H.ou de los Cabrones (Cabrales) - Cuetos del Trabe - Amuesa - Bulnes - Texu - Poncebos (Cabrales)

9 de Xunetu de 2013

Track: H.ou de los Cabrones (Cabrales) - Poncebos (Cabrales)

Ayeri de nueche, paez que los únicos con fuercies pa nun dir pa la cama a primer hora, fuimos Pangua y yo, que tuviemos fuera colos frontales, lleendo revistes y bebiendo cerveces que nos proporcionaba'l refuxeru. El casu, fué que cuando aportamos al refuxu de nuevu, magar de ver l'atapecer, alcontrámonos con tol mundiu na cama, dempués de paez ser d'una riña del refuxeru pa con unos faltosos de Murcia.

Nun tengo claro, que folixa queríen montar nun refuxu d'alta montaña a 2030 ms. Fernan, Bittor y Tito, taben nel sacu ya, y nós nun teníemos nin plizca de gana de durmir, anque tuviésemos cansaos, poro falamos col refuxeru, seriu pero mui bon paisanu por ciertu, y proporcionónos un par de cervecines pa facer sueñu.

Alborecemos nel H.ou de los Cabrones (2033 ms)

Caín (Valdión) - Cares - Ría - Piedrabellida - Cerredu - H.ou de los Cabrones (Cabrales)

8 de Xunetu de 2013

Track: Caín (Valdión - Llión)- H.ou de los Cabrones (Cabrales)

Tamos de llenu, na Travesera Picos d'esti añu y como suel asoceder, la tercer estaya de la Travesera siempre ye dura, dura, poro nun esperábemos menos pa esti añu. Por suerte, la nueche anterior, fuimos a descansar de luxu, dempués de la cena, la visita a la h.uente la H.arda y les cerveces nuecherniegues.

Menos suerte tuvieron los collacios que retiráronse nel día anterior, ya que siguimos les sos aventures hasta mui entrada la nueche. Y ye que, facése'l Cares, con sus 13 kms, dempués de la paliza que llevaben enriba, tuvo que ser durísimu y conducir hasta Xixón y Euzkadi respeutivamente col cansaciu acumuláu más.

Gracies Pau, Rebe, Simón, Ainara, Carlos... sois los meyores

Entamamos el tercer día en Caín (461 ms)

Vega d'Ariu (Onís) - Torres de los Cabrones - H.errera - Caín (Valdión)

7 de Xunetu de 2013

Track: Vega d'Ariu (Onís) - Caín (Valdión)

Alborecemos en Vega d'Ariu, ensín durmir n'escesu precisamente. Amás, sigo rucando la tiesta, coles males sensaciones d'ayeri, poro nun les tengo toes conmigo y camiento que viendo'l tercer día de Travesera, tengo que tener güei unes sensaciones contrapuestes a les del primer día de travesera.

L'almuerzu, como siempre, aída un pelín más a dir garrando fuercies y camudar el sentir. Aún así, coles pates pelín cargaes del día anterior, vamos preparando la mochilona, estirando un ratín y despidiéndonos de collacios, traveseros que faen otru camín al nueso y de la primer baxa de la travesera, Haritz.

Semeya de grupu con Monchu y familia na Vega d'Ariu (1620 ms)

La Molina (Cabrales) - Casañu - Cantón del Texéu - Vega d'Ariu (Onís)

6 de Xunetu de 2013

Track: La Molina (Cabrales) - Vega d'Ariu (Onís)

Madrugón de los que faen hestoria, pa entamar la Travesera Picos 2012-2013, ya que quedamos bien ceo n'Arenas p'almorzar toos xuntos. Dende Xixón, saldremos Simón, Haritz y yo y dende Euzkadi vienen, Fernan, Bittor, Tito, Carlos y Ainara.

Como siempre, aportamos a Arenas garrando l'autovía del Cantábricu hasta Posada de Llanes, onde tomamos direición a Cabrales al traviés del Altu d'Ortigueru, y ya baxamos a los pueblos de Canales, Carreña, Poo y a la fin Arenas.

Entamamos la Travesera en La Molina (356 ms)

Travesera Picos 2012 - 2013

Del 6 al 9 de Xunetu de 2013

Track: Travesera Picos 2012 -2013

Cuarta travesera integral de Picos del GM Xuan de la Borrina y una vegada más, vamos conociendo un pelín meyor esta brutalidá de sistema montañosu y tamién vamos conociéndonos a nós mesmos, como montañeros, coles coses bones y males.

Y ye que cuando estudiamos un percorríu pa la Travesera, hai qu'albidrar per adelantáu lo que vamos sofrir, onde vamos meténos y en qué condiciones vamos tar pa cual o tal día. El nuesu maxín, camiento que diseñó pa esta Travesera unos oxetivos enforma ambiciosos y la propia montaña foi la que púsonos nel nuesu llugar.

Sicasi, nun too va ser coses males, por nun cumplir lo que teníemos na tiesta. Les meyores noticies, vinieron de la capacidá d'adautase a planes B ya inclusu C, y sobromanera a la capacidá de sofrimientu, nunes condiciones perdifíciles con munchísimu calor y munchísima ñeve, muncha más de lo camentáu.

Tolos participantes de la Travesera 2012-2013 con Monchu, Esther y Luis

El Pino (Ayer) - Pena Reonda

16 de Xunu de 2013

Track: El Pino (Ayer) - Pena Reonda

Última ruta del añu montañeru 2013-2013, la cual a pesar de la temporada ivernal tan llarga, fuimos a llibrar lo meyor que pudimos. Sicasi, que teníemos rutes más potentes o abegoses, pa finar, queríemos en realidá acabar con bon tastu entos sentíos, poro conocer les Foces del Pino y ascender a la Pena Reonda yera aseguranos l'esitu.

Asína que, una vegada más esti añu, vamos apaecer pel conceyu d'Ayer, magar de la ruta davezu dende Xixón, pela autovía minera hasta Mieres del Camín. Ellí garramos la A-66, hasta'l desvíu al corredor del Ayer pola As-112 pasando per Morea, L'Escuyu, Los Estrul.lones y Cabanaquinta onde topamos un chigre de milagru onde almorzar y siguimos pela AS-253 pasando por L.levinco, Entepenes, Col.lanzo, Yanos, La Pola Vieya y nel Pino aparcamos los coches na vera la carretera.

Grupu nel guapu pueblu d'El Pino (626 m)

Campionatu de Dificultá en Xixón (2013)

15 de Xunu de 2013 

Bono, y dempués de tar esguilando en La Peñona pela mañana, tuviemos na plaza mayor de Xixón, viendo a los competidores del campionatu de Dificultaá de Xixón. La verdá ye que presta ver a estos pros, el nivelazu que tienen y l'ambiente qu'había na plaza nun podía ser meyor.

Caleciendo músculos los finalistes

Namái llegar, tuviemos viendo como calecíen músculos nel bulder desplomáu de detrás del pedazu de rocódromu que montó top30 pa la ocasión. Ellí, pudimos ver a la totalidá de los participantes, los cuales nun pueden ver la vía hasta unos minutos enantes d'entamar la compe.

Cesar Ciudad, Berta Martín y Helena Alemán

Aparte, de los escaladores del Estáu, taba tamién convidada por Top30 (empresa asturiana de montaxe de rocos) la nomada escaladara estadounidense Sasha Digiulian, la cual sorprendiónos, nun solo por esguilar la vía na final hasta'l top, sinon polo menudina que ye.

Ablucante top pa Sasha Digiulian

Con unes cerveces na man, entamó l'acción y tuviemos tola final, esfrutando de los participantes, los cuales apretaron tolo que pudieron pa facer top na vía, pero tan sólo Ramón Julián y Sasha Digiulian, foron a encadenar la vía.

Ramonet sobráu hacia'l top

Con tol fregáu finiquitáu, enantes d'escapános pa una sidrería a lo nueso, tuviemos la suerte de facenos una semeyina con Ramón Julián y charrar un pocu con él. Esto valióme pa ver que yera un rapaz atentu y mui agradable.

Teresa Troya y Marco Jubes

Pero tamién, como siempre, valióme pa dame cuenta, que nun somos a valorar lo que tenemos n'Asturies y tampoco somos a amosalo a la xente de fuera. Ye increyible que teniendo a dos de los meyores escaladores del mundiu, nun seyamos a retenelos y convidalos a quedase esguilando n'Asturies.

Paezme ablucante, que les entidaes asturianes nun se rasquen el bolsiellu, pa facer promoción de llugares tan espectaculares pa la escalada como Quirós y Teberga. Tanto'l gobiernu d'Asturies, como los Valles del Oso, tendríen que mirar meyor que faen p'atraer a la xente a Asturies.

Camudando'l Camín con Ramón Julián

Una forma guapa y deportiva, sería tener a estos profesionales de la escalada, faciendo víes n'Asturies, amosando'l potencial que tenemos y atrayendo a más escaladores a les nueses escueles. Con ello, la publicidá espoxiga por si mesma y les posibilidaes de sobreviviencia d'estos valles sedría mayor.

Nun me paez tan difícil, facer les coses mediu bien, ya que cuando en Catalunya, nun se soporta'l calor, bien podríen tar munchos de los escaladores que trepen peles parés d'esi país, esguilando nel nuesu con temperatures muncho más aselaes.

Paredes (Valdés) - Foces del Esva - Picu Espina

9 de Xunu de 2013

Track: Paredes (Valdés) - Foces del Esva - Picu Espina

La temporada montañera 2012-2113 tendrémosla n'alcordanza pol iviernu interminable de ñeve y pol mal tiempu en xeneral. Sicasi, siempre somos a salir bien paraos en cuanto a rutes y salides montañeres y un bon exemplu ye la que mos ocupa.

De les rutes qu'inda quédenmos por facer, nun teníemos posibilidaes reales de sacar alantre nenguna, poro tenia yo na enorme "carpeta de pendientes" conocer les Foces del Esva y un cercanu post del collaciu Cienfuegos, foi l'emburrión final a dir a por elles.

Nós, saldremos de Paredes en Valdés, y p'aportar hasta esti guapu valle, tenemos que garrar autovía'l cantábricu en direición Galiza, hasta'l desvíu de Caneiru y Querúas, garrando la N-634 que fadrános pasar por Ranón, La Cavada y Trevías onde paramos a almorzar y mercar pan.

Salimos de Paredes (113 ms)

Puertu Cienfuegos (Ibias) - Picu Miravalles

26 de Mayu de 2013

Track: Puertu Cienfuegos (Ibias) - Picu Miravalles

Tamos nel fín del mundiu.... astur... entiéndase, jeje. Venimos de monte hasta Ibias, a conocer un pelín meyor tola xeografía asturiana. Pa ello, tenemos intención de xubir ún de los cumales más míticos del cordal cantábricu y nesti casu de la fastera d'Os Ancares... el Miravalles.

P'aportar equí, tócanos facer una tirada en coche llarga, llarga, saliendo de Xixón a les 6 y media la mañana, pa garrar l'autovía de Grau, dempués de bordiar Uviéu, hasta'l so final. Ellí, como siempre, garramos la As-15 hasta Cangas del Narcea, pa pocu dempués parar en Pinl.lés a almorzar como lo ficiéramos na ruta na que visitamos Seroiro.

Siguiremos camín pela As-15, siguiendo'l ríu Narcea, pol conceyu de Cangas, hasta topanos col túnel d'El Rañadoiru, pa salir por L.larón y baxar al conceyu de Degaña, conociendo'l guapu pueblu de Fonduveigas al llau del ríu Ibias agora.

Meyor blogue de montaña Landher Montaña y Millet

Esta ye una entrada d'eses que perderáse pa siempre nel furacu'l tiempu, jeje. Pero namás ye pa contaros que l'enllaz que veis a la mandrecha'l blogue ye porque toi participando nun concursu de blogues de montaña.

Si vos presta'l mio blogue podéis votame, poniendo'l vuesu nome y apellíos, la direición d'email y Camudando'l Camín o http://camudandolcamin.blogspot.com.es/ nel votu pa ello, tenéis que facelu... EQUI

Tenéis ehí, les normes y participáis nun sorteu pa una chaqueta téunica MILLET de 210 pavetes, jeje.

Animáivos y votar tolos blogues que vos presten

Un abrazu