Lodares (Porma) - Peña Armada

22 de Mayu de 2026 

Track: Lodares (Porma) - Peña Armada

Dempués de munchos meses ensin vacaciones, a la fín garro unos díes de vacaciones, coincidiendo cola carrera pel monte del Cainejo, pero mis soleos nun me dexaron preparame pa participar, asina que finalmente, marché esos díes hacia la fastera del Porma - Cistierna, col envís de patear más seliquino y escalar dalgo si les temperatures permitiénlo.

Salimos dende la curva de Lodares (1115 m)

Pal primer día preparé una rutina curtia pa probar un pocu les pates, yéndonos hasta'l banzáu del Porma, llueu de durmir la nueche anterior en Puebla de Liyo, parándonos nel llugar de Lodares, onde aparte de mirador ornitolóxicu y embarcaderu pa kayaks, tenemos la partida pa dos rutes de la contorna, como ye a la Peña Armada y la Peña San Pedro.

Averámonos a la bas de la Peña Armada pente rebolleres moces

Nós tenemos na tiesta la Peña Armada, asina que salimos apriesa pela carretera pa salinos a la manzorga y travesar dellos praos, entrando nuna viesca de rebollos xoven pel qu'alcontramos dellos senderos, hasta arribar a la parte alta d'una llomba allargada (la Peña La Vega de 1210 m) que déxanos en posición d'acceder a la faldera sur de la Peña Armada, imposible dafechu, por mor de les muries verticales enllenes d'utreres.

Siguimos senderu fitáu algamando pocu a pocu grandes vistes del banzáu del Porma

Por embargu, atoparemos dellos fitos que van indicándonos un bordéu perguapu pente fayes moces hacia l'occidente siempre n'ascensu hasta atopar la brecha de "l'armadura" que ye esta peñona, entamando la parte divertida y fresca de la ruta, ya que taba pegando duro a les 11 la mañana, faciendo los seliquinos trepes onde malpenes ponemos les manes, algamando unes vistes increyibles de tol banzáu del Porma.

Malpenes ponemos les manes en dalgún puntu y ya tamos na crestería de Peña Armada con vistes a tola redolada

Ensin más parones que sacar les semeyes de los pasinos, entainamos hacia la boquera de salida a l'arista cimera de la Peña Armada, averándonos, nel intre, al cumal Suroriental de 1425 m, con vistes dalgo empuercaes a cumales de Cistierna en primer términu y hacia la Montaña Palentina más lloñe, anque como non, el Susarón llévase toles nueses miraes, ya que ye un monte ablucante.

Encumamos la proa oriental (1425 m) pa tornar a la boquera y xubir a la cume cimera de Peña Armada

Nun paramos res, pesie a la brisina prestosa, vemos que'l día pa calecer enforma, asina que tornamos pela arista hasta la boquera y xubimos apriesa al cumal cimeru de la Peña Armada de 1465 m, que ye un auténticu prau na, onde paramos a echar un triagu, sacar la semeya de rigor col Susarón ya intentar acolumbrar les peñes de la redolada (Forqueta, Ancino, Prau Llano...).

El Susarón dominando tola contorna del Porma nos 1465 m de la Peña Armada

Son les 11 y media y tirámonos abaxo, anque ye un cumal pa echar el bocadiellu feliz coles vistes, pero nun hai quien pare de calor, asina que tornamos a la boquera y entamamos el descensu pel canalizu, aportando a la faldera de la Peña Armada, onde propongo a Pepa dir hasta la oriella del banzáu, pa facer una circular hasta Lodares, ya que nun me presten les rutes de xube-baxa.

Descendemos hacia la boquera y baxamos el canalizu pa siguir viesca abaxo hacia la vega'l Porma

Vémolos bien, descendiendo per una llera ensin dificultá pa metenos nuna viesca bien guapa, pela que siguiremos dalguna traza d'animales, hasta dar a la parte baxa onde ya tenemos praos, echando una güeyada a la Peña Armada, ya que tan sólo esa pequeña resquiebra paez dar accesu a la parte alta. Tiraremos praos abaxo, onde atopamos senderos de ganáu y aportamos a la oriella nun llugar máxicu, con un isllote enfrente y vistes a les peñes calices de la redolada.

Travesamos la viesca ensin problemes algamando prestoses vistes del Porma caleyando tola oriella alantre

Dende equí, siguiremos avanzando per tola oriella con menos sensación de calor que na parte alta, pudiendo esfrutar de les munches ensenaes del banzáu, alcontrando llugares realmente guapos, apeteciéndonos hasta dar un bañu, pero casi tenemos más ganes d'aportar al coche y xintar dalgo, ya que vamos col almuerzu ya nos todiellos y nun paramos nin a xintar mediu puñáu de frutos secos.

 

Siguimos siempre per senderu conociendo varies ensenaes bien guapes hasta tornar a Lodares

Lo dicho, namás tendremos que siguir d'ensenada n'ensenada pelos senderos de ganáu, pudiendo agüeyar bien de truches, hasta facer un pequeñu ascensu, ya que la viesca aporta hasta'l mesmu banzáu, travesando la viesca per bonos senderos y saliendo ya hacia la desembocadura de la riega de Vegamián, que danos accesu a la carretera onde teníemos l'aparcaderu de la furgo en Lodares.

En resume, ruta curtia pero mui guapa, con ciertu toque picantín pola "trepadina" pel canalizu, pero ensin denguna dificultá pa xente averada al monte, que completamos col mui necesariu paséu pela oriella del banzáu, nun total de 3 hores d'actividá, +/-450 m de desnivel acumuláu y 6,5 km de percorríu.

Camudando'l Camín nel Porma