Primavera 2025
Munchu tiempu ensin espublizar nel blogue na rellacionáu cola esguilada y la verdá ye que toi un pelín más enfotáu n'equipar que n'apretar asina que tampoco ye que tea teniendo grandes resultaos trepando, poro caltengo un pocu l'atención en deprender equipando en solitariu, pasando tardes escolingáu a mi bola nos parés y cuando escalo suelo tar a un nivel más baxo, pasando'l día colos collacios.
Sicasí, tenía pendiente la entrada del Mortiru, un seutor equipáu por Sergio, Pablo,... nel que como ya conoceréis, ya qu'espublizáronse los croquis esta selmana, vais poder alcontraros con un grau mediu-baxu perimportante, lo que va facer la delicia de tolos escaladores, poniendo mui en valor, l'increyilbe trabayu que ficieron pa sacar eses víes alantre, ya que'l procesu de llimpieza nesos graos ye insufrible dafechu.
Dígolo, porque ta pasándome a mi nun seutor nel que tamos trabayando y poro, soi cosciente, que lo mesmu la xente nun lo valora lo suficiente, lo duro que ye sanear y llimpiar graos baxos, sobretou en muries con munchu matu, lo que fai que de munchu cantu, pero tamién munchísimu trabayu, asina que valoráilo y disfrutailo y si veis a los equipadores da-yos les gracies, porque meter paraboles, failo casi cualquiera, pero dexar una vía llimpia y sin peligru de romper na, ya ye otru mundu enllenu de paciencia y dedicación.
Nel tema deportivu, les víes que pudi probar fueron más o menos les que salen nos croquis a la mandrecha paeciéndome toes mui buenes, dalgunes bastante tieses pal grau, lo que diz a les clares el nivel de xarréu que manexen dalgunos 6a/+, metiendo metros de calidá y diversión de cantu a manos enllenes. La llargura les víes tamién engaña y muncho, ya que dalgunes aporten a los 40 metros, anque la media andará pelos 25 m, ya que munches tienen segundu llargu.
Comentar que l'añu pasáu, los equipadores tuvieron que desequipar les víes pa poder continuar colos trabayos y terminar el seutor, ya que la xente nun respeta los tiempos, poniéndose en munchos casos en peligru, ya que les víes tan pocu probaes, pueden romper cantos, nun tar terminaes de sanear o simplemente hai que dar la oportunidá a los propios equipadores a encadenar les sos víes.
Nun ye ser más o menos repunantes, ye que simplemente tenemos que respetar los tiempos de los equipadores y dexar trabayar a gustu ya ensin tar pendientes que dalguien se te meta en víes que nun tan entá pa esguilar y puedan tener un accidente, que lo d'equipar faise pol amor al arte, gastando perres del bolsiellu na mayor parte y que mínimu qu'agradecer y respetar el trabayu de los demás.
Mil gracies a Sergio, Pablo y el restu de collacios que llimpiaron, sanearon y equiparon esti seutor, agora tan sólo queda respetar les places nel pueblu d'Otura, que son munchos muros a esguilar pa tan poques places.
No hay comentarios:
Publicar un comentario