Brez (Llébana) - Canal de Lechugales - Morra - Silla Caballu - Canal Las Arredondas

11 de Xunetu de 2026 

Track: Brez (Llébana) - Canal de Lechuglales - Morra - Silla Caballu - Canal d'Arredondas

Dempués del primer día de ruta pela tarde al Picu Jano, venía ún de los platos fuertes d'esta Travesera Picos 2025 - 2026 como yera l'ascensión a la cota más alta del macizu Oriental, pero claro, nel GM Xuan de la Borrina, nun díbemos facelo cenciellu dende'l H.itu d'Escarandi, sinon que queríemos conocer la Canal de Lechugales y baxar pela d'Arrendondas, canal a la que-y tenía munches ganes.

Les previsiones yeren de munchu calor, asina que les alarmes na casa rural y nes furgos, sonó a les 6 de la mañana, ya que teníemos la intención d'entamar a caleyar a les 7. Asina que con un apixote perimportante, vamos preparándonos los almuerzos, la mochila y la xinta, intentando despertar a base de cafés infernales, que yeren de salir corriendo al bañu ún tres d'otru.

Partimos bien ceo del pueblu llebaniegu de Brez (760 m) 

Con too preparáu y una mañana fresquina pel momentu, tamos a les 7 la mañana preparaos pa caleyar y facémoslo saliendo, cola mochila enllena de xinta y agua (unos 4 litros por tiesta), asina que con esi pesu, entamamos a caleyar peles cais de Brez hacia la parte alta del pueblu onde vamos garrar la pista formigonada que llévanos hacia los ivernales de Rojes.

Continuamos pela pista, baxo la borrina mañanera hsta los praos de Sandoblo, onde salímonos de la pista y garramos el senderu baxo la canal del Ranchón, continuando con un cómodu ascensu hacia la entrada de la canal de Lechugales, perdiéndonos el senderu superior pelín tomáu, teniendo qu'aportar a la parte baxa de la riega de Piedras Negras, ya con tola canal enfrente de los nuesos güeyos, llueu d'hora y media dende Brez.

Dobarganes (Llébana) - Picu Jano

10 de Xunetu de 2026 

Track: Dobarganes (Llébana) - Picu Jano

Pues llegó'l momentu de la Travesera Picos 2025 - 2026 y como los últimos años, preparamos una rutina pa la tarde del vienres, como pa poner los músculos a furrular de cara a la paliza de los díes siguientes y como non, si l'añu pasáu tuviemos que cancelar pola calufa infame que teníemos en Riañu, na Llébana andamos más menos asemeyaos, anque viendo que vamos dir munchu tiempu per viesca, decidimos siguir alantre. 

Partimos del pueblín de Dobárganes (960 m)

Siguir alantre, significa aportar a Dobárganes, llueu de parar n'Ojedo a tomar un cafetín y al aparcar nel pueblu y salir a la cai a preparanos, casi morremos del calor. Preparamos mochila con agua y pocu más y al par del cartelu qu'indícanos la ruta, vamos entamar a caleyar, col suelu secu del camín desprendiendo un calor insoportable. 

Travesera 2025 - 2026

Del 10 al 15 de Xunetu de 2026

Como tolos años la Travesera del GM Xuan de la Borrina, ye puntu referente del añu y esta temporada veníemos bien bregaos de tol añu, nel que volvimos incluso, a facer dalgo d'ivernal, sicasí, camiento que va ser l'asignatura pendiente pa la temporada que'entra, ya que nun sólo tenemos que progresar na temporada estival pa evolucionar, sino que lo poco que podamos facer con ñeve, deberíemos aprovechalo.

Pegando un vistazu per onde díbemos movenos

De toes formes, l'avance del nivel del grupu ye evidente, teniendo unos ritmos altísimos a metá de temporada con rutes bien potentes tanto en kilómetros como en desnivel y téunicamente, tamién fuimos faciendo cresteríes desconocíes pal grupu, que sirvieron d'entrenu pa que la xente fuera con bastante facilidá y con más confianza pel tarrén calizu.

El Condao (Llaviana) - La Repunta - El Cotón - Mediodía - La Triguera - Fresnéu - La Robellá - Xerra - Boroñes

27 de Xunu de 2026 

Track: El Condao (Llaviana) - La Repunta - El Cotón - Mediudía - La Triguera - Fresnéu - La Robellá - Xerra - Boroñes

Continuamos un pocu cola preparación pa la Travesera de Picos del GM Xuan de la Borrina, viniéndonos a la tiesta, que tenía pendiente una crestería que bien pudiera valenos, pa superar un desnivel curiosu y sobretou pa movenos per tarrén calizu, asina que decidimos averanos hasta'l Condao en Llaviana, p'acometer la crestería sur del cordal de Peñamayor hasta'l Picu La Triguera. 

Les previsiones son de bastante calor y posibles tormentes de tarde, asina que saltámonos l'almuerzu de turnu y a les 9 la mañana tamos preparaos nel aparcaderu del cementeriu del Condao, pa entamar a caleyar, onde un potrín y la so ma, tienen a bien aparte de saludanos, acompaganos un ratín de pista nos primeros pasos del día. 

Partimos del pueblu d'El Condao (375 m)

La pista pela que salimos ye la que xube hasta'l colláu de Breza, xustu al empar del nuesu oxetivu final como ye'l Picu La Triguera, que tamién ficiéramos va munchos años na otra parte de la crestería de Peñamayor dende Fayacaba naquella ocasión. Esta vegada, saldremos a 375 m d'altor poro tenemos casi mil metros direutos d'ascensión per una crestería que nun pilotamos res, asina que vamos a l'aventura como siempre.

La Puente (Morcín) - El Rotellón - Figares - La Collá - La Madalena - Cuitu Rumiru - Otura - Llugar de Baxo

17 de Xunu de 2026 

Track: La Puente (Morcín) - El Rotellón - Figares - La Collá - La Madalena - Cuitu Rumiru - Otura - Llugar de Baxo

Miércoles cualesquiera col horariu de branu y somos a xuntanos, pa entrenar, tres del GM Xuan de la Borrina per Morcín. La idega yera facer la ruta al Picu Figares, que tantes vegaes fice entrenando pa les carreres y si'l tiempu permitíalo, continuar hasta'l Monsacru y facer el percorríu que más nos apeteciese, ya que teníemos avisu tormentes.

Son pocu más de les 4 la tarde, preparámonos y salimos caleyando pela sienda verde pela que discurría la vía'l tren pente'l pozu Monsacru y la Pereda en Mieres. Agora, tendremos un seliquín patéu, que tamién usamos pa dir a esguilar a los seutores de la Peña Garcilleru, teniendo que cruciar un par de túneles illuminaos, hasta'l Caliru'l Rotellón, onde aparte del caliar, tamién había llugar de crucie de trenes. 

Partimos del aparcaderu del cementeriu de La Puente (245 m)

Comentar que ta n'estudiu, recuperar la siguiente parte de la senda verde, al traviés de la cantera de Peñamiel, pa xunise a la esistente de La Pereda a Frechura, pudiendo casi unir Mieres cola Foz de Morcín, lo que daría munches posibilidaes deportives, sobretou ciclistes a estos conceyos mineros. Nós, tamién tenemos perpasáu dalgún túnel más, con "usu ganaderu" p'acceder a la fastera de Cueva Cabrera tamién na escuela de la Peña Garcilleru, pa esguilar pero dexa de ser transitable nel siguiente túnel.

Bueida (Quirós) - Puertu Güeria - Muezca Cigacha - Ranchón - Socel.lares - Valle La Foiz

13 de Xunu de 2026 

Track: Bueida (Quirós) - Puertu Güeria - Muezca Cigacha - Ranchón - Socel.lares - Valle La Foiz

Tornamos a les rutes de calendariu del GM Xuan de la Borrina, yéndonos nesti casu hasta'l macizu de Penubina (Les Ubiñes), onde Pepa preparare una ruta p'ascender al picu Ranchón, conociendo'l pasu de monte de la Muezca Cigacha que nun conocía y tamién la baxada pel valle la Foiz, otra pequeña ayalga a descubrir.

El problema que teníemos yera'l calor que daben, teniendo que madrugar enforma y quitando de la ecuación el nuesu clásicu almuerzu de camín. Poro, plantámonos nel aparcaderu de Los Garrafes, pista alantre sol pueblu quirosanu de Bueida, pelín dempués de les 8 la mañana, pa preparanos y salir a les 8 y media en puntu.

Partimos de Los Garrafes (Bueida) (925 m) 

Caleyaremos con calma, siempre pela solombra pa dir entrando muscularmente en calor, personalmente sigue un pelín mosqueáu colos soleos, asina que nun quiero entamar fuerte, asina que voi dexándome dir al ritmu del grupu aportando a la Campa Las Infiestas (1130 m).

Pel camín tuvimos 'un agradable paséu pembaxo'l fayéu y al llau de la riega Buxalbe de la que nun achisbamos nin media d'agua nesta dómina l'añu y ye que tol paraxe de Los Garrafes ye un sumideru qu'apara nun sifón subterráneu, que sólo brota cuando enllénas, lo que tien que ser un espectáculu.

El Mortiru (Morcín)

Primavera 2025

Munchu tiempu ensin espublizar nel blogue na rellacionáu cola esguilada y la verdá ye que toi un pelín más enfotáu n'equipar que n'apretar asina que tampoco ye que tea teniendo grandes resultaos trepando, poro caltengo un pocu l'atención en deprender equipando en solitariu, pasando tardes escolingáu a mi bola nos parés y cuando escalo suelo tar a un nivel más baxo, pasando'l día colos collacios.

Sicasí, tenía pendiente la entrada del Mortiru, un seutor equipáu por Sergio, Pablo y compaña, asitiáu nel Monsacru Oriental o más davezu nomáu, como Otura, del que ya qu'espublizáronse los croquis esta selmana, poro ya sabréis que vais poder alcontraros con un grau mediu-baxu perimportante, lo que va facer la delicia de tolos escaladores, poniendo mui en valor, l'increyible trabayu que ficieron pa sacar eses víes alantre, ya que'l procesu de llimpieza nesos graos ye insufrible dafechu. 

Kíla echando un gabitu pa facer pie de vía

Dígolo, porque ta pasándome a mi nun seutor nel que tamos trabayando y poro, soi cosciente del trabayu fechu, tema que la xente nun lo valora lo suficiente, lo duro que ye sanear y llimpiar graos baxos, sobretou en muries con munchu matu, lo que fai que dé a lo postreru munchu cantu, pero tamién munchísimu trabayu, asina que valoráilo y disfrutailo y si veis a los equipadores da-yos les gracies, porque meter paraboles, failo casi cualquiera, pero dexar una vía llimpia y sin peligru de romper na, ya ye otru mundu enllenu de paciencia y dedicación.

Aprovechando pa testiar munches de les víes de la fastera drecha del seutor

Nel tema deportivu, les víes que pudi probar fueron más o menos les que salen nos croquis a la mandrecha paeciéndome toes mui buenes, dalgunes bastante tieses pal grau, lo que diz a les clares el nivel de xarréu que manexen dalgunos 6a/+, metiendo metros de calidá y diversión de cantu a manos enllenes. La llargura les víes tamién engaña y muncho, ya que dalgunes aporten a los 40 metros, anque la media andará pelos 25 m, ya que munches tienen segundu llargu.

Otru murín con vistes precioses a L'Aramo

Comentar que l'añu pasáu, los equipadores tuvieron que desequipar les víes pa poder continuar colos trabayos y terminar el seutor, ya que la xente nun respeta los tiempos, poniéndose en munchos casos en peligru, ya que les víes tan pocu probaes, pueden romper cantos, nun tar terminaes de sanear o simplemente hai que dar la oportunidá a los propios equipadores a encadenar les sos víes.

Nun ye ser más o menos repunantes, ye que simplemente tenemos que respetar los tiempos de los equipadores y dexar trabayar a gustu ya ensin tar pendientes que dalguien métase en víes que nun tan entá pa esguilar y puedan tener un accidente, que lo d'equipar faise pol amor al arte, gastando perres del bolsiellu na mayor parte y que mínimu qu'agradecer y respetar el trabayu de los demás.

Mil gracies a Sergio, Pablo y el restu de collacios que llimpiaron, sanearon y equiparon esti seutor, agora tan sólo queda respetar les places nel pueblu d'Otura, que son munchos muros a esguilar pa tan poques places y averase a dar unos peguinos nes víes más nueves de la esquierda.

Otura (croquis) 

Los croquis del Monsacru Oriental (Otura) tenéislos pa consultar en papel, allugaos nel chigre MoNa en Llugar de Riba onde podéis sofitar a los equipadores de Morcín (Club Asturvertical, GM Xuan de la Borrina,...).  

Fuentes de Peñacorada (Cistierna) - Peñacorada

24 de Mayu de 2026 

Track: Fuentes de Peñacorada (Cistierna) - Peñacorada

Continuamos unos díes de descansu pa Llión y dempués d'un día d'esguilada complexa por mor del sol, el domingu pela mañana madrugamos una vegada más, alboreciendo con más sueñu del que nos prestaría y salimos de Cistierna, onde cenáremos la nueche anterior, p'averanos hasta Fuentes de Peñacorada, onde aparte d'esguilar na so redolada, vamos ser el puntu d'entamu pa la nuesa ruta.

Partimos de Fuentes de Peñacorada (1150 m)

Asina que 9 la mañana tamos ya preparaos pa entamar a caleyar, sintiendo ya que va ser un día duru de calor, lo que ya entama a agobiar, puesto que la tarde puede tornase en tar a la solombra pegaos al rigu, ensin más cosa que facer, qu'hidratase y xintar, ya que les escueles llioneses nun mos tan dando muncho marxe pa poder esguilar de tarde, salvo a les últimes hores y cuesta enforma motivase al final del día.

Lodares (Porma) - Peña Armada

22 de Mayu de 2026 

Track: Lodares (Porma) - Peña Armada

Dempués de munchos meses ensin vacaciones, a la fín garro unos díes de vacaciones, coincidiendo cola carrera pel monte del Cainejo, pero mis soleos nun me dexaron preparame pa participar, asina que finalmente, marché esos díes hacia la fastera del Porma - Cistierna, col envís de patear más seliquino y escalar dalgo si les temperatures permitiénlo.

Salimos dende la curva de Lodares (1115 m)

Pal primer día preparé una rutina curtia pa probar un pocu les pates, yéndonos hasta'l banzáu del Porma, llueu de durmir la nueche anterior en Puebla de Liyo, parándonos nel llugar de Lodares, onde aparte de mirador ornitolóxicu y embarcaderu pa kayaks, tenemos la partida pa dos rutes de la contorna, como ye a la Peña Armada y la Peña San Pedro.

Geras (Gordón) - Meleros - La Silla - La Carba - Boyariza - Palanco

16 d'Abril de 2026 

Track: Geras (Gordón) - Meleros - La Silla - La Carba - Boyariza - Palanco

Tornamos al monte col GM Xuan de la Borrina, dempués de los díes per Soria de vacaciones y facémoslo con una ruta propuesta por Charly, que diba llevanos hasta la comarca de Gordón, onde la casa conceyu ta faciendo un esfuerzu perimportante p'atrayer turismu deportivu de monte, ya seya con escueles d'escalada, como percorríos de BTT o senderismu y podemos comprobalo per cada pueblu que visitemos.

Partimos de Geras (1139 m) na comarca de Gordón

Nel nuesu casu, vamos averanos hasta Geras, pueblu bien guapu nomáu pol so embutíu y pegáu al rigu Casares, con bien d'ambiente en casi tol añu y que conocemos de visites a esguilar a les foces de Palanco y la Boyeriza ya inclusu tamién a Beberino, qu'alcuentrase bien cerquino, pente la Pola y Geras. Sicasí, nunca tuviera, pela redolada patiando y eso qu'alcontrámonos con bien de rutes marcaes con munchu ciñu y con montes y foces bien guapes.

Collía (Parres) - Xerra'l Cabalgadoriu - Calabrez (Ribeseya)

25 d'Abril de 2026 

Track: Collía (Parres) - Xerra'l Cabalgadoriu

Dempués de la ruta a la Forcá, teníemos más que claro que díbemos volver más ceo que sero, ya que ver tola crestería del Cabalgadoriu, llámonos l'atención enforma, asína qu'ensin más, viendo que nun s'apuntara muncha xente a la ruta pal finde, vimos la oportunidá de cabalgar tola crestería con un númberu amañosu de persones. Asina que plantámonos un finde más en Les Arriondes, capital del conceyu de Parres p'almorzar y tomar un cafetín, axuntándonos nun coche pa conducir unos pocos kilómetros hasta Collía, onde tendremos el puntu de partida de la ruta.

Entamamos ruta nel pueblín parresanu de Collía (155 m)

Aparcamos el coche nuna placina onde nun molestamos, preparamos mochila y entamamos a restolar per onde podemos atacar la crestería, siguiendo un tomáu ya imposible camín, hasta'l depósitu d'agua, onde atopamos pasu d'un prau al siguiente. Dicir que'l camín ta imposible, fuimos pel prau de la esquierda y cruciamos esi camín y una sebe pa dar pasu al siguiente prau, que sacónos hacia una viesca, pela que ya pudimos dir siguiendo dalgo de senderu hasta garrar la crestería al altor de la Peña Los Curones.

Les Arriondes (Parres) - Collía - La Forcá - La Teyera - Güexes

12 d'Abril de 2026 

Track: Les Arriondes (Parres) - Collía - La Forcá - La Teyera - Güexes

Día repunante de meteo, nel que toca inventar daqué pa salir al monte pela mañana, asína que llueu d'una primer idega picante, tenemos qu'echala p'atrás porque la lluvia éntranos antes de lo debío, alcontrando dalgo más rápidu pa facer nel conceyu Parres y más en concretu dende la so capital, Les Arriondes, onde Pepa y Jose andaben de furgonetéu seliquino.

Partimos de Les Arriondes (30 m) capital de les Piragües

Almorzamos un cafetín y enantes de les 10 de la mañana tamos preparaos pa salir caleyando dende l'aparcaderu, cruciando'l rigu Chicu y saliendo per carretera per amplies envueltes hacia Pendás, onde pocu enantes alcontramos crucie hacia'l pueblu de Collía, atopando tamién marques de percorríu, que la verdá ye que podíen currase pela viesca que va travesando tola carretera.

Laguna Negra (Pinares) - Laguna Helada - Llanos de la Sierra - Urbión - Laguna Larga

4 d'Abril de 2026 

Track: Laguna Negra (Pinares) - Laguna Helada - Llanos de la Sierra - Urbión - Laguna Larga

Continuamos de vacas per Soria y dempués del pateín per Caracena hasta la Calera y d'otru día d'escalada en familia per Muriel de la Fuente, decidimos pegar una ivernalina hasta'l picu Urbión, que veíase bien cargáu de ñeve, nos últimos díes. Garraremos entós, los preseos necesarios pa salir del pasu, anque al nun trayer furgo, nun pude meter grandes maraviyes y tiramos hasta la Laguna Negra, ensin madrugar demasiáu.

A les diez y media la mañana, tamos nel aparcaderu de la Laguna Negra, estráu de xente a estes hores, la mayor parte visitantes/domingueros, que nin tan siquiera son a caleyar los menos de dos kilómetros de carretera hasta la llaguna, poro tenemos al autobús a fueu p'arriba y p'abaxo, aportando nós en pocu más de venti minutos a la Laguna Negra, con una capina de xelu nesta dómina l'añu que la fai más guapa entá. 

Partimos dende l'aparcaderu de la Laguna Negra (1595 m) en Pinares

Namás salimos de la Laguna Negra, vamos alcontrando xente ensin nengún tipu de preparación, xugándose la vida a lo tuntu intentando xubir a la parte alta pel correor superior. Nós, sacaremos piolé y crampones, atopando xente na parte alta, que nun sabemos bien, que tal van volver a baxar, entrugándonos como lo veíemos y contestando, qu'esperasen un pelín a que subiese la temperatura a ver si ablandaba dalgo la ñeve.

Caracena (Tierras del Burgo) - Valderromán - Manzanares - La Calera

2 d'Abril de 2026 

Track: Caracena (Tierras del Burgo) - Valderromán - Manzanares - La Calera

Díes de descansu en Selmana Santa per Soria, como tolos años, yendo con ganes de facer actividá, poro dempués del viaxe del miércoles, pal xueves santu ya teníemos preparáu un pateín pela redolada de las Tierras del Burgo y más en concretu, per Caracena, onde ya pasáremos en dalguna ruta conociendo la so guapa Hoz y en bici cuando aportáremos dende Tiermes, siendo puntu interesante a conocer, pol so castillu y pueblu.

Xusto falábemos de les rutes en bici, Miguel y yo, cuando arribamos a Caracena, onde aparcamos na parte baxa del pueblu, viendo que tenemos un montón de cartelos nuevos, asina como un aparcaderu bien guapu, informámonos de que tenemos un circuitu de gravel pa esta fastera sur de Soria, faciendo en parte, aquella ruta que completáremos va dellos años.

Partimos de Caracena (1064 m) en Tierras del Burgo

Quedámonos cola copla del circuitu pa bici gravel y preparámonos pa salir, faciéndolo pela mandrecha del barrancu de Las Gargantas, anque otra opción sedría salir pueblu arriba, visitándolo con calma y pasando pel castillu de Caracena, pero esta vegada, queríemos visitar un sabinar o carrascal, poro esta vegada, el nuesu caminar sedrá pela mandrecha'l barrancu, siguiendo tramos de senderín y otros de camín d'accesu a dellos campos de cultivu.

Fonduveigas (Degaña) - El Mangueiru - La Braña - El Picu'l L.lagunachu - La Brañolina - TramosCuetos

22 de Marzu de 2026 

Track: Fonduveigas (Degaña) - El Mangueiru - La Braña - El Picu'l L.lagunachu - La Brañolina - TramosCuetos

Dempués d'un par de díes de monte, ya teníemos bastante claro, el nivel de ñeve nes cordaleres y sobretou la carga dependiendo de la orientación, asina que con un día frescu, pero soleyeru, el nuesu últimu día pel suroccidente diba ser más tranquilu, sin bregar col mantu blancu, poro averámonos al cordal de Degaña col envís de conocer la so cota más alta, como ye'l Picu'l L.lagunachu.

Pa ello, conducimos dende Cabual.les onde tuvimos el nuesu campu base, hasta Fonduveigas, onde a la salida del pueblu, tenemos un apartaderu xusto al par de la carretera, onde tenemos el cartel d'aniciu de ruta hacia la L.laguna Brañolina, que comparte muncha parte del percorríu que vamos llevar alantre.

Partimos de Fonduveigas (750 m)

Preparámonos y entamamos a caleyar pela pista qu'asciende tol monte'l Mangueiru, costándonos abondo garrar ritmu, nes primeres y amplies envueltes, col únicu entretenimientu anicial, de travesar el regueiru la Cárcava pela L.lera, que baxa con agua enforma del desxelu, amosando a les clares como fórmase'l carcavón pola fuercia la riega nestes dómines.

Caleyaremos pista alantre, metiéndonos pali pali nel monte, pudiendo esfrutar del fayéu, que cola primavera más avanzada tienen que tar perguapos, avanzando na parte alta, n'envueltes más curties que van averándonos hacia'l sur, onde ganamos vistes a la cordelera pela qu'anduviéramos el día anterior, destacando como non, El Tesu Mular, que vuelve a gananos cola so forma cuadrada. 

A Estierna (Ibias) - Moreda - Chou Cuevu - Tesu Mular - L.lagunas de Trabáu

21 de Marzu de 2026 

Track: A Estierna (Ibias) - As Mestas - Moredina - Tesu Mular - Os L.lagos

Continuamos col finde pel Suroccidente, siendo de sábadu la ruta más importante, cola idega de xuntar un par de cumales cimeros d'esta fastera como ye'l Tesu Mular y la Pena Rogueira, poro preparámonos pal retu con tolos preseos ivernales, ya que'l día anterior pudimos comprobar l'estáu del monte y nun pensábemos facer el tuntu, otra vegada en pantalón curtiu y playerinos, como col Bustatán.

Magar del almuerzu na casa rural en Cabual.les, averámonos hasta'l conceyu d'Ibias, onde visitamos el pueblín d'A Estierna, puntu de partida, aparcando al llau del nucleo rural Tixileiro, garraremos agua y entamaremos a caleyar pelin antes de les 10 de la mañana, ya que camentábemos tener un día llargu de monte.

Partimos del pueblu d'A Estierna (800 m) n'Ibias

Fadremos semeya de salida al llau del cartelu del percorríu hasta las l.lagunas d'A Estierna o Trabáu y entamaremos a caleyar pel pindiu camín, costándonos un pocu pillar ritmu, ya qu'al menos los del día anterior, nel Bustatán, tenemos más carga de pates de lo camentáu. Sicasí, el camín ye claru y caún al so ritmu vamos aportando al col.láu Baisán, onde tendremos per delantre un tramu de llanéu y baxada hacia la braña Moreda.

Fadrémoslo apriesa, echando una güeyada hacia tol cordal de Moreda, intentando aldovinar cuales son los cumales a los tenemos intención d'atacar y ye que nel suroccidente, cuéstanos enforma orientanos, ya que ye una fastera menos trabayada pol grupu, lo que tamién aporta un nivel de motivación importante pa siguir conociendo Asturies. 

Valdepráu (Ribas de Sil) - El Val.le - La Moroquina - La Pandiel.la - Bustatán - Val.le Estremeiro

20 de Marzu de 2026 

Track: Valdepráu (Ribas de Sil) - Val.le - La Moroquina - Bustatán - Valle Estremeiro

Finde especial, nel que nos arrimamos al suroccidente astur, pente les tierres del Sil ya Ibias y como siempre, queremos apurar la tarde del vienres pa tachar dalgún monte que tengo na llibreta. Poro, conducimos Carlos, Rubén y yo, hasta Ribas del Sil, y más en concretu a Valdepráu, onde ya ficiéramos va dellos años una ruta perguapa al Miru y al Veigardón.

Partimos del pueblu de Valdepráu (1130 m)

Esta vegada, vamos col envís de conocer otru Monte Cimeru Astur como ye'l Bustatán o  Bóveda, poro tendremos qu'averanos xusto al cordal d'enfrente del Miru y Veigardón, saliendo a caleyar con munches duldes de la cantidá de ñeve que tendremos na parte alta, anque danos por xugánosla y salimos en playeros y pantalón curtiu por mor del calor que facía a la hora de partir.