Figares (Morcín)

5 de Payares de 2023

Vuelve la temporada de Figares, escasa temporada d'esguilada en Figares, que fai enllenase esti maraviyosu seutor demientres los 3 meses y mediu nel que por mor de regulaciones dafechu inxustes y desmedíes, queda zarráu esti seutor por utre y digo por utre, ya que la zapiquera, tien una regulación menor y ye munchu más controlable.

A la escontra, tamos antes una creciente comuna utrera en Figares y en xeneral en Morcín, lo que ye evidente a cualesquier llugar que vayamos a esguilar, pasiar o visitar del conceyu, por estes regulaciones nun tienen xacíu dengún, ante l'aumentu y el total pasotismu d'estos increyibles animales ante la presencia humana.

 

Baxando al muru Este del picu Figares

El casu ye qu'esti añu, sí que diónos un pocu más por volver hasta Figares, ya que nel añu 2022 diónos tanta pereza que malpenes dimos unos peguinos a dalgún posible proyeutu pero vímosla lloñe y nun fui a motivame lo suficiente pa enfrentame al Promontorio, coles ganes necesaries, asina que llimpiela una vegada más, pero nun-y dí siquiera unos pegues decentes y con motivación.

Dando unos peguinos pal encadene de Paseo Vertical con Suco y Rubén

Esti añu, teníemos dos grandes motivaos del seutor, como yera Anna que dexara Masterchimi l'añu pasáu vista pa sentencia dempués de facer Oficial del Metal y Dani, que probó Kiluxa y namoróse, dexando pa prau Paseo Vertical, na que la rotonda brutal qu'hai que facer pa facer los pasos, nun-y motivó lo suficente pa continuar proyeutándola.

Personalmente, nun sé mui bien por qué, vila factible y púnxeme más en serio con ella, tanto pa controlar bien los pasos duros, como pa controlar meyor si cabe los pasos sicolóxicos ya que'l vuelu llateral ye pocu apetecible y cuando entamé a dar pegues d'encadene na parte más lloñe de la llínea de chapes había que dir por railes cláramente.

Anna en Masterchimi y Santos en Oficial del Metal

 

Al final, tanto Dani como yo, fuimos a encadenar dambos proyeutos (Kiluxa paecióme mui dura pa esti añu (7c+)), quedando nel mió casu, Paseo Vertical de 7b+, ya que nun me paez que llegue al 7c, a non ser que fuerces los pasos per unes regletes rascaes, cuando ties a mediu metru a la drecha cantos más agradables. 

Pa estes coses, suelo siempre apuntame les víes de lo que me paecen y nesti casu, faciéndola pero onde yo la fice, nun pueu apuntala de 7c, porque nun llega. Sicasí, la vía ye guapa, anque pa mi idega nun ta equipada per onde la llinea ye más evidente, pero bono, una menos, que dedicámonos a esguilar linees y non graos.

 

Apuraremos lo que queda de temporada pa tener más tocada dalgún otru proyeutu y si esti añu faise una regulación menos salvaxe estiraremos la temporada hasta onde se pueda, sobretou esperando qu'Anna pueda encadenar Masterchimi cola que lleva una llucha contra la vía y coles condiciones de moyaura de les sos chorreres.

Figares
 
Croquis de la escuela d'escalada de Figares, por mor de la Asociación de Escaladores Astur Vertical. Gracies y col so permisu.  

-----------------------------------------------------------------------------

L'Altu La Cobertoria (L.lena) - Bildeo - Brañavalera - Monte Mofusu

29 d'Ochobre de 2023

Track: L'Altu La Cobertoria (L.lena) - Bildeo - Brañavalera - Monte Mofusu 

Continuamos a la gueta de rutes pa tolos gustos, que vayan poniéndonos un pelín a tonu, que nun lo pase yo mui mal cola cadera y que de pasu, sírvame pa intentar conocer dalgo nuevo y tachar dalgún oxetivu de los miós llistaos, como ye nesti casu l'últimu vértice xeodésicu del conceyu de Quirós, como ye'l Picu Bildeo.

Pa ello, tamién voi repetir esta vegada, monte principal del día, col picu Brañavalera al que ya xubiera dende Tiós en solitariu va dellos años nuna ruta bien potente y guapa y tamién, averaríame hasta esti maraviyosu mirador, en plena carrera de Güeyinos del Diablu, aportando hasta'l cumal con una fundida física increyible.

 

Partimos del Altu La Cobertoria (1218 m)

Nel día de güei, un día preciosu con una lluz increyible, pero con un vientu fríu terrible, vamos salir hacia Brañavalera dende L'Altu La Cobertoria, poro, quedamos pa xuntar coches en Mieres del Camín y averámonos hasta la Cobertoria pel conceyu de L.lena, onde entamamos a caleyar cómodamente per pista con vistes al conceyu de Quirós.

Ruil.lazo (Los Argüeyos) - Picu Correciellas

21 d'Ochobre de 2023

Track: Ruil.lazo (Los Argüeyos) - Picu Correcillas

Dempués de los díes de patéu per Somiedu, descansábemos quince díes y volvíemos al monte, con una meteo dafechu distinta al calor que pasamos de daquella. Esta vegada, tenemos un día serondiegu, fresquín enforma y col golor esi de les primeres ñeves nel ambiente, tanto que según vamos conduciendo hacia Llión, acolumbramos esi mantu blancu na parte alta de los cumales del macizu de Penubina.

Atrás quedara l'almuerzu en Mieres del Camín, onde xuntamos coches, conduciendo pel Puertu Payares alantre, hasta Vil.lamanín, onde saldremos hacia Cármenes primeru y llueu hacia la fastera de Vegacervera, desviándonos hacia'l pequeñu pueblín de Ruil.lazo, onde tendremos el nuesu puntu de partida.

 

Partimos de Rodillazo (1315 m) nos Argüeyos

Tamos en mediu d'un mundiu de montes llioneses del Cordal Cantábricu y sincéramente, tovía perdémonos un pocu, ya que nestos años, patiamos Asturies con xeitu, pero darréu, vamos intentar conocer meyor esta Asturies Cismontana y nesta fastera, la cantidá de montes de gran valir son ablucantes: Bodón, Buicioso, Valdhorria...y el nuesu oxetivu el picu Correciellas o Polvoreo.

Valdolayés (Santu Adrianu)

11 d'Ochobre de 2023

Una tarde soleyera, de camín a Teberga, diónos por parar por Santu Adrianu a la gueta d'un pelín de solombra pa trepar y de pasu, conocer esta escuelina, a la que tovía nun ficiera denguna visita, pese a descubrila nuna ruta circular polas Xanas a Pedroveya con baxada pela senda Valdolayés dende Dosangu.

El muru dafechu cara norte, tien un pateín non mui llargu dende la carretera que xube al Altu Tenebréu, poro ye perfeutu pal branu, pudiendo pasar casi un día enteru d'escalada ensin esmolecese pola solana, pero nel nuesu casu, ya llegábemos pelín tarde y entraba'l sol, anque pa facer unos llarguinos cenciellos valíanos de sobra.

Vista de les muries dende la senda Valdolayés

Con un calufa importante, fola de calor a entamos d'Ochobre, que puede salir mal, aportamos al seutor y metémonos a probar un par de 6as (Pluma Roxa y Terpsicore) cortinos, que facemos ensin problemes, pero pasando calor, asina qu'echamos un vistazu al seutor y decidimos conocer l'otru murete de placa a la manzorga del principal.

Aportaremos hasta la placa de la manzorga y Silvia quería apretar un pocu más, pesie a la mala pinta de la vía, métese a Rasputina (6b), un diedru pelín suciu que nun daba muncha seguridá, ya que veo dellos bloques sueltos que nun presten res y ye que cuando vienes de currar tol branu nun seutor y mires delles equipaciones, quedes un pocu pensando, sinon espublízase dacuando demasiáu ceo.

Tarde rápida de trepada per Valdolayés nos dos seutores

Facemos la vía con más mieu que vergoña, con tol diedru enllenu tierra y dalgún bloque que movíase y cola mesma recoyemos tol material, quedando con una sensación pelín probe del seutor, alcordándome un pelín de la última visita al seutor Frae de Baíña, nel que tamién alcontramos muncho que sanear en delles víes.

D'esti xeitu, desfacemos camín hacia los coches, cola idega de da-y una segunda oportunidá a esta escuela ya que'l primer tastu nunca puede ser la referencia final, sicasí, otra escuelina más pa Santu Adrianu con Buyera y Villanueva.... asina que volveremos.

La Senda (Proaza)

Hestoria d'esta escuela de Proaza

Ya ficiera años que conociera esta escuela, pero tamién durante esos años, a pesar de meteme en tou tipu de víes, nun me suelen prestar muncho les víes desplomaes y físiques. Aparte del mió amor por Morcín, que llévame día a día, a moveme mui pocu a otros llugares d'Asturies a escalar, poro les visites a esta escuela del escobiu de Penas Xuntas, fueron mui esporádiques y pocu motivantes.

Sicasí, nos últimos tiempos, por mor d'acompañar a Orlando a la gueta del encadene de su máximu proyeutu, la Berriada (8a), averéme hasta ellí nunes mañanes de vacaciones y dalguna tarde braniega, col envís d'aseguralu, más que de esguilar con ciertu xeitu motivante y muncho menos d'abrir dengún proyeutu curiosu.

Vistes de las Placas de la Senda

 Poro, la primer tarde, ensin tener nin ganes de trepar, ya que venía d'esguilar de mañana en Baíña, aportamos hasta'l seutor, preparándose pa dar un pegue Orlando, llueu de calecer deos nun 6b a la manzorga, que ya ficiera va dellos años (Era Fea). Pente medies, monté sofriendo pol calor, el primer llargu de Güelos Free (7a+) que ya probar en 2021 y al segundu pegue, cuando ya baxara'l calor na roca, pude llevámela ensin muncho sufrimientu.

Vía mítica de la Cueva de la Senda

 Dos díes más de mañanéu pasé per ellí, ún d'ellos con Dani y Tolo tamién, yendo ya direutamente a lo que más me podría motivar, como son unes plaques llargues a la mandrecha'l seutor, les que realmente sí que me prestaron pola vida y eso que'l primer pegue, yera a cepillu y mediu matándose de lo pocu feches que tan estes víes. El resultáu, pues llevame al segundu pegue dos rutones 5 estrelles de 7a (Viento en Popa y la Senda del Oso)

 

Tolín probando la Berriada na Cueva

La verdá ye que prestáronme muncho y quedé con ganes de prebar más, ya que queden otres 4 víes pente 7a+ y 7b, que toi naguando por cepillar y tastiar, ya que tienen munchísima calidá, anque claro, veo que la xente vien al desplome y chorreréu y queden nel escaezu plaques de 40 metros, rutes 5 estrelles dafechu y ye una pena, asina que si vuelvo, tengo claro en que voi meteme.

Ta la prósima...

Pigüeces (Somiedu) - Picu'l Rubiu

1 d'Ochobre de 2023

Track: Pigüeces (Somiedu) - Picu'l Rubiu

Alborecemos una vegada más en Viḷḷar de Vildas, nel conceyu Somiedu, cola idega de zarrar los cuatru díes de monte, baxando un pelín pel vaḷḷe'l Pigüeña, hasta'l pueblu de Pigüeces, onde quedamos con dellos componentes más del grupu monte. Atrás quedaron, tres díes perbon monte, meyores fartures pa cenar y unes sensaciones non tan males como albidraba, pa llevar alantre la temporada montuna.

Pente pitos y flautes, retrasámonos un pocu, recoyendo y almorzando y cuando llegamos a Pigüeces, ya lleven un ratín esperando los collacios, xuntándonos pa la semeya a la entrada'l pueblu y entamando a caleyar peles sos cais a les 10 y media la mañana.

Partimos del pueblu de Pigüeces (625 m)

La ruta de güei va llevanos a ascender el Picu'l Rubiu, siendo esti cumal, l'últimu vértice xeodésicu de Somiedu que quédame per conocer. Esti monte, enmediu d'un tarrén bien xabaz de Somiedu ye un gran mirador y la so circular ye perfeuta pa una mañana, asina que saldremos con xeitu caleyando hacia la braña Pigüeces.

Viḷḷar de Vildas (Somiedu) - Vaḷḷinona - Páramu - Moscosu - Pornacal

30 de Setiembre de 2023

Track: Viḷḷar de Vildas (Somiedu) - Vaḷḷinona - Páramu - Moscosu - Pornacal

Alborecemos en Viḷḷar de Vildas nel conceyu de Somiedu y alborecemos con tol grupu de monte Xuan de la Borrina, que xúnese a Miguel, Mario y yo, que llevamos un par de díes ya de pateos. Alborecemos sí, pero malamente, ya que la fartura riquísima de la nueche anterior, pasó a dellos chupitos, birres... hasta les mil col cocineru'l chigre, así qu'alborecemos pero de la manera.

Lo más cenciellu, diba ser, siguir durmiendo y que faigan la ruta los demás, pero dempués de preparar la ruta y ver que'l cadril, al menos, déxame patiar durante dos díes, había qu'intentar siguir col proyeutu ya intentar compartir una ruta toos xuntos, anque fuera de resaca.

 

Partimos un día más de Viḷḷar de Vildas (860)

Saldremos entós, sobre les diez y media la mañana, peles cais del pueblu, valle Pigüeña alantre, al igual que ficiéramos el día anterior, pero esta vegada na puente Los Cotaos, vamos tomar el ramal esquierdu durante unos metros, pa dexar la pista que sigue a la Pornacal y metenos dafechu na Braña L'Acebu, pela que fadremos delles amplies envueltes, enantes d'entamar un pindiu ascensu pegaos a los parés de la Pena la Furada.

Viḷḷar de Vildas (Somiedu) - Busteḷḷín - Fanarrionda - Lḷau Bonu - Ferviḷḷín

29 de Setiembre de 2023

Track: Vil.lar de Vildas (Somiedu) - Bustel.lín - Fanarrionda - L.lau Bonu - Fervil.lín

Continuamos pel conceyu de Somiedu, afitando'l campu base nel vaḷḷe del Pigüeña y más en concretu nel pueblu de Viḷḷar de Vildas, onde ya va munchos años ficiéramos un par de rutes al Cornón y al Cogoḷḷu Ceboḷḷéu que punxeran daquella, na llende, les nueses capacidaes físiques montunes, siendo rutes mui llargues tanto en kilómetros como en desnivel.

Pal segundu día de monte, dempués del patéu y ascensión al Monegru, Miguel decide descansar, a sabiendes de lo que teníemos per delantre y Mario, que llega con bien de ganes de conocer ese Somiedu desconocíu, preséntase al almuerzu pa tomar un cafetín y preparámonos pa salir sobre les diez y media la mañana.

 

Partimos de Viḷḷar de Vildas (858 m) nel Pigüeña

Tamos nuna selmana de fola de calor, pero'l día ta fresquín de momentu, asina que salimos caleyando pel valle'l Pigüeña alantre, como si fuéramos hacia la nomada braña de la Pornacal. Bien ceo, al altor del puente Los Cotaos, vamos garrar el ramal drechu, ascendiendo nun primer momentu per pista formigonada, pasando a camín de tierra llimpiu nun primer momentu, hasta alcontranos col camín pelín tomáu, penriba los praos previos al Castru, onde tenemos un animáu alderique con un vecín de Viḷḷar.

Penriba'l Castru del cuetu Tabláu, alcontrámonos con una pista en perbon estáu que vien dende'l puente Francibín y que ya ensin dengún problema, va llevanos al traviés d'un preciosu fayéu, hasta la braña'l Busteḷḷín, onde llueu d'una hora de camín, esfrutaremos de les cabañes de teitu vexetal con vistes al picu Fanarrionda, munchos metros d'altor penriba nuesa.

Las Morteras (Somiedu) - Pena L'Home - El Monegru - Clavichas

28 de Setiembre de 2023

Track: Las Morteras (Somiedu) - Pena L'Home - El Monegru - Clavichas

Selmana de vacaciones y dempués de probame na primer ruta de la temporada en L.lena, nel Curul.lu Braña, díbemos intentar dar un pasu más y facer varios díes de monte per Somiedu. El plan yera quiciábes mui ambiciosu pa mi estáu físicu, pero dempués d'unos díes d'escalada, ya tenía ganes de patiar nestes vacaciones, asína que'l primer axuntámonos Miguel, que vien dende Soria a pasar unos díes y yo, col envís de conocer un pelín meyor, la fastera somedana del Altu San L.lorienzu.

Partimos del pueblu de Las Morteras (645 m)

Pa ello, quedamos cola calma na Riera y viendo que tenemos tol día per delantre, vamos hasta la Pola a almorzar y baxamos de nuevu hasta la Riera, pa xubir esta vegada hacia L'Altu San L.lorienzu, parando nel pueblu de Las Morteras, onde tendremos el nuesu puntu de partida pa la ruta. Poro, preparámonos y a les 12 la mañana, entamamos a caleyar pentes les cases del pueblu, pa siguir camín hacia Fontagallos  primeru a la solombra pa dempués salir a tarrén más abiertu de monte baxo pela Cantullada.

Baíña (Mieres)

27 de Setiembre 2023

Más d'un añu ensin pasar per Baíña a esguilar y eso que dende munchos seutores de Morcín, siempre tenemos enfrente varios de los seutores al otru llau del rigu Caudal, que tan escaeciéndose poquín a pocu, pesie al intentu de varios escaladores de recuperar y remozar dellos de los seutores.

Ún dellos, ye'l seutor Frae de Baíña, el primeru de los seutores dende'l pueblu de Baíña, al que volvimos más d'un añu dempués y al qu'alcontramos l'averamientu tomáu enforma, al igual que los pies de vía y eso que ye un seutor remozáu va menos de dos años y nel que nun esiste restricción por añeramientu, como si qu'esiste n'otros seutores d'esta fastera.

Los perretes a la solombra'l paré

Sicasí, fuimos a aportar al seutor, dándonos tiempu a facer un par de víes na fastera oeste del seutor, onde entramos a Bloques en los cogotes, un V+ que pude sanear na parte alta, ya que faciendo honor al so nom, tuve que tirar tres morrillos bien peligrosos, asina que cascu mui encomendable nesti seutor.

 

Andrea prebando la meyor vía que tastiamos na paré occidental del seutor

Siguiendo con esta fastera, pudimos probar, Andrea, Marta y yo, la meyor vía no poquísimu qu'escalé nel seutor Frae, como fue Que ha fluido, un 6b con pasos en babaresa, mui guapu y con muncha meyor calidá de roca que'l V+ anterior, enantes de que ya'l sol ficiese actu de presencia y tuviésemos que pasar a la fastera Este, onde ya teníemos la solombra presente.

 

Vistes al Llusuriu dende'l seutor Frae nun día soleyeru bien guapu

Nun tenía munchu tiempu más, asina que siguí un pelín más col orde que llevaba de va un añu, dándome tiempu a encadenar un 6a (Insierto), quedándo-yos montada a Andrea y Marta, que siguieron esguilando demientre yo baxaba a Baíña a xintar un pinchín y tirar pa Proaza a facer sesión de tarde.

La verdá ye que dame muncha pena, ver seutores mediu perdíos en tan pocu tiempu, tan sólo porque toca dar un patéu más llargu de lo que tamos avezaos, anque hai que dicir que la calidá de la roca nes poques víes que probé, nun yera la meyor, asina qu'intentaremos da-y dalgunes oportunidaes más, a ver si paga la pena o non, el caltenimientu d'esti seutor.

Baíña (Seutores visitaos)

Croquis de la escuela d'escalada de Baíña, por mor del club d'esguilada Asturvertical. Gracies y col so permisu.

-----------------------------------------------------------------