Laguna Negra (Pinares) - Laguna Helada - Llanos de la Sierra - Urbión - Laguna Larga

4 d'Abril de 2026 

Track: Laguna Negra (Pinares) - Laguna Helada - Llanos de la Sierra - Urbión - Laguna Larga

Continuamos de vacas per Soria y dempués del pateín per Caracena hasta la Calera y d'otru día d'escalada en familia per Muriel de la Fuente, decidimos pegar una ivernalina hasta'l picu Urbión, que veíase bien cargáu de ñeve, nos últimos díes. Garraremos entós, los preseos necesarios pa salir del pasu, anque al nun trayer furgo, nun pude meter grandes maraviyes y tiramos hasta la Laguna Negra, ensin madrugar demasiáu.

A les diez y media la mañana, tamos nel aparcaderu de la Laguna Negra, estráu de xente a estes hores, la mayor parte visitantes/domingueros, que nin tan siquiera son a caleyar los menos de dos kilómetros de carretera hasta la llaguna, poro tenemos al autobús a fueu p'arriba y p'abaxo, aportando nós en pocu más de venti minutos a la Laguna Negra, con una capina de xelu nesta dómina l'añu que la fai más guapa entá. 

Partimos dende l'aparcaderu de la Laguna Negra (1595 m) en Pinares

Namás salimos de la Laguna Negra, vamos alcontrando xente ensin nengún tipu de preparación, xugándose la vida a lo tuntu intentando xubir a la parte alta pel correor superior. Nós, sacaremos piolé y crampones, atopando xente na parte alta, que nun sabemos bien, que tal van volver a baxar, entrugándonos como lo veíemos y contestando, qu'esperasen un pelín a que subiese la temperatura a ver si ablandaba dalgo la ñeve.

 Ascendemos con xelu penriba la Laguna Negra hacia la Laguna Helada

La verdá ye que nun doi créditu cola estupidez humana, nun soi referencia nesti casu, porque al llevar mochila de trail, nun quise que cargasen los compas colos crampones, pero al menos llevo un piolé y bota monte y con curiáu, faigo les travesíes más espuestes penriba les muries que cierren la llaguna Negra. Nun son pasos de gran dificultá, pero cola ñeve xelao si que tienen muncha esposición en dalgún pasu y alloriamos con que dalgunos xubiesen en playerinos y un bastonín entre tola familia.

Pasamos pela Laguna Helada y continuamos ascensión al Mojón Alto

Escaecemos a tola dominguerada actuando con muncha irresponsabilidá y salimos hacia la Laguna Helada, onde ya atopamos xente preparada, lloñe del dominguéu, con sus barayones, polaines, ropa de monte y munchos con crampones y piolé tamién. La realidá ye qu'aportamos a la Laguna Helada, tapecía dafechu polos metros de ñeve esistentes y decidimos aprovechar pa pegar un ascensu hacia'l Mojón Alto, llibrando les cornises pela manzorga. 

Damos vistes hacia'l Pico Urbión en tola nuesu crestéu pasando pelos Llanos de la Sierra

Al dir "preparaos" tamos faciendo un pocu de cursu pa Miguel, que nun ta d'usar crampones, asina que garramos una rampla respetable y pindia, abriendo buelga pa que tire de crampón y xemelu hasta los 2098 m del Mojón Alto, onde podremos quitar los crampones un ratín, ya que la fastera suroeste, caltién muncha menos ñeve y podemos dir crestiando hacia los Llanos de la Sierra, alcontrándonos con varios montañeros en direición contraria.

Ascendemos al Pico Urbión (2226 m) con una bayura montañera increyible

Perpasaremos los Llanos de la Sierra, otru dosmil soriano de 2185 m, atopando unes vistes perguapes hacia'l Pico Urbión, onde ya vemos muncha xente pela so faldera. Descenderemos hasta'l colláu y baxo un calor infame, aprovechamos toles fondes buelgues p'ascender ensin dengún problema hasta los 2226 m del Urbión, onde nos faen una semeya amables montañeres y ponémonos a picar dalgo pasaes la 1 la mañana.

Descendemos pela Laguna Larga de nuevu hacia la Laguna Negra

La baxada del Urbión vamos facela pela "ruta normal" desfaciendo camín hasta'l colláu de nuevu y continuando descensu hacia la Laguna Larga, que malpenes atopamos pente la ñeve, bordiándola pela manzorga, pa siguir dempués per onde meyor nos paez hacia'l descensu final hacia la Laguna Negra, puntu onde tenemos que tirar de piolé y crampones pa baxar, ya que l'estáu de la ñeve, mui pisáu y xeláu taba pelín peligrosu.

Dende la Laguna tornaremos apriesa al aparcaderu, ya que teníemos intención de xintar en Vinuesa, aportando al coche pasaes les 3 de la tarde, completando una ruta de 4 hores y 45 minutos, con un total de 12.5 km y superando un desnivel acumuláu de +/- 650 m con un día ablucante de ruta ivernal.

Camudando'l Camín nel Urbión más guapu y primaveral