Covarriella (Morcín)

20 de Mayu de 2025

Los últimos meses continuamos yendo pel Aviru Campón en delles ocasiones, más que na por acompañar a dellos collacios, ya que dempués de los encadenes d'Escampla la Borrina y Pie de Kíla, sentía que Camudando'l Cadril, quedábame pergrande, sicasí, l'últimu día que la probé, sí que pude realizar tolos movimientos con cierta fluidez, anque fuera por separáu.

 

Orlando nos pegues de proyeutu en Pie de Kíla (7b/+)

Tengo claro, que ye perdifícil cotar una vía tan concentrada na so dureza, pero llueu de facer otres víes del seutor y d'otros seutores tamién a bloque, tengo claro qu'esta vía, rondará'l 7c+ y tamién tengo tan claro, que ye una vía mui fanática y quiciás favoratible a xente más baxa, sobromanera colos miós métodos pa moveme de pasu en pasu.

 

Sandra esfrutando de la SN 2 del Aviru Campón

Polo demás, tuve munchos díes acompañando a Orlando nel so procesu hasta encadenar Pie de Kíla, que terminó siendo un bon proyeutu y prestándo-y pola vida esta ruta en honor al mió amorín perruno. Tamién, Santos, tuviera volviendo a dar pegues sueltos dacuando a Pie de Kíla, pero entá nun acaba de garrar puxu pa cola escalada, tema qu'espereremos solucionar motivándolo con víes nueves a prebar.

 

Santos volviendo a Pie de Kíla

Otros díes, tuvimos esguilando con Anna que pudo encadenar la SN 2 del Campón, dexándola a su gustu de 7a, llueu de pegues en díes sueltos, anque hai xente que casi la considera 7a+, pero bono, pa eso tan los graos, pa que la xente ufrezca la so opinión dende'l respetu, como non y sobretou considerando y valorando'l trabayu de los equipadores.

 

Camudando'l Cadril pinta a proyeutu llargu

Tamién Sandra tuvo la so oportunidá nel puente de Mayu, de tornar pel Aviru Campón, faciendo al flash la SN 3 (6c+) que ta convirtiéndose nuna auténtica clásica del seutor ya que tien un percorríu dafechu preciosu d'escalar, teniendo darréu una nueva entrada equipada por Poch, que tuve la suerte d'enchufar al segundu pegue, paeciéndome 7a, con dellos pasinos guapos regleteros.

 

Anna tachando la SN 2 (7a/+)

Dicho esto, dexamos esti seutor pa díes sueltos, nos que dar pegues al proyeutu, dexando pa Setiembre la equipación de dalguna vía dura más y tamién delles víes facilines a la derecha, pa tener un espaciu pa calecer deos, amestándose a una nueva vía equipada por Poch, que paeciónos V+

----------------------------------------------------------------------------------

Salentinos (Ribas de Sil) - Cordales de Xistréu y la Robeza

18 de Mayu de 2025

Track: Salentinos (Ribas de Sil) - Cordales de Xistréu y la Robeza

Tornábemos al monte col grupu, llueu d'un parón de vacas de selmana santa y faciémoslo yéndonos hasta la comarca de Ribas del Sil nel Altu Bierzu, onde ya tuviéramos va dellos años, ascendiendo al Miru y al monte más altu de Degaña, el Veigardón, nuna ruta que dexáranos con un tastu bien dulce, por mor de les vistes y la guapura del percorríu.

Pesie a lo lloñe de la fastera pa nós, dos horines de coche dende'l centru d'Asturies, vamos dir peranimaos, los tres participantes de la ruta, Montse, Rubén y yo. Asina que quedamos en Mieres y arrancamos hacia, Vil.lablino, parando enantes en Güergas de Babia a almorzar.

Partimos de Salentinos (1180 m)

Llueu del almuerzu y estacazu raru nel Moriscal, continuamos viaxe hacia L.laciana primeru y Ribas del Sil dempués, pasando per Palacios, onde vemos unos cuantos satélites pela carretera ya que tan de fiestes y siguimos hacia Páramu, pa continuar pela guapa carretera hasta'l valle de Salentinos, alloriando un pelín colo guapo del llugar.

Preparamos tolos trastos y pasaes les 9 y media, somos a salir caleyando pel pueblu, enterándonos qu'esiste un albergue de montañeros, camentando lo desconocío d'estes tierres pa nós. Saldremos del pueblu y ya tendremos cartelos informativos de l'ascensión al Catoute, ún de los cumales, que tenemos na tiesta conocer.

Castroviejo (Pinares) - Peñas Claras - Fuentes del Duero

30 de Marzu de 2025

Track: Castroviejo (Pinares) - Peñas Claras - Fuentes del Duero

Continuamos esfrutando d'esta selmana santa deportiva, saliendo por segundu dia consecutivu a patear peles tierres sorianes, yéndonos tola familia hasta la comarca de Pinares, onde'l día anterior conociéramos la sierra del Umbriazo y nesta ocasión vamos volver hacia la sierra d'Urbión, col envís de conocer l'ascensión dende la fastera de Castroviejo.

Dende esti guapu llugar na faldera la sierra l'Urbión ya saliéramos va dellos años a ascender al Muñalba y Tres Provincias , tando d'aquella, ensin pervertir tolos bloques de granito de Castroviejo, teniendo nel intre, una infraestructura xabaz pa que tola dominguerada xúbase a los bloques a una especie de mirador hacia nun se onde, supongo que dando vistes a tolos pinares.

Partimos hacia la parte alta dende les inmediaciones de Castroviejo (1542 m)

 Escapamos de la xente y salimos primero per carretera y llueu pista, hacia'l refuxu del Berro, viendo como la mayoría la xente xube y baxa en coche pela pista, siguiendo nós a lo nuesu, hacia'l siguiente refuxu más alto entá, como ye'l del Bunker, onde ya sí termínase la pista, cruciándonos con dellos senderistes. Nesti puntu, penriba'l Bunker, decidimos ascender pel senderu de Peñas Claras, teniendo qu'andar fino, pa siguir los h.itos y la traza de senderu, ya que tol mundiu xube direutos hacia l'Urbión y Fuentes del Duero.

Muriel de la Fuente (Pinares) - La Fuentona - La Peñota - Umbriazo

 29 de Marzu de 2025

Track: Muriel de la Fuente (Pinares) - La Fuentona - La Peñota - Umbriazo

Dempués de la selmana santa per Olba, escalando y saliendo cola bici, apetecía tamién, andar un pocu pel monte, asina que dempués del miércoles de viaxe hasta Soria, preparamos pa dar una vueltina colos collacios, yéndonos hasta Muriel de la Fuente, na contorna natural de la Fuentona. onde alcontraremos dellos senderos bien balizaos pa pequeños pateos, col envís de conocer la cascada d'Espeñalayegua y la propia Fuentona.

Partimos de Muriel de la Fuente (1010 m)

Aportamos a Muriel alcontrándonos l'aparcaderu casi enllenu y ye que la selmana santa, ye un pocu infiernu pa visitar cualesquier cosa, ya que tolos rebaños de xente salen a lo llocu. Pagamos l'aportación pal caltenimientu del monumentu natural y salimos pente la xente a bon ritmu, esfrutando del paseín a la vera del rigu Abión, hasta'l desvíu hacia'l Chorro d'Espeñalayegua, al qu'aportamos pente les cares de frustración de los visitantes, qu'alcuéntrelu dafechu seco.