Caranga Baxu (Proaza) - La Riquiebra - Canal del Cirio - Llampaseca - La Forcá - La Corraína - Senda La Cruz

23 Payares de 2024

Track: Caranga Baxu (Proaza) -La Riquiebra - Cirio - Llampaseca - La Forcá - Corraína - La Cruz

Ruta que tenía prevista dende l'añu pasáu, pero qu'ente la lesión del cadril y que nun mos xuntábemos los interesaos, quedó nel tinteru, hasta que la revisamos en condiciones, viendo los reportaxes de Victor (Pindio), Javi Cienfuegos y Yonatan (Los de las Claras), camentando que pudiera danos tiempu nesta dómina l'añu.

D'esti xeitu y avisaos toos de dir col equipu de bregar, xuntámonos nel pueblu proacín de Caranga Baxum, a les 9 la mañana, preparándonos pa salir a y cuartu, travesando les cais de Caranga, hasta la parte alta, onde atopamos camín, hacia los praos d'enriba'l pueblu, pasando pel depósitu d'agues que ye bon referente de que vamos bien.

 

Partimos de Caranga Baxu (250 m) con rises nervioses

Dende'l depósitu siguiremos camín alantre, hasta onde entama una vallina que paez nun tener salida de frente, teniendo que salir a la manzorga per una viesca, alcontrando senderu penriba d'una muria d'un prau, pa siguir siempre viesca alantre cola vista puesta nos parés del Risquiebru, enriba nuesa, a los qu'aportaremos travesando una llerona pelín inestable, na que topamos rastru de tar pisada y que vamos negociando como meyor podemos. 

Vamos ganando altor, sacando vistes al valle del rigu Teberga tres de nueso, mirando tamién con atención a la muria La Riquiebra onde topamos delles utreres y una cuevona na manzorga ensin accesu dalu. Al final de la llerona, toparemos que'l canalizu superior nun tien posible trepada, poro debemos salir a la mandrecha per una resbariosa viesca, upándonos a la parte alta del canalizu onde atoparemos rastros de senderu.

Teyeo (L.lena) - El Rebel.léu - Monte Tixirúa - La Escrita - La Tesa - La Caviyera - Treslacruz

9 Payares de 2024

Track: Teyeo (L.lena) - Monte Tixirúa - La Escrita - La Tesa - La Caviyera - Treslacruz

Ruta que tenía preparada dende va tiempu, ya que quería que'l grupu conociese la guapa foz de la Caviyera, que yo conociera baxando a fueu na Güeyinos del Diablu y que paecíame que paga la pena facela con calma y esfrutando de cada pasu. Sicasí, prestábame preparar una circular montañera y potente, poro púnxeme a investigar como ascender a la Tesa, de dalguna manera diferente, ya que la normal ficiéramosla cuantayá dende l'Alto'l Palo.

Como non, la poca info qu'algamé vino del blogue del collaciu Victor "Pindio" qu'anduviera a la recoyeta de nomes, na faldera de les canales que quería conocer. Poro, fícieme cola parte del track que servíame de referencia y tiré de "mapa y llapiceru" pa trazar la llínea a siguir peles pindies vallines que queríemos ascender.

 

Partimos de Teyeo (650 m) al pie del rigu Güerna

Sábadu de madrugar, tomando'l cafetín en Mieres, onde dexamos coches pa dir na furgo hasta Teyeo, preparándonos nun día pelín frescu y húmedu nel entamu, saliendo a caleyar pocu más alantre les 9 la mañana, cruciando'l rigu Güerna pa salir hacia les cabañes de Rucao, entamando a calecer músculos y dándonos cuenta de la sudada qu'espéranos güei por mor de l'altísima humedá.

Siempre per pista, diramos ganando desnivel, algamando vistes hacia la fastera contraria del valle'l Güerna, distinguiéndo guapos montes como la Carba Valsecu o el Tapinón y Siegalabá, que ficiéramos en travesía va dellos años, casi nestes feches, daquella con ñeve na parte alta y esti añu escosu dafechu y sin pinta d'entamar l'iviernu nel intre.

Entragu - Pena Gradura (Teberga)

Tolosantos 2024

Puente de Tolosantos, con bon tiempu, asina qu'averámonos hasta Entragu en Teberga, col envís, d'intentar continuar trepando tolo posible siguiendo la inercia que trayiemos d'Olba. El xueves parábemos pel aparcaderu d'Entragu, dando un paseín con Kíla hasta la Esplanada, viendo que taba bastante moyáu, tol tema chorreril, asina que diba tocar plaquear enforma.

Al día siguiente, llueu d'una nueche con conciertín nel Narciso, qu'estendióse un pelín de más, col día nubláu tiraremos hasta la Esplanada, metiédonos a prebar la Nirvana orixinal, una placa infecta de 7a+, al que-y metí un par de peguinos, enantes d'abandonala por temor a desyemar nel primer día.

La Pipeline L1 fuera la ruta más prestosa del puente

A última hora, llueu d'unes hores infames de solana, pudiera probar la Pipeline L1, que montárala Rubén, cayéndome de la cabera cinta a cadena, onde tien el pasu en realidá, dexándola montada pa madrugar al día siguiente, cosa que nun fuimos a facer, pente varios desayunos y pa cuando xubimos probara Anna la vía, sacando tolos pasos y cuando tocó meterme a dar pegue d'encadena, ya entrara'l sol xubiendo dende la tercer cinta sudando como un pollu, cayéndome na placa por nun mirar bien los pies.

Rubén destruyendo tolo que pillaba na Esplanada

 D'esti xeitu, escapamos pa la Esplanada onde taben Ani y Rubén, pasando'l restu'l día, dando unos peguinos pela mió parte a la Lady Di y Anna encadenara Jayefante, que tenía pendiente y probara la Dodi (7a+), costándo-y sacar los pasos d'abaxo. De la que baxé de desmontar la Lady Di, ya que nun me lo daben les yemes, probara los pasos en polea y allorié, con como pude facela a vista poniendo cintes.

 

Mañanes d'Entecampos y Esplanada aprovechando hasta que pegaba la solana

Dempués de cenar nel Sobia y pasar un ratín nel llocal del club, planchamos la oreya bien ceo y vamos llevantanos prontín, tando nel pié de vía d'Entecampos a les 9 y media la mañana. Bien motivaos, esta vegada, tócame entrar primeru y voi caleciendo deos, na fría roca, poniendo les cintes hasta la placa, onde cayera al día anterior, sacando sin problemes los pasos de placa y reposando con calma, antes d'entrar al bloque final, qu'esta vegada nun me costó gran cosa, faciéndola la Pipeline L1 pa calentar.

Anna entrara con brenga dempués, cayendo na placa, pero matizando bien los pasos, ya que-y quedaba pelín llargu un pasu llateral y tira dempués hasta la parte alta, onde resuelve ensin mayores problemes el bloque final, quedándo-y pendiente pa otra vegada, ya que nun hai quien pare ya de calor nel paré d'Entecampos.

Nueche estrellada... xelada mañanera asegurada

Cola mesma, decidimos baxar a la Esplanada, onde tamos un ratín tumbaos esperando por Ani y Rubén, decidiendo dar un par de peguinos a la Lady Di (7a) de nuevu y a la Dodi. Por suerte, paez ser qu'al tercer día d'escalada va too rodáu y fáigola poniendo cintes tamién, pudiendo montar a Anna la Dodi, de la que baxo, metiendo un pegazu y llevándosela tamién, quedándonos ya con cara de y agora que.

Pa rematar la xugada, Rubén fizo al mesmu tiempu Entropía a vista y poniendo cintes y Ani taba reventada de los dos díes enantes, asina que la decisión yera unánime, colar pa Samartín a tomar el vermú y xintar un menú, pa pasar la tarde tiraos tranquilamente per Teberga.

---------------------------------------------------------------------

Cabruñana (Grau) - Picu Sollera

6 Ochobre de 2024

Track: Cabruñana (Grau) - Picu Sollera

Continuamos desesperaos coles previsiones meteorolóxiques, abortando una ruta potente pal sábadu, por mor de les condiciones que nun se cumplieron y preparamos entós, pal domingu una mini ruta por dar un paseín nuna supuesta ventana mañanera, que tampoco cumplióse. Ye dicir, alcontrámonos con un día brutal de sol, cielos espeyaos, pero ensin dar tiempu pa preparar dalgo más potente, pues siguimos adelantre col plan.

Salimos de Cabruñana (355 m) nel conceyu de Grau

Asina pues, quedáramos en Grau p'almorzar cola calma, viendo'l día guapu que teníemos y siguimos en coche hasta Cabruñana, onde díbemos tener el nuesu puntu de partida. Preparámonos y saldremos caleyando pel Sampedru, pasando al llau d'un llavaderu pa continuar per pista, per una viesca bastante guapa que tien de dexanos nel colláu de L'Ascura, baxo la faldera del picu Subarrionda.

Les Texeres (Riosa) - L.lamo - Mines de Texéu - Llazarandín - Picu Santiagu - Fondu la Vega - Cuesta Penallonga - Panderraíces

28 Setiembre de 2024

Track: Les Texeres (Riosa) - L.lamo - Mines de Texéu - Llazarandín - Picu Santiagu - Muena - Panderraíces

Tornábemos una vegada más al cordal del Aramo y facíemoslu col envís, de continuar conociendo dellos requexos, de la fastera oriental. Nun va muncho que tuviéramos de visita poles mines de Texéu,  quiciás ún de los llugares más ablucantes d'Asturies, pero aquella vegada saliéramos hacia la Peña Los Bescones y baxáremos pel camín del Fierru a Espines, pa terminar de nuevu en L.lamo.

Esta vegada queremos pasar de nuevu peles mines pero queremos salir al puertu Aramo, más en concretu hacia Llazarandín pa encumar el Picu Santiagu y descender hacia los pueblos de Panderraíces. Asina qu'averámonos hasta L.lamo, pero alcontrámonos que son les fiestes y tienen la carretera cortada, pa que pueda aparcar los vecinos pa la folixa, asina que damos marcha atrás y aparcamos en les Texeres.

Partimos de les Texeres (585 m) anque la semeya ye en L.lamo

Asina pues, caleyaremos per carretera menos d'un kilómetru y mediu hasta L.lamo, onde charramos un pocu colos vecinos y continuamos camín hacia les mines de Rioseco, alcontrando cambios fonderos de va un añu nes instalaciones, con toles construcciones termináes, un ampliu aparcaderu pal pobláu y tolos cartelos desplicativos anovaos y munchísimos detalles decorativos col llogu de les mines bien guapos.

Seaza (Grau) - Picu'l Víu - Picu Pedroriu - Moutas - La Fuexa

 22 Setiembre de 2024

Track: Seaza (Grau) - Picu'l Víu - Picu Pedroriu - Moutas - La Fuexa

Entamábemos temporada 2024 - 2025 dempués d'un final bastante apoteósicu de l'anterior, con una Travesera per Picos bien potente y un par de rutes de muncha calidá per tierres llioneses al Cuetu Ancino y a la Peña Forqueta. completando un branu montañeru escelente.

Pero como non, la meteo pal entamu de temporada, nun yera afayaiza y tuviemos que buscar una rutina curtia nuna ventanina de bon tiempu, que dexáranos tiempu pa poder picar dalgo dempués. Pa ello, preparamos una circular al traviés del cordal del Pedroriu, llende pente'l conceyu de Miranda y Grau.

 

Partimos del pueblu de Seaza (485 m) nel conceyu de Grau

Quedaremos a una hora prudente p'almorzar en Grau capital y saldremos hacia la GR-4 que percorre'l valle del rigu Vega, conduciendo per llugares realmente guapos hasta'l Puente Seaza, onde tomamos una pista asfaltada, per pindia hasta'l pueblín de Seaza, onde aparcamos a la entrada'l pueblu y preparámonos pa caleyar.

Piedrasecha (L.luna)

6 al 15 de Setiembre de 2024

Selmana de vacaciones y como siempre, pal norte nin mirar pa esguilar y tampoco ye que quixera colar mui lloñe, ya que nun tenía xente pa tar fuera tola selmana, asina que miramos pal sur y cerquino, averándonos hasta Piedrasecha, per segunda vegada, a ver si-y garrábemos gustu a esta escuela llionesa, casi, la más nomada polos fanáticos escaladores llioneses.

 

De camín con Kíla hacia les muries de la foz de los Calderones

El primer finde, anduvimos moviéndonos pel seutor de la Virgen, faciendo les víes pendientes, siendo la mayor parte de lo sestos de la esquierda, quedándonos dalgunu sueltu ensin facer, por mor, de la cantidá de xente que tuviera esti finde, puente n'Asturies, pel seutor. A destacar, quiciás, un 7a (En dique seco) físicu superdivertíu que pudimos facer varios del grupu y tamién un 6c+ (Acción Mapache) en travesía, llibrando tol desplome a la manzorga'l seutor.

 

Esfrutando de la escalada nel seutor de la Virgen y Chorreras

Aparte, el llunes festivu, tuviéramos esguilando en Fantasía, onde calecimos nun quintín bastante guapu y metímonos a dar un pegue al flash a Ayahuasca, perbona vía, pero non tanto como la homónima de Cuenca jeje. Dende equí, pasamos enantes de qu'entrase la solana a Bravos, un 7a de desplome descomunal, al que tan sólo pude dar un peguín, viendo lo mal que taba físicamente pa esti tipu de víes.

 

Ambientazu nel finde nes víes del seutor de la Virgen

Dempués d'esi día d'escalada, baxáremos a mediudía, a xintar dalgo tranquilamente y ya tocaba tornar a casa, a dexar descansando a Kilina, sobar en casa y tornar el martes de nueche hasta Piedrasecha, ya que seguimos cola meteo infame per Asturies y el norte en xeneral y tocó tornar de nuevu a tierres llioneses pa intentar llibrar la lluvia pa poder esguilar.

 

Visita de varios díes al Templo ensin dubia un seutor de gran calidá

Col equipu renováu pa col finde anterior, axuntámonos otros cuantos collacios, xubiendo'l miércoles, a esguilar al Templo, seutor que nun conocía y que sorprendióme, sobretou por un pañu de roca cargáu de sétimos medios, con una roca de munchísima calidá, pa lo que vien siendo Llión, asemeyándose muncho a delles víes del Cuetu La Corona, como exemplu de roca regletera y de cantu.

 

Esfrutando de probar una vía de gran calidá nel Templo

Como sigo nuna especie de baxón físicu, tuviera probando un 7b del Templo, durante tres díes y tuviera cayéndome de la última chapa a cadena, yéndome d'estes vacaciones con unes sensaciones permales, sintiendo que necesito rodar, esguilar sin presión, escaeciendo tolos proyeutos que tenía na tiesta y que tuviéronme casi castigáu a repetir una y otra vegada per Morcín.

--------------------------------------------------------------------------------------------------

Arintero (Los Argüeyos) - Peña Forqueta

24 d'Agostu de 2024

Track: Arintero (Los Argüeyos) - Peña Forqueta

Tornábemos de vacaciones per Soria, llueu de danos un pelín de caña na bici tres díes siguíos, pero como siempre, les ganes de monte yeren grandes, asina que falando con Pepa, miramos dalgo pa Llión ya que p'Asturies daben malu, como tol branu y casi tol añu.

Na ruta al Cuetu Ancino, dellos selmanes enantes, ya viéramos la crestería de la Forqueta n'Arintero y colo munchu que nos prestara'l finde pelos Argüeyos, nun perdimos la ocasión y presentamos al grupu la propuesta, xuníendose los avilesinos: Sara, Vane y Mario, fallándonos a última hora dellos interesaos más.

 

Partimos d'Arintero (1321 m) col crestéu d'Arintero detrás nuesa

Quedaremos n'Arintero tol grupu, llueu d'almorzar na furgo unos y otros venir dende Avilés, con parada como non, n'Ezequiel y pa les diez y media, tamos preparaos travesando tol pueblín y sacando la semeya de rigor delantre de la crestería d'Arintero, con tolos cumales a la vista.

Salimos del pueblu per pista, garrando'l ramal drechu que nos fai baxar hacia los praos de la riega Villarias, la cual cruciaremos pela ponte, col envís de garrar una pindia vallina, qu'en curties envueltes va dexanos na faldera del espolón occidental del picu Gudín.

Cantu La Sierra (Morcín)

27 d'Agostu de 2024

Nun fue la meyor primavera-branu pa la escalada n'Asturies, nin munchu menos, nun soi a alcordame de la cantidá de díes que baxé moyándome del seutor, ya fuera na Cualladrona, Carba ya inclusu dalgún día nel Cantu La Sierra y aparte, los cierres paxarólogos nun dan muncha alternativa a movese en varios llugares pa trepar, poro tocó proyeutar y non, quiciás nes víes que meyor me van pa mi estilu d'escalada.

Croquis del Cantu la Sierra na faldera'l Monsacru

Esta temporada tuviera namái que con Te Rompo la Cara, un 7b+ mui sólidu qu'apunta a barra cláramente, que tien una entrada desplomada mui física y nel que toca sacar recursos pa movese cuando nun ties la pegada necesaria pa tirar de cualquier cosa, anque a dicir verdá, mis métodos y preses qu'usaba paecíenme bien guapes, esaxerando una bicicleta pa poder moveme.

 

Becky y Orlando disfrutando de la escalada nel Cantu

La parte d'arriba ye una placa que rondará'l 7a+ perguapa, onde nun hai que despistase, nin fallar pies pa un pasín téunicu mui finu antes de garrar meyor presa pero con desplome y un últimu pasu pelín tensu antes del reposu y salir ya a la parte final d'Ética Mutante, onde arribes con una petada importante, lo que diznos a les clares, que la variante saliendo hacia Non e duro e placa, será o 7c o 7c+, quedándo pendiente pa otru añu.

Proyeutando esti añu Te Rompo la Cara (7b+)

 

Digo que pendiente, porque dempués del gastu mental pa facer la normal, la variante más dura, sedrá n'otru añu y n'otru estáu de forma, asina que fácilmente tendré tovía tres proyeutos serios nel Cantu la Sierra de 7c+ pa esfrutar del nuesu sectorín unos añinos más.

 

Como nota, dicir que fáltenme tovía dos víes por facer la placa esquierda equipaes por Diego, pero sí que ficiera a vista Deja el maillón (6c/+), que va por un evidente diedru y sincéramente ye una vía guapísima que ya ta bastante repetida, anque por favor, nun salise de la línea del diedru, porque a la mandrecha hai una llibrería de bloquinos a nun tocar.

 ---------------------------------

Recuerda (Tierras del Burgo) - Morales - Aguilera - Berlanga - Alaló - Brias

14 d'Agostu de 2024

Track: Recuerda (Tierras del Burgo) - Morales - Aguilera - Berlanga - Alaló - Brias

Dempués de dellos díes de folixa pel pueblu y un par de díes rodando en bici pela redolada, preparéme una ruta pa darme un pelín de caña y de pasu, tachar un par de vértices sorianos, que pocu a pocu voi completando, al menos nes comarques más averaes a Recuerda.

Como siempre digo, Soria ye un paraísu pa la bici de monte pudiendo trazar cualesquier ruta entre pueblos, per pistes de tierra ensin tener que tomar carreteres asfaltaes, anque tampoco son males p'andar en bici les comarcales, onde nun alcontraremos munchu tráficu.

 

Partimos de Recuerda (900 m) cola visión del Castillo de Gormaz

Asina qu'alborecemos mediu ceo, almorzamos y salgo del pueblu enantes de les diez, pa garrar camín hacia'l pueblu de Morales, pasando, como non, al llau de les bodegues de Recuerda, xustu enantes de garrar la rampla pela bas de la Muela, que llévame hacia un colláu dende'l baxaremos dexando a la mandrecha Valdeley, pa siguir de secute pela pista hacia'l pueblu de Morales.

Travesaremos Morales saliéndonos pel Calvario pa garrar el camino del Molino, hasta'l Alto la Mina, onde la pista va llevanos pegaos al rigu Duero durante más menos un kilómetru, pa dexalo un pelín de llau, siguiendo la pista que va llevanos hacia'l Molino Blanco.