Ruil.láu (Babia) - L.láu - La Ferrera - Altu La Cañada - Rabinalto - Peña L'Arena - Las Vegas

27 de Mayu de 2024

Track: Ruil.láu (Babia) - L.láu - La Ferrera - Altu La Cañada - Rabinalto - Peña L'Arena - Las Veigas

Dempués d'unes vacaciones cántabres y muncha escalada deportiva, per Asturies, yeramos a algamar un grupete curiosu nel GM Xuan de la Borrina pa salir de monte una vegada más. Llevaba tiempu, con ganes de conocer l'otra fastera de Babia al sur de la carretera, ya teníemos bones rutes feches hacia'l norte, como nel Montigüeiru o al Morrunegru más reciéntemente, pero teníemos munchu monte por conocer al sur, y l'Altu La Cañada, yera un oxetivu míu pa esti añu.

D'esti xeitu, vamos averanos hasta Güergas de Babia, onde almorzamos nel Moriscal, como siempre y siguimos hasta'l cercanu pueblu de Ruil.láu, onde travesaremos les sos cais, hasta atopar un bon sitiu onde aparcar los coches, al pie del camín de partida y d'una bona fonte onde garrar agua. Dicir, qu'a la entrada del pueblu, tenemos un amplia area d'autocaravanes y furgonetes onde pasar la nueche y esfrutar d'esti guapu llugar.

 

Partinos de Ruil.láu (1265 m) nun día bien guapu

Comentando lo muncho que trabayen en Llión pa caltener un turismu de monte estable y sostenible, con rutes señalizaes, aparcaderos de furgos y autocaravanes en munchos pueblos y munchu qu'ufrecer y por embargu, n'Asturies colo poco que se cuida'l turismu sostenible de monte, en toles fasteres asturianes, lo únicu que somos a algamar ye masificación en delles fasteres, llevando mil molesties a los paisanos de los pueblos.

Po (Cabrales)

10 de Mayu de 2024

Finde cabraliegu de conciertos col Válgame Fest, nel qu'averámonos el vienres tarde hasta Po y pese a lo que camentábemos en cuanto a moyaura de la escuela, alcontrámonos con tolo contrariu, con tolos parés secos, poro decidimos per primer vegada na mió vida, quedame na parta baxa de Po, cola idega d'esfrutar de les chorreres.

 

Vistes mítiques dende la escuela de Po en Cabrales

Ellí, tuviemos qu'esperar un ratín a que baxara'l sol y entamamos probando les dos primeres víes del seutor, como non, dando un peguín a Mociviellos (6b+), vía increyible buena, nun grau nel que nun ye normal poder esfrutar de garrar chorreres, empotrase y endiedrar pa salir a una placa cenciella brutal, con preses en forma de xarros nos que fluir con tola calma hasta la cadena.

 

Esfrutando de la parte baxa de Po con víes de chorrera

Aprovechando que teníemos la parte d'arriba montada, montamos la Carola Caracola (7a), que probó primero Ana, tirando d'empotres rodilleros y más tarde yo, viendo lo terriblemente malo que soi pa estes xeres. Nel segundu pegue, malpenes apoyé un segundu'l muslu na chorrera y tiré de garrotismu illústráu pa salir lo más apriesa posible de tola parte desplomada y encadenar la vía, qu'a dicir verdá, al final gustóme bastante.

----------------------------------------------------

La Concha (Valles Pasiegos) - Fayéu de Zamina - El Toral

3 de Mayu de 2024

Track: La Concha (Valles Pasiegos) - Zamina - El Toral

Continúabemos de vacas pel Miera y a la espera que llegasen dalgunos collacios más pa esguilar el restu la selmana, decidimos de mañana salir a dar un patéu y conocer el recomendáu fayéu de Zamina, poro averámonos hasta'l barriu La Concha, pelín más arriba de Sanroque Riumiera, en direición al puertu Lunada.

Entamamos la ruta a la Zamina dende la Concha (575 m)

Ellí, aparcaremos la furgo y echamos un vistazu al cartelu indicativu, viendo que vamos tener que facer la circular completa, ya que dir ver el fayéu y volver diba ser igual de llargu, asina que baxamos dellos metros pela carretera y salimos pela manzorga nun camín n'ascensu, llueu de visitar un pequeñu y guapu tabayón na riega Los Pontones.

Santoña (Tresmiera) - Monte Bucieru - Caballo - Pescador - Mazu

1 de Mayu de 2024

Track: Santoña (Tresmiera) - Monte Bucieru - Ganzu - Caballu - Pescador - Mazu

Díes de vacaciones per Cantabria, tornando con tol gustu del mundu al valle del Riumiera, onde ya tuvieramos esguilando va tiempu, yendo esta vegada col envis, d'apalancanos tranquilamente nel camping Lunada, faciendo monte, esguilando y saliendo a andar en bici, en definitiva, a desconectar y descansar de munchos meses de trabayu.

Cola meteo, pelín repunante y llibrando más o menos como pudimos, hubo un día onde yera imposible esguilar ya que daba hasta ñeve pa Riumiera y decidimos baxar a la costa de Tresmiera, onde Silvia quería conocer Santoña pa xintar anchoes y yo de pasu, apetecíame patiar un pelín y facer un cumal cimeru del Cordal Cantábricu, independientemente del so baxo altor: la peña Ganzo.

 

Partimos de Santoña na sablera de San Martín (5 m)

Asina que plantámonos en Santoña na comarca del Tresmiera, cola calma, aparcando la furgo na sablera de San Martín, baxo les muries del fuerte y saldremos per unes escaleres al alcuentru d'una sienda costera que da tola vuelta al monte Bucieru, pasando en primer llugar pel fuerte San Carlos, pa salir ya per senderu al propiu camín, col envís d'empobinanos hacia la punta'l Peón, onde algamaremos guapes vistes de la costa cántabra dende la boquera del Asón hasta l'Oriñón.

Iondokorta (Arratia-Nerbioi) - Baias Ubeguia - Gorbeia - Aldamiñape

21 d'Abril de 2024

Track: Iondokorta (Arratia-Nerbioi) - Baias - Gorbeia - Arimekorta

Continuamos al día siguiente de Xuntanza Asturvasca, llevantándonos pela mañana unos meyor qu'otros, ya que les raciones de llicores varios y la llarga partida de mus, pasaron factura al día siguiente, asina que con una resaca estupenda, enllenamos la barriga coles palmeres d'Unquera y café pa espabilar y ponémonos en marcha, pa facer una nueva ruta.

Esta vegada, díbemos repetir monte, col Gorbeia, que ya ficiera munchos años que lo xubiéramos, asina que garraremos la mochila y pesie al día soleyeru, ponemos tola ropa que tenemos, ya que nótase una mañana fresca, entamando a caleyar a les 9 la mañana col envís de que dénos tiempu a facer la ruta y aportar pa tomar dalgo tranquilamente enantes de la xinta.

 

Preparativos nel refuxu del Baskonia coles banderes correspondientes

Saldremos caleyando pegaos a la muria del banzáu de Mendizabal, esfrutando de los primeros pasos pel fayéu de Iondokorta saliendo xusto al crucie cola pista que xube hacia Arimekorta, desdexándo ésta y yéndonos de frente nesti casu, pa garrar una pista maderera, que va llevanos pente pinos y fayes, hacia la faldera del Aldamin, qu'ascendiéramos hacia años xunto al propio Gorbeia.

Bentalta (Bilboaldea) - Pastorekorta - Ganekogorta - Pagasarri

20 d'Abril de 2024

Track: Bentalta (Bilboaldea) - Pastorekorta - Ganekogorta - Pagasarri

Tornábemos a facer xuntanza Asturvasca, dende cuantayá, ye más, dende 2018 pasando penmediu, temporaes mui correnderes nel nuesu grupu, perdiendo un pocu esa capacidá y motivación montañera y tamién, una pandemia que fízonos perder un par d'años o más pudiendo a la fín, xuntanos de nuevu, anque ya tuviéramos pel Pirinéu con Fernan y visitáremos a la vuelta a dellos collacios en Basauri.

Esta vegada, vamos averanos por milenta motivos, namái que 4 miembros del GM Xuan de la Borrina, madrugando como siempre dende Asturies, p'aportar a Basauri so les 10 de la mañana, onde tan esperándonos p'almorzar dalgo, teniendo que movenos mui pocu esti añu, p'averanos al puntu de partida en Bentalta, bien cerquina de Basauri.

Partimos de Bentalta (180 m) nun día preciosu

Con un garrapiellu de vascos y otru d'asturianos, vamos salir caleyando col monte Malmasín, tres de nueso, pa salir caminando per pista, siempre con cartelos indicativos de tola fastera, bordiando pela mandrecha una enorme cantera de piedra, hasta desvianos per una trialera a la manzorga, pa quitanos d'enmediu un bon tramu de pista nel nuesu caminar hasta l'area recreativa de Pastorekorta.

Balmonte (Miranda) - Tabláu - Matacaliáu - Meruxal

13 d'Abril de 2024

Track: Balmonte (Miranda) - Tabláu - Matacaliáu - Meruxal

Una vegada más, teníemos ruta del GM Xuan de la Borrina y como siempre, tengo que preparar dalgo casi sobre la marcha pa facer una mañanera afayaiza, ya que varios son compromisos de la xente implicada, dándome cuenta que va tiempu que tenía na tiesta facer el picu Matacaliáu, dende Balmonte, capital del conceyu de Miranda.

Esti picu, asitiáu a la vera'l míticu camín rial de la Mesa, diba ser la cuenta, asina que quedamos con calma en Balmonte, pa tomar un cafetín y so les 9 y media la mañana, ya tábemos preparaos pa cruciar el rigu Pigüeña, travesando delles caleyes de Balmonte, hasta garrar la pista, angüaño asfaltada, hasta'l pueblín de Tabláu.

Partimos de Balmonte al llau del rigu Pigüeña

Dacuando, prepares rutes sol mapa y pasa esto, qu'atopes carreteres, pero nesti casu, nun son munchos kilómetros, asína que nin siquiera faise pesáu y vamos algamando desnivel cómodamente, demientres echamos un vistazu a la desfecha xerra de Bixega, estrada dafechu d'eólicos y que percorriéremos va dellos años, ensin remenbrances gayoleres.

Xuntanza Asturvasca - 2024 - 2025

 20, 21 d'Abril de 2024

Tornábemos a facer xuntanza Asturvasca, dende cuantayá, ye más, dende 2018 pasando penmediu, temporaes mui correnderes nel nuesu grupu, perdiendo un pocu esa capacidá y motivación montañera y tamién, una pandemia que fízonos perder un par d'años o más pudiendo a la fín, xuntanos de nuevu, anque ya tuviéramos pel Pirinéu con Fernan y visitáremos a la vuelta a dellos collacios en Basauri.

Partimos de Bentalta (180 m) nun día preciosu

Esta vegada, vamos averanos por milenta motivos, namái que 4 miembros del GM Xuan de la Borrina, madrugando como siempre dende Asturies, p'aportar a Basauri so les 10 de la mañana, onde tan esperándonos p'almorzar dalgo, teniendo que movenos mui pocu esti añu, p'averanos al puntu de partida en Bentalta, bien cerquina de Basauri.

20 d'Abril del 2024

Esta vegada tuvimos la suerte de que los collacios vascos nos guiyaron pa conocer un nuevu monte na redolada de Bilbo, como ye'l Pasterokorta, que gustónos muncho, dándonos vistes hacia tola redolada de la comarca, con vistes a la mar y la ría, pero tamién a tolos montes al sur y casi dafechu a tolos montes d'Euzkadi.

 

Cumal del Pagasarri (671 m)

Más info de la ruta en: Bentalta (Bilboaldea) - Pastorekorta - Ganekogorta - Pagasarri

Como siempre, dempués de la ruta movímonos pelos pueblos de la redolada, enantes de siguir camín hacia'l refuxu de Iondokorta, onde ya como siempre, echamos unes rises, birres, chupitos y cenamos ya la clásica tortiella de Iñaki, más dalgo de picotéu variáu más.

Camudando'l Camín tuteando en Iondokorta

21 d'Abril del 2024

Al día siguiente, con una resaca importante, ya que se nos fue de la man, el tema chupitos, almorzamos como podemos y díbemos tornar hasta'l Gorbeia de monte, entrándo-y pel occidente, conociendo'l ñacimientu del rigu Baias, pasando per llugares bien guapos, con viesques de fayes, nun ambiente mui nortiegu casi astur.

 

Cumal del Gorbeia Mendi con tolos collacios vascos y asturianos

 Más info de la ruta en: Iondokorta (Arratia-Nerbioi) - Baias Ubeguia - Gorbeia - Aldamiñape

Al final de la ruta, aportaremos a Iondokorta de nuevu, onde ya alcontrámonos con bien de xente, que vinieron a echar un gabitu na cocina pa la xinta o simplemente a vernos y charrar un ratín, como Jose y Bea, a los que siempre ye un placer dar un abrazu y saber d'ellos.

 

Vermú relaxáu per Iondokorta

Hasta l'añu que vien... seya onde seya... pero con tan bona compaña de xuru

Xente astur que vieno a disfrutar: Mario Lopez y Mario Gallego, Rubén y Berto.
 
Xente vasco que trabayó y tamién disfrutó: Pedro como xefe del refuxu, cola aida d'Iñaki y Aitor, más un montón de collacios que vinieron el domingu (Josean, Bea) con Fernan como xefe d'espediciones con Juanan, Rubens...

Frechura (Mieres)

3, 5 y 11 d'Abril de 2024

Un añu más, entra'l calor enantes n'Asturies y la vida llévanos hasta Frechura, onde los perretes vieyos tienen un patéu más amable y munchu prau pa tar tumbaos, asina que decidimos qu'al menos un día a la selmana, vamos averanos a dir llimpiando hasta onde puédase esta téunicu, dura y guapa escuela, onde nun regalen nenguna vía dafechu.

El primer día de visita, tuve la suerte de prebar Tayuc (6c+), pringando nun pasín mui arriba, por nun ver una regleta y al segundu ya salió ensin problemes, quedándome claro, que ye la vía más agradecida que probara, sobretou viendo a Andrea bregando con Desarrollo Sostenible hasta que la pudo facer, ya que'l bloque resultába-y mui incómodu pal so esguile más estáticu y téunicu.

Al día siguiente, ya compartimos vía, metíendonos a facer metros na variante del Reencuentro y Tírate a la Cabra qu'amesta dos llargos de 6c y 6b+ de casi 50 metros, que vien-y dan el 6c+, tocándome facer un testeu mental nel segundu llargu a vista con unos pires d'alloriar qu'acabaron por tumbame, faciéndola tamién al segundu del tirón, pudiendo esfrutala muncho más, pero non tanto como Andrea que la enchufó al primer pegue, quedándose mui a gustu.

 

Plaquines de pies infames de Frechura

El tercer día, tocó metese en Atácala que ya cae (6c+) que fué la que menos prestóme del seutor, pel momentu, teniendo que facela de nuevu al segundu pegue, llueu d'un primer pegue atroz de calor y esnidiaes de pies y manos, con pasos llaterales que nun me dieron más.

Andre a lo suyo, faciéndola a vista y rematando cola Vagoneta (7a) tamién a vista, que ya la tenía yo y recomendésela, algamando un día perfeutu, hasta qu'avísenme otros escaladores que reventárenme la ventaniella la furgo, robándome la cartera y liándome tola selmana pasada y ésta, dalgún cabronazo que tien pilláu'l puntu del aparcaderu de Frechura, más averáu a la carretera.

D'esti xeitu, avisái, de que'l tipu en cuestión ya lleva tres robos nesi aparcaderu y anque ta denunciáu y deberíen pillalo, porque ta grabáu nun gasolinera porque mui llistu nun yera, pues que lo mesmu, tovía tien güevos a siguir faciendo'l rata colos vehículos de los escaladores, así qu'andái con güeyu que dalgún personaxe llocal ta fadiándonos les nueses tardes de tranquilidá per Frechura.

--------------------------------------------------------------------------------------

Cuenca (Cuenca)

23 y 24 de Marzu de 2024

Vacaciones de Selmana Santa, con munchos planes na tiesta, de primeres con idega d'escalar per Cuenca dellos díes y colar pa Soria a andar en bici, pero siempre pendiente de la meteo, ya que nun lo daben bono precísamente, poro tamién, teníemos la opción de continuar viaxe esguilador hacia'l Levante.

Al final, namái que pudimos esguilar un par de díes per Cuenca, nós que pela mañana salí a dar una vueltina en bici, viendo muches posibilidaes pa la bici monte, asina que nun sedrá la última vegada que meta la bici na furgo, nin munchos menos, ya que fai l'amestaura perfeuta salir pela mañana en bici y esguilar tola tarde.

Conociendo'l seutor del Merendero na Hoz del Huecar

 

El primer día, averámonos hasta la Foz del Huecar, onde nunca esguilar nos distintos viaxes y ficiéramoslo nel Merendero, ya que les mañanes d'almuezu estirábense y nun mos dió tiempu a conocer la cueva la Zarza, onde ya entraba'l sol pa la hora a la que llegábemos, poro echamos pie a tierra nel merenderu y centramos la vista nun par de 6c+, col envís de calecer deos nellos, pero como siempre, la vía Libertad (6c+) púsonos nel nuesu sitiu y ya vimos los graos nos que tocaba movese tol viaxe, teniendo qu'encadenala al segundu pegue.

 

Colos díes llarguinos ya, tuve tiempu a dar un pegue fuerte a vista a Imaginación, un 7a, que pa mi ronda'l 7a+, pifiando nun pasín non mui duro na metá de la vía, pero sicolóxico pegando un volátil de los guapos, pero viendo que na parte alta, tenía toles papeletes de pringar tamién, ya que tien un pasu regleteru que toca tener bien controláu. En resume, rutón que quedóme apuntáu na tiesta pal prósimu viaxe, al que-y dí un segundu pegue cayéndome na parte alta, que como dixe, hai que llevar bien controlada ya que ye fina, fina.

Probando un 7a increyible... que llamábase Imaginación

Al día siguiente, volvimos al Júcar, cola calmísima, ya que salí en bici una tiradina llarga y teníemos qu'esperar a la entrada de solombra en Juego de Bolos, el primer seutor del Júcar a la manzorga la carretera, si miramos dende Cuenca. La última vez que fuéramos, pasamos echando un vistazu a les víes, pero'l murín nel que pudimos paranos siempre taba estráu de xente.

Esta vegada, malpenes había 5 o 6 cordaes asina que pudimos escoyer vía, caleciendo en Alpi un 6c+ con un tramu de fisura bien guapu, pelín suave comparáu col seutor del día anterior y terminamos con un encadene al flash de Mirando pa Cuenca, un 7a míticu, mui guapu y tamién un pocu sele ya innecesariamente manufacturáu na parte alta, pa que llueu digan d'otros sitios, grandes adalides de la escalada llimpia.

---------------------------------------------------