Castroviejo (Pinares) - Muñalba - Tres Provincias

15 d'Abril de 2017

Track: Castroviejo (Pinares) - Muñalba - Tres Provincias

Casi vien siendo una tradición, que los díes que paso en Soria de vacas, faiga una escapadina a dar una vuelta a los montes más altos de la provincia. Esta vegada quería conocer un pelín meyor los Picos d'Urbión entrándo-yos pela so fastera más occidental.

Pa ello, Miguel y yo, vamos averanos hasta Duruelo de la Sierra, siendo'l camín dende'l Burgo de Osma, direición Soria pela N-122 hasta'l desvíu de la SO-910 hacia Abejar. Ellí, garramos la CL-117 que va pal banzáu de la Cuerda del Pozo y bordiándolo pela manzorga, pasaremos per Molinos de Duero, Salduero, Covaleda y enantes d'entrar a Duruelo, saldrá una carretera hacia Castroviejo.

Saldremos de Castroviejo (1554 m)

Esti área recreativa, con ampliu aparcaderu, menos mal porque ta petáu de coches, furgonetes y hasta un autobús del San Bernardo de Turón, manda güevos jeje, sedrá'l nuesu puntu d'aniciu. Nun gastamos tiempu en facer una visitina a les milenta peñes de toles formes que tan semaes pelos sos praos y siguiremos en direición NO per una amplia pista

Pasaremos de pista a cómodu senderu hasta dar vista al Muñalba

Xubiremos per pista pocu más d'un kilómetru pente los típicos pinares d'esta fastera, hasta qu'esta acaba nun claru, onde tomaremos una guapa sienda, marcada con fitos, que pasará pela Cespedilla hasta dar nun colláu a 1885 m nomáu como'l Pino del Cardenal.

Ascendemos ensin mayores problemes hacia'l cumal del Muñalba (2083 m)

Dende equí, daremos vista al nuesu primer monte, el Muñalba y entamaremos una tranquila ascensión, per monte baxo, siempre buscando'l meyor camín hasta encumar los 2083 m d'altor y ganándonos les amplies vistes de la llende pente Burgos y Soria.

Xuntamos con sele caminar l'espaciu pente'l Muñalba y el Tres Provincias

Dende'l Muñalba, tan sólo quedanos seguir la cuerda con tranquilidá hacia'l Pico Tres Provincias, qu'amesta a les dos anteriores, La Rioxa. Demientres, damos los pasos, diremos esfrutando de les vistes hacia los montes del norte, como'l San Millán o el San Lorenzo, anque tamién hacia tola fastera de las llagunas de Neila y de la de Muñalba que tenemos baxo los pies.

Nel Tres Provincias (2053 m)

Siendo una hora mui prudente, pararemos un ratín nel Tres Provincias, pa facer un pinchín y mirar con cierta pena, como'l monte esti añu ta peláu de ñeve. L'Urbión, malpenes caltién unes ceyes na so cuerda y alcordámonos de la selmana santa pasada pela fastera de Cebollera onde tocara trabayar p'abrir buelga y conocer la llaguna y dellos dosmiles.

Descendemos del Tres Provincias a pinchu hacia les pistes

Ensin más, miramos el reló y decidimos descender ya que va llevanos más tiempu de lo que pensábemos aportar al Urbión y quedamos pal vermú. Así que descendemos a pinchu, siempre empobinándonos hacia los praos primeru y más tarde tomando de referencia una riega, la cual dexaremos a la manzorga, hasta dar cola pista que vien del bunker de Piedras Blancas.

Llargu pero tranquilu caminar pelos GRs de los Picos d'Urbión

Llueu, ensin perda posible, diremos a bon pasu pela pista, que marcada con dellos postes de GR, nos llevará a pasar pel refuxu de la fuente del Berro de primeres y más tarde aportaremos al crucie cola carretera que xube a Castroviejo la cual usaremos pa los caberos metros hasta l'aparcaderu del area.

Con 3 horines caleyaes a bon ritmu, facemos los 12,3 km del percorríu que llevónos a superar unos 690 m de desnivel acumuláu y a conocer otru par de dosmiles sorianos. Tan sólo, quedábanos mudanos de ropa y baxar a Covaleda a tomar una cañina con un ambientazu de turistes y una temperatura impresionante.

Camudando'l Camín nos Picos d'Urbión