Fonduveigas (Degaña) - El Mangueiru - La Braña - El Picu'l L.lagunachu - La Brañolina - TramosCuetos

22 de Marzu de 2026 

Track: Fonduveigas (Degaña) - El Mangueiru - La Braña - El Picu'l L.lagunachu - La Brañolina - TramosCuetos

Dempués d'un par de díes de monte, ya teníemos bastante claro, el nivel de ñeve nes cordaleres y sobretou la carga dependiendo de la orientación, asina que con un día frescu, pero soleyeru, el nuesu últimu día pel suroccidente diba ser más tranquilu, sin bregar col mantu blancu, poro averámonos al cordal de Degaña col envís de conocer la so cota más alta, como ye'l Picu'l L.lagunachu.

Pa ello, conducimos dende Cabual.les onde tuvimos el nuesu campu base, hasta Fonduveigas, onde a la salida del pueblu, tenemos un apartaderu xusto al par de la carretera, onde tenemos el cartel d'aniciu de ruta hacia la L.laguna Brañolina, que comparte muncha parte del percorríu que vamos llevar alantre.

Partimos de Fonduveigas (750 m)

Preparámonos y entamamos a caleyar pela pista qu'asciende tol monte'l Mangueiru, costándonos abondo garrar ritmu, nes primeres y amplies envueltes, col únicu entretenimientu anicial, de travesar el regueiru la Cárcava pela L.lera, que baxa con agua enforma del desxelu, amosando a les clares como fórmase'l carcavón pola fuercia la riega nestes dómines.

Caleyaremos pista alantre, metiéndonos pali pali nel monte, pudiendo esfrutar del fayéu, que cola primavera más avanzada tienen que tar perguapos, avanzando na parte alta, n'envueltes más curties que van averándonos hacia'l sur, onde ganamos vistes a la cordelera pela qu'anduviéramos el día anterior, destacando como non, El Tesu Mular, que vuelve a gananos cola so forma cuadrada. 

Salimos pela pista del monte'l Mangueiru

Tamién acolumbramos la Pena Rogueira, con bien de ñeve, que quedónos nel tinteru pa otra incursión pel Suroccidente, siguiendo a les últimes envueltes que nos lleven a la Braña Fonduveigas, onde echamos un traguín d'agua al par de la cabaña, pa siguir pel evidente senderu qu'empobínase hacia'l norte, demientres tenemos señalización de la l.laguna Brañolina pela que baxaremos al Sur.

Increyibles vistes hacia los montes d'Ibias averándonos a la Braña Fonduveigas

Percorremos el senderu hasta que piérdese un pelín pente les escobes, teniendo que lluchar un pelín, hasta salir al Chanu, onde cambiáremos la broza peles l.leres cuarcítiques que nos faen avanzar más apriesa hasta'l Rel.lanu, puntu nel que tomamos otra l.lera en cuestu hasta aportar a la Boqueta Sequeras, onde atopámonos col mar de ñubes hacia'l valle de Monesteriu d'Ermu.

Esfrutamos de l'ascensión hacia'l Picu'l L.lagunachu pela Boqueta Sequeras

Como regalu na Boqueta Sequeras, tendremos vistes a la so l.laguna y fadremos l'esfuerzu final pel entepechu hacia'l cumal, teniendo que superar los últimos 100 m a pinchu, hasta los 1873 m del Picu'l L.lagunachu, que como podríemos esperar, ufreznos unes vistes increyibles de tola redolada y más nun día tan guapu, soleyeru y con tolos montes ñevaos.

Grandes vistes nun día preciosu dende los 1876 m del Picu'l L.lagunachu

Llevamos tres díes de monte y les pates, sumáu a un pocu de folixa que tuviemos per Cabual.les na cena, faen que nos desplomemos a xintar cola calma y tomar el sol, simplemente esfrutando d'esti guapu monte. Si bien ciertu ye, que la xubida ye cansina per pista, el monte paga la pena muncho, tando tol grupu bien contento pola ascensión.

Descendemos hacia la Llaguna Brañolina

A estos altores, siendo domingu y teniendo per delantre la llarga vuelta a casa, teníemos preparada una baxada per un valle alternativu, pero tenemos mieu d'enmarronanos pelos bardiales o atopar el supuestu camín de baxada tomáu, poro decidimos conocer la l.laguna Brañolina y tornar a la pista, descendiendo pela arista SE, onde atopámonos cola mayor bregada cola ñeve, alcordándose les nueses espinilles de la ruta del primer día al Bustatán.

Baxada tranquila dende la Brañolina per Tramoscuetos haca la pista del Mangueiru

Ensin más, arribamos a la l.laguna Brañolina, a la que casi nun somos a pescanciar por tar xelada y con una capa de ñeve enriba y continuaremos pela fastera de Tramoscuetos, onde siguimos un cortafueos que va facenos baxar hacia'l Cantu, prau desbrozáu, que dará pasu a traviés de la viesca a la pista, ensin tener que tornar a la Braña Fonduveigas.

Finamos la ruta aportando a Fonduveigas de nuevu

Dende equí, ya solo tendremos que dexanos caer pela pista otra vegada durante 6 pesaos kilómetros, hasta arribar de nuevu a Fonduveigas, onde completamos otra ascensión a un monte realmente guapu, anque sin prieses hubiésemos escoyíu una baxada alternativa pa completar la circular de forma más elegante, al igual que'l día anterior nel Tesu Mular, quedándome una sensación agridulce d'estes dos rutes.

En resume, ascensión al Picu'l L.lagunachu, cota más alta del cordal de Degaña y Monte Cimeru Astur, completándolo nun percorríu de 17,3 km, superando un desnivel acumuláu de +/-1220 m nun total de 5 hores y 40 minutos.

Camudando'l Camín pela xerra de Degaña