jueves, 9 de marzo de 2023

Figares (Salas) - Picu Muxagre

26 de Febreru de 2023

Track: Figares (Salas) - Picu Muxagre

Día perruno no meteorolóxicu, ensin munches oportunidaes de facer monte curiosu, asina que decidimos dir a tachar ún d'esos Montes Cimeros d'Asturies, na que la so dominancia, con vistes de la redolada, ye calter a destacar ya que'l so atrautivu nun ye nin munchu menos pola guapura del tarrén onde vamos movenos, con bayura ocalitales en tola redolada.

P'ascender al picu Muxagre, asitiáu nel conceyu de Salas, averámonos hasta'l pueblu trucheru y salmoneru de Corniana, onde atopámonos a la hora del almuerzu colos corredores del Trail Traviesas de Corniana, que nun m'alcordaba ya que yera nestes feches.

 
Partimos de Figares (135 m)

Con bon ambiente y muncha variedá de pinchos pa escoyer, almorzaremos y siguiremos en coche hasta'l guapu pueblu de Figares, na faldera'l monte Muxagre, saliendo a les 10 y media la mañana a caleyar primeru per carretera pael barriu la Llonguera, hasta un cruce onde ya metémenos nel monte, travesando per pista, una viesca agradable, demientres el día quier orpinar, col borrín tamién dalgo xuguetón.

 
Ascendemos pel Regatón pa siguir travesando Regueraseca hacia Mourusu

La pista, cómoda, dirá sacándonos a la parte alta, per tarrén un pocu a pinchu, hasta entamar un llargu faldéu, travesando la Regueraseca, decidiendo siguir en travesía hacia les cases de Mourusu, envede atayar per dalgún camín que xubía más direutos, allargando un pelín más la ruta y ganando vistes hacia'l Visu o hacia la cota más alta de Salas nel picu Aguichón.

 
Pasamos Mourusu pa siguir camín hacia la capiya la Virxen del Llanu

Continuaremos cómodamente pela pista, esta vegada muncho más fea por mor del desbrozáu del ocalital, hasta aportar a la capiya de la Virxen del Llanu, nome que toma del cordalín nel que tamos, siendo éste ún de los llugares más guapos de la ruta. Taremos un ratín mirando'l curiáu edificiu, pa salir per detrás, travesando una viesca pa continuar ya nun faldéu relaxáu, hasta la fastera norte del Muxagre.

 
Arrancamos ascensión final nel Llanu la Felechosa

Aportaremos al Llanu la Felechosa, onde intentamos acolumbrar dellos montes que nos pudieran sonar, atalatando'l Llan de Cubel y tola xerra Los Vientos, siendo una pena'l día, ya que tan sólo vemos pente'l borrín los cantiles del Cabu Negru, na redolada del Cabu Peñes, quedándonos con ganes d'asitianos un pelín más nesti conceyu de Salas, que tenemos tan escaecíu pal monte.

 
Facemos cumal nel Muxagre (661 m)

Ensin más, aportaremos a los 661 m del picu Muxagre, monte cimeru astur, que domina na redolada de Salas y al que por suerte, llégase per bon camín, ensin dengún problema, lo qu'agradezse ya que ya de nun ser mui guapu, al menos nun tocó bregar nin mediu metru en tola ruta, asina qu'al menos ye perafayaiza pa una mañanera, ensin envís de grandes aventures.

 
Descendemos hacia Las Cárcuas pa tornar pocu a pocu a Figares

Ensin más, col día que sigue murniu y que la hora'l vermú va acercándose, descendemos de nuevu al Llanu la Felechosa, pa entamar un descesnu n'envueltes pela fastera oriental del Muxagre, aportando a Las Piñiradas, puntu nel que tocamos asfaltu de la Pv-1 que va dir faciéndonos pasar pelos barrios de Las Cárcuas y la Llanca, enantes d'aportar de nuevu a Figares.

 
Aportamos a Figares finando esta rutina mañanera

En pocu menos de 3 hores, zarrábemos esta circular al Picu Muxagre, ún de los montes más importantes de Salas y pola so dominancia d'Asturies, qu'anque nun seya de lo más guapo, al menos ye cómodu de conocer, ensin bregaes innecesaries, con esta ruta de 11 km y +/- 585 m de desnivel acumuláu.

Kíla peles capiyes montunes de Salas

No hay comentarios:

Publicar un comentario