miércoles, 8 de junio de 2016

Tuíza Riba (L.lena) - Pena Cerreos

12 d'Ochobre de 2011 y 15 de Mayu de 2016

Track 2011: Tuíza Riba (L.lena) - Pena Cerreos
Track 2016: Tuíza Riba (L.lena) - Pena Cerreos - Puertu Cerreos



Nun soi muncho de repetir rutes pero bono, nesti casu, nun tenía más planes y dir con otra xente de monte, ye casi como dir a un monte desconocíu, poro allá que volví a la Pena Cerreos. El percorríu del 2011 y del 2016 camuda dellos tramos namái, asina que nun ye de recibu facer una entrada distinta.

Como siempre que salimos de Tuíza Riba, tiramos pela As-66 hasta Campumanes pa siguir hacia Tuíza Riba, pasando pelos pueblos de Sotiel.lo, Espineo, Los Pontones, Teyeo, Rospaso, Tuíza Baxo y dexaremos el coche nel aparcaderu de Tuíza Riba.


Namái salir de Tuíza Riba ya tenemos tou esto delantre

Ambos díes, a eso de les 10 de la mañana, tábemos yá coles mochiles al llombu, y travesamos el pueblu de Tuíza Riba, pa garrar, na primer visita, el míticu camín hacia la Braña Meicín, que cuantayá, ficiera averanos a cumales tan prestosos como la Pena Ubina o los Picos del Fontán.

La segunda visita a Cerreos, vamos facelo pel camín d'iviernu que xube pal Meicín. Esti camín trata de llibrar los ábanos que cayen dende Las Colgás y Los Cantos, xuntándose al de branu, na Portil.lera, non sin antes pasar poles guapes cabañes y praos de la Braña Meicín.

Esta última vegada'l borrín fue'l nuesu compañeru fiel pel camín d'iviernu

Pente'l borrín, pocu hai que cuntar de la Portil.lera alantre nel 2016, por embargu en 2011 onde tómase'l camín a Meicín, desviámonos a la esquierda un pelín hacia la Xerra Gabuxeos, ya que tenía n'alcordanza lo pesáu que faíse l'ascensu hasta l'Altu Terreos dende'l Meicín, camudando'l plan d'aniciu.


Tou un agasayu pa los güeyos tantos cumales

Tou esto, facíamoslo demientres seguíamos colos güeyos caún de los cumales que forman esti valle, y sin perdé-yos de vista, vamos separtámonos de tolos demás montañeros que siguíen el cursu normal hacia'l refuxu.


El nuesu oxetivu: Cerreos y a lo baxo'l refuxu de Meicín

Nós, meterémonos nesa xerra Gabuxeos, pela qu'avanzaremos entreteníos travesando por igual vegues como la del L.lanu y tramos calizos, pero siempre nun continuu ascensu que fadrános l'averamientu al altu Terreos muncho más llevaderu que dende lo baxo del Meicín.


Ascendiendo cola Ubina siempre presente

Poquín a pocu, diremos avanzando y dempués d'una hora caleyando ya veremos el Refuxu del Meicín mui embaxo y l'Altu Terreos muncho más cerquina. Hai que dicir, que nun hai un senderu claru, pero simplemente'l sentíu común, va llevanos siempre n'ascensu unes vegaes y otres calteniendo l'altor hasta que metémonos nun pedreru.


Siguimos acolumbrando cumales d'Ubina

Esti pedreru, nun supón nengún problema travesalu, anque sería un puntu de referencia nel casu de querer tomar la Pena Cerreos pela so cara más xabaz, ya que dende equí podría xubise fácilmente hasta'l Puertu Cerreos, onde garrar unes canales d'ascensu hasta l'arista de Cerreos.


Pasando un pedreru col Altu Terreos ya cerquina

Como nun sabíemos d'esta posibilidá hasta que la vimos dende riba, travesamos el pedreru, llantándonos embaxo de los parés de Cerreos y salimos al caberu tramu d'ascensu per praos al Altu Terreos con muncho desnivel ganáu.

Dempués de tomar un pocu de refrescu, demientres acolumbramos tola cresta que va de la Forqueta'l Portil.lín al Picu Fariñentu, vamos facer esti pindiu tramu, baxo la solombra de Cerreos, lo cual ye mui d'agradecer ya que'l calecer del sol ye perfuerte.


Puertu de Tuíza cola Ubina Pequena al frente

Finalmente, en dos hores taremos nel Altu Terreos (1887 ms) onde tenemos de frente tol Puertu Tuíza cola Ubina Pequena, y dos pequeñes cotes como son la Carba y el Solmil.lo, les cuales ya tan preparaes pa la prósima vegada que nos apeteza facer una visitina a la parte sur del Macizu de Penaubina.


Ascendiendo hacia l'arista de Cerreos

Magar del descansu, con chocolatín y augua, tirámonos pola llende astur-llionesa hasta l'entamu de la pala qu'asciende a la Pena Cerreos. Nesti casu podríase xubir direutamente hasta'l cumal, ya que nun supón nenguna dificultá faciendo envueltes, pero preferímos facer una diagonal pergrande hasta l'arista cimera, xubiendo l'altor mui selemente.


Trincheres de la guerra na cresta final

Con ello, algamamos unes vistes perguapes del Puertu Cerreos al aportar a l'arista, y tamién tener un crestéu final mui prestosu al traviés de les trincheres qu'inda sobreviven nesti guapu cumal.

A la una menos diez de la tarde, casi 3 hores dempués de salir del aparcaderu de Tuíza Riba, y 45 minutinos dende l'Altu Terreos, vamos facer cota nos 2108 ms de la Pena Cerreos, cota másima hasta'l momentu pa Paula, y un cumal más pal bolsiellu pa mi nesti macizu.


Na Pena Cerreos (2108 ms)

Y nun ye un cumal más, ya qu'a pesar de nun ser de les cotes más altes del macizu, al tar pelín separtáu de cualquier otru, tien unes vistes de lo meyor. Pues entamar pola Ubina Pequena hasta la Pena Ubina Grande , y d'ehí garrar la cresta hasta'l Siete, baxando polos Portil.linos, que colos Picos del Fontán detrás, baxen a la Forqueta del Portil.lín que xube a la cresta que va hasta'l Picu Fariñentu, que sigue pol Güertu los Pioyos hasta'l conxuntu de Siegalabá y Tapinón... y ello sin escaecer al increyible cordal de la Magrera, Mesa y Tesa.

Vamos, p'alloriar dafechu les vistes... que tuviemos nel 2011, cosa que nel 2016 nin golifales. Pero por suerte, dibemos con bonos conocedores de L.lena y tuviemos la oportunidá de ser guiyaos al traviés de la hestoria d'esti país, coles fortificaciones de la guerra civil.

Baxamos de Cerreos hacia Santumichanu metiendo nel Val.le Rituertu

Pa ello baxaremos hacia'l val.le Rituertu bordiando pembaxo una cabaña en bon estáu, hasta a l'altor del espolón sur de Pena Cerreos, garrar una curtia pero pindia canal, onde nel llau esquierdu alcontraremos el primer parapetu.

Quedo alloriáu por nun conocer estes trincheres, prestándome pola vida conocer onde allugábense los republicanos pa defender los puertos d'entrada a Asturies de los nacionales. Del primer parapetu, descendemos pela canal contigua en dirección este onde alcontramos otru parapetu, pero siendo esti una peña afuracada con ventanos pa disparar... una pasada.

Increyibles estes pequeñes fortificaciones: unes artificiales no alto y escavaes na peña no baxo

Tornaremos a xubir la segunda canal y empobinámonos a la cabera de les trincheres, tando ésta en plenu Puertu Cerreos. Ye la más grande claramente y entramos tol grupu pa poder xintar, anque fai más fríu dientru que fuera jeje.

Magar de picar dalgo y oyer dalguna bona hestoria de la guerra civil y estudiar con calma una bala de 1918 que fízonos pensar na munición que gastaben los republicanos, con fecha de la primer guerra mundial de xuru.

Descendemos del Puertu Cerreos al Meicín pelas Rubias

El día que nun quier abrir, así que con pena descendemos del Puertu Cerreos hacia'l canalón que baxa hacia'l Meicín, a la mandrecha primeru de la Pena Medio Cabel.lo y llueu de la Penas Las Rubias, dexándonos nel refuxu onde descansamos, tomamos unes cerveces y un bocadillu d'escandalo.

Como seguimos sin ver gran cosa, cuntaremos meyor como en 2011, magar del llargu descensu dende Terreros averándonos a la cara este de Penubina y distrayéndonos coles vistes d'esti valle glaciar y de cumes tan ablucantes como los Castil.linos y Portil.linos.


Vamos despidiéndonos de semeyes como estes

Naquel día, tamién tuvu su puntu, agüeyar con tranquilidá la convivencia de vaques y caballos nel prau secu del L.legu, ya inclusu ver una llucha entre caballos machos por cubrir a una hembra, coles dos cares pa los lluchadores: unu quedóse cola hembra mordiéndo-y un pocu'l llombu de forma cariñosa y l'otru pocu más y queda ensín dientes de la coz que-y tiró'l ganador.


Baxando hacia Tuíza col solano cascando cosa fina

Tanto en 2011 como 2016 el descensu dende'l Meicín faise de manera relaxada col envís de dir colocando'l cuerpu en mou premiu por aprovechar otru día de monte y nun ye otru que una cerveza bien fría nel chigre de Tuíza Riba o Rospaso.

En resume, actualizo esta entrada pa ver como en dos díes completamente distintos no meteorolóxicu, pudimos aprovechar los nuesos pasos pa conocer monte o conocer hestoria, siendo'l pagu por ello unes 5 hores y 40 minutinos de ruta, nos que percorrer 9,3 kms y superar 935 ms de desnivel acumuláu, siendo un pelín más en 2016 por mor de les vueltes pel Puertu Cerreos.


Camudando'l Camín en Tuíza Riba

Nesti rutina ficimos 1 dosmil de L.lena perteneciente al club 58 de Penaubina: Pena Cerreos (2108 ms)Ver progresos en: Retos montañeros

5 comentarios:

  1. Hola Berto; guapa ruta, sencilla pero muy agradecida. Dices bien, que al estar un poco seperada ofrece buenas vistas.
    Un saludo amigo

    ResponderEliminar
  2. Berto, Peña Cerreos ye un cumal que munches vegaes escaecemos por tar al llau de peñes más altes o más guapes, pero que la verdá ye que ye muy agradeciu. Va munchos años que nun lu xubo. Lo mismo torno esti iviernu con paraxones o crampones.
    Un saludu

    ResponderEliminar
  3. Ya pagó Paula champán por romper techo? Que día más cojonudo para poner nombres a todas las cimas.
    Un abrazu collaciu y collacia (esto suena mal).

    ResponderEliminar
  4. Fernan, toi esperando al domingo pa pagar la botellina, pero de sidra mejor que de champán. Puedes poner "collacios" que voi dame por aludida igualmente, jeje, un besín.

    ResponderEliminar
  5. Gracies Monchu y Cienfuegos polos comentarios. La verdá ye que n'ivernal tien de ser una pasada faciendo buelga por eses pendientes.

    Fernan, el domingu que se pague dalgo, jeje

    ResponderEliminar