17 de Xunu de 2026
Miércoles cualesquiera col horariu de branu y somos a xuntanos, pa entrenar, tres del GM Xuan de la Borrina per Morcín. La idega yera facer la ruta al Picu Figares, que tantes vegaes fice entrenando pa les carreres y si'l tiempu permitíalo, continuar hasta'l Monsacru y facer el percorríu que más nos apeteciese, ya que teníemos avisu tormentes.
Son pocu más de les 4 la tarde, preparámonos y salimos caleyando pela sienda verde pela que discurría la vía'l tren pente'l pozu Monsacru y la Pereda en Mieres. Agora, tendremos un seliquín patéu, que tamién usamos pa dir a esguilar a los seutores de la Peña Garcilleru, teniendo que cruciar un par de túneles illuminaos, hasta'l Caliru'l Rotellón, onde aparte del caliar, tamién había llugar de crucie de trenes.
Comentar que ta n'estudiu, recuperar la siguiente parte de la senda verde, al traviés de la cantera de Peñamiel, pa xunise a la esistente de La Pereda a Frechura, pudiendo casi unir Mieres cola Foz de Morcín, lo que daría munches posibilidaes deportives, sobretou ciclistes a estos conceyos mineros. Nós, tamién tenemos perpasáu dalgún túnel más, con "usu ganaderu" p'acceder a la fastera de Cueva Cabrera tamién na escuela de la Peña Garcilleru, pa esguilar pero dexa de ser transitable nel siguiente túnel.
Aportaremos al Rotellón y ellí abandonamos la senda principal que muerre pocu más alantre como ya dixera y descendemos per un guapu senderín, que suelo facer corriendo en baxada o col mochilón d'esguilada en xubida y nunca ficiera a un ritmu normal, dándome cuenta de lo guapa que ye, sobretou cuando aportamos al rigu Riosa, caleyando a la so vera con delles lleres y pocines hasta dar cola puente, que llévanos a travesar la carretera al altor del Molín de Figares.
Nel intre, vamos acometer una bona xubida, que munchu préstame pa entrenar, ya que nel primer tramu, ascenderemos pel vieyu camín a Figares, empedráu y con traminos bien guapos y con vistes hacia la Cueva Cabrera en dalgun puntu y a los seutores del Garcilleru, pa entrar pela parte baxa al pueblu de Figares, onde garramos la pista formigonada que lleva hacia l'antena asitiada nel Picu Figares.
Otru camín perbien conocíu pa dir a esguilar a la escuela de Figares, que nos tienen zarrada durente casi 9 meses por mor del añeramientu de la utre, nuna decisión tan estúpida como inxusta, cuando ye un ave, que ta n'espoxigue per Asturies y ta fuera de cualesquier amenaza polos escaladores. El camín sedrá común col accesu a la escuela, hasta una envuelta formigonada, onde tirámonos hacia l'antena, continuando per un prestosu senderín que nos dexa nos 525 m del Picu Figares.
Como digo ye una de mis subides favorites pa entrena, ya que en 2 km mediu correnderes ascendemos casi 400 metros positivos, aportando nel intre con una sudada brutal y cola truena amenazando de continuu, nuna carga de calor y humedá, que nun sabemos si nos dexará continuar muncho más. Poro, sacamos semeya y colamos d'ellí ensin disfrutar de les guapes vistes, baxando pel mesmu trazáu hasta Figares de nuevu, onde descendemos hasta la carretera que vien de Santolaya, pa garrar camín hacia la Collá.
Percorreremos en xubida tol camín dende Figares y la Collá, que tuvieron a bien, recuperar dende la casa conceyu morciniega, pa completar esti percorríu circular tan prestosu. Aportaremos a la Collá y paez que'l día quier abrir una migaya, asina que decidimos continuar hacia'l Monsacru, anque si nun tenemos tiempu o punxérase a llover, podemos continar este percorríu montañeru, baxando dende la Collá hacia la Puente, per otru camín bien guapu y recuperáu que pasa peles cases de Panizales.
Nun vamos volvemos llocos, asina que tiramos poles clásiques envueltes a la Madalena, anque tamién podríemos ascender al Cantu La Sierra dende La Collá y siguir pela Canal d'Otura hasta la Granda Entrepuertes, pero lo dicho, nun vamos dar más vueltes cola truena abeyando y tiramos envueltes p'arriba, aportando al mayéu Les Capiyes (La Madalena), onde va abriéndonos el día, pa sacar dalguna semeyina coles Capiyes, tirando aína hacia la Muezca, pasu penriba la capiya Santiago, que pudiera facenos baxar hacia La Covarriella.
Como siempre, siguimos el senderu dende la Muezca, pasando al llau del cumal de La Fayona, al que siempre escaecemos y baxamos a la colladina pa de secute, facer el tramu final d'ascensión al Cuitu Rumiru. Nesti puntu, Charly pa cagándose en too pol ritmu al que vamos y ye que ta mui fuerte, pero los ritmos correnderos quéden-y un pelín grandes y el chornazu con una humedá brutal tampoco ayuda muncho.
Son les 7 la tarde y ya llibramos bastante un xarazu, asina que nun vamos tentar a la suerte y tiramos pela Vallina Monxa, canalina bien guapa, que va facenos pasar embaxo del Aviru Salón, desplome descomunal nel que ta desendolcándose otru sector d'esguilada, pa continuar pasando pembaxo la Aguya Madalena, la Carrera'l Llobu y l'Aviru Campón, seutores de la escuela La Covarriella, nel que tanto tamos trabayando nos últimos años.
Pararemos nel Aviru Campón onde tenemos a dos collacies esguilando y dempués de charrar, ponse a cayer dalguna gotera, poro decidimos descender apriesa, faciendo un par d'intentos de garrar un camín que va direuto a Los Yanos, pero nun somos a topalo, poro damos vuelta pa baxar a la Covarriella y garrar agua, ya que tábemos escosos y con un secañu xabaz, teniendo que xintar con patates la pista formigonada hasta Los Yanos.
Travesaemos Los Yanos y continuamos a Otura per camín que sácanos a la parte alta'l pueblu, pa siguir hacia'l Picaretu, nome de la food truck y llugar onde viven unos collacios polacos y dende'l Picaretu vamos garrar camín hacia Les Comuñes, onde tomamos el senderu que va facenos baxar ya definitivamente hasta Llugar de Baxu, xustu pel percorríu que fai la carrera d'Afuega'l Pitu.
Caleyaremos peles cais de Llugar de Baxu y garraremos la carretera hasta La Puente, pasando pembaxo de los murazos qu'hai n'Entrefoces, onde asítiase una guapa escuelina d'esguilada y tan sólo quédanos crucier el Riosa na Puente y continuar de nuevu hasta'l cementeriu, onde tendremos unes meses pa xintar el bocata llueu d'esta rutina, que pudiera ser una mañanera de llibru.
En resume, bon entrenu per casa, metiéndonos un total de 14 km xuniendo delles partes de los percorríos morciniegos de monte, teniendo que facer un desnivel acumuláu de +/- 1000 m nun total de 4 hores y media, ganándonos les cerveces na Moncloa, mientres poníase a xarazar y la cena dempués en Santolaya.
No hay comentarios:
Publicar un comentario