Les Arriondes (Parres) - Collía - La Forcá - La Teyera - Güexes

12 d'Abril de 2026 

Track: Les Arriondes (Parres) - Collía - La Forcá - La Teyera - Güexes

Día repunante de meteo, nel que toca inventar daqué pa salir al monte pela mañana, asína que llueu d'una primer idega picante, tenemos qu'echala p'atrás porque la lluvia éntranos antes de lo debío, alcontrando dalgo más rápidu pa facer nel conceyu Parres y más en concretu dende la so capital, Les Arriondes, onde Pepa y Jose andaben de furgonetéu seliquino.

Partimos de Les Arriondes (30 m) capital de les Piragües

Almorzamos un cafetín y enantes de les 10 de la mañana tamos preparaos pa salir caleyando dende l'aparcaderu, cruciando'l rigu Chicu y saliendo per carretera per amplies envueltes hacia Pendás, onde pocu enantes alcontramos crucie hacia'l pueblu de Collía, atopando tamién marques de percorríu, que la verdá ye que podíen currase pela viesca que va travesando tola carretera.

Continuamos de Pendás hacia Collía per camín asfaltáu primeru y de tierra a lo postreru

Ensin más, garramos camín asfaltáu que bordea'l picu Campaces y Pendás pelo baxo hasta l'altor de la subestación onde salimos a la mandrecha a la fin, a camín guapu de tierra que nos dexará en Collía, col ablucante cresteríu del Cabalgadoriu y la so peña más alta enriba, la peña Les Corones.

Baxamos de Collía hacia Santitomás pa xubir hacia'l Conventu

Pararemos en Collía un segundín a garrar agua y empobinámonos per un camín a mediu desbrozar que va llevanos siempre en descensu, con vistes al nuesu oxetivu que nun ye otru que la Forcá, al otru llau de la carretera'l Fitu. Baxaremos, pel camín con pinta riega, saltando dalgún árbol qu'otru y aportamos a la puente sol rigu Bodes en Santitomás, onde cruciamos la carretera y ascendemos per carretera hasta'l Conventu, onde ya vemos la evidente canal pela que xubiremos a la Forcá.

Perguapa curtia canal a los cumales de la Forcá pasando al llau de los sectores d'escalada

El día ta perguapu nel intre y vamos esfrutando peles cases del Conventu, saliéndonos a la mandrecha enantes de les del Cotaraxu, ya que conocemos perbien l'accesu a la canal, ya que nos parés de La Forcá, alcuéntrase una escuelina d'escalada, onde va munchos años que nun visitamos, pero que ye ún de los llugares más guapos pa trepar, con unes vistes pa Picos d'alloriar.

Encumamos los 361 m de la Rasa dempués de ximielgase un pocu pente la peña

Pasaremos al llau de dellos seutores nel nuesu avance pela canal llerosa, que siendo curtia como ye, facémosla ensin problemes, teniendo que trepar en dalgún puntu na parte alta pa salir al primer cumal de la mandrecha, pelín incómodu de tarrén calizu y yerba, encumando los sos 361 m d'altor.

El día nun acaba d'abrir p'algamar les precioses vistes de Picos, asina que nun paramos de más, ya que vemos ñubes prietes pel occidente, contentámonos con echar un vistazu a la xerra Cabalgadoriu, perguapa dende la nuesa posición y descendemos de nuevu a la forcada pa entamar l'ascensu al cumal cimeru de la peña La Forcá.

Facemos cresteríu cenciellu hasta'l cumal más altu de la Forcá, la Bandera de 383 m

Na forcá tendremos que bordiar un pelín pela mandrecha un curtiu muru y ya per senderu aportamos a la crestería que faese cenciella, demientres la ñube quítase y tenemos a la fin les vistes a los Picos d'Europa, xustu al tiempu qu'encumamos los 383 m del picu la Bandera, cumal cimeru de la peña La Forcá, que paeciónos un monte bien interesante pa un día curtiu de monte.

Sacaremos la semeya de rigor y decidimos descender ya que si tardamos muncho la moyaura puede ser asegurada, poro baxamos del cumal y tomaremos una evidente vallina, onde picamos dalgo protexíos del vientu, pa continuar descensu pela arista Oeste. 

Descendemos per tarrén calizu bien guapu hacia la collada La Gobia 

Baxaremos hasta un corte n'arista viendo una evidente vira a la manzorga, onde entraremos nun paraxe calizu preciosu, saludándonos delles cabres baxo los muros de dalgún seutorín más de la escuela, como ye la Torrexona, evidente aguya, que llevamos viendo dende les cases del Conventu y el Cotaraxu.

Nel nuesu casu malpenes vemos la corona la Torruxona, que dexaremos quiciás pa una visita escaladora y baxamos ya per una llera, hasta la perguapa collada la Gobia, llugar idílicu onde salúdanos un burrín, nel nuesu pasu per un camín amuriáu perfeutamente.

Baxamos de la Gobia hacia la Teyera onde facemos visita al so increyible Molín

Pasaremos peles desaniciaes y malrrolleres cases de la Gobia y continuamos hacia los Calerinos, onde vienen a visitanos un par de mastinos mozos, teniendo que rascái la barrigona a la mastina fema, pa continuar hasta la Teyera, onde nun podemos facer otra cosa que visitar el so molín, activu nel intre, pudiendo visitalo y alloriando cola fuercia l'agua que baxaba, sumando coses prestoses a la ruta, ya que bien paga la pena, ver la canalización, la fariña recién molida, etc...

Saldremos del molín per pista cruciando la riega Fíos pa entrar na parroquia de Nevares, cruciando'l monte hasta Güexes, onde tornamos a la carretera pasando pela Venta y el Peruyal, onde pararemos a tomar una botellina viendo que la meteo aguanta un pocu. El track que llevábemos, continuaba hacia l'area recreativa de la Toya, pero como ya tenemos bastante carretera nos pies, decidimos acortar la ruta pel pueblu de Cuadroveña. 

Continuamos pel monte hasta Güexes pa continuar hasta'l Peruyal onde paramos a tomar el vermú

D'esti xeitu, saldremos a la manzorga per carretera hacia Cuadroveña cruciando'l pueblu pel barriu de La Cueva y continuaremos en descensu hacia'l cementeriu de Les Arriondes entrando pela ilesia Samartín al nucleu urbanu.

En resume, rutina mañanera, con demasiáu asfaltu, qu'allargamos dende Les Arriondes, pero que si'l nuesu interés ye la Peña Forcá pudiera facese dende Collía a mou paséu rápidu. A nós, saliónos un total de 13.8 km, con un desnivel acumuláu de +/- 545 m nun total de 5 horines de patéu.

Camudando'l Camín peles Arriondes