Isoba (Porma) - Runción - La Raya - La Guaría - Entrevados

17 de Marzu de 2025

Track: Isoba (Porma) - Runción - La Raya - La Guaría - Entrevados

Dempués del repunte ivernal de Marzu, con díes mui fríos y ñeve, teníemos ganes de facer dalgún cumal col mantu blancu, asína que cola previsión perfría que teníemos, tampoco quiximos dir mui lloñe, poro averámonos hasta Isoba, na comarca del Porma, pocu más alantre del Puirtu Braña, a la gueta d'un monte cimeru de la Cordelera Cantábrica, el Runción.

Esti hermanu menor del Peñón San Justo, ye un gran escaecíu, nesta fastera, de grantes montes ivernales en tola redolada, asina que rescatámoslu d'esi escaezu y preparamos una circular prestosa dende'l Llagu d'Isoba, al qu'aportamos cayendo dalgún falisgu, demientres garramos la mochila y abrigámonos pa salir a caleyar.

Partimos del Llagu d'Isoba (1415 m) col día bien prietu

Llueu de la semeya col llagu y el picu Runción al fondu, salimos per camín que va hacia la mina San Andrés y bien ceo vamos abandonala pa garrar l'arista Oeste de la xerra de las Porracas, entamando una sele ascensión, un pelín abellugaos del vientu pela fastera norte, algamando guapes vistes del llagu d'Isoba.

Obar (Cabrales) - Las Palancas - Cabeza Polvorosa - Tordín - Camba - Cabeza Sonllanu - Sotres (Cabrales)

10 de Marzu de 2025

Track: Obar (Cabrales) - Palancas - Polvorosa - Tordín - Sonllanu - Sotres (Cabrales)

Colos díes más llargos y el cadril con más fuercia cada día, tocaba probase un pelín más y aprovechando que tenía a dellos collacios per Cabrales, decidí poner ruta pa esa fastera, anque finalmente, nun pudo venir muncha xente a facer esta guapa travesía pente Obar a la vera'l Cares y el pueblu de Sotres.

Los motivos cimeros d'esta ruta, yeren dos defechu, conocer el nomáu Aventón de las Palancas, un kilómetru vertical dende Obar hasta Portudera pa entamar la ruta y al final d'ésta, ascender a la Cabeza Sonllanu, ún de los últimos Montes Cimeros de Picos, que fáltenme por conocer de segunda categoría y que sorprendióme poles vistes tan guapes que tenía.

Entamamos nel aparcaderu d'Obar (210 m)

Alborecemos n'Arenas prontín, llueu de pasar la tarde del sábadu, tomando dalguna cervecina y cenando pal día siguiente a les 9 la mañana tar almorzaos, asina qu'averámonos hasta l'aparcaderu d'Obar, Pepa, Rubén y Naiara, guardesa del refuxu del H.ou de Cabrones, qu n'esta vegada va xunísenos pa conocer esta guapa travesía.

Preparámonos nel aparcaderu, coles meyores gales y miramos p'arriba del nomáu Aventón de las Palancas, kilómetru vertical que toma nome de la parte alta de la canal, tamién conocíu como Ardalomba pelos de Tielvi. Cualesquier person, daría-y pereza con tan sólo mirar, pero dempués d'añu y mediu de dolores y una operación de cadril, yo taba gayoleru por metéme con un bon desnivel.

Covarriella (Morcín)

1, 4 de Marzu de 2025

Dempués del rodaxe esguilando per L'Utiru en Peña Manteca y la vuelta a los entrenos nel panel de casa, garré la confianza nel cadril y la motivación pa tornar a los proyeutos que tenía na Covarriella. L'Aviru Campón, esi "pequeñu" seutor, con cincu víes perguapes pente'l 6c y el 7a+/b, que fuimos faciendo pali pali, tenía dos proyeutos más, equipaos por mí, como yeren Escampla la Borrina y Pie de Kíla.

 

La Covarriella como siempre... un llugar ablucante

Escampla la Borrina, ya tuviera pela mió parte munchos pegues d'intentu d'encadene y nel mió camín, fue viendo repeticiones dende la primera ascensión de Santos, a dellos collacios más como Dani, Becky, Orlando y a munchos más conocíos del mundu la escalada, que tuvieron apretando y disfrutando d'esta guapa vía, asentada nel 7b+.

Orlando y Anna probando delles víes nel Aviru Campón

La última selmana de Febreru, ya tornara a dar un par de pegues pa ver que tal me sentía na vía, comprobar que nun me daba mieu volar y ver si quedaba pa la prósima temporada o diba a por ella con xeitu. L'últimu día de Febreru, daba bonos pegues cayéndome dempués del bloque y al día siguiente, nun día perfríu y duru pa esguilar, con Rubén, llevámonos los dos esta guapa ruta, faciéndola pela mió parte, al cuartu pegue del día, terminando realmente cansáu.

 

Pegue d'encadene a Pie de Kíla (7b/+)

Aquel mesmu día, tornaba a prebar Pie de Kíla, dedicada al mió amorín perrunu, que trabayó tanto como nós pa recuperar esti seutor, viéndome bastante bien nella. El tema con esta vía, ye que tuve mover un pocu los seguros, ya que les primeres ascensiones vinieron acompañaes d'unos chorizos brutales con rechape, asina que tocó mover un par de seguros pa dexar la vía p'apretar ensin mieu.

Croquis actualizaos de L'Aviru Campón

El martes d'antroxu, dalgo descansaos del finde, ficimos otra visitina a L'Aviru Campón, pudiendo montar la vía y reequipala, dexándola p'apretar a muerte, metiéndonos a dar pegues Orlando y yo, dándo-y un pegue buenu ya nel de calecer y pudiendo enchufala al segundu pegue del día y sétimu en total, lo que déxame cola dulda, pal mió nivel, col grau, paeciéndome que 7b/+ ye lo más afayaizu.

D'esti xeitu, tán sólo quedábame xubir pela última vía qu'equipé a la mandrecha, nomada como Camudando'l Cadril, del que namái que probé hasta'l bloque un día, viendo que tenía llimpiar y macear un pocu más la salida del bloque, asina qu'eso ficimos quedando pa probar, pero con cuidadín na repisa superior, ya que tovía pue cayer dalguna pequeña piedra o quedar tierra.

Con esto ya... paezme que quedará un pocu de descansu ya la Covarriella y tocará trabayar n'otres escueles

-------------------------------------------------------------------------

Abelgas (L.luna) - Peña Negra - La Viesca - La Filera - La Raya

23 de Febreru de 2025

Track: Abelgas (L.luna) - Peña Negra - La Viesca - Picu Filera - La Raya

Continuamos cola recuperación del cadril, poro quería dar un pasín más, aumentando kilómetros y desnivel, a ver que tal nos alcontrábemos. Pa ello, como nos últimos tiempos, restolémos nos miós llistaos, decidiéndome a conocer el Picu Filera en L.luna, monte cimeru de la cordelera cantábrica, dexándame a les clares que Llión va ser un vezu abenayá, ya qu'Asturies téngola mui patiada y cuéstame alcontrar dalgo nuevo a facer.

D'esti xeitu, magar del almuerzu en Mieres p'axuntar coches, díbemos tirar pel Güerna hasta la salida al parque de Babia y L.luna, bordiando'l banzáu de Caldas, hasta garrar el desvíu en Sena hacia Abelgas, percorriendo una guapa carretera hasta'l xeláu pueblu, siempre a la vera'l rigu Pereda.

Partimos con una xelada importante en Abelgas (1270 m)

Preparámonos con un par de graos baxo cero y salimos a caminar peles cais del pueblu, hacia la pequeña foz que faen les distintes riegues que formen el rigu Pereda. La temperatura nun invita a quitar ropa de momentu, asina que siguiemos a bon pasu, col envís d'atopar los primeros rayinos de sol ya na foz de la riega'l Cuartero, onde desviarémonos hacia'l valle de la Guariza, siempre per bon camín.

Cuevagüerta (Teberga) - Penaviguera - La Foceicha - Parmu

 9 de Febreru de 2025

Track: Cuevagüerta (Teberga) - Penaviguera - La Foceicha - Parmu

Primer ruta del añu 2025, magar de la operación de cadera, poro preparábemos una rutina curtia pa poder probame, esfrutar y sobretou intentar caminar pel monte ensin dolores y ensin la coxera que llevaba padeciendo dende un añu y mediu aprosimádamente.

Naide quier operase tan "mozo" de prótesis de cadera, pero los dolores diben n'aumentu y nun me dexaben facer la mió vida normal, que ye tar nel monte y escalar y como dalgunos trabayamos pa vivir y non vivimos pa trabayar, lo importante dafechu yera poder facer vida normal nel monte, poro tocó pasar per quirófanu.

 

Partimos del aparcaderu de Cuevagüerta (620 m)

Nesti día, alcordéme que tenía pendiente conocer la Penaviguera en Teberga, un auténticu mirador sol rigu Parmu y la so foz d'Estrechura. Asina que magar del almuerzu en Samartín, tiramos hasta l'aparcaderu de Cuevagüerta, onde tendríemos el nuesu puntu de partida llueu de los preparativos correspondientes.

Peña Manteca (Morcín)

Xineru y Febreru de 2025

Magar d'operar la cadera a primeros d'Avientu y pasar un mes bastante fastidiáu rehabilitando per Xixón, con munchu paseín y exercicios pa la patuca, en Xineru tornábemos a casa, onde pudimos continuar la rehabilitacíon más seria, con bici estática y eliptica, así como exercicios de fuercia, pudiendo recuperar bastante rápidu.

D'esti xeitu, a mediaos de Xineru, anímábame a caminar pel monte un par de díes, yendo hasta dellos seutores a tomar el sol, como la Carba la Robla na Peña Manteca y la Covarriella, onde pude siguir probando la estabilidá de la prótesis de cadera y la recuperación de la fuercia na pierna drecha.

A los pocos díes, diba atrevéme a probar a esguilar, col envís, de ver si teníemos fuercia na pierna drecha y si dalguna posición molestábame. Como non, ficímoslo en graos bien baxos, aprovechando pa conocer un seutor nuevu na Peña Manteca como ye L'Utiru, equipáu per Mon y Villa, nun curro increyible. 

Los díes fueron pasando y L'Utiru, convirtióse nel mió llugar de xuegu particula, pudiendo esguilar dellos díes colos collacios, xubiendo pali pali el nivel de les víes, disfrutando muncho a vista toles víes hasta quedame con L'Utiru (6b/+), una vía llarga y de cantu, que sedrá una clásica del seutor.

Primeres visites a L'Utiru na fastera sur de Peña Manteca

La verdá ye que toles víes paeciéronme mui buenes, pel momentu y eso que voi asegurando los pasos pa nun volar, pasando un pocu de tensión estra, teniendo que colgar ún de los díes nun 6b+ (Vetas de Miel) ya que nun fui a alcontrar bien la posición del cuerpu nel pasu y dióme mieu volar.

Dempués de la revisión del trauma, coincidiendo xustu colos dos meses de la operación, confirmándome que taba too estupendo, volví a esguilar al día siguiente col compañeru Santos, metiéndonos a calecer en L'Utiru, montando dempués la vía de la mandecha Javi Mugarra (7a), que tenía per encadenar Santos, faciéndola sufriendo un pelín.

Magar d'entrugar si creía que llegaba bien a cadena, metíme p'allá a ver que pasaba, sufriendo un pocu na parte más desplomada, onde salí del pasu apretando presa a presa enforma. Llueu ya tocó salir a la placa y fuí soltándome, navegando de llau a llau de la vía, según me diba paeciendo, pudiendo encadenala al flash, nel segundu cumplemés de la cadera nueva.

L'últimu día de visita a L'Utiru, tocó tastiar víes ya más físiques na parte drecha, como ye la Luna, un 6c mui buenu, que fícelu al segundu, ya que pringué y volé un puquiñín, a mou de preba, nel pasu del desplome. Pa completar el día, pude facer poniendo cintes Vetas de Miel, que teníala pendiente, confirmando, que vamos avanzando rápidu y bien, de cara a tar recuperáu pa la primavera.

Mil gracies, Mon, Villa, Javier.... por sacar otru seutor en Morcín alantre, pal esfrute de tolos escaladores de la zona. A mí, personalmente ta salvándome la vida, pa nun tener que repetir víes y rodar enantes de volver a los proyeutos pendientes.

------------------------------------------------------------------

Vibuli (Ponga) - Seu Vibulines - Tuba - Peña Salón - Nochendi - Toyu - Baxeñu

1 d'Avientu de 2024

Track: Víboli (Ponga) - Seu Vibolines - Tuba - Peña Salón - Nochendi - Toyu - Baxeñu

Última ruta del añu col GM Xuan de la Borrina, enantes d'una inesperada por lo rápida intervención pa operame de la cadera, que llevábame machacando dende la selmana santa del 2023, pudiendo facer nestos tiempos muncha escalada y dalgo de monte pero con dolor abondo. 

Al llunes siguiente d'esta ruta per Ponga, tenía'l preoperatoriu colo que camentaba un mes mínimu de tranquilidá hasta la operación, pero esi mesmu día ufreciérenme operame al día siguiente, asina qu'ensin pensalo demasiáu fuimos p'alantre y nel mes d'Avientu quitáramos d'enriba la operación, tando nel intre, nel procesu de rehabilitación, col envis d'intentar tornar a l'actividá pa la primavera dafechu.

 

Salimos de la redolada de Vibuli nel aparcaderu de les Mesties (715 m)

Nesti primer día d'Avientu, aportábemos cola calma a Vibuli nel conceyu de Ponga, onde ya tuviéremos va dellos años ascendiendo a Sen de los Mulos y la Pica Subes y pasáremos bien cerquina na nuesa primer ascensión a la Peña Salón, dende les cercaníes de la puente Bidosa. Esta vegada la idega yera conocer los seos de Vibulines, que daquella nun yeren tan conocíos y escapáronse a la nuesa circular.

Pa ellos, almorezareos na Huera en Cangues d'Onís, pa siguir l'escobiu los Beyos alantre, que tantes rutes diónos durante estos años que llevamos faciendo monte per Asturies y más en concreto nos conceyos d'Amieva y Ponga. Xubirmeos pela foz de los Andamios en coche, lo que ya ye toa una aventura, ablucando col llugar y les parés que cayen a dambos llaos de la foz del rigu Vibuli.

Caranga Baxu (Proaza) - La Riquiebra - Canal del Cirio - Llampaseca - La Forcá - La Corraína - Senda La Cruz

23 Payares de 2024

Track: Caranga Baxu (Proaza) -La Riquiebra - Cirio - Llampaseca - La Forcá - Corraína - La Cruz

Ruta que tenía prevista dende l'añu pasáu, pero qu'ente la lesión del cadril y que nun mos xuntábemos los interesaos, quedó nel tinteru, hasta que la revisamos en condiciones, viendo los reportaxes de Victor (Pindio), Javi Cienfuegos y Yonatan (Los de las Claras), camentando que pudiera danos tiempu nesta dómina l'añu.

D'esti xeitu y avisaos toos de dir col equipu de bregar, xuntámonos nel pueblu proacín de Caranga Baxum, a les 9 la mañana, preparándonos pa salir a y cuartu, travesando les cais de Caranga, hasta la parte alta, onde atopamos camín, hacia los praos d'enriba'l pueblu, pasando pel depósitu d'agues que ye bon referente de que vamos bien.

 

Partimos de Caranga Baxu (250 m) con rises nervioses

Dende'l depósitu siguiremos camín alantre, hasta onde entama una vallina que paez nun tener salida de frente, teniendo que salir a la manzorga per una viesca, alcontrando senderu penriba d'una muria d'un prau, pa siguir siempre viesca alantre cola vista puesta nos parés del Risquiebru, enriba nuesa, a los qu'aportaremos travesando una llerona pelín inestable, na que topamos rastru de tar pisada y que vamos negociando como meyor podemos. 

Vamos ganando altor, sacando vistes al valle del rigu Teberga tres de nueso, mirando tamién con atención a la muria La Riquiebra onde topamos delles utreres y una cuevona na manzorga ensin accesu dalu. Al final de la llerona, toparemos que'l canalizu superior nun tien posible trepada, poro debemos salir a la mandrecha per una resbariosa viesca, upándonos a la parte alta del canalizu onde atoparemos rastros de senderu.

Teyeo (L.lena) - El Rebel.léu - Monte Tixirúa - La Escrita - La Tesa - La Caviyera - Treslacruz

9 Payares de 2024

Track: Teyeo (L.lena) - Monte Tixirúa - La Escrita - La Tesa - La Caviyera - Treslacruz

Ruta que tenía preparada dende va tiempu, ya que quería que'l grupu conociese la guapa foz de la Caviyera, que yo conociera baxando a fueu na Güeyinos del Diablu y que paecíame que paga la pena facela con calma y esfrutando de cada pasu. Sicasí, prestábame preparar una circular montañera y potente, poro púnxeme a investigar como ascender a la Tesa, de dalguna manera diferente, ya que la normal ficiéramosla cuantayá dende l'Alto'l Palo.

Como non, la poca info qu'algamé vino del blogue del collaciu Victor "Pindio" qu'anduviera a la recoyeta de nomes, na faldera de les canales que quería conocer. Poro, fícieme cola parte del track que servíame de referencia y tiré de "mapa y llapiceru" pa trazar la llínea a siguir peles pindies vallines que queríemos ascender.

 

Partimos de Teyeo (650 m) al pie del rigu Güerna

Sábadu de madrugar, tomando'l cafetín en Mieres, onde dexamos coches pa dir na furgo hasta Teyeo, preparándonos nun día pelín frescu y húmedu nel entamu, saliendo a caleyar pocu más alantre les 9 la mañana, cruciando'l rigu Güerna pa salir hacia les cabañes de Rucao, entamando a calecer músculos y dándonos cuenta de la sudada qu'espéranos güei por mor de l'altísima humedá.

Siempre per pista, diramos ganando desnivel, algamando vistes hacia la fastera contraria del valle'l Güerna, distinguiéndo guapos montes como la Carba Valsecu o el Tapinón y Siegalabá, que ficiéramos en travesía va dellos años, casi nestes feches, daquella con ñeve na parte alta y esti añu escosu dafechu y sin pinta d'entamar l'iviernu nel intre.

Entragu - Pena Gradura (Teberga)

Tolosantos 2024

Puente de Tolosantos, con bon tiempu, asina qu'averámonos hasta Entragu en Teberga, col envís, d'intentar continuar trepando tolo posible siguiendo la inercia que trayiemos d'Olba. El xueves parábemos pel aparcaderu d'Entragu, dando un paseín con Kíla hasta la Esplanada, viendo que taba bastante moyáu, tol tema chorreril, asina que diba tocar plaquear enforma.

Al día siguiente, llueu d'una nueche con conciertín nel Narciso, qu'estendióse un pelín de más, col día nubláu tiraremos hasta la Esplanada, metiédonos a prebar la Nirvana orixinal, una placa infecta de 7a+, al que-y metí un par de peguinos, enantes d'abandonala por temor a desyemar nel primer día.

La Pipeline L1 fuera la ruta más prestosa del puente

A última hora, llueu d'unes hores infames de solana, pudiera probar la Pipeline L1, que montárala Rubén, cayéndome de la cabera cinta a cadena, onde tien el pasu en realidá, dexándola montada pa madrugar al día siguiente, cosa que nun fuimos a facer, pente varios desayunos y pa cuando xubimos probara Anna la vía, sacando tolos pasos y cuando tocó meterme a dar pegue d'encadena, ya entrara'l sol xubiendo dende la tercer cinta sudando como un pollu, cayéndome na placa por nun mirar bien los pies.

Rubén destruyendo tolo que pillaba na Esplanada

 D'esti xeitu, escapamos pa la Esplanada onde taben Ani y Rubén, pasando'l restu'l día, dando unos peguinos pela mió parte a la Lady Di y Anna encadenara Jayefante, que tenía pendiente y probara la Dodi (7a+), costándo-y sacar los pasos d'abaxo. De la que baxé de desmontar la Lady Di, ya que nun me lo daben les yemes, probara los pasos en polea y allorié, con como pude facela a vista poniendo cintes.

 

Mañanes d'Entecampos y Esplanada aprovechando hasta que pegaba la solana

Dempués de cenar nel Sobia y pasar un ratín nel llocal del club, planchamos la oreya bien ceo y vamos llevantanos prontín, tando nel pié de vía d'Entecampos a les 9 y media la mañana. Bien motivaos, esta vegada, tócame entrar primeru y voi caleciendo deos, na fría roca, poniendo les cintes hasta la placa, onde cayera al día anterior, sacando sin problemes los pasos de placa y reposando con calma, antes d'entrar al bloque final, qu'esta vegada nun me costó gran cosa, faciéndola la Pipeline L1 pa calentar.

Anna entrara con brenga dempués, cayendo na placa, pero matizando bien los pasos, ya que-y quedaba pelín llargu un pasu llateral y tira dempués hasta la parte alta, onde resuelve ensin mayores problemes el bloque final, quedándo-y pendiente pa otra vegada, ya que nun hai quien pare ya de calor nel paré d'Entecampos.

Nueche estrellada... xelada mañanera asegurada

Cola mesma, decidimos baxar a la Esplanada, onde tamos un ratín tumbaos esperando por Ani y Rubén, decidiendo dar un par de peguinos a la Lady Di (7a) de nuevu y a la Dodi. Por suerte, paez ser qu'al tercer día d'escalada va too rodáu y fáigola poniendo cintes tamién, pudiendo montar a Anna la Dodi, de la que baxo, metiendo un pegazu y llevándosela tamién, quedándonos ya con cara de y agora que.

Pa rematar la xugada, Rubén fizo al mesmu tiempu Entropía a vista y poniendo cintes y Ani taba reventada de los dos díes enantes, asina que la decisión yera unánime, colar pa Samartín a tomar el vermú y xintar un menú, pa pasar la tarde tiraos tranquilamente per Teberga.

---------------------------------------------------------------------