tolos años.


Como tolos años, quedamos naguando pola siguiente que tocaría esta vegada n'Euskadi... esperemos que seamos a organizala un añu más...

Xente astur: Carlos, Pangua, César, Paula y Berto.
Xente vasco: Amaia, Juanan, Bittor, Haritz y Fernan.

No hay comentarios:

Publicar un comentario