Vil.lamayor (Teberga) - Braña'l Val.le - Peña Cruzada

1 de Mayu de 2021

Track: Vil.lamayor (Teberga) - Braña'l Val.le - Peña Cruzada

Finde de tiempu inestable y perfrío, nel qu'aprovechando que Charly llibra de currar el sábadu, proponemos una ruta na qu'a la fín, axúntense xente del grupu monte. Tenemos la mañana, pa facer dalgo, ya que llueu albídrase una tarde lluviosa, poro aprovechando que toi per Teberga intentando esguilar preparo l'ascensión al techu de Tameza: Peña Cruzada.

Entamamos saliendo de Vil.lamayor (857 m)

Nesti casu vamos salir dende Vil.lamayor, un pueblín bien guapu al qu'apórtase saliendo dende Entragu en direición Taxa. Magar del almuerzu, xubiremos hasta Vil.lamayor, onde alcontrámonos tol grupu, preparándonos pa caleyar baxo los paragües.

Belerda (Casu) - Monasteriu - Campiza - La Roza - Canalina - La Cabritera - Vallines

25 d'Abril de 2021

Track: Belerda (Casu) - Monasteriu - Campiza - La Roza - Canalina - La Cabritera - Vallines

Ruta que sacamos del bolsiellu de les pendientes, ya que tenía bien de ganes de conocer esta fastera del monte de Reres, dende cuantayá. Quiciábes, dende que tuviéremos faciendo una guapa ivernal al Visu La Grande ya viéramos a la baxada esos paredones de la xerra de Brañapiñueli, quedándonos pelin ablucaos polo vertical del xerrón pela so fastera norte.

D'esti xeitu, arrimámonos hasta Casu, parando como non, nel balcón de Redes en Rusecu a echar un cafetín, pa continuar hasta'l pueblu de Belerda, onde preparámonos pa entamar a patiar. Tamos cola mosca tres la oreya, por mor de les previsiones tormentoses pa la tarde y pola llargura la ruta.

Partimos de Belerda (655 m)

Salimos pueblu alantre, pa bien ceo, garrar una pista formigonada que nuna envuelta nos fai salir penriba'l pueblu, pa siempre nun pindiu ascensu, pasar peles cabañes del Pozobal primeru y La Corona dempués, hasta aportar a la Gobia, onde aparte de tener les primeres vistes del Cantu L'Osu y la pista que xube a Brañagallones, tenemos el nuesu desvíu hacia'l valle'l Monasteriu.

Piedranidia (Nava)

14 d'Abril de 2021

Nuna selmana de nun parar de trepar, magar de pasar por seutores como la Manzanea, la Puente o el Laboratoriu, pa probar delles víes reequipaes o proyeutar, de les que podremos falar en breve, espero,  tuve la suerte d'acompañar a Richie Patterson pa revisar y sacar semeyes na escuela naveta de Piedranidia.

Perguapa vía Estevia (7a)

 

Ya lloviera dende la última vegada qu'averárame per ellí a esguilar, asína que prestóme echar una güeyadina al seutor, que vese bien conserváu y por suerte nun mui tomáu pola broza. Díbemos acompañaos de Castro, ún de los responsables de caltenimientu de la escuela y equipador de dalguna de les víes.

Un placer apretar un puquiñín en Piedranidia

 

Por suerte, díbemos a sacar semeyes y sabiendo esto Castro, recomendó metese en Estevia un 7a de resistencia mui guapu, nel que pringamos a vista na parte alta, pero que pudimos encadenar al segundu esfrutándola munchísimu, lo qu'anímame a tornar per Piedranidia esta temporada de xuru.

Piedranidia
Croquis modificaos por mi de la escuela d'escalada de Piedranidia, por mor del grupu d'equipadores de la escuela: Piedranidia. Gracies y col so permisu.
 

-------------------------------------------------------------------------

Val.le (Somiedu)

29 y 31 Marzu de 2021

Como ya comentara na entrada montuna de los puertos de Cuevameliz tuviéramos 3 díes pel Val.le, esfrutando d'unos díes d'escalada tranquilos y de tola guapura somedana. Nun tien preciu, espertar nel aparcaderu y acolumbrar munches de les cotes del Val.le ñevaes y con una meteo mediánamente agradable.

Cómodu pié de vía con vistes a los picos ñevaos del Val.le

El día qu'aportamos al Val.le, fuimos diréctamente a la Pena Blanca a trepar un ratín, aportando al seutor con solín, pero bien ceo, púnxose friu y tuviemos de tirar de térmica pa esguilar, cosa que nun suelo facer enxamás.

Un par de semeyes apretando en El OSo (6c+)

 

Esi día, entráremos dempués de calecer nun V a ún de les víes que faltaben por facer nel seutor, como yera El Oso, un 6c+ de pasu plaqueru, que por mor de lo guarro que taba, nun pudo salir a vista. Llueu de llimpialu y sacar la secuencia encadenelu al segundu pegue, non sin apretar durín.

Vidiu del pasu duru y finu de Pote con F1

 

Al día siguiente alboreciera, con un vientu fríu, que diba ponenos difícil esguilar a gustu. Viendo que'l día anterior ya ficiéramos dellos metrinos Andrea, Anna y yo, fuímonos a caleyar dexando l'últimu día al solín, otros tantos pegues enantes de despedir la estancia somedana con una merienda-cena pandémica.

Plaqueando fino en Pote con F1 (7a+)

 

Esi día, demientres Andrea, continuó faciendo metros y ventilando les víes más cencielles del seutor, Anna y yo probamos Pote con F1, un 7a+ pelín soft, que caún encadenó al so estilu, faciendo'l bloque en mi casu por monodeos ñaperos pela mandrecha y Anna, con un bloqueu brutal y manu-pié pela manzorga.

Guapa escuela la del Val.le na Pena Blanca

En resume, estos tres díes dexónos bon tastu montañeru y esguilador, como meyor tastu dexónos la cena precumpleañera mía en Casa Cobrana, onde namái que podemos da-yos les gracies pol tratu, tanto nos almuerzos, como na cena y la sidra post-actividá.

 

Pa que llueu digan, que los furgoneteros, nun dexamos perres...

Val.le
Croquis modificaos por mi de la escuela d'escalada del Val.le, por mor de Piratas Free y Camping L.lagos de Somiedu. Gracies y col so permisu.

------------------------------------------------------------------------------

Val.le (Somiedu) - Sousas - Faspachón - Cuevameliz - El Puntío

30 de Marzu de 2021

Track: Val.le (Somiedu) - Sousas - Faspaxún - Cuevameliz - El Gabitón

Dempués d'un día de tresvase furgoneteru dende la costa Occidental, onde tuviéramos trepando en Penouta y Panondres, aportamos a Somiedu y más en concretu al Val.le, llugar de partida de munchísimes rutes y tamién de dalgún día d'esguilar na Pena Blanca y na redolada.

D'esti xeitu alborecemos per Somiedu

El día anterior, tuviéramos trepando un pocu, poniéndose'l día pelín gafu a última hora, dexándonos claro qu'al día siguiente nun diba tar mui allá. Dicho y fecho, llevantámonos y un día murniu danos los bonos díes, asína que decidimos dar un pateín coles perretes, pa que faigan un pelín más de manada, ya que Xena nun tenía mui a bien a Rico jeje.

Almorzamos y saldremos del Val.le (1264 m)

Penouta (Bual)

 28 de Marzu de 2021

Espertamos nesti primer finde de vacas pel Occidente, nel mió pueblín, Ortigueira y como non, dar un paseín al sol pela sablera d'Arnelles coles perrones ye una de les coses más prestoses pa una mañana. Si ayeri anduviéramos trepando sele en Panondres, esti día díbemos camudar la cuerda pela colchoneta.

Espertamos pela mar dando un paseín per Ortigueira

Nun m'alcuerdo ya, el tiempu que pasó dende la última vegada que tuviera blocando, pero bono, dacuando presta vovler a probar y aprovechando que tábemos pela zona, decidimos averanos hasta Bual y más en concretu hasta l'Alto de Penouta.

Garramos la colchoneta col envís de xugar un pocu

Con esti plan, garramos la furgo dalgo más de media horina dende Navia y aportamos a Bual con un día brutal de solín, tándose de luxu con una brisina fresca de la mar. Nel Alto de Penouta, aprovechamos pa conocer un pocu'l llugar dando un paséu primeru pel area recreativa y viendo los túmulos p'averanos dempués hasta'l parque eólicu onde alcuéntrense los bloques de granitu.

Llugar tranquilu pa esparcer y blocar con vistes a la mar y al monte occidental

Como ye normal, nun ye una zona mui frecuentada, asina que sin más llimpiamos un pocu lo que vemos factible y vamos xugando y xubiendo peles peñes como vamos viendo. Nun hai que dicir que nun forciamos nin lo más mínimu, asina que ficimos dalgún bloquín de los croquis y tamién probamos dalgun bloque más baxo con entraes sentaes por puru divertimientu.

Xugando un puquiñín nos bloques de granitu

Namái que tuviemos nos bloques 1 y 2 más averaos a la carretera y na so redolada, pa más tarde facer una visitina caleyando hasta'l Penedo Aballón, onde alcuéntrense dellos bloques más. La verdá ye que pasamos una tarde bien prestosa, gastando un pelín les yemes nel granitu, cosa a la que nun toi avezáu a tastiar.

Camudando'l Camín nel Penedo d'Aballón

Penouta
 
Croquis modificaos por mi de la escuela d'escalada de Penouta. Gracies y col so permisu.

Panondres (Navia)

27 de Marzu de 2021

Tornábemos, un tiempu pandémicu dempués, hasta l'occidente col envís de pasar unos díes tranquilos y trepar per ellí. La idega yera tornar per Panondres a esguilar si'l tiempu lo permitía y si'l parque eólicu que tan montando nun se llevaba per delantre la escuelina naviega. Por suerte, el paré sigue en pie, pero mete mieu l'estrozu mediuambiental.

Magar d'alloriar un pelín col desfarrape y la nueva visión del paisaxe costeru dende Panondres, ponémonos en marcha y xubimos hasta'l paré, metiéndonos en dos víes curties a la mandrecha, contando con que fai casi dos años, entamáremos pela mandrecha.

La escuelina naviega de Panondres a puntu'l desaniciu

Les víes nun salen nos croquis, pero sedrán como 6b/+ y 6a+/b, mui apretones nes dos chapes esistentes y con un trekking innecesariu a cadena, nel que si falles vas al suelu diréctamente. Nun sé quien equipó esta puta mierda, pero que sepa que ye mui peligrosu, nun costaba na meter una tercer chapa a compartir pente les dos víes y evitar una posible caída. 

Escaecemos esti trance y vamos a la primer vía que si apaez nos croquis un 6b llarguín y mui buenu, nomáu Proyecto 1. Prestó volver a garrar eses increyibles preses na parte alta del paré, siendo como siempre los pasos durinos na parte baxa y un esfrute total no cimero'l paré.

La divertida cuarcita de Panondres y les dueñes del pié de vía

Magar de garrar ritmu, pasámonos a la mandrecha por ver onde había víes pelín más dures, pero diónos por continuar onde lo dexara l'anterior vegada, faciendo otres 4 víes pente'l V+ y 6b/+, dende Escolingáu a Manzanawi.

Como siempre qu'entames unes vacaciones, tocaba dir a tomar dalgo antes del cierre de chigres, asina que dexamos otru tramín de paré pa una prósima visitina. Sicasí, un añín y mediu ensin tornar per Panondres y pocu más y desapaez por mor del desaniciu de los nuesos montes nel occidente.

Nueves vistes dende Panondres

Panondres
 
Croquis modificaos por mi de la escuela d'escalada de Panondres. Gracies y col so permisu.

------------------------------------------------------------------------------

Val.le (Somiedu) - Mostachéu - Las Cruces - Tarambicu - L.lamera

21 de Marzu de 2021

Track: Val.le (Somiedu) - Mostachéu - Las Cruces - Tarambicu - L.lamera

Hai díes, nos qu'alboreces y ya sabes que va salir redonda la ruta. El día ta fríu en Xixón y la nuesa idega ye tirar a Somiedu, onde tará más friu tovía,. Según garres la furgoneta, ya atopes esi cielu azul de xelada mañanera y de día soleyeru pel monte, vas entrando en calorín según vas conduciendo y el picor d'una gran xornada de monte afáyate y alcuéntreste esfrutando de cada curva de la carretera.

Recoyes compañeros, tomes un cafetín en Balmonte y continues hasta'l Val.le, onde axúnteste col restu'l grupu, faciendo un segundu cafetín nel pueblu enantes d'entamar a caleyar. Preparámonos y salimos caleyando peles cais del Val.le, hasta'l barriu de L'Auteiru, onde garramos un camín ganaderu y vamos a por una evidente rampla penriba les cases del barriu.

Partimos como tantes vegaes del pueblu somedán del Val.le (1244 m)

La nuesa idega ye conocer l'accesu a la boca Mostachéu y llueu sobre la marcha percorrer tol cordal del Tarambicu que ya conociéramos dellos años atrás. Ye lo guapu d'Asturies, del mió país, un día tas nel oriente esfrutando de la llocura cabriega en Peñamellera y otru plánteste nel Occidente pa esfrutar del paisaxe somedanu.

Trescares (Valle Altu de Peñamellera) - Rubó - Carraspión - Collantes - Oceño (Valle Altu de Peñamellera)

7 de Marzu de 2021

Track: Trescares (Valle Altu) - Rubó - Carraspión - Collantes - Oceño (Valle Altu)

Finde pel oriente, na bas de los Picos d'Europa, nel que magar d'escalar per Oceño de sábadu, vamos tener tamién esti pueblín del Valle Altu de Peñamellera, como fin de la nuesa travesía. El entamu sedrá dende Trescares, poro madrugaremos un pelín los furgoneteros pa xubir a Oceño una furgo y descender a Arenas a almorzar col restu del grupu monte.

Llevamos tiempu con ganes de tornar a conocer un pocu más esta fastera de Picos, ya que la última vegada bregáramos como nunca pela foz de Mildon y cuantayá que tuviera con Fernan pela Cabeza Viguera, quedándonos xustu enmediu por conocer la canal de Rubó.

Partimos de la ponte la Vidre en Trescares (80 m)

Oceño (Valle Altu de Peñamellera)

6 Marzu de 2021

Tornamos de nuevu per Cabrales, nun finde escalador-montañeru dalgo gafo no meteorolóxicu, pero qu'a la fín, permitiónos facer les actividaes que teníemos en mente. De sábadu, averámonos hasta Oceño, una vegada más, col envís de probar los sétimos de la escuelina ya que los sestos ya los ventiláremos nos dos visites anteriores.

Calecemos manos, Anna y yo, en Roba la Fuente, ya que ta'l día fresquín, demientres llega'l restu la tropa y de secute métome a montar unu de los 7as, faciendo les primeres cintes bien, hasta un chapaxe duro que resuelvo y cuando quiero moveme pa salir del pasu, se fai de nueche dafechu jaja.

Ani apretando duro en su primer día nel seutor

Cuelgo, miro y remiro y allorio col pasu, nun veo casi preses y me digo qu'esto nun paez 7a. Revisamos croquis y me diz Rubén que ye 7c jajaja. Buena guah.e. Toca acerar y salir a reunión como pueu y de la que baxo monto lo que si yera un 7a xustu a la so manzorga.

Pente'l grupete que somos, casi petamos ya'l seutor de perros y xente, tando prestosu ver progresar a caún nes sos víes. Ye día de plumes y guantes mientres nun escales, pero aguántase bien y l'ambiente ye bien divertíu.

Orlando y Natalie nos sestos d'Oceño

Demientres, prueben el 7a que dexé montáu Rubén y Xavi, Anna anímase a montar l'otru 7a, aportando perbien al bloque de techín, que nun ye a resolver nel so primer pegue. Darréu, tiro yo y pringo na placa del mediu, asina que miro'l bloque d'arriba, termino de montala y dexámosla pa un segundu pegue.

 

Los encadenes nun tan baratinos precísamente y la roca pel momentu, tien de sanear y nos sestos llevamos dalgún sustín con dalguna peña que ruempe. Aún así, hai motivación y los pegues son bien divertíos, viendo dalguna bramada de les buenes con volátiles incluyíos.

Xavi apretando nes plaques d'Oceño

Los segundos pegues van siendo más definitivos y sí que los encadenes van xurdiendo, tanto Xavi como Rubén en Coyugu, como Orlando y yo en Sobrelacueva. Anna, tamién-y mete un pegón encadenando hasta'l bloque y dexándolo matizáu pa otra visita.

Habrá que tornar y siguir probando cosines...

Oceño
 
Croquis de la escuela d'escalada de la Oceño, por mor de la Revista INUA. Gracies y col so permisu.

-----------------------------------------------------------------------------------------------------------------