Retuerto (Valdeburón) - Cordal de Pármede

15 de Xunetu de 2024

Track: Retuerto (Valdeburón) - Cordal de Pármede

Continuamos de Travesera per Picos, yéndonos hasta la comarca de Valdeburón, col envís de pasar de Valdión a Sayambre, faciendo una paradina de camín pa conocer el cordal de Pármede, colos picos Parme, monte cimeru del Cordal Cantábricu y Pozúa, como referentes del cordal y grandes miradores de los Picos d'Europa.

Pa ello, vamos averanos, al pueblín de Retuerto, onde tendremos nuesu puntu de partida, aportando a una hora mui tardía, magar d'almorzar na furgo y en Posada pa despedinos de Pepa, lesionada del cuadriceps. Asina que vamos prepararnos y salir de Retuerto, por suerte con un dia fresquino, so les 11 y media la mañana, teniendo ya un pelín de presión pola hora, ya que tienen dellos compañeros que facer viaxe de vuelta.

 

Partimos de Retuerto (1200 m) nun día estupendo de temperatura

Cruzaremos el rigu Pármede, echando un vistazu al cartelu indicativu, ya que tamos en fastera pelín desconocida y siempre aida a orientase y alcordase de llugares cercanos pelos que ya tuvimos de monte, saliendo per una amplia pista, que va llevanos per un fayéu preciosu, baxo la faldera del picu Navarín, desdexando nel nuesu casu, les indicaciones de rutes hacia Burón, ya que'l nuesu destín son los praos del Hedo, onde aparte de vistes al Cornión, atoparemos caseta forestal a la vera la viesca.

Colláu H.ermosu (Valdión) - Torre'l Llambrión - Colladinas - Llagu Baxeru - Asotín - Cordiñanes (Valdión)

14 de Xunetu de 2024

Track: Colláu H.ermosu (Valdión) - Llambrión - Colladinas - Llagu Baxeru - Asotín - Cordiñanes (Valdión)

Tercer día de Travesera Picos, espertando nel colláu H.ermosu, onde teníemos apallabráu almuerzu, asina qu'averámonos al refuxu y llueu de ponenos finos con tolos esistente na mesa, tornaremos al vivac pa recoyer tolos trastos cola calma, poniéndonos en marcha so les 9 y media la mañana, col oxetivu claru: La Torre'l Llambrión.

Tamos nel últimu día del finde, teniendo munchos integrantes del grupu que tienen qu'abandonar pa trabayar al día siguiente, asína que la idega ye xubir y baxar peles "marques marielles", ensin cresteríes, pa que tengan tiempu de sobra a baxar, nun llegar mui tarde a casa y ver la final del mundial de fútbol, ensin atropellos.

Partimos del Colláu H.ermosu (2075 m)

El grandiosu día anterior peles Travieses del Rabicu y Llaz, pasó factura y Vane llevantóse con dolor nel cadril, asina que va quedar nel refuxu a la espera de que baxemos, acompañada por Sara, la so hermana, demientres que los demás, salimos colos mochilones hacia'l H.ou del Llambrión, onde podremos dexales, tres d'una piedra dalgo escondíes, pa facer un ascensu llixeru.

Col día pelín frescu, según vamos xubiendo, alcuérdome de nun llevar dalgo más de ropa, esperando que l'esfuerzu y los trepes vayan caleciendo, asina que tiro a ritmu, probando una vegada mi maltrechu cadril, respondiendo perfeutamente, poniéndonos a la entrada de les "marques marielles" en 50 minutinos dende'l refuxu.

Cordiñanes (Valdión) - Asotín - Solano - Rabicu - Llaz - Colláu H.ermosu (Valdión)

13 de Xunetu de 2024

Track: Cordiñanes (Valdión) - Asotín - Solano - Rabicu - Llaz - Colláu H.ermosu (Valdión)

Dempués de la cena y durmir en Santa Marina en Valdión, tol grupu teníemos que movenos hasta Cordiñanes, pa continuar cola Travesera Picos d'esta temporada y teníemos per delantre, dos díes de monte pela fastera'l colláu H.ermosu, con una primer estaya que diba llevanos a esti guapu llugar, per senderos colgaos non aptos pa xente con vértigu, teniéndome defechu dalgo esmolecíu, ya que yéremos en grupu curiosu pa movenos per estos pericuetos.

Ensin priesa, magar del almuerzu calmáu nes furgonetes, averámonos hasta Cordiñanes, onde preparamos tol material de vivac, embutiéndolo como pudimos na mochila y pocu dempués de les 10 de la mañana, entamábemos a caleyar con un día fresquín pero soleyeru, no que vien a ser una temperatura perfeuta p'andar pelos Picos.

 

Grupu preparáu en Cordiñanes (865 m) p'aventurase per tarrén xabaz

Dempués del día anterior, ensin vistes n'ascensión al Escañu, alborecíemos con borrina baxa, que fuera esnidiando durante la mañana, dándonos vistes al seutor de la Bermeya nel Cornión, nos primeros pasos pela senda la Rienda, lo que prometía que díbemos tener un día bien guapu pa facer monte. 

Munchos de los collacios, nunca xubieran pela Rienda, asina que diben encantaos col senderu colgáu, senderu que la primer vegada que percorriera, nun tenía dengún seguru, nin cuerdes, nin cadenes, asina que mientres comentábemos estes hestories, calecíemos músculos y díbemos acolumbrando tola redolada de picos, canales y pasos que teníemos enfrente.

El Santu (Tierra La Reina) - Puerma - L' Escañu - Mostayal

12 de Xunetu de 2024

Track: Pandetrave (Tierra La Reina) - Puermán - L' Escañu - Mostayal

Primer día de la Travesera 2023 - 2024 dempués del parón del añu pasáu pela lesión de cadera, pero viendo qu'esti añu tamos pudiendo xubir el nivel de rutes, entráronme ganes otra vegada de preparar dellos díes pelos Picos d'Europa y como siempre, préstame pegar un pateín de vienres, restolando pente los llistaos de pendientes dalgún monte que conocer.

L'anterior travesera averárame corriendo hasta'l picu Gabanceda en solitariu y esti añu quería conocer xustu'l monte a la otra vera la carretera del puertu Pandetrave, siendo L'Escañu, el monte escoyíu al ser un dos mil de segunda categoría de Picos, xustu na llende pente Llión y Cantabria, ya que sigue la cuerda hacia'l Coriscáu.

Partimos del mayáu del Santu (1423 m) poques curves enantes de Pandetrave

Esta vegada tengo la suerte de tar acompañáu, por Pepa, Sara y Rubén, que tuvieron tamién la posibilidá d'animase a la ruta y llueu del llargu viaxe per Tarna y Riañu, aportamos per Portilla la Reina, a la mayada'l Santu, a malpenes una recta del puertu de Pandetrave, nuna curva d'esquierdes perzarrada, onde tendremos apartaderu pa los coches y preparámonos rápidamente pa salir de monte.

Nesti puntu, perteneciente entá a la comarca de Tierra La Reina, entamaremos la ruta, llueu de comentar colos guardes del Parque, si nun díbemos pelín tarde jeje. Saldremos, travesando unos praos, pa garrar a la mandrecha un ampliu camín que tien de llevanos a la parte alta de los mayaos del Santu, onde veremos al otru llau de la riega de Puerma una cabaña, anque nós siguiremos pela mandrecha la riega, ascendiendo apriesa per esti valle de Puerma.