Fuentes de Peñacorada (Cistierna) - Peñacorada

24 de Mayu de 2026 

Track: Fuentes de Peñacorada (Cistierna) - Peñacorada

Continuamos unos díes de descansu pa Llión y dempués d'un día d'esguilada complexa por mor del sol, el domingu pela mañana madrugamos una vegada más, alboreciendo con más sueñu del que nos prestaría y salimos de Cistierna, onde cenáremos la nueche anterior, p'averanos hasta Fuentes de Peñacorada, onde aparte d'esguilar na so redolada, vamos ser el puntu d'entamu pa la nuesa ruta.

Partimos de Fuentes de Peñacorada (1150 m)

Asina que 9 la mañana tamos ya preparaos pa entamar a caleyar, sintiendo ya que va ser un día duru de calor, lo que ya entama a agobiar, puesto que la tarde puede tornase en tar a la solombra pegaos al rigu, ensin más cosa que facer, qu'hidratase y xintar, ya que les escueles llioneses nun mos tan dando muncho marxe pa poder esguilar de tarde, salvo a les últimes hores y cuesta enforma motivase al final del día.

Salimos de Fuentes de Peñacorada per un prestosu camín armáu hacia'l Campurrial

La suerte ye que vamos salir empobinándonos hacia l'Oriente y los nuesos pasos van llevanos per un camín bien guapu, armáu en dalgunos puntos y sobretou a la solombra a estes hores de la mañana, que va dir averándonos ensin munchu desnivel hacia'l colláu'l Campurrial, onde tendríemos accesu al valle del Tuéjar y con vistes hacia la montaña Palentina.

Entamamos ascensu hacia la Peñacorada, siempre per camín marcáu enforma

Dende'l colláu'l Campurrial, siguiremos siendo hacia unes guapes peñes, dexándoles a la mandrecha y entrando nel entepechu más duru de l'ascensión, onde noto un pelin los soleos, pero parando un pelín más de lo avezáu en nós, voi xestionando muscularmente los problemes, upándonos hasta l'arista occidental, onde tovía vemos que queda un bon pedazu hasta'l cumal.

Ganamos l'arista Oeste de Peñacorada algamando vistes de tola meseta castellana

Nel intre, Pepa y yo, quedamos ablucaos coles vistes, ya que dámonos cuenta que la Peñacorada, paez l'últimu finxu del cordal cantábricu al sur, viendo tola inmensa meseta castellana, tema que comentamos y nun-y presta muncho a un montañeru llionés, pero bono, como dixe, paez mesmamente que'l reinu asturllionés, termínase nesta llinea montañera del cordal de Peñacorada y ye que'l contraste ye brutal dende'l norte y el sur.

Continuamos hasta los 1835 m de la Peñacorada

Continuaremos crestéu alantre, cola vista pues en tola redolada de montes que tenemos per conocer, apaeciendo nel llistáu el Relance, Moru, Cerrosu, entre otros, ya que vemos formaciones calices con una pinta estupenda. Ensin más, aportaremos a los 1835 m de la Peñacorada, sentándonos un ratín a xintar cuatru frutos secos y a charrar col montañeru llionés que tiraba p'abaxo pa ver de tarde a la Cultural, que xugábase'l descensu nesti finde.

Decidimos tirar tol macizu de Peñacorada alantre hacia l'Oriente

Lo dicho, miramos la hora, les 11 y cuartu y paez que va calecer per bien, pesie a correr una brisina agradable, decidiendo colar enantes de palmar al sol, asina que tirámonos abaxo hasta'l mesmu colláu d'entrada a l'arista, pa continuar per tola cordelera oriental, per senderu más que marcáu, aportando a dalgun cumal secundariu, pasando pel guapu mayáu de la Laguna, puntu nel qu'entamaremos el descensu per una pindia vallina.

Descendemos per una pindia vallina hacia un fayéu que llévanos hacia la riega Bodeguinos

Podemos na realidá baxar per esta vallina, con senderu marcáu a tramos en varios ciszas, pente un fayéu mozu o facer una llarguísima envuelta hasta'l colláu Los Ratones, siguiendo pel camín Olvidado, con más envuelta tovía, pa tornar hacia la riega Bodeguinos xustu nuna costrucción ganaera, onde empatamos dambes posibilidaes, l'atayu con trabayu y la cenciella pero llarguísima envuelta.

Garramos agora si, pista baxo'l sol que nos dexa de vuelta en Fuentes de Peñacorada

Una vegada que tamos na pista, ya tamos de nuevu nel aniellu de Peñacorada, marcáu con finxos y diremos baxo un sol cafiante, a tramos baxo la solombra y otros a plenu sol, de vuelta hacia Fuentes de Peñacorada, teniendo dempués de cruciar la riega de Fuentes, una cabera xubida hacia'l pueblu que se nos fai bola pol calor sofocante.

En resume, ruta mañanera a un monte perimportante del cordal cantábricu como ye la Peñacorada, que nun conocíemos y prestónos muncho, completando'l percorríu de 12 km en pocu más de 4 hores, superando un desnivel acumuláu de +/- 770 m.