La Matosa (Piloña) - Picu Torre

6 de Xineru de 2021

Track: La Matosa (Piloña) - Picu Torre

Día de reis na ñevada más grande de los últimos años y como somos republicanos, pues tiramos pal monte. Alcuérdome d'una ñevadona así, fai diez años, cuando ficiéramos n'ivernal el Picu Fariu nes llendes de Xixón, Siero, Sariegu y Villaviciosa, más menos.

Ta tol mundiu más menos igual, esquiando, saliendo a correr pel ñeve, una llocura, pero ente tanto plan, alcontrámonos Kíla y yo, preparando a les 9 la mañana una ruta que nos pudiera prestar. Vueltes y más vueltes de tracks y decídome a tirar pa Piloña, a facer dalgún de los vértices xeodésicos que tengo per facer nesa fastera.

Vistes de la Matosa, el nuesu puntu de partida (284 m)

Los Llanos (Morcín) - Cuitu Rumiru

3 de Xineru de 2021

Track: Los Llanos (Morcín) - Cuitu Rumiru

Iviernu de nuevu estrañu, ensin rutes del grupu y con una meteo gafa con una ivernada como nun viéramos n'años, ya que vamos pa 3 selmanes siguíes de ñevaes continues. Asina, que vemos media ventanuca o más bien, echámos-y un par y decidimos dir hasta'l Monsacru pa facer dalgo rapidín y quitar los picores montunos.

Kíla esfrutando de la ñeve dende los primeros pasos

Güel.les (L.lena)

21 d'Agostu de 2020

Visitina a una "nueva" escuela nel conceyu de L.lena  nel pueblín de Güel.les de camín al puertu Payares. Como bien digo, ye nueva ente comines, ya que oyera falar d'ella dende va 4 o 5 añinos, así que supongo que ye bien conocía pela xente de les cuenques d'Asturies.

Vista del paré dende'l senderu d'averamientu

 

Ya ficiera un intentu en Xunetu de dir hasta ellí, pero perdímonos p'alcontrala, pente truena y xarazu, colo que desistimos y escapamos del sur, averándonos al centru, onde entá diéranos tiempu a trepar. Esta vegada, magar de les indicaciones d'un collaciu, fuéramos a pasar el día Anna y yo, alcontrando'l camín y el senderu recién desbrozáu, asi que nun tuviemos munchos problemes p'alcontrar el seutor.

Encadenando'l Palidón, un 6c finu de regletes

 

 Aparte, tuviemos suerte y topámonos con xente esguilando, poro pudimos entrugar un pocu poles víes y demás, anque a la fín, teníemos ganes de facer metros y dedicámonos a trepar graos cenciellos que nuna escuela nueva, hai que dir garrando puxu poquin a pocu.

La caliza de Güel.les habrá que volver a catala

 

Nesta primer visita, ficiéramos a vista un 6a+, dos 6b+ y un 6c, toos ellos esixentes d'escalada fina regletera en tramos y de carboncillos n'otros, nun amiestu d'esguilada asemeyada quiciás a Pel.luno o a escueles más de la cordelera cantábrica, tipu Llión.

Güel.les (Seutores visitaos)

Croquis modificaos por mi de la escuela d'escalada de Güel.les. Si dalguien tien dalgun problema pola so espublización retírense ensin mayores problemes

El Brañil.lín (L.lena) - Xerra del Cuitunigru

9 d'Avientu de 2020

Track: Brañil.lín (L.lena) - Xerra del Cuitu Nigru

Otra selmana de vacaciones, na que llegó una ivernada curiosa saliendo a pisar ñeve, pero con mui mala meteo, na que tan sólo un día tuvimos bon tiempu, lo que fuimos a aprovechar nosotros y munches persones más que naguaben per sacar los esquís a pasiar.

Partimos dende El Brañil.lín (1435 m)

Poncebos (Cabrales) - Bulnes - Cuetos d'Albu - Llagu Rasu - Valcosín

23 de Payares de 2020

Track: Poncebos (Cabrales) - Bulnes - Cuetos d'Albu - Llagu Rasu - Valcosín

Lo de siempre, llamada d'Ana con picor de monte xabaz y Berto qu'acude a la llamada. Conocémonos demasiáu bien, como pa saber que ye lo que-y presta a la compañera de grandes batalles, asina que preparo una circular cañera pero con toque teúnicu na parte alta.

Problemes? Tolos que quieras, tamos casi n'Avientu con mui poques hores de lluz y ocúrreseme la xabazada d'ascender a los Cuetos d'Albu dende Poncebos. Camiento que somos a ello, pero tamién tengo claro que nun tamos na forma d'otros años y ye que'l 2020 pasó factura en tolos sentíos.

Partimos de Poncebos (260 m) de nueche aportando a Bulnes (715 m) pela canal del Texu

Inguanzu (Cabrales) - Seu L'Home Muertu - La Canal - El Cuetón - Ostandi - Busnuevu

31 d'Ochobre de 2020

Track: Inguanzu (Cabrales) - Seu L'Home Muertu - La Canal - El Cuetón - Ostandi - Busnuevu

Segunda fola de la pandemia del horrendu 2020, no sanitariu y no económicu a estes altures pa muncha xente, quedándonos colo únicu positivu, que ye la posibilidá de salir al monte siendo federáu ya que tamos confinaos perimetrálmente nes grandes ciudaes.

Sicasí, somos conscientes de la gravedá del asuntu, poro xuntámonos namái que seis del grupu monte y vamos en coches separaos. Nel ambiente, toos tenemos un ruxerux de que quiciás ye la última ruta que vamos poder facer nesti añu, ya seya por cierre gubernamental o por pura responsabilidá de grupu.

Partimos del guapu pueblu d'Inguanzo (315 m)

Tarna (Casu) - Tabayón del Mongallu - Cuetu Negru - Vega Pociellu

 27 de Setiembre de 2020

Track: Tarna (Casu) - Tabayón del Mongallu - Cuetu Negru - Vega Pociellu

Día serondiegu enforma, con frescu mañaneru pero con unes previsiones perbones de sol tol día, poro espérase un "llenu" nel monte astur, ante la nueva moda que tamos sofriendo. Ye lo que traen les pandemies, camudos de vezos na xente y al non poder salir d'Asturies dalgunos meses, la xente descubrió lo que tenía en casa.

 

Nun tengo mui claro entá, si esto ye positivu o non, por un llau que la xente avérese al monte, pue dar de sí un mayor interés nos conceyos y nel país por caltener les siendes llimpies, al menos los PR y GR, pero paezme que sedrán la sociedá la que dicte sentencia y la masificación acabará por crear problemes mediuambientales y pente la xente llocal y los foriatos.

Partimos del pueblu casín de Tarna (985 m)

Sobrevil.la (Teberga)

10 d'Ochobre de 2020

Entamaba un puente d'Ochobre con una meteo pelín gafa, con fríu y dalgo de lluvia a tramos del día, poro díbemos pa Teberga a facer lo que buénamente se pudiera. El primer día, magar d'alborecer relaxádamente, terminamos por dir hasta Murotecho.

Esguilando un pocu per Murotecho

Sedría la mió tercer visita y nun acabo de pillá-y el puntu, quiciás porque siempre vamos con condiciones fríes y pocu agradables. Esta vegada, al menos llevaba los deberes apuntaos y nun yera otra que facer Juventud Creadora, una 7a finu de regletéu y ñapines que según la xente diba prestame.

Juventud Creadora.... una vía fina, téunica y mui, mui guapa

Y teníen razón, prestóme, una vía mui guapa, fina de ñapes nel pasu y llueu un tramu más físicu arriba, siendo mui completa en términos xenerales. El pegue poniendo cintes ya fué perbono, pringando al dir más dinámicu de lo que diba prestame a una regle ínfima pero al segundu pegue ya la enchufamos y nun dió tiempu a metese en namái.

 

Habrá que tornar per ellí...

Sobrevil.la (Seutores visitaos)
 
Croquis modificaos por mi de la escuela d'escalada de Sobrevil.la, por mor de La noche del Lloro. Gracies y col so permisu.

 

Millaró (Los Argüeyos) - Cuetu Millaró

27 de Setiembre de 2020

Track: Millaró (Los Argüeyos) - Cuetu Millaró

2020, añu pandémicu. Branu enllenu de salides al monte, col grupu, sin grupu, xataes, ascensiones clásiques. Qu'esperar a partir d'agora? Entamamos temporada como si nun pasara na? Munches incóunites teníemos y aún así, decidimos entamar la temporada del GM Xuan de la Borrina con una salidina curtia pa intentar calecer pates y que la xente vaya animándose.

 

Partimos de Millaró (1380 m)

Val.le (Somiedu) - Pena L.lana - Picos Blancos - Picos de la Mortera

24 de Setiembre de 2020

Track: Val.le (Somiedu) - Pena L.lana - Picos Blancos - Picos de la Mortera

Un día cualesquiera, como siempre, Ana dame un toque picando pa ver si pueu garrar un día pa salir al monte. Esti añu, pente la pandemia y demás, tengo díes sueltos a esgaya, asina que póngome a preparar dalgo pa pegar un patéu guapu, pero ensin xatada infame, ya que tenemos previsión de lluvia pa la tarde.

Va tiempu, que sé que los últimos dosmiles de Somiedu que me queden por facer, son les peñes de la Mortera, poro preparo una circular guapa y p'allá que vamos. Cuantayá que nun tuviera per Somiedu y más entá pel Val.le, asína que paezme una idega de lo más afayaiza.

Partimos del Val.le (1258 m) en Somiedu