La Cueta (Babia) - Fuentes del Sil - Pena Orniz

13 Abril de 2019

Track: La Cueta (Babia) - Fuentes del Sil - Pena Orniz

Segunda vegada que visitábemos Somiedu esta temporada, a la gueta d'ascender un cumal en condiciones ivernales. Si apocayá, fuéramos hasta L'Altu la Farrapona pa facer una guapísima ruta a la Pena Calabazosa, ésta vegada queríemos conocer l'ascensión a la Pena Orniz dende la fastera llionesa, partiendo del pueblu de La Cueta.

Esti guapu pueblín, con escuelina d'escalada, caltién un toque montañeru pergrande, siendo llugar de pelegrinación d'esquiadores de montaña pudiendo ascender o facer travesíes pente milenta cumales del parque natural de Somiedu o de la fastera de Fuentes del Sil, que dalgo pudiéramos conocer, na nuesa visita y ruta al Montigüeru.

Partimos de la Cueta (1442 m)

Caliao (Casu) - Los Arrúos - Picu Corteguerón - Les Campes

31 Marzu de 2019

Track: Caliao (Casu) - Los Arruos - Picu Corteguerón - Braña Vieya

De los grandes montes del parque natural de Reres, pocos me quedaben por encumar y a dicir verdá, tan sólo, paezme que'l Picu Corteguerón resistíase a les munches rutes que tenemos feches pelos conceyos de Casu y Sobrescobiu. Pa facelu, averarémonos al pueblu casín de Caliao (680 m), pel camín davezu saliendo de Xixón pela autovía minera y a l'altura de Llangréu, tomaremos el corredor del Nalón que traviesa los conceyos de Llangréu, Samartín del Rei Aurelio y Sobrescobiu.

Magar del cafetín y pinchu tortiella nel chigre de Rusecu, garraremos namái pasar el banzáu de Tañes, la carretera que nos empobinará a Caliao dempués de cruciar los pueblos de Coballes y La Encruceyada. L'aparcaderu de la ermita de San Antonio, sedrá'l nuesu llugar de salida pa empobinanos hacia'l más que míticu desfiladeru de los Arrúos.

Partimos del perguapu pueblu de Caliao (680 m)

Caín (Valdión) - Canal de Ría - H.ou Los Cabrones (Cabrales) - Piedrabellida

23 Marzu de 2019

Track: Caín (Valdión) - Canal de Ría - H.ou Los Cabrones - Piedrabellida

Son les 7 y media de la mañana y ya va alboreciendo nel nuesu campu base particular en Caín. Dende esti pueblín valdoniegu, de munchos raigaños asturianos ya que la conexión pente Cabrales y Valdión ye evidente, salieron munches de les grandes actividaes que ficimos Ana y yo.

Nos últimos tiempos, tan sólo ella ta siendo capaz de sacar esa vena montañera que tengo amatagada pola escalada deportiva, les lesiones y el zanganismu de nun querer entrenar en condiciones pa facer xataes pel monte.

La última burrada dende Caín, lleváranos a descender corriendo mil metros de desnivel pela canal del Mueñu pa llegar a cenar, magar d'ascender per Arzón y Dobresengros a la Torre La Celada. Pero esta vegada tamos n'otru xeitu dafechu. Tamos tovía na dómina ivernal y camudamos el gris de la peña y el verdi de la yerba pol gris y blancu d'esa mesma peña y la ñeve.

Como siempre, unes cañes, son el plan afayaizu de cualesquier día pela selmana, pa que salguen planes de monte, pero esta vegada yera dalgo que tenía na tiesta dende cuantayá, yera dalgo que me llamaba dende que ficiera con Fernan la Canal del Agua.

Campu base particular en Caín (459 m)

Tonín (Los Argüeyos) - L'Esturbín - Boleru - Vallequín

16 Marzu de 2019

Track: Tonín (Los Argüeyos) - L'Esturbín - Boleru - Vallequín

Siguimos con condiciones ivernales n'Asturies y anque lloñe de los niveles de ñeve de va un mes na Farrapona, el fríu n'altor fae que'l mantu ñivosu calténgase curiosu, lo que convídanos a facer otra ascensión con un día de solín anque perfríu.

Al igual que va más de 8 años, n'anterior ascensión al picu L'Esturbín tornamos a Tonín d'Arbas p'ascendelu, ya que la temporada anterior intentámoslo dende La Paraya n'Asturies, quedándonos nun antecumal como ye la Peña Cuaña y viendo que l'accesu ye perllargu pa la dómina l'añu na que tábemos.

Partimos de Tonín (1265 m) nun día perfrío

Anguiano (La Rioxa)

2, 3 de Marzu de 2019

Aprovechando la ponte d'antroxu d'esti añu, escapábemosnos hasta la Rioxa col envís de trepar un pocu y descansar del trabayu. La idega yera centranos na escuela d'Anguiano que dende'l nuesu campu base en Ezkarái quedábanos a unos 45 minutinos más menos.

En términos xenerales ye una escuela de placa, con graos mediu-baxos pa esfrutar d'una escalada a la que tamos pocu avezaos n'Asturies, siendo esta sobre regletes romes y furacos y hai que facese a ella, a pisar en planos y escalar casi tol tiempu n'estensión ensin cerrar les preses.

Accesu percómodu hasta los parés de los distintos seutores

Nel total de los díes que tuviemos per ellí, tampoco ye qu'esguilásemos muncho, ya que les mañanes yeren cola calma y aportábemos al seutor casi al mediudía, pero al menos conocimos los seutores del Molino y Cornisa.

Pepa y Jose plaqueando fino n'Anguiano

El Molino ye'l más cercanu y como ye normal, ye un seutor onde si sumávos-y que de por sí, ya esguilamos en planos en caliza vieyos, pues lo sobao de la roca, fai que nun dé muncha confianza y cueste pillá-y el puntín, poro fice 3 quintinos y fuímonos pal seutor Cornisa.

Pillándo-y el puntín al plaquéu de romos y furaquinos

El seutor Cornisa caltién una bayura de graos estensa pente'l V+ y el 7b, anque paezme que nesti viaxe nun pasé nin del 6a+ jaja. Esguilando cola calma y esfrutando de pegues de rises colos collacios fué más que suficiente.

El primer día nesti seutor ficiéramos un par de víes de 6a de tarde a la mandrecha'l seutor, tirando a mui perres, pero como ya dixi, hai que dir pillándo-y el puntín a la escalada. Al día siguiente, ya pudimos escalar de continuu durante tol día nes víes de la manzorga y esfrutamos de pegues prestosos faciendo les 7 víes del entamu'l seutor.

Graos baxos y caliza vieyo... pero prestosa esguilada

En resume, tanto la escuela como'l pueblu son afayaizos pa un finde y pa los furgoneteros tien un bon apalanque nel polideportivu. Nun ye una escuela de viaxe de varios díes, pero pa visites esporádiques quiciábes con dalguna otra escuela de la Rioxa podría cundir perfeutamente.

Eso sí... los muros miren al sur, asina que si nun queréis cocer... la meyor dómina del añu pa facer la visita ye l'iviernu o díes ñublaos, ya qu'onde'l tactu nun ye que seya una maraviya, con calor pue facese bola la escalada de romos jeje.

Camudando'l Camín  con Kíla sollerte al paisaxe rioxanu

Anguiano (Seutores visitaos)

Croquis modificaos de Anguiano, como siempre mercái la guía xente. Gracies y col so permisu.

---------------------------------------------------

L'Altu La Farrapona (Somiedu) - Pena Calabazosa

24 Febreru de 2019

Track: L'Altu La Farrapona (Somiedu) - Pena Calabazosa

Dempués d'un mes ensin tornar al monte y con ciertes sensaciones estrañes, ya que debió ser la primer vegada que tuviera aguyetes dempués d'una llarga ruta per Grau, diciendo muncho de mi condición física, metémonos nel Somiedu oriental a la gueta de la primer ivernal del añu

Poro, magar d'escalar en Teberga'l día anterior, saldré con Pepa y Jose pel Altu San L.lorienzu, hasta garrar na Riera la SD-1 que nos fadrá entrar nel val.le Saliencia, pasando per Veigas, Vil.larín, Arbeyales, Éndriga y Saliencia onde cenaremos nel maraviyosu Albergue de Saliencia y dormiremos nel aparcaderu.

Increyible puntu de partida nel Altu La Farrapona (1708 m)

Llinares (Proaza) - San Adrianu'l Monte (Grau) - Buei Muertu - L'Oral - Cuallagar

26 de Xineru de 2019
 
Track: Llinares (Proaza) - San Adrianu'l Monte - Buei Muertu - L'Oral - Cuallagar

Dempués d'un parón perimportante de más d'un mes ensin salir de monte, a la fín, organizamos una ruta y lloñe de buscar grandes hestories, preferí meter kms de patéu ensin dificultá y conocer una fastera asturiana que tando mui cerquina del centru asturianu, caltién un toque de soledá que llevó a munchos pueblos a desaniciase poblacionalmente y pali pali, tamién estructuralmente.

Pa ello, partiremos del pueblu proacín de Llinares, al qu'aportamos dende Xixón dempués del clásicu camín hacia'l valle del Trubia, al que tantes vegaes fuí a esguilar. Una vegada qu'aportamos a San Andrés desviarémonos hacia Castañéu'l Monte nel conceyu de Santu Adrianu y dende ellí, siguiremos carretera arriba hasta'l pueblu de Llinares a un ablucante altor de 760m

Salimos bien ceo del pueblu de Llinares (760 m)

Villamoréi (Sobrescobiu) - Torrexón - Llampaces - Soto

16 d'Avientu de 2018 
 
Track: Villamoréi (Sobrescobiu) - Torruxón - Llampaces - Soto

Casi un mes dempués de la última salida el GM Xuan de la Borrina, tornamos al monte y con un día pelín gafu, restolamos pente les rutes de calendariu pa salir anque seya a dar un paseín. La escoyeta de la ruta, fue col envís, de que'l grupu fuera garrando dalgo de puxu y motivación y por que non, garrar un pelín de forma.

Pa ello, averámonos hasta'l conceyu de Sobrescobiu y más en concretu al pueblu de Villamoréi dende onde entamará la nuesa circular pela xerra'l Crespón. Va dellos años, percorriera tola xerra dende'l Cogollu al picu Llampaces pero esta vegada vamos intentar ascender al más picu nomáu de la xerra propiamente dicho, sacante de los cumales solitarios del Corbellosu y el Guanalón y Cogollu.

Partimos del guapu pueblín de Villamoréi (390 m)

Rifabar (Piloña) - Maserones - Xiblaniella - Lligüeria

25 Payares de 2018 
 
Track: Rifabar (Piloña) - Maserones - Xiblaniella - Lligüeria

Magar d'un tiempu de reposu, dende les xataes d'Ochobre per Picos, tornamos al monte llueu de que quedaren nel tinteru un par de rutes del grupu que nun acabaron por salir. Esta vegada sí que xuntámonos un bon garrapiellu xente y dan un día de sol estupendo pa poder conocer ún de les poques foces na fastera del Infiernu que quédame per conocer: Los Maserones.

El día anterior, tuviéramos esguilando pela Forcada y como non, quedamos a durmir na capital de Piloña, L'Infiestu, p'almorzar un pinchín de tortiella de bona mañana y una vegada que xuntémonos toos entamar a viaxar hacia la vega'l rigu Espinaréu.

Partimos dende'l pueblu piloñés de Rifabar (323 m)

La Forcada (Parres)

24 de Payares de 2018


Magar de l'aforfugu montañeru de los últimos meses, el mió cuerpu pidió un descansu y con un estáu de forma importante, anque siguiendo coles molesties nel xemelu, abelluguéme una vegada más na escalada deportiva como deporte principal de les miós actividaes.

Ún de los munchísimos díes nos qu'anduve trepando en delles zones, pasaríame pela Forcada en Parres, dempués de dos años ensin catar la so roca. Esta vegada cola compañía de Pepa y Jose, Andrea y Lara y con Suco de compañeru de cordada, tuviéramos dándo-y unos peguinos a delles víes del seutor del Callejón.

Probando delles víes nel Callejón

Les intenciones yeren de llimpiar el seutor, contando con varies víes a la manzorga ya encadenaes, pero metímonos nun par de sestos baxos a la mandrecha y el toque alpín de la escalada, lo sucio y el nivel de cansanciu que manexábemos fizo qu'encadenásemos lo que nos dexaron les nueses fuercies más que lo que teníemos en mente.

Dicir que los sextinos de la mandrecha, tan sucios y mui pocu escalaos, asína que güeyu y muncha cabeza a la hora d'afrontalos y metese nellos, teniendo que dir más bien sobraos de grau, sinon queremos tener dalgún sustín curiosu o mancase direutamente, por mor de los alloñes y dalgún cantu sueltu.

La cordada de collacies apretando enforma

Llueu metímonos a un 6b+ y un 6c que resultaron apretones y perretes, anque como decimos, el nivel de cansanciu yera perimportante y ficiéronseme más duros de lo que realmente pudieran ser, al menos falando del 6c... el 6b+ yera perrete sí o sí, jaja.

Con ganes d'enchufalos, tuviemos que colar, ya que les previsiones más menos acertaron y púnxose a orbayar dexándonos coles ganes d'al menos llevar nel bolsiellu toles víes que tuviemos tiempu a probar, pero tendrá de ser pa la temporada siguiente ya que cierra por añeramientu hasta'l branu.

La Forcada
Croquis modificaos por mi de la escuela d'escalada de la Forcada, por mor de Piratas Free y Entretenimiento Vertical. Gracies y col so permisu. 

 

 -----------------------------------------------------------------------