La Molina (Cabrales) - Cabeza Pandescura - Casañu

21 de Febreru de 2016

Track: La Molina (Cabrales) - Cabeza Pandescura - Casañu

Alborecemos, Kíla y yo, na habitación del pisu de Fernan en Colombres, magar d'un increyible día de monte nel H.ucantu, con posterior cena, cerveces y partíu del Sporting. Güei, quedamos a les 8 y media n'Arenas pa facer ruta de calendariu con tol grupu Xuan de la Borrina, asina que toca entainar y garrar carretera hasta Arenas.

Dende Xixón, sedría'l viaxe típicu.... pero nós tenemos que dir per Unquera y Panes, pa entrar a Cabrales pel Valle Bah.u de Peñamellera, xuntándonos toos como siempre nel café Cares. Llueu del almuerzu, siguimos hasta'l pueblu cabraliegu de la Molina, pero cagámosla dexando los coches en Canales, ya qu'anque nun hai muncho sitiu p'aparcar nel propiu pueblu, podemos de camín dexalos en varios apartaderos ensín comenos 5 km de más de ruta.

GM Xuan de la Borrina en La Molina (360 m)

Redipollos (Porma)

15 de Payares de 2015

Como l'iviernu nun quería aportar a les Asturies, tiramos pa Llión a una guapa escuelina na qu'asoleyar fino y trepar con tranquilidá. Asina que tiramos hasta Redipollos en Liyo, onde tuviera va más d'un añu conociendo la escuela.

Vicen estrenando reversu pa rapelar

Esta vegada xuntámonos un bon garrapiellu xente, con muncho "novatu", poro'l llugar yera l'indicáu col seutor de los Guajes onde nun pasen les víes de V casi. D'esti xeitu, tuviemos tol día turnándonos vía tres vía hasta dempués del bocata cuanda pasámonos al seutor d'al llau Violet Carson.

Richar nun día brutal trepando con bones víes a vista

Tampoco ye qu'apretáremos a morrer nin muncho menos, pero diónos pa conocer un par de V+ nuevos pal currículum ún d'ellos de placa con un pasín que fizo les delicies del respetable. Como anéudota, dicir que me comí con patatines un 6a+ de placa que dióme a entender que cuando hai que ser especialista n'adherencia llionesa ye por dalgo...

Tornaremos... con más fuercia y ganes

Redipollos (Seutores visitaos)
 
Croquis modificaos por mi de la escuela d'escalada de Redipollos, por mor del C. D. El Local de "El Húmedo" y amosáu en Infoescalada. Gracies y col so permisu.

-------------------------------------------------------------------------------

Carrera Coto - Musel (Llaviana)

2 de Payares de 2015

Track: Carrera Coto - Musel (Llaviana)

Web del Trail: http://quebrapates.com/coto-musel/
 
Clasificaciones: Clasificaciones 2015  

Pues como ya dixera na anterior carrera pel monte en Nava enxamás digas d'esti agua nun beberás. Si tovía teníemos fresquino la carrera anterior, una selmanina, decidimos correr a la selmana siguiente la Coto - Musel en Llaviana pa que'l mió hermanu pudiera debutar.

Entamu de carrera y rápidina tol tiempu

Ésta ye una carrera perfeuta pa debutar, con pocu desnivel y muncha pista pela qu'andar como chiflaos y eso fué lo que pasó, que pal mió gustu nesta carrera córrese demasiáu y ya voi viendo que nun ye'l mió estilu.

Baxaes rápides y cómodes enforma

Aún así, fuí finu y llevamos unos ritmos estupendos, tan estupendos qu'acabamos los últimos dos kilómetros per asfaltu a unos 4 min y pocu'l kilómetru, abondu pa min y de más pal mió hermanu que diba resoplando jeje.

Caberos kilómetros a fueu hasta la meta

El casu ye pasalu bien... el día que nun seya asína, tengo claro qu'acabóse, pero pol momentu, una carrerina rápida y curtia nunca nun vien mal pa dir fuera de puntu tol tiempu, anque paezme a min que lo meyor van ser les carreres llargues y que'l cuerpu decida.

Ta la próxima...

Ponte Bidosa (Ponga) - H.ucantu

20 de Febreru de 2016

Track: Ponte Bidosa (Ponga) - H.ucantu

Cuantayá que nun quedábemos Fernan y yo pa una escapada montuna y magar de dellos cambios na mió vida, facíame falta colar de Xixón, con Kíla pa llevala de monte a ella y pa llevame a mí, y que meyor qu'en compaña de Fernan, al que tengo qu'agradecer que Kíla durmiese na so casa en Colombres..

Pa onde tirar... pues nin siquiera decidímoslo nós, ya que diba venir otru collaciu vascu, Carlos y anque finalmente nun s'animó, sí que nos dexó la ruta a facer: el H.ucantu, auténticu balcón sol escobiu de los Beyos.

Enantes, como non, teníemos per delantre un paséu en coche pola autovía'l Cantábricu y la N-625, hasta Cangues d'Onís onde quedamos p'almorzar na Huera como vien siendo davezu. Magar del cafetín, siguimos pela N-625, hasta cruciar la ponte Dobra entrando nel conceyu d'Amieva.
 

Salimos de la Ponte Bidosa (290 m) 

La Feriona del Pilar - Peña Los L.lanos (L.luna)

3 d'Ochobre de 2015

Ya perdí la cuenta de les vegaes qu'Abel convidárame a dir dalgún a facer alpina y por un motivu u otru, fue quedando pa prau dende cuantayá. A la fín, un finde d'Ochobre, fuimos hasta L.luna en Llión y más en concretu hasta la Peña Los L.lanos onde esperábanos La Feriona del Pilar.

Ye la primer vegada que métome nel tarrén alpín, sacante de xeres más montunes como'l Picu Urriellu y collacies de la redolada como Torre L'Osu o Carnizosu, onde alcuéntrome como pexe nel agua, xubiendo casi ensin proteición.

Averamientu hasta'l pilar con camín pindiu pero cómodu

Pero en víes d'alpina hai controlar de meter trastos y sobretou metelos bien, al igual d'andar sollerte con montar reuniones con seguridá. Nun yera'l casu d'esta vía, na que les reuniones tan montaes con parabolts al igual que les proteiciones nes plaques... eso sí... too con un toque picante a base d'alloñes considerables.

Nesti sen, ye un placer vese mover a Abel, con una tranquilidá suprema pa navegar nes plaques d'adherencia llioneses y tamién p'acerar si un pasu lu pide y ta forzándose de más. Too esto y muncho más dediqueme a deprendelo nes hores d'escalada de segundu.

La Feriona del Pilar... más info en El Maquis

El Condao (Llaviana)

26 de Setiembre de 2015 

Esti añu dexamos un pocu abandonada a la escuela d'El Condao en Llaviana y ye una pena ya qu'anguaño ta siendo reequipada y esi esfuerzu bien paga la pena nun escaecela como fuera antaño quedando casi nel total abandonu.

Namái qu'un día pasamos en tol branu per ellí, coincidiendo con un certame de cerveza artesano en Rusecu. Nun fai falta dicir que dimos un paseín hasta'l seutor de Los Quintos onde calecía'l sol enforma, quitándonos les poques ganes d'esguilar y pidiéndonos a glayíos que fuésemos a echar unes cañes cuanto antes.

Esí día tuve pegándome con un 6a, si oyístis bien, un 6a con un pasu cabrón a más non poder y cuando rompí un presa y frayé un deu ya tuve abondo y colamos d'El Condao con bastante mal rollu pela mió parte.

Poro... necesito tornar per ellí esti añu y quitar esti mal tastu.

31 d'Ochobre de y 7 de Payares 2014

Equí tamos, intentando caltener un mínimu de dignidá na escalada y pa ello restolamos escueles onde fogueanos nos sestos baxos ensín sofrir de más. Con esi envís, vamos a conocer la escuela d'El Condao, que gracies a unos mozos ta tornando a la vida con munchísimu trabayu de desbroce y requipamientu.

Perguapu seutor de los Quintos

Nesta escuela fogueóse muncha xente de la cuenca'l Nalón garrando tan bon nivel que fueron dexándola per nuevos retos más duros quiciás y eso que ye difícil, na Cueva Deboyu por exemplu. Y digo que difícil, porque los graos tan durinos con pasos en dalgún 6a+ mui difícil de lleer a vista.

Munchísima calidá na peña y nes víes de los Quintos

Nós, simplemente ficimos dos visites, tando'l primer día nel seutor Quintos dafechu, faciendo un par de cuartos, un V+ y un 6a. Toos ellos, mui bonos, con muncha calidá na peña y siendo unes víes perguapes.

Poca lluz ya nesta dómina del añu, así que un par de pegues y paséu pela escuela

Al día siguiente, magar de peganos con un 6a+ que dió pa tres pegues pola mio parte, viendo les demás víes a seguir intentando moyaes, decidimos dar una paséu pela escuela. Dicir que dar un "paséu" pela escuela, ye facer una ruta de montaña y de les espuestes... así que muncho güeyu colos senderos que xunen unos seutores y otros.

Salida de los seutores más pegaos a la carretera.... una pequeña ferrata y too

Sobretou, si tirais de los Quintos hacia Cuento de Hadas o Cadillac Solitariu, ya que los destrepes son peligrosos con mochiles pesaes d'escalada. Meyor, garrar senderos d'abaxo hacia Taberna Galática y llueu a los anteriores.

Lo dicho... esta escuela ye toda una aventura tan sólo con conocela... sólo hai que ver lo aéreu de les siendes so la carretera que va pal parque de Reres..., munchu güeyu xente y disfrutái d'esta remocicada escuela.

El Condao
 
Croquis modificaos por mi de la escuela d'escalada d'El Condao, por mor de la páxina del facebook de Recuperación de la Escuela d'Escalada d'El Condao. Gracies y col so permisu.

Espinaréu (Piloña) - Xerra d'El Sellón

13 de Febreru de 2016

Track: Espinaréu (Piloña) - Xerra d'El Sellón

Aportó l'iviernu a Asturies, tarde, pero aportó a la fín y con ello inestabilidá meteorolóxica y dificultaes pa restolar que fastera d'Asturies ye la meyor p'aventurase. Si a esto, amestámos-y que la escoyeta de rutes de la mayor parte del grupu, fuese a grandes altores esti añu, pues tengo que sacame del bolsiellu más d'una ruta alternativa al calendariu d'aniciu.

Pa esti finde en cuestión, teníemos una ventana de bon tiempu hasta'l mediudía o un pelín, asína que descartábemos cualesquier ruta del occidente o sur, por entrar el frente per ellí y sobretou por fuertes ventoleres. Con estes premises, apetecíame tornar pal conceyu de Piloña, que pesie a nun tener grandes altores, sí que tien un tarrén montuno perinteresante con grandes accidentes xeográficos sobretou de calter hidrolóxicu.

Nesi sen, averámonos hasta Espinaréu, non pa metenos nes fondes foces del ríu Infiernu, pero sí col envís de conocer un pelín meyor tol valle dende una posición privilexiada como ye la xerra d'El Sellón, xerra que da nome a un camín real que percorre de norte a sur dende Tarna a L'Infiestu siendo una de les grandes víes de comunicación d'antaño.

Preparaos pa caleyar n'Espinaréu (274 m)

La Puela (Ayande) - El Buñu

6 de Febreru de 2016

Track: La Puela (Ayande) - El Buñu

Tamos nun día de visita a la Puela, capital d'Ayande pa conocer al nenu de Pangua y Rebe, pero aparte poné-y cara y velu durmir, momentu nel que descansen los pas, Pangua y yo, fuimos dar un paseín pa facer fame.

P'aportar a la Puela, saldremos de Xixón pela autovía A-66, pa garrar la de Grau hasta'l final, onde empobinámonos siempre hacia Cangas del Narcea pela As-15 hasta unos pocos kilómetros enantes de la capital, onde cruciamos la ponte L'Infiernu, garrando la As-14, pasando pelos pueblos ayandeses de la Ponte L.linares y Ruvena, hasta arribar a la capital del conceyu.

Salimos de la Puela (537 m)

L.lindes (Quirós) - Pena Ruea - Foiz Grande

31 de Xineru de 2016

Track: L.lindes (Quirós) - Pena Ruea - Foiz Grande

Quinta vegada, que se diz aína, que voi intentar la Pena Ruea, teniendo namái qu'un triste porcentaxe d'aciertu d'un cumal, pero bono como dicen per ehí, ye'l camín lo importante y non la cume, anque seyamos sinceros lo que nos presta a los montañeros ye facer cume, sentanos y alcordanos de caún de los pasos llevaos hasta riba y non dándonos la vuelta a metá de camín.

Son les 10 menos venti de la mañana y tamos nel pueblu quirosanu de L.lindes. P'aportar a él, salimos de Xixón y garramos la AS-I hasta topanos en Mieres del Camín cola A-66 que nos dexaría en la Pola de L.lena. Ellí garramos la As-230 que nos fadrá xubir a la Col.la la Cobertoria dempués de pasar pelos pueblos l.lenizos de Palaciós, Piedracea y Armá.

Entamu de ruta en L.lindes (923 m)

El Corveru (Ribeseya) - La Peñe Pagadín

23 de Xineru de 2016

Track: El Corveru (Ribeseya) - La Peñe Pagadín

Los picores por trepar pueden ser tremendos, tanto que te faigan facer una kilometrada ensin xacíu un vienres tarde d'orbayu, cuntando con que nel desplome de turnu nun chorrée l'agua como si hubiese un tabayón. Esto ye así... crecen los díes y los vienres te piden griesca, actividá y sobretou allargar el finde a lo máximu posible.

D'esti xeitu, visitamos Navalones, pero taba pingando, colo que fuimos conocer esi "Centru Municipal de Teunificación y Altu Rendimientu de Deportes de Montaña y Escalada". A qu'acoyona'l nome eh... pues más acoyona cuando llegues un viernes a les 5 y ta pieslláu'l llocal, quedándonos con cara bobos, ya qu'al menos intentábemos a base de kilómetros aprovechar la tarde.

En fin... nun sabemos si tovía nun t'abiertu, pero un vienres tarde a les 6 casi, ye bona hora pa ello, asína que coles oreyes gaches colamos pa Xixón aburrios y deseyando qu'al día siguiente dalgún paré d'Asturies tuviera secu.

Atrevíos montañeros nel crucie d'El Corveru con Quintana Riba (222 m)