Trail Villa de la Sidra (Nava)

22 de Marzu de 2023

Track: Trail de Peñamayor (Nava)

Web del Trail: Trail Villa la Sidra

Clasificaciones: Clasificaciones 2023

Un añu xustu fai que tornábemos a correr pel monte, o más bien, a "competir" dientru del nuesu nivel, que ye'l montañeru que fae de too. Daquella, ficiera la carrera curtia, sofriendo un pelín na parte final de les Foces del Pendón, como suel pasar nesta carrera, sicasí termináremos contentos y con ganes de más, faciendo otres tantes carreres na temporada.

Esta vegada, vengo mui rodáu, anque nos últimos meses ya entré en mou escalador y la compañera de carreres lesionóse, poro nun toi entrenando res, yendo namái, que de carrera en carrera que nun ye poco. Pero bono, pente los tres díes nel Trail de Deva y correr la Maxi Kangas, nun corretiar de quincena en quincena, nun me taba yendo mal.

 

Silvia que volvía a correr una carrera llueu d'un mes y mediu

Como plantegame esta carrera de 26 kms yera una entruga que tenía na tiesta, ya que sabía que podía apretar casi tol percorríu, asina que salimos un pocu atrás como siempre, garrando ritmu y corriendo sacante los atascos per Pra, tolos primeros kilómetros hasta l'entamu de la xubida hacia Fayacaba.

Durante la xubida, pesie a dir cargando un pocu pates, vi que'l ritmu que llevaba yera curiosu y enriba taba divirtiéndome, sufriendo pocu y charrando muncho cola xente que diba alcontrando, asina que siguimos fuerte hasta Peñón d'Orosu pa baxar a echar un tragu y entrar n'ascensión al Picu Peñamayor.

 

Travesando'l cresteríu per Peñamayor

Equí entamamos a regular ya que les posiciones nes que me movía, yeren de ritmos fuertes, a los que nun toi mui avezáu, asina que controlando calambres con sales, hidratando y demás, fuimos a caltener ritmu, hasta entamar la baxada hacia les Praeres, onde tamién nun quise apretar muncho, ya que la pista fízoseme pelín pesada.

Nes Praeres, piqué dalgo y continué a la espera de los problemes vinientes, pero xubimos la Varallonga con muncha facilidá, ganando posiciones y ya tireme abaxo hacia les Foces del Pendón, con otra visión, descendiendo apriesa y sofriendo un pelín, como siempre nel llanu de les foces, pero munchísimu menos qu'otres vegaes, anque sigue paeciéndome incomodísimu de correr esti tramu.

 

Les Foces del Pendón pasando factura como siempre

Aportamos al descensu final hacia H.uentesanta, colo meyores ritmos de carrera que soi a alcordame, faciendo una xubida hacia Piloñeta, corriendolo tou y ganando dalguna posición más, pa facer los últimos kilómetros a bonos ritmos y con sensaciones mui prestoses hasta aportar a la meta, onde alcontrábase Montse animando, a la que vamos ver si-y pica volver a correr.

Como siempre ambientazu per Nava, llavase un pocu, llimpiar una ferida d'un fostión que pegara na parte final y tomar unes cerveces esperando por Silvia, que tuviera qu'abandonar por mor de dolores nuna rodiella.

Aportando a meta mui contentu cola carrera

En resume, carrera guapísima, con nueva organización de diez, na qu'esfruté munchísimu con un tiempu de 3 hores y 10 minutos, quedando'l 56 na xeneral y el 15 na mio categoria y como siempre alloriando cola xente, lo munchu qu'entrena y lo fuerte que ta, ya que paezme que por muncho qu'entrenara baxar de les 3 hores, quédame fuera l'alcance y siendo sinceros, tampoco ye a aportame tanto.... pocos montañeros quedamos nesto de les carreres.

Torrostigu (Babia) - Morrunegru

12 de Marzu de 2023

Track: Torrostigu (Babia) - Morrunegru

Nueva salida del GM Xuan de la Borrina, averándonos esta vegada a la comarca de Babia en Llión, una de les fasteres más guapes pa facer actividá montañera nel Cordal Cantábricu y como tenemos munches cosines pendientes por facer, siempre ye un placer dexanos cayer pelos pueblos babianos, siendo esta vegada Torrostigu, el nuesu puntu de salida y el Morrunegru el nuesu oxetivu.

Llueu del viaxe clásicu pagando la primada del Güerna, almorzaremos nel Moriscal en Güergas de Babia pa siguir viaxe hasta Torrustigu, onde aparcamos los coches, demientres aporta al pueblu tamién, el grupu Fariñentu de Pola L.lena, que diben siguir en travesía hacia la Farrapona.

 

Partimos de ruta dende Torrostigu (1355 m)

Saldremos nuestru grupín, mui lloñe de les aglomeraciones de xente d'otros grupos, caleyando peles cais del pueblu, siempre con vistes al ablucante tabayón de la Foz, viéndose a les clares como de rápidu taba siendo'l desxelu nesta temporada, hasta dar col crucie hacia'l valle de Valverde, el cúal siguiremos, esfrutando d'una cómoda xubida per pista.

Kangas Mountain (Cangues d'Onís)

4 de Marzu de 2023

Track: Cangues Montain (Cangues d'Onís)

Web del Trail: Cangues Montain (Cangues d'Onís)

Clasificaciones: Clasificaciones 2023 

Tornábemos a correr en Cangues d'Onís, cincu años dempués, quedándome ensin dorsal pa la Original de 33 km, nun sabiendo mui bien que facer, decidiéndome al final, por intentar superame un pocu y correr la Maxi Trail de Cangues de 58 km, másima distancia y de mayor desnivel a la que diba enfrentame, llueu del Desafiu Somiedu del branu anterior.

Nesti sen, sabíemos que la carrera con terminala, abríanos la puerta a dir apuntándonos a la mítica Travesera, pero bono, tampoco ye que fuera un aspeutu definitivu, sinon qu'apetecíame probar más distancia y ver si yera capaz de regulame curiosu y facer una carrera mediu intelixente.

 

Ascensión al Picu L'Arbolín... pelín afogáu que díbemos

Como nos grandes eventos, fuimos pa Cangues d'Onís, a durmir na furgo, topándonos con munchos collacios del GM Xuan de la Borrina, pasando una tarde-nueche estupenda, cenando y tomando unes cerveces enantes de dir a sobar, descansando bastante mal, pa ser sinceros, espertándome a les 3 de la mañana, dando vueltes el restu la nueche hasta les 6 de la mañana que sonó l'alarma.

Vestise na furgo, echar una güeyada nel bar de la Estación, con poca pinta d'abrir, yéndome hasta la gasolinera, onde pude tomar un cafetín, mercar dalgún donuts, una isotónica y agua pa salir bien hidratáu, escaecíendoseme coles prises el frontal, necesariu a dicir verdá pa les primeros venti minutos, que pude facer tranquilamente gracies a la montonera corredores que xuntámonos a les 7 la mañana pa facer esta Maxi Trail de 58 km y 3500 positivos.

 

Los dos alloriaos que participamos na Maxi Kangas

Na salida xúntome con Alberto y Natalia, que sácanos una semeya de salida, arrancando peles cais adormecíes de Cangues, con dalgún qu'otru vecín, aplaudiendo dende les ventanes al nuesu pasu. Los primeros kms sedrán más rápidos de lo que diba prestame hacia'l picu Arbolín, aportando en pocu menos d'una hora, decidiendo dexar qu'Alberto tire a sos ritmos y ver si soi capaz d'alcontrar la mió carrera, ya que taba faciéndoseme pelín abegosu siguilo.

Ya más tranquilu, garré un grupín col que fuí alternando posiciones, charrando dempués de Les Roces, con un corredor de Madrí, con muncha esperiencia en ultres, asina que tomelu como referencia, faciéndoseme un poco más amable tol tramu de carrera pel Cantu La Cerica, anque a la baxada final hacia Cangues, tuve que baxar ritmu, porque ví que nun me sentía mui bien.

 

Cruciando dos pontes claves na Kangas Mountain

En Cangues tuve un bon ratu, esperando a ver si alcontrábame con más compañeros que facíen la Original, pero nun tuve la suerte, asina que xinté lo que consideré, recoloqué les zapatilles con calma y salimos pel Puente Romano, hacia'l picu La Cogolla, compartiendo un tramu colos de la original, lo qu'agobia un pelín al xuntanos tantos corredores, con tiempos y oxetivos mui distintos.

Separámonos al fin y entramos nun tramu de carrera llarguísimu, nel que vémonos mui pocos corredores en tola xubida, faciéndose per llarga l'ascensión, teniendo na crestería final un par d'amagos de calambres, dalgo normal dempués de 5 hores de carrera.

Nel avituallamientu, el cuerpu pide enerxía, asina que metemos barrines enerxétiques, charramos calmao colos voluntarios y salimos caleyando sele, pa ver si les pates vuelven a furrular, controlando los calambres con sales y bebiendo muncha agua, algamandos una baxada hacia Avalle, más que positiva, compartiendo tramu con corredores del Horizonte.

Xubida hacia Següencu puntu clave de la carrera

 

Nesti puntu, ya conocemos bien el restu la carrera, cola xubida hasta'l colláu Andrín, la cual faigo percómodu, sintiéndome bien, anque la baxada hacia Tornín, dizme que tengo que regular, que queda muncho por delantre, aportando al avituallamientu con un compañeru del Horizonte y col corredor madrilanu, entamando la temida xubida a Següencu, pela nomada pedrera.

Como siempre, la pedrera nun ye lo pior, sinon que la pindia xubida pela viesca hasta l'últimu avituallamientu del día, faise perduro pol calor, polos kms que llevamos enriba y les hores (8 hores y 36 min). Una vegada más, toca tirar de cabeza, tomalo con calma, beber, xintar un bombón de chocolate qu'ufreciéronme y facemos la cabera xubida hasta L'Altu Següencu y entamábemos la baxada final hacia Cangues sabiendo que ya taba casi fecha.

 

Aportábemos a meta dempués de 9 hores y media de carrera

 Paez mentira qu'una baxada tan correndera y prestosa, si vas con pates, atragántese tanto, adelantando delles posiciones na primer parte, alcontrándome colos últimos de la Original (munchísimu méritu, que diben sofriendo lo suyo) hasta Ñeda, onde véome bien apretando na xubida y pagándolo nos últimos kilómetros de baxada, tocando controlar munchísimu pa nun terminar la carrera con calambres.

Finalmente, corríemos peles cais de Cangues d'Onís, entrando na meta, con collacios y tolos compañeros del GM Xuan de la Borrina animando, faciendo un total de 9 hores y media clavaes, no más baxo del intervalo que tenía en mente entre 9 y media y 10 hores.

En resume, carrera intelixente per primer vegada, sin cebame, con dalgún tramín de sufrir por cansanciu, pero regulando munchísimu los calambres, sabiendo soportar llevar el frenu manu echáu, terminando na posición 114 d'entre 222 parcipantes lo que nun ta mal del too, pa ser una carrera tan llarga y dura.

Figares (Salas) - Picu Muxagre

26 de Febreru de 2023

Track: Figares (Salas) - Picu Muxagre

Día perruno no meteorolóxicu, ensin munches oportunidaes de facer monte curiosu, asina que decidimos dir a tachar ún d'esos Montes Cimeros d'Asturies, na que la so dominancia, con vistes de la redolada, ye calter a destacar ya que'l so atrautivu nun ye nin munchu menos pola guapura del tarrén onde vamos movenos, con bayura ocalitales en tola redolada.

P'ascender al picu Muxagre, asitiáu nel conceyu de Salas, averámonos hasta'l pueblu trucheru y salmoneru de Corniana, onde atopámonos a la hora del almuerzu colos corredores del Trail Traviesas de Corniana, que nun m'alcordaba ya que yera nestes feches.

 

Partimos de Figares (135 m)

Con bon ambiente y muncha variedá de pinchos pa escoyer, almorzaremos y siguiremos en coche hasta'l guapu pueblu de Figares, na faldera'l monte Muxagre, saliendo a les 10 y media la mañana a caleyar primeru per carretera pael barriu la Llonguera, hasta un cruce onde ya metémenos nel monte, travesando per pista, una viesca agradable, demientres el día quier orpinar, col borrín tamién dalgo xuguetón.

Trail de Deva (Xixón)

17,18,19 de Febreru de 2023

Track: Trail de Deva (Xixón)

Web del Trail: Trail de Deva (Xixón)
 
Clasificaciones: Clasificaciones 2023  

Última carrera que ficiera enantes de la pandemia, fae dos añinos, terminándola, nun sé mui bien cómo, col tobiellu fechu una llaceria. Dempués del trail per Deva, tuviera tiempu abondo pa recuperar y munchu más hasta que nel trail de Peñamayor de l'añu pasáu, decidiera tornar a esto de les carreres pel monte.

Esta vegada, aprovechando qu'andaba per casa en Xixón, decidí probar a correr tres díes siguíos, faciendo la nocturna de 5 km el vienres, una carrerina rápida y curtia de 11 km el sábadu y el domingu terminar cola llarga de 27 km, too ello combináu como non, con dir a esguilar nos tiempos muertos pente carrera y carrera.

Entamu del primer día na nocturna de 5 Km

Entamábemos cola noctura de viernes, a la qu'aportaba dempués de da-y unos peguinos a un proyeutu na Carba en Peña Manteca. D'esti xeitu, cansáu d'apretar venía con un apixote perimportante conduciendo, poro tocó tomar un cafetín nel Camping de Deva con una palmerina de chocolote y ya preparámonos calentando un pocu y saludando a tolos familiares y collacios que corríen esti finde.

Una vegada preparaos los distintos participantes, fuimos saliendo en pareyes con diferencia de 30 segundos, nuna modalidá de contrarreló prestosa abondo, al igual que correr de nueche col frontal, toda una esperiencia en cuanto a los sentidos, corriendo lo más apriesa posible sollerte de cada pasu que das, anque pelín agobiante.

Preparaos pa la curtia del sábadu de 11 Km

Al día siguiente, llueu de tomer ciertes birres con un collaciu, llevantámonos preparaos pa la segunda carrera, de 11 km pero mui correndera, poro tocaba intentar controlar nervios y nun dir a fueu, cosa que suel costame munchísimu. Nel día anterior, faciendo la posición 30 na xeneral, diba ser difícil regular, asina que salí con Gus y Miguel, pero aína perdí la tranquilidá adelantando a tola xente que diba alcontrándome.

 

A la fín, los primeros kilómetros de reláx, marcaron un pocu la clasificación perdiendo 5 puestos col día anterior na xeneral, quedándome con bones sensaciones por apretar controláu, anque con munchos temores pal últimu día, nel que llegaba la prueba llarga de 27 km y nun sabía como diben responder les pates.

Esfrutando muncho'l sábadu na correndera

 

Pa rematar, como non, una persona sensata diría pa casa a descansar, tumbase nel sofá, estirar un pocu, pero quedara con collacios pa trepar un pocu y el día taba mui guapu como pa quedar en casa. Asina que vermú, bocata y pasar la tarde na paré, sicasí, nun contaba con tener que subir hasta L'Argayu... teniendo un patéu finu cola mochilona d'esguilar.

 

L'últimu día, despiértome con poques ganes de correr, llueu de tomar dalgo con más collacios, pero bono, teníemos el retu d'intentar terminar l'envite corredor, asína que pa Xixón tiramos, volviendo a intentar salir con Gus y Miguel, pero como siempre, voi dexándome llevar y na primer cuesta fuerte, piérdolos de vista y ya continúo en solitariu.

Col frenu man echáu na llarga de 27 Km del Domingu

 

Dicir, que llevé'l frenu man echáu hasta'l kilómetru 15 nel avituallamientu de metá de carrera más menos y viendo que les pates furrulaben, intenté caltener un ritmu controláu, dando la vuelta a tol cordal de Riosecu y sabiendes de que tábemos ya volviendo hacia Deva, apreté un pocu más na penúltima xubida, garrando nel camín a Illán y Alberto que diben en pareya.

 

Dellos kilómetros xuntos, con dalgún percance d'Alberto y qu'Illán nun diba como debiera, siguí baxando fuerte dexándolos atrás, garrando la última xubida hacia l'observatoriu con bon ritmu y cola tiesta puesta na cabera baxada y sobretou nos kilómetros d'asfaltu hacia'l camping de Deva.

Aportamos a meta faciendo una bona carrera nos tres díes calteniendo posiciones

Por sorpresa, muscular y mentalmente pude terminar con ritmos decentes, non tan rápidu como'l sábadu pero sí con sensación de nun tener calambres, ganando dalguna posición más, terminando los tres díes, na posición 33 de la xeneral, lo que dexó un bon tastu de cara al restu la temporada.

Como siempre, ensin ser de les carreres más guapes d'Asturies, sí que correr por casa presta, con tola familia faciendo deporte o viniendo a animar, asina como'l puntu de retu de los tres díes de carrera, colos que camiento y espero, poder siguir faciendo y meyorando sensaciones y posición.

 

El Puertu (Cangas del Narcea) - Picu Los Penones

12 de Febreru de 2023

Track: El Puertu (Cangas del Narcea) - Picu Los Penones

Continuábemos d'ivernada, saliendo parte del grupu a facer esquí de monte y otros decidímonos, anque fuéramos pocos, a conocer un puquiñín más el suroccidente, esi gran desconocíu pa facer monte. Nun ye xera cenciella aportar a los montes d'esta fastera astur, ya qu'al ser muncho más ancha, los viaxes en coche faesen pelín pesaos, sicasí, a sabiendes que díbemos tar más tiempu nel coche que caleyando, averámonos hasta'l Puertu L.leitariegos.

Nin que dicir tien, que xuntanos Carlos, Haritz, Kíla y yo, yera como remembrar tiempos d'antaño, asina que llueu del almuerzu en Cangas del Narcea, continuaremos viaxe hasta'l Puertu L.leitariegos, onde atopamos "gran cantidá" d'esquiadores na estación y xente animosa de dar dalgún pateín pela ñeve, pero lloñe, mui lloñe de toles aglomeraciones nel centru asturianu.

Partimos d'El Puertu (1522 m) con ñeve dende les cais del pueblu

  

Casi a les 12 arrancaremos a caleyar, escapando un pocu del fríu mañaneru, saliendo per pista pegaos a la riega las Eras, alcontrándonos la ñeve ensin transformar, polvu, dafechu distinta a les idegues que teníemos poles temperatures reinantes, cola mochila cargada colos crampones y el piolé y dexando los marañones en casa.

Villanueva (Santu Adrianu)

11 de Febreru de 2023

Pues cuntar, cuntábemos con nun tornar per Villanueva, pero... siempre hai xente afanosa con munches ganes de trabayar, que dá-yos por equipar otru seutorín nes muries penriba'l rigu Trubia. Va tiempu que viera los croquis peles redes y tenía pendiente arrimame hasta'l seutor, más que nada, porque préstame muncho dir a llugares nuevos y sobretou porque tenía una inmensa necesidá de trepar en graos más relaxaos.

 

Kíla asitiándose nel pie de vía... desbrozáu con procuru

 

Asina qu'averámonos hasta ellí, Silvia, compañera de carreres pel monte y yo, aportando un pelín más tarde Lau y Suco, que tamién animábense a conocer el seutorín. Entamamos, faciendo un quintín a la manzorga del too, yendo con curiáu ya que tovía puen romper cosines, pa siguir per un 6a a la so mandrecha prestosín, pasándonos a un 6a+ de diedru a la mandrecha del too, que bien pudiera ser más, fácil 6b pa min.

 

Suco y yo probando los dos 6cs del seutor

 

 Xustu a tiempu, aporten Lau y Suco, dexándo-y un toprropín a Lau pa que fogaease un pocu, viendo tamién que yera durina pa 6a+, pasándonos dempués a probar un 6c y un 6c+, a la manzorga y mandrecha d'una covarata, siendo les dos de bloquín na parte alta, que si nun sabes a lo que vas, son pringables dafechu.

 

 

Un par de detalles de los nomes de les víes

Como final del día, metíme nun 7a Hedera Helix a vista, como a toles demás, pero pringué esta vegada, nel pasu y ye que tien un puntu bloqueru, nel que nun ties mui clares les preses hasta que nun toques un pocu y garres postura pa salir del techín, siendo per una vegada dalgo más dura si yes mui altu y nun te da pa xubir un pie drechu clave.

 

Lau sigue apretando a tope en top-rope

En resume, bon día per Villanueva, onde ya pensaba que nun diba volver, pudiendo facer toles víes a vista-flash menos el 7a que tuve que da-y un segundu, completando una vegada más la escuela, anque nun sedrá la visita final al conceyu de Santu Adrianu, ya que tovía nin trepé en Valdolayés nin conozo la Cueva'l Mar y la placa nueva equipada... asina que tenemos trabayu.

Villanueva (Seutores visitaos)
 
Croquis modificaos por mi de la escuela d'escalada de Villanueva, por mor de Piratas Free. Gracies y col so permisu.

Cayón Trail (Piloña)

5 de Febreru de 2023

Track: Cayón Trail (Piloña)

Web del Trail: Cayón Trail (Piloña)

Clasificaciones: Clasificaciones 2023  

Pues cuantayá que tornaba a L'Infiestu a correr na Cayón Trail y ye que la cabera vegada nun quedara mui contentu, nun sé mui bien, si pol estáu físicu, si porque taba a piques de lesioname del piramidal o porque sin más, llevaba nel 2017 munchísima tralla enriba y nun disfrutara la carrera como tien de ser.

Esta vegada, con un día soleyeru y fríu, llueu de facer un pateín curtiu con dellos collacios nel cercanu Picu Incós, diba a la carrera a esfrutar a intentar reconcialiame coal carrera y de pasu, a ver si podíemos meyores aquellos tiempos de cuando yera más mozu.

Numberosa participación de corredores nel Cayón Trail

Llueu del monte y tomar una cervecina colos collacios, avérome a pol dorsal y de pasu recibir un regalu que tocárame nun sortéu, siendo unos playeros de trail y un pantalón la sorpresa, asina que pocu más podemos pidir, más que poner el dorsal y salir a completar el día lo meyor posible.

Munchísima xente per Infiestu pa la carrera, anque a dicir verdá, pocos conocíos, así que charro con poca xente y abellúgome del fríu al solete, nos minutos enantes de la carrera. A les 4 la tarde, entamamos a correra aputuguñaos pente les cais, pa salir pelos barrios altos d'Infiestu hacia'l monte Cayón, onde la carrera va estirándose en tramos mui correnderos, hasta aportar a les primeres ramples del monte.

Tramos correnderos na parte inicial y final

Vamos turnando sucesives xubides, con dalgún tramín llanu, ya inclusu con dalguna pequeña baxada hasta garrar otra trialera pindia, hasta aportar a lo alto'l monte Cayón, el Picu Fariu, onde quiciás, dalgo reservón na xubida, entamo a correr más fuerte, pasando a unos cuantos corredores qu'apretaron na xubida, con tramos de llanéu y quebrapates a ritmos mui fuertes.

 

Cuando quiero dame cuenta, percorremos tol monte y entama la baxada a fueu, onde voi alcontrándome cada vez meyor, corriendo tola segunda parte, inclusu con un repechín quebrapates, mui al final de la baxada, hasta salir del tarrén téunicu, superdivertíu y garrar les pistes finales de baxada a L'Infiestu, onde soi a garrar ritmos, mui lloñe de los avezáu en mí, pembaxo los 4 min/km.

Diversión asegurada nes baxaes téuniques

Con mui bones sensaciones, aporto a meta, baxando dellos minutinos mi anterior y única participación, garrando cuatru frutos secos y una botellina, pa tirar a la furgo a camudar la ropa, ya que la temperatura ye perbaxa y nun ta p'andar perende pasando fríu.

En resume, tastu perdulce del día, pente'l monte seliquín pel Picu Incós y agora pel Cayón, quitando carbonilla y esfrutando de la carrera munchísimu, anque tamién hai que dicir que l'estáu de les trialeres yera de primera ensin barru y fue un prestor baxar a fueu tol monte Cayón.

Entramos n'Infiestu faciendo un tiempín curiosu

Lludeña (Piloña) - Picu Incós

4 de Febreru de 2023

Track: Lludeña (Piloña) - Picu Incós

Día de carrera col Cayón Trail n'Infiestu, pero siendo una carrera curtia y de tarde, dábame pereza perder la mañana ensin facer gran cosa per casa, asina que falo con Carlos pa dar una vueltina pela zona, animándose Haritz con Laia, decidiéndonos por un techín nororiental como yera'l Picu Incós, techu del conceyu de Cabranes.

Pa ello, quedamos pa tomar un cafetín n'Infiestu a una hora moderada, averándonos dempués hasta'l cercanu pueblín de Lludeña, onde asítiase un Palaciu, una Ilesia curiosa y un Turruxón que bien valía la so reconstrucción, por munchos motivos, tanto hestóricos, como poles vistes que tien de tolos Picos d'Europa.

 

Salimos del pueblu de Lludeña (297 m) con vistes al picu Incós

Saldremos caleyando enfrente la Ilesia, baxando unos metros de carretera hasta la Picota, onde garramos camín hacia la Llantada, pasando pela enorme casería de la Blanca, siguiendo camín penriba del Turruxón medieval de Lludeña, el cuál caltiénse nun estáu curiosu, ensin esbarrumbe de les sos parés, pudiendo restaurase como puntu turísticu piloñés, con grandes vistes de tolos montes orientales astures.

Vil.lanueva la Tercia (Los Argüeyos) - Circular Ivernal pel Cuetu Millaró

 29 de Xineru de 2023

Track: Vil.lanueva la Tercia (Los Argüeyos) - Travesía Ivernal per Millaró

Día de ruta col GM Xuan de la Borrina, que nun sal alantre por varies baxes que-y ven les oreyes al llobu, viendo les temperatures y la necesidá d'equipamientu ivernal. Poro, terminamos por montar un grupín d'esquí montañeru, nel que decidióse dir hasta la comarca Los Argüeyos y más en concretu al municipiu de Vil.lamanín, onde asítiase'l pequeñu pueblu montañeru de Millaró la Tercia.

Ellí, entama una clásica ascensión al Cuetu Millaró, malnomáu Brañacaballo, que ficiéramos va dellos años, nuna circular seliquina pa entamar temporada. Esta vegada, l'estáu de la carretera fizo que nun pudiéramos aportar nin tan siquiera al pueblu, así que dexamos los coches al entamu la carretera y salimos portiando pel asfaltu ñeváu y xeláu, hasta alcontrar la capa suficiente de ñeve, pa preparar los trastos y foquiar o raquetiar.

Entamamos a caleyar nun día perfríu dende'l desvíu a Millaró

Esfrutaremos del pequeñu escobiu fechu pela riega Millaró pente las xerras Blancas y Curril.los, pudiendo agüeyar carámpanos nos parés, dando amuesa de les perbaxes temperatures a les que tamos, sicasí l'ascensión hasta'l pueblu, fai que vayamos caleciendo'l cuerpu y a la salida d'ésti, a plenu sol, entamaremos a quitar capes de ropa.

Paez mentira, pero cruciar foquiando colos esquís un pueblu n'iviernu, ye una d'eses coses que presten pola vida, asina que felices siguimos per pista rigu alantre, hasta la divisoria de regatos, nas Regadas, decidiendo siguir camín alantre hacia las Tablas, envede facer más envuelta pela pista que va hacia Farramedal.