Trail de Deva (Xixón)

17,18,19 de Febreru de 2023

Track: Trail de Deva (Xixón)

Web del Trail: Trail de Deva (Xixón)
 
Clasificaciones: Clasificaciones 2023  

Última carrera que ficiera enantes de la pandemia, fae dos añinos, terminándola, nun sé mui bien cómo, col tobiellu fechu una llaceria. Dempués del trail per Deva, tuviera tiempu abondo pa recuperar y munchu más hasta que nel trail de Peñamayor de l'añu pasáu, decidiera tornar a esto de les carreres pel monte.

Esta vegada, aprovechando qu'andaba per casa en Xixón, decidí probar a correr tres díes siguíos, faciendo la nocturna de 5 km el vienres, una carrerina rápida y curtia de 11 km el sábadu y el domingu terminar cola llarga de 27 km, too ello combináu como non, con dir a esguilar nos tiempos muertos pente carrera y carrera.

Entamu del primer día na nocturna de 5 Km

Entamábemos cola noctura de viernes, a la qu'aportaba dempués de da-y unos peguinos a un proyeutu na Carba en Peña Manteca. D'esti xeitu, cansáu d'apretar venía con un apixote perimportante conduciendo, poro tocó tomar un cafetín nel Camping de Deva con una palmerina de chocolote y ya preparámonos calentando un pocu y saludando a tolos familiares y collacios que corríen esti finde.

Una vegada preparaos los distintos participantes, fuimos saliendo en pareyes con diferencia de 30 segundos, nuna modalidá de contrarreló prestosa abondo, al igual que correr de nueche col frontal, toda una esperiencia en cuanto a los sentidos, corriendo lo más apriesa posible sollerte de cada pasu que das, anque pelín agobiante.

Preparaos pa la curtia del sábadu de 11 Km

Al día siguiente, llueu de tomer ciertes birres con un collaciu, llevantámonos preparaos pa la segunda carrera, de 11 km pero mui correndera, poro tocaba intentar controlar nervios y nun dir a fueu, cosa que suel costame munchísimu. Nel día anterior, faciendo la posición 30 na xeneral, diba ser difícil regular, asina que salí con Gus y Miguel, pero aína perdí la tranquilidá adelantando a tola xente que diba alcontrándome.

 

A la fín, los primeros kilómetros de reláx, marcaron un pocu la clasificación perdiendo 5 puestos col día anterior na xeneral, quedándome con bones sensaciones por apretar controláu, anque con munchos temores pal últimu día, nel que llegaba la prueba llarga de 27 km y nun sabía como diben responder les pates.

Esfrutando muncho'l sábadu na correndera

 

Pa rematar, como non, una persona sensata diría pa casa a descansar, tumbase nel sofá, estirar un pocu, pero quedara con collacios pa trepar un pocu y el día taba mui guapu como pa quedar en casa. Asina que vermú, bocata y pasar la tarde na paré, sicasí, nun contaba con tener que subir hasta L'Argayu... teniendo un patéu finu cola mochilona d'esguilar.

 

L'últimu día, despiértome con poques ganes de correr, llueu de tomar dalgo con más collacios, pero bono, teníemos el retu d'intentar terminar l'envite corredor, asína que pa Xixón tiramos, volviendo a intentar salir con Gus y Miguel, pero como siempre, voi dexándome llevar y na primer cuesta fuerte, piérdolos de vista y ya continúo en solitariu.

Col frenu man echáu na llarga de 27 Km del Domingu

 

Dicir, que llevé'l frenu man echáu hasta'l kilómetru 15 nel avituallamientu de metá de carrera más menos y viendo que les pates furrulaben, intenté caltener un ritmu controláu, dando la vuelta a tol cordal de Riosecu y sabiendes de que tábemos ya volviendo hacia Deva, apreté un pocu más na penúltima xubida, garrando nel camín a Illán y Alberto que diben en pareya.

 

Dellos kilómetros xuntos, con dalgún percance d'Alberto y qu'Illán nun diba como debiera, siguí baxando fuerte dexándolos atrás, garrando la última xubida hacia l'observatoriu con bon ritmu y cola tiesta puesta na cabera baxada y sobretou nos kilómetros d'asfaltu hacia'l camping de Deva.

Aportamos a meta faciendo una bona carrera nos tres díes calteniendo posiciones

Por sorpresa, muscular y mentalmente pude terminar con ritmos decentes, non tan rápidu como'l sábadu pero sí con sensación de nun tener calambres, ganando dalguna posición más, terminando los tres díes, na posición 33 de la xeneral, lo que dexó un bon tastu de cara al restu la temporada.

Como siempre, ensin ser de les carreres más guapes d'Asturies, sí que correr por casa presta, con tola familia faciendo deporte o viniendo a animar, asina como'l puntu de retu de los tres díes de carrera, colos que camiento y espero, poder siguir faciendo y meyorando sensaciones y posición.

 

El Puertu (Cangas del Narcea) - Picu Los Penones

12 de Febreru de 2023

Track: El Puertu (Cangas del Narcea) - Picu Los Penones

Continuábemos d'ivernada, saliendo parte del grupu a facer esquí de monte y otros decidímonos, anque fuéramos pocos, a conocer un puquiñín más el suroccidente, esi gran desconocíu pa facer monte. Nun ye xera cenciella aportar a los montes d'esta fastera astur, ya qu'al ser muncho más ancha, los viaxes en coche faesen pelín pesaos, sicasí, a sabiendes que díbemos tar más tiempu nel coche que caleyando, averámonos hasta'l Puertu L.leitariegos.

Nin que dicir tien, que xuntanos Carlos, Haritz, Kíla y yo, yera como remembrar tiempos d'antaño, asina que llueu del almuerzu en Cangas del Narcea, continuaremos viaxe hasta'l Puertu L.leitariegos, onde atopamos "gran cantidá" d'esquiadores na estación y xente animosa de dar dalgún pateín pela ñeve, pero lloñe, mui lloñe de toles aglomeraciones nel centru asturianu.

Partimos d'El Puertu (1522 m) con ñeve dende les cais del pueblu

  

Casi a les 12 arrancaremos a caleyar, escapando un pocu del fríu mañaneru, saliendo per pista pegaos a la riega las Eras, alcontrándonos la ñeve ensin transformar, polvu, dafechu distinta a les idegues que teníemos poles temperatures reinantes, cola mochila cargada colos crampones y el piolé y dexando los marañones en casa.

Villanueva (Santu Adrianu)

11 de Febreru de 2023

Pues cuntar, cuntábemos con nun tornar per Villanueva, pero... siempre hai xente afanosa con munches ganes de trabayar, que dá-yos por equipar otru seutorín nes muries penriba'l rigu Trubia. Va tiempu que viera los croquis peles redes y tenía pendiente arrimame hasta'l seutor, más que nada, porque préstame muncho dir a llugares nuevos y sobretou porque tenía una inmensa necesidá de trepar en graos más relaxaos.

 

Kíla asitiándose nel pie de vía... desbrozáu con procuru

 

Asina qu'averámonos hasta ellí, Silvia, compañera de carreres pel monte y yo, aportando un pelín más tarde Lau y Suco, que tamién animábense a conocer el seutorín. Entamamos, faciendo un quintín a la manzorga del too, yendo con curiáu ya que tovía puen romper cosines, pa siguir per un 6a a la so mandrecha prestosín, pasándonos a un 6a+ de diedru a la mandrecha del too, que bien pudiera ser más, fácil 6b pa min.

 

Suco y yo probando los dos 6cs del seutor

 

 Xustu a tiempu, aporten Lau y Suco, dexándo-y un toprropín a Lau pa que fogaease un pocu, viendo tamién que yera durina pa 6a+, pasándonos dempués a probar un 6c y un 6c+, a la manzorga y mandrecha d'una covarata, siendo les dos de bloquín na parte alta, que si nun sabes a lo que vas, son pringables dafechu.

 

 

Un par de detalles de los nomes de les víes

Como final del día, metíme nun 7a Hedera Helix a vista, como a toles demás, pero pringué esta vegada, nel pasu y ye que tien un puntu bloqueru, nel que nun ties mui clares les preses hasta que nun toques un pocu y garres postura pa salir del techín, siendo per una vegada dalgo más dura si yes mui altu y nun te da pa xubir un pie drechu clave.

 

Lau sigue apretando a tope en top-rope

En resume, bon día per Villanueva, onde ya pensaba que nun diba volver, pudiendo facer toles víes a vista-flash menos el 7a que tuve que da-y un segundu, completando una vegada más la escuela, anque nun sedrá la visita final al conceyu de Santu Adrianu, ya que tovía nin trepé en Valdolayés nin conozo la Cueva'l Mar y la placa nueva equipada... asina que tenemos trabayu.

Villanueva (Seutores visitaos)
 
Croquis modificaos por mi de la escuela d'escalada de Villanueva, por mor de Piratas Free. Gracies y col so permisu.

Cayón Trail (Piloña)

5 de Febreru de 2023

Track: Cayón Trail (Piloña)

Web del Trail: Cayón Trail (Piloña)

Clasificaciones: Clasificaciones 2023  

Pues cuantayá que tornaba a L'Infiestu a correr na Cayón Trail y ye que la cabera vegada nun quedara mui contentu, nun sé mui bien, si pol estáu físicu, si porque taba a piques de lesioname del piramidal o porque sin más, llevaba nel 2017 munchísima tralla enriba y nun disfrutara la carrera como tien de ser.

Esta vegada, con un día soleyeru y fríu, llueu de facer un pateín curtiu con dellos collacios nel cercanu Picu Incós, diba a la carrera a esfrutar a intentar reconcialiame coal carrera y de pasu, a ver si podíemos meyores aquellos tiempos de cuando yera más mozu.

Numberosa participación de corredores nel Cayón Trail

Llueu del monte y tomar una cervecina colos collacios, avérome a pol dorsal y de pasu recibir un regalu que tocárame nun sortéu, siendo unos playeros de trail y un pantalón la sorpresa, asina que pocu más podemos pidir, más que poner el dorsal y salir a completar el día lo meyor posible.

Munchísima xente per Infiestu pa la carrera, anque a dicir verdá, pocos conocíos, así que charro con poca xente y abellúgome del fríu al solete, nos minutos enantes de la carrera. A les 4 la tarde, entamamos a correra aputuguñaos pente les cais, pa salir pelos barrios altos d'Infiestu hacia'l monte Cayón, onde la carrera va estirándose en tramos mui correnderos, hasta aportar a les primeres ramples del monte.

Tramos correnderos na parte inicial y final

Vamos turnando sucesives xubides, con dalgún tramín llanu, ya inclusu con dalguna pequeña baxada hasta garrar otra trialera pindia, hasta aportar a lo alto'l monte Cayón, el Picu Fariu, onde quiciás, dalgo reservón na xubida, entamo a correr más fuerte, pasando a unos cuantos corredores qu'apretaron na xubida, con tramos de llanéu y quebrapates a ritmos mui fuertes.

 

Cuando quiero dame cuenta, percorremos tol monte y entama la baxada a fueu, onde voi alcontrándome cada vez meyor, corriendo tola segunda parte, inclusu con un repechín quebrapates, mui al final de la baxada, hasta salir del tarrén téunicu, superdivertíu y garrar les pistes finales de baxada a L'Infiestu, onde soi a garrar ritmos, mui lloñe de los avezáu en mí, pembaxo los 4 min/km.

Diversión asegurada nes baxaes téuniques

Con mui bones sensaciones, aporto a meta, baxando dellos minutinos mi anterior y única participación, garrando cuatru frutos secos y una botellina, pa tirar a la furgo a camudar la ropa, ya que la temperatura ye perbaxa y nun ta p'andar perende pasando fríu.

En resume, tastu perdulce del día, pente'l monte seliquín pel Picu Incós y agora pel Cayón, quitando carbonilla y esfrutando de la carrera munchísimu, anque tamién hai que dicir que l'estáu de les trialeres yera de primera ensin barru y fue un prestor baxar a fueu tol monte Cayón.

Entramos n'Infiestu faciendo un tiempín curiosu

Lludeña (Piloña) - Picu Incós

4 de Febreru de 2023

Track: Lludeña (Piloña) - Picu Incós

Día de carrera col Cayón Trail n'Infiestu, pero siendo una carrera curtia y de tarde, dábame pereza perder la mañana ensin facer gran cosa per casa, asina que falo con Carlos pa dar una vueltina pela zona, animándose Haritz con Laia, decidiéndonos por un techín nororiental como yera'l Picu Incós, techu del conceyu de Cabranes.

Pa ello, quedamos pa tomar un cafetín n'Infiestu a una hora moderada, averándonos dempués hasta'l cercanu pueblín de Lludeña, onde asítiase un Palaciu, una Ilesia curiosa y un Turruxón que bien valía la so reconstrucción, por munchos motivos, tanto hestóricos, como poles vistes que tien de tolos Picos d'Europa.

 

Salimos del pueblu de Lludeña (297 m) con vistes al picu Incós

Saldremos caleyando enfrente la Ilesia, baxando unos metros de carretera hasta la Picota, onde garramos camín hacia la Llantada, pasando pela enorme casería de la Blanca, siguiendo camín penriba del Turruxón medieval de Lludeña, el cuál caltiénse nun estáu curiosu, ensin esbarrumbe de les sos parés, pudiendo restaurase como puntu turísticu piloñés, con grandes vistes de tolos montes orientales astures.

Vil.lanueva la Tercia (Los Argüeyos) - Circular Ivernal pel Cuetu Millaró

 29 de Xineru de 2023

Track: Vil.lanueva la Tercia (Los Argüeyos) - Travesía Ivernal per Millaró

Día de ruta col GM Xuan de la Borrina, que nun sal alantre por varies baxes que-y ven les oreyes al llobu, viendo les temperatures y la necesidá d'equipamientu ivernal. Poro, terminamos por montar un grupín d'esquí montañeru, nel que decidióse dir hasta la comarca Los Argüeyos y más en concretu al municipiu de Vil.lamanín, onde asítiase'l pequeñu pueblu montañeru de Millaró la Tercia.

Ellí, entama una clásica ascensión al Cuetu Millaró, malnomáu Brañacaballo, que ficiéramos va dellos años, nuna circular seliquina pa entamar temporada. Esta vegada, l'estáu de la carretera fizo que nun pudiéramos aportar nin tan siquiera al pueblu, así que dexamos los coches al entamu la carretera y salimos portiando pel asfaltu ñeváu y xeláu, hasta alcontrar la capa suficiente de ñeve, pa preparar los trastos y foquiar o raquetiar.

Entamamos a caleyar nun día perfríu dende'l desvíu a Millaró

Esfrutaremos del pequeñu escobiu fechu pela riega Millaró pente las xerras Blancas y Curril.los, pudiendo agüeyar carámpanos nos parés, dando amuesa de les perbaxes temperatures a les que tamos, sicasí l'ascensión hasta'l pueblu, fai que vayamos caleciendo'l cuerpu y a la salida d'ésti, a plenu sol, entamaremos a quitar capes de ropa.

Paez mentira, pero cruciar foquiando colos esquís un pueblu n'iviernu, ye una d'eses coses que presten pola vida, asina que felices siguimos per pista rigu alantre, hasta la divisoria de regatos, nas Regadas, decidiendo siguir camín alantre hacia las Tablas, envede facer más envuelta pela pista que va hacia Farramedal.

Trail Afuega'l Pitu (Morcín)

22 de Xineru de 2023

Track: Trail Afuega'l Pitu (Morcín)

Web del Trail: Trail Afuega'l Pitu

Clasificaciones: Clasificaciones 2023 

Tres años pasaron dende la mió última participación na carrera más guapa d'Asturies nesta distancia y ye que nun la hai más montañera, téunica y pindia, que la xubida al Cuitu Rumiru dende la Foz en Morcín. Aparte, ye tarrén d'entrenos pela tarde, na que voi siempre camudando'l percorríu, según tenga de tiempu o ganes p'allargar un pelín más o menos, anque a dicir verdá, la mayor de les vegaes salgo dende la Collá.

 

Mañana xelada na Foz pal entamu de la carrera

Con un día perfríu como suel dase nesta dómina l'añu, aporto a la Foz, resacosu por xuntame con collacios que facía tiempu que nun veía, na tarde-nueche del sábadu y d'esti xeitu, prepárome con mal cuerpu, demientres el restu los corredores caltienen una alta motivación, caleciendo músculos p'alantre y p'atrás de les cais de la capital morciniega.

 

Xubida hacia'l Picoretu, enantes de sofrir la canal d'Otura

Intento desperezame, corriendo un pelín hasta la salida, la cúal como siempre sal a fueu, dando una vueltina pel camín fluvial y entama la xubida hacia'l Picoretu, pasando dalguna posición ya intentando garrar ritmu, anque'l cuerpu nun va y l'estómagu menos, asina qu'aporto a la Canal d'Otura col envís de caltener posiciones, xubiendo mui pero que mui atrancáu, ensin poder dar más, poro quédome a rebufu del d'alantre hasta'l Cantu d'Entrepuertes, onde al fin pueu soltar pates na pequeña baxada hasta la collada.

 

Esfrutando munchísimu na parte alta del Monsacru

Dende la collada de salida de la pista de los Yanos, tendremos una pequeña subidina pa garrar baxada per pista hacia'l picu La Granda, onde fadremos un bordéu perguapu pela cara norte del Monsacru, hasta dar cola boquera de la xubida dende la Collá. 

 

 

Ablucante semeya col Aramo ñeváu a lo fondu

A estos altores, el cuerpu diba recuperando y garro un ritmín mui prestosu, ganando posiciones por tarrén téunicu, parando a garrar un pocu d'agua pa siguir xubida hacia'l Cuitu Rumiru, cola típica prebaxada quebrapates pela Fayona.

 

Increyible'l pasu pela fastera norte del Monsacru

Voi esfrutando a tope, aportando al cumal y entamando'l llargu descensu, per fastera Noroeste, lo que fai que'l tarrén tea bien xeláu, lo que nun ye problema col estrenu de zapas, pudiendo ganar varies posiciones en tol bordéu en descensu hacia la Covarriella. Como siempre, nesta collada entama'l xuegu del barru, qu'al tar xeláu nun tuviéramos entá, atrancándome un pocu nel llanéu picante hacia la Forcá, onde ya entamaría la baxada final hacia la Foz.

 

Finábemos la carrera baxando pel barru a tolo que dábemos hacia la Foz

Son unes cuantes vegaes, les que baxé de nuevu per equí nos entrenos, alcontrándome'l pior día de barru de los últimos tiempos, sicasí, ye más bien los altos ritmos los que faen que revuélvaseme l'estómagu, baxando un pocu ritmu, perdiendo ciertes posiciones, aportando a la meta nuna hora 1h 38 minutos y puestu 100, siendo esto bastante meyorable, pero les coses hai que tomales como son, ya que finalmente pude esfrutar muncho de la carrera a tramos y eso ya paezme abondo, pa como me sentía al llevantame pela mañana.

Caña Valles (Cangues d'Onís) - Uberdón - Comeya - La Ercina - Mosquital - Enol - Porra Enol - Teón

14 de Xineru de 2023

Track: Caña Valles (Cangues d'Onís) - Uberdón - Comeya - Ercina - Mosquital - Porra d'Enol - Teón

Tornábemos al monte, con munches ganes, dempués del parón navidiegu y díbemos facelu con una ruta afayaiza, pa baxar un pocu los escesos, pero sin que fuera seliquino de más. Pa ello, apeteciónos dar un paseín pela fastera de los Llagos de Cuadonga, pisando dende cuantayá los nuesos Picos d'Europa y preparando una circular que nos ficiera tachar d'una tacada un par de montes cimeros de segunda categoría.

Ún d'ellos ye la perconocía Porra d'Enol y l'otru monte ye la Porra Uberdón, que domina penriba la preciosa Vega Comeya y con grandes vistes hacia tola fastera alta del conceyu de Cangues y Onís, colos pueblos de Gamonéu casi a tiru piedra.

Partimos del Colláu la Caña Valles (785 m) cola pista hacia la vega Comeya

D'esti xeitu motivante, magar del almuerzu de rigor na Huera en Cangues d'Onís, tiramos pa los Llagos de Cuadonga, garrando l'aparcaderu del colláu la Caña Valles como puntu d'aniciu. La idega ye facer una circular dende esti puntu, asina que preparámonos y salimos gayoleros pela pista que tira pa Comeya, pela Inh.iesta Valles, abrigaos por mor del vientu, pa bien ceo, dir quitando capes según ascendemos hacia la collada Uberdón.

VillaCabra Trail (Villaviciosa)

18 d'Avientu de 2022

Track: Trail Villaviciosa (Villaviciosa) - Santolaya (Cabranes)

Web del Trail: Trail VillaCabra

Clasificaciones: Clasificaciones 2022 

Por cuartu añu, tornamos una vegada más hasta Villaviciosa, pa finalizar l'añu correnderu nel Villacabra Trail y cómo? Pues corriendo munchísimu, más de lo que somos a esfrutar los montañeros jeje. Esta vegada, Cesar Pina y el grupu Llamaello, prepararon una carrera con salida y llegada dende la Villa, con tres xubidas, dos al picu Solares y otra la clásica Peña Cabrera, ensin baxar nesta ocasión hasta la capital de Cabranes, Santolaya.

Los molinos del Profundu lo más guapu de la carrera

Entamamos la carrera permal, escaecíendoseme'l dorsal a falta de 5 minutos del pistoletazu teniendo que volver a la furgo a la carrera, saliendo con él na mano y faciendo'l primer kilómetru caminando, colocándomelo con imperdibles, hasta qu'en Montotu, despídome de Silvia y la cola de carrera y arranco a correr adelantando xente, con demasiada priesa qu'a la llarga ficiérame dir agobiáu tola carrera.

Dacuando barrizal y dacuando un pelín de pista formigonada

Na primer xubida al picu Solares, voi garrando ritmu y baxo a fueu con varios corredores hacia Llugás, onde alcuéntrome con Alberto qu'abandona por mor d'un xemelu mancáu. Equí arrancaremos la xubida hacia Peña Cabrera, onde nun m'alcuentru bien del estómagu y nun soi a hidratame curiosu, sofriendo un pelín tola baxada y tol maraviyosu tramu de los Molinos del Profundu.

Tramu final de carrera aportando a la Villa

D'esti xeitu nel pasu por Coru, tengo claro que toca caltener ritmu sele y terminar la carrera lo meyor posible, atopando un compañeru col que vamos alternando posiciones, según seya baxada o xubida, onde tira unu o el otru, sofriendo y faciéndoseme llarguísima la xubida de nuevu a Solares y tol crestéu hasta la baxada final, onde entramos a la Villa, con 3 hores clavaes de carrera.

Paez mentira, que mires los tiempos que ficisti en carrera, siendo abondo positivos y que les sensaciones personales seyan tan males, pero les carreres pel monte son así, hai díes nes que vas flotando en sensaciones pero nun apretes lo suficiente y otres nes que sin darte cuenta vas rápidu pero nun sientes que vayas fluyendo precísamente.

----------------------------------------------------------------------------

Sorrodiles (Cangas del Narcea) - Picu Sigueiru - Val.láu - Sonande

3 d'Avientu de 2022

Track: Sorrodiles (Cangas del Narcea) - Picu Sigueiru - Val.láu - Sonande

Continuamos colos bonos vezos de dir de monte, sacando del tinteru o más bien del llistáu de Montes Cimeros d'Asturies, otra posible ruta, que llevásenos a conocer otru cachín del enorme conceyu de Cangas del Narcea, nel suroccidente astur, que tan pocu valoráu ta y que tanto tendrá que dir ufreciéndonos nos prósimos años.

Del mesmu mou, que na visita al picu'l Cabril y Rabu L'Asnu, tornamos al val.le Cibea, pero esta vegada díbemos quedanos en Sorrodiles, crucie de caminos pente la CN-4 a Xinestosu y la CN-8 hacia Val.láu, aparcando delantre'l chigre'l pueblu y preparándonos pa una xornada de monte bien fría.

Partimos de Sorrodiles (670 m) en Cangas del Narcea

La verdá ye que la meteo empobinónos hacia'l suroccidente, ya qu'en toa Asturies namái que llibraba pa esta fastera, asina qu'aportamos a Sorrodiles, magar d'un viaxe en coche lloviendo hasta Cangas de Narcea, pero a partir d'equí los claros y ñubes diben ser una costante nel día, eso sí, entamamos a caleyar de Sorrodiles hacia'l pueblu de la Riegla de Cibea, con tolo que teníemos d'abrigu puestu.