Altu'l Mazucu (Llanes) - Llosa Biango - Picu La Valleya - Las Camperas

21 de Xineru de 2024

Track: Altu'l Mazucu (Llanes) - Llosa Biango - Picu La Valleya - Las Camperas

Cuantayá tenía pendiente conocer la Llosa Biango, pero fueron pasando los años, fuimos conociendo munchos requexos de Cuera, faciendo toles cotes más importantes (Peñeblanca, Torbina, Lliñu...) pero col pasu'l tiempu escaecimos esti valle asitiáu pente Cuera y una especie de precordal nomáu polos llaniscos como'l Risque.

Tenía idega pal finde d'averame hasta la Babia a conocer nuevos montes, pero les insufribles temperatures baxo cero hasta'l mediudía, facía pelín peligrosu conducir hasta Llión y aprovechando que tenía preparada la ruta a Biango y col día perfríu pero soleyeru y guapísimu fuimos hasta'l valle de Caldueñu aportando al Altu'l Mazucu pelín pasaes les diez de la mañana.

 

Salimos del Altu'l Mazucu (450 m)

Aparcamos el coche y abrigámonos enforma, pa salir per pista formigonada hacia la solombra'l Cuera, sofriendo un fríu que nin caleyando cuesta riba somos a quitar hasta qu'aportamos al colláu Rubiera, onde esfrutaremos d'un pelín de sol y na Pasada, garraremos un prestosu senderu a media faldera, qu'empobinarános a conocer tol valle Biango.

Pel.luno (Ayer)

13 de Xineru de 2024

Dempués de la visita a Oceano sin Límite nel primer día del 2024, dimos una vuelta de tuerca y decidimos conocer dalguno de los seutores nuevos qu'apaecen na guía de Roca Verde, viendo'l seutor de L'Ercu la Vieya, con una imaxen positiva, por mor de la variedá de graos, pa un día na que la meteo diba tar un pelín repunante, así que rodar diba veninos bien a tol grupu.

 

Camín guapu y tranquilu hacia L'Ercu la Vieya

P'allá que nos fuimos entós, aparcando esta vegada nel Barrio Cima de Pel.luno, baxo les indicaciones d'un amable vecín que cuéntanos delles hestories, sola nueva masificación montañera que sufren y al pocu de caleyar con tolos trastos ya vamos equivacaos y otra vecina entrúganos pa onde vamos y empobinanos correutamente con una amabilidá, que sorpréndenos, namorándonos esti pueblu y la so xente.

 

Revisamos vía a vía tol pié de vía de L'Ercu la Vieya

Esfrutaremos del patéu hacia L'Ercu La Vieya con una parte final preciosa de camín empedráu que saldría hacia la Peña'l Castro. Nós, xustu enantes de les últimes envueltes salímonos a la mandrecha, viendo los primeros bordillos equipaos, quedando un pelín ablucaos, pol seutor qu'escoyimos pa pasar el día, nun teniendo claro si gastariemos chapes dengún de nosotros nesos bordillos.

 

Damos unos peguinos pente ñube y ñube cayendo cuatru gotes

Daremos un vistazu a tol seutor, yendo hasta L'Ercu, interesándonos poles víes más llargues, nun teniendo mala pinta dos 6bs llargos dalgo apartaos, echando una güeyada a un 7a a la mandrecha llarguísimu, que direutamente desesperanzónos pa col seutor en xeneral, pola mala pinta de la roca, asina que volvimos a les víes centrales, onde más cómodu yera'l pie de vía y decidimos dar unos peguinos por pasar el día, pero desencantaos pa col seutor.

 

Les vistes dende'l seutor lo meyor ensin dubia

Al final ficimos unes tres víes, pente ñube y ñube que tiraba dalgu d'orbayu, faciendo un 6a+ (Calcetu Solís) bastante feete y con dalgún pire innecesariu y llueu ameyoraron les de la manzorga, con meyor roca, paecíendonos 6b (Calcetu de Yamba (6c nos croquis)), más guapa saliéndose hacia Lluna d'Ochobre, pa nun facer un pasu ranciu del 6a+ y pa terminar Lluna d'Ochobre, que si pudiera rondar el 6b+ pero bastante suave, eso sí mui guapa.

En resume, seutor bastante malo, con poca continuidá de roca, bordillos y en xeneral un pañu non mui afayaizu, que nun pasaba na si quedaba ensin equipar, viendo los murazos qu'hai más altos a la mandrecha, nes muries que cierren los praos de Pel.luno en direición a la collada.

-----------------------------------------------------------------------------------------------------------------

Valbona (Siero) - La Grandota - Xerra La Paranza - Bendición - El Sol (Noreña) - Cotorbán

7 de Xineru de 2024

Track: Valbona (Siero) - La Grandota - Xerra La Paranza - Bendición - El Sol (Noreña) - Cotorbán

Dempués del 2023 llegaron cambios físicos, ceru positivos y pel momentu, ensin tener posibilidá de facer monte curiosu y ensin dolores, namái que me quedaba la escalada como forma de tar pel monte, pero la sensación yera incompleta ya que les ganes de grandes actividaes y conocer más llugares yera más potente que la escalada deportiva, que sincéramente, acaba siendo dalgo obsesivu y casi repetitivu y los montañeros necesitamos algo más.

Asina que llueu de faceme con una bici estática y una elíptica pa poder entrenar tren inferior y ver si meyoramos dalgo los problemes de cadera, pude comprobar que la bici yera dafechu indolora, poro, llueu de munchos años ensin salir a facer monte en bici, tirámonos a la piscina, mercamos bici y estrenámosla con una salida pela contorna del conceyu de Siero.

Partimos del pueblu de Valbona (215 m)

Nun hai que dicir que pa los montañeros xabaces, hai dellos conceyos que quédense un pelín curtios a la hora de los pateos, tanto por desnivel como pola altitú o belleza de los montes o simplemente polos caminos asfaltaos o formigonaos, poro, la bici de monte fai perfeutes toes estes condiciones pa preparar rutes, conocer nueves fasteres ya incluso, tachar dellos montes pocu afayaizos pa grandes rutes a pie.

Asina que, nesti nuevu mundiu qu'ábrese cola bici de monte, vamos facer la nuesa primer ruta saliendo de Valbona en Siero, averándonos hasta Bobes, onde vamos travesar tol parque industrial pa salir hacia la parroquia de Llimanes, saliéndonos ya pelos pueblos carbayones de Caravia y Faro, nel nuesu envís cola nuesa primera ascensión del día al picu La Grandota de 505 m.

La Matosa (Piloña) - Les Cuerries - Argumosu - Les Cabañes - Pandacéu - La Praduela

16 d'Avientu de 2023

Track: La Matosa (Piloña) - Les Cuerries - Argumosu - Les Cabañes - Pandacéu - La Praduela

Última ruta oficial del GM Xuan de la Borrina del 2023 y facía tiempu que nun preparaba una ruta, penriba'l mapa, tan sólo por conocer una fastera en concretu, sin un monte nomáu como oxetivu. Como non, mi conceyu preferíu pa conocer foces, riegues, valles ye Piloña, esi conceyu maltratáu montañeramente falando por ser vecín de conceyos más "clásicos" montañeros como Ponga o Casu, sicasí, somos unos auténticos namoraos de Piloña pa facer monte y la variedá y cantidá de rutes feches pol grupu son una amuesa clara d'esti amor.

Nesti casu, vamos volver dempués d'unos añinos al valle del rigu Color, que ya conociéramos en parte cola ascensión al Picu Priede o al Picu Torre, pero que faltábame conocer tol valle alantre hacia Les Vízcares que ye una fastera dafechu increyible, lloñe de cualesquier población y mui xabaz dientro d'Asturies.

 

Salimos dende La Matosa (315 m) en Piloña

Pa ello, como na ruta al Picu Torre vamos salir dende'l pueblín de la Matosa, asitiáu nun preciosu colláu, con vistes a los valles del rigu Color a un llau y del Tendi al otru. Aparcaremos na parte alta del pueblu, onde hai bon sitiu pa ello y baxaremos en direición norte, con vistes al Picu Priede, pa salir a la manzorga abandonando'l solín mañaneru y entrando nuna baxada hacia'l rigu Color, onde les temperatures baxen hasta los cero graos, teniendo qu'abriganos con tolo que llevamos na mochila.

La Rumiada (Cabrales)

8 d'Avientu de 2023

Más de tres años ya, dende la última vegada que ficiera una visita a la Rumiada y pol mediu, hubo una denuncia del parque, desequipamientu y una siguiente recuperación del seutor polos equipadores llueu del vistu buenu del parque, teniendo otra vegada, esti preciosu requexu de Picos pa esguilar en deportiva.

Asina qu'espertamos n'Arenas, cola calma, con demasiada calma, tanta que cuando aportamos a Poncebos p'aparcar ya yera imposible de la xente qu'habia pa facer la senda'l Cares. Asina que xubir pel camín antiguu dende Poncebos a Tielvi pela canal de la Rumiada, topónimu que da nome al seutor d'esguilada deportiva y qu'animo a tolos montañeros a conocer ya que sobretou la so parte final enriba de Poncebos ye preciosa dafechu y una obra ganadera increyible con toles armaures en cada envuelta, nun yera una opción.

 

Seutor d'esguilada deportiva de la Rumiada

La otra que pocos conocen, ye siguir camín hacia Tielvi, aparcando al par de les cabañes de Torbanes, del llau de la carretera y descender hacia'l rigu Duh.e, cruciando non ensin pasar un pocu de mieu per un par de quitamieos a mou de ponte, pa llueu xubir hacia'l seutor a pinchu pel monte, nun accesu perincómodu na realidá.

Travesamos el Duh.e y restolamos senderu pa xubir al seutor

Pesie al fríu, aportaremos al seutor con una bona sudada y dalguna rascaura qu'otra coles espineres, preparándonos pa trepar a la solombra, ya que tamos viendo que tola Peñe Maín da solombra al seutor y que les ñubes lo mesmu van impedir tamién que más tarde, esti sol apaeza pela garganta del Cares, sicasí, el tactu de la roca nun ye perfrío y podremos trepar ensin mayores problemes.

 

Ani, Rubén y Senda esfrutando d'esti guapu llugar

Eso sí, podremos escalar pero sin parar un segundu, ye dicir, pegue, asegurar, pegue, asegurar y pocu descansu, ya que les temperatures nun son p'andar mirando'l paisaxe ensin movese. Poro, güei yera un dia perfeutu pa facer víes "cencielles" y facer metros d'escalada pembaxu'l nivel nel que solemos movenos y sobretou esfrutar al máximu de la calidá de la roca y de les víes, ya que denguna de les que prebamos paeciónos mala nin fea.

 

Día d'esguilada "relax" faciendo metros enforma y esfrutando de la caliza

Asina que nesti mou, fuimos dexándonos les cintes puestes entre toos, faciendo dalgún quintín, un par de 6as bien guapos, un 6b finu d'adherencia y terminamos con un segundu llargu con una calidá descomunal de caliza, que paeciónos 6b+, llueu del primer llargu de V, piesllando'l día con un total de 6 víes bien guapes.

 

Tuviemos la suerte de baxar pela canal de la Rumiada pa terminar el día

 

Amás, pa terminar, tuviemos la suerte de poder baxar pela Rumiada, pa nun desfacer mal camín hasta Torbanes, esfrutando del guapísimu camín de la Rumiada del que nun yera alcordame de lo guapo que ye'l tramu final hasta Poncebos, coles caberes envueltes penriba'l Cares. 

 

En resume, tendremos de tornar, ya que los más picaos ya probaren un 6c mui buenu y en realidá toos quedamos con ganes de meté-y un pegue a un 7a llargu con una pinta brutal, pero otru grupu de collacios escaladores tuviéronla ocupada y los díes son curtios nesta dómina l'añu, asina que queda pa otru día.

La Rumiada
 
Croquis de la escuela d'escalada de la Rumiada, por mor de la Revista INUA. Gracies y col so permisu.

 

----------------------------------------------------------------------------------------

Altu d'Aristébanu (Valdés) - Picu L'Estoupu

3 d'Avientu de 2023

Track: Altu d'Aristébanu (Valdés) - Picu L'Estoupu

Seguimos con un finde mui inestable no meteorolóxicu y si ayeri tábemos pel conceyu d'Ayer, faciendo'l Cuitu Moros con Benjamín y Carlos, esta vegada díbemos desplazar al grupu hasta la llende pente los conceyos de Tinéu y Valdés, y más en concretu, hasta l'Altu d'Aristébanu. 

L'aventura d'aportar dende'l centru d'Asturies, hasta Aristébanu, llevóme a percorrer carreteres peles que nunca pasara, sobretou descubriendo la N-634 dende la Espina a Brieves, que llevóme per llugares que paecen ya escaecíos nel tiempu, quedándome bien claro, qu'al suroccidente o mediuoccidente astur tenémoslu dafechu abandonáu.

 

Partimos del Altu d'Aristébanu (565 m) pente Tinéu y Valdés

Dempués d'un cafetín pa desestresar del viaxe, salimos fuera, poniendo casi tola ropa que tenemos ya que'l día ta ventosu y frescu, cosa que nun esperábemos, porque na realidá yera güei, el meyor día del finde y entamamos a caleyar, per asfaltu siguiendo'l cartelu del pueblín de Brañascardén, hasta aportar al Chanu la Piniel.la, onde tenemos la primer visión del parque eólicu que llantaron nos últimos años na xerra L'Estoupu.

Morea (Ayer) - Cuitu Moros

2 d'Avientu de 2023

Track: Morea (Ayer) - Cuitu Moros

Finde raruno no meteorolóxicu, con muncha inestabilidá, poro buscamos rutes curties en ventanes de tiempu y siguir "tachando" vértices xeodésicos de conceyos asturianos. Nesti casu, tenía pendiente conocer el Cuitu Moros, como últimu vértice que quedábame del conceyu d'Ayer, un conceyu nel que tantes bones rutes tenemos feches.

Sicasí, lo averao al pueblu mineru de Morea, quiciabes nunca fizo mui atrautiva esta cume, asina que fue quedando nel tinteru hasta güei. Animosos como siempre, Benjamín y Carlos serán los collacios del grupu qu'apuntáronse al pateú, llueu del almuerzu de rigor en Morea.

 

Partimos d'un aparcaderu na Conforcá en Morea (300 m)

Averámonos en coche hasta un aparcaderu nel barriu de la Conforcá, preparamos les mochiles, intentando calmar los nervios de Kíla y Ares y salimos caleyando teniendo que travesar un segundín la carretera que va pa Nembra y aína garraremos el camín del percorríu Les Fuentes, bien marcáu al entamu la pista, xunto a les cases de Vidayos.

Tuña (Tinéu) - Fraxeirúa - L.lamas del Mouru (Cangas del Narcea) - Penas del Canalón - El Payarón

26 de Payares de 2023

Track: Tuña (Tinéu) - Fraxeirúa - L.lamas del Mouru (Cangas del Narcea) - Picu Canalón - El Payarón

Continuamos cola temporada del GM Xuan de la Borrina y como siguimos intentando recuperar dalgo la cadera, hai qu'andar buscando rutes non demasiáu dures, asina que tuve restolando posibles llugares nuevos a conocer y como non, tenemos al conceyu de Tinéu un pelín escaecíu y alcontré nel valle de Tuña, la fastera perfeuta pa dir de monte.

Fai dellos años, ya tuviéremos per ellí, pero siguiéramos valle alantre cola idega d'ascender al techu de Tinéu, Pena Filera, dende'l pueblín de L'Azorera, más alantre de Xinestaza, onde tuviemos oportunidá de cruciar la fana en vehículu, quedando un pocu alucionaos col fenómenu xeolóxicu del esbarrumbe de la pena la Fana.

 

Partimos dende Tuña (235 m) xunto al General Riego

Como siempre, el grupu anda siempre nel equilibriu total de xente y na mañana perdemos a tres miembros por diversos motivos, quedándos tres persones namás, anque por suerte, nuevos compañeros averáronse hasta Tuña, pa esfrutar una vegada más d'una ruta trazada a mapa dafechu, col envís d'ascender el picu'l Canalón, pero sobretou, cola idega de percorrer y conocer el valle del rigu Faxeirúa.

Sacaremos la semeya de salida, xunto al bustu del General Riego ñacíu en Tuña y que puso fin al absolutismu monárquicu, entamando a caleyar col himnu de Riego na mente, demientres vamos desdexando les munches pistes marcaes de BTT, p'averanos hacia'l rigu Fraxeirúa, tomando la so pista al pie d'una pequeña área recreativa.

Premoñu (Les Regueres) - Ania - Picu La Cuesta - La Llonga

11 de Payares de 2023

Track: Premoñu (Les Regueres) - Picu La Cuesta

Continuamos intentando esfrutar del monte, contando colos problemes físicos na cadera y tocaba ruta del grupu pero nun hubo munchu ésitu de convocatoria, asina que decidíme a dar un pateín enantes de la comida familiar que tenía, poro avisé a Benjamín y animóse rápidamente a visitar Les Regueres col envís de facer l'últimu vértice xeodésicu que quedábame per conocer.

 

Partimos de Premoñu (90 m) a la vera'l ríu Nalón

Pa ello, quedamos a les 9 y media la mañana nel pueblu de Premoñu, onde va añinos díbemos a esguilar a la vera'l ríu Nalón y onde tengo que volver ya que tengo ganes de conocer otru seutor qu'equipóse va años. Preparámonos, aparcando cerquina de la ermita de Santana y saldremos caleyando carretera abaxo, durante mediu kilómetru hacia'l barriu de Picarín, onde visitaremos el molín de Picarín, que toma agües de la riega Andayón.

Visitamos el rigu Andayón y el molín de Picarín caleyando per carretera

Nel intre, ponse un pelín a orbayar y llueu de ver el guapu y remociáu molín, por dalgún motivu, envede salir per carretera hacia les cases de Picarín, decidimos cruciar el rigu Andayón atopando un camín empedráu bien guapu, que diba llevanos hacia'l pueblu d'Ania nuna xubida tranquila, anque a la postre, diba dexanos ensin conocer la Cueva Oscura, marcada en dellos cartelos de percorríos.

 

Travesamos Ania y entamamos ascensu hacia'l picu La Cuesta

Poro, ensin querer casi, aportamos al pueblu d'Ania, parando al fin d'orbayar pero quedándonos con un borrín que va acompañar los nuesos pasos travesando'l pueblu hasta la fastera de la Gobia, onde vamos metenos nunos praos, siempre pelos bordes, pa salir ya a monte baxo, per onde algamaremos sienda hasta restolar los últimos metros hasta'l nuesu oxetivu: el vértice de la Cuesta de 278 m.

 

Facemos cumal en La Cuesta (278 m) vértice del conceyu Les Regueres

A estos altores el día, paez espabilar un pocu y les nueses vistes ábrense a tola fastera central astur, destacando l'averáu Picu Grande na Degollada, tol cordalín del Naranco col picu Paisanu y ya pal sur tol cordal de L'Aramo, Monsacru y hasta monte de Proaza como'l cordal de Caranga. La verdá ye que dacuando, vien estupendo alloñase de los nuesos montes preferíos y velos dende monte más baxo con otra perspeutiva dafechu mui prestosa.

 

Baxaremos hacia La Cuesta y Areces pa siguir hacia la Llonga

Llueu d'un pequeñu descansu, descenderemos hacia les cases de La Cuesta, pasando pel depósitu d'agua de la capital de les Regueres, Santuyanu, el cuál tenemos xustu embaxo nuesa. Saludamos a la paisana de la primera casa que topamos y al so perru, que tenía pinta gafa y garraremos camín, hacia'l barriu d'Areces, onde vamos parando ca pocu a pañar castañes valdunes.

 

Descendemos pel valle la Llonga sorprendiéndonos esti guapu llugar

Aportaremos a la primer casa d'Areces y vamos garrar una pista a la manzorga, que va llevanos a conocer quiciás el requexu más guapu de tola ruta, como ye'l valle la Llonga, pel que descenderemos siempre pero guapu camín, con viesques de castaños a los llaos y praos perbon curiaos, siendo una auténtica maraviya esti caleyar hacia'l pueblu de Premoñu.

Con esti tramu final tan prestosu, onde esfrutamos de los collores de la seronda, aportaremos a Premoñu de vueltu, zarrando esta circular de malpenes de 7 km y +/-240 m positivos, que tuviéronmos entreteníos nesta mañana serondiega durante 2 hores y media de paséu. Comentar qu'a la nuesa ruta, puédese visites a la Cueva Oscura, los palacios de les Regueres o los Meandros del Nora, pero nun me responsabilizo de la cantidá de kilómetros de carretera a xintar.

Camudando'l Camín nel conceyu Les Regueres