Trail de Salas (Salas)

20 de Payares de 2022

Track: Trail de Salas

Web del Trail: Salas - Virxen del Visu
 
Clasificaciones: Clasificaciones 2022 

Continuamos cola motivación por correr pel monte, entrando ya, na dómina l'añu más ivernal, onde apaecen pel calendariu carreres más curties, más afayaices pal tiempu fríu o lluviosu y onde tar munches hores corriendo nun ye lo más apetecible.

D'esti xeitu, apuntábame per primer vegada al Trail de Salas, que percorre tola falder del monte Visu, onde asítiase una ermita cola virxen. La carrera de 13 km, parte d'esti guapu pueblu, que nun tenía la suerte de conocer, lo qu'indícame a les clares, que debemos afondar más nel monte suroccidental y poner en valor esta fastera asturiana.

Carrera a fueu dende l'entamu en Salas

Gran ambiente pel pueblu, dende bien ceo, con xente recoyendo'l dorsal, caleciendo músculos o tomando un cafetín tranquilu como solemos facer nós. Llueu, preparámonos y aportamos a la meta saludando a munchos conocíos, cola idega de facer la mió carrera, esperando que'l día anterior de monte pel cordal de L.longalendo nun se notara muncho.

Nun fue así y salimos a bon ritmu tola parte correndera hasta'l tabayón de Nonaya, pa entamar una xubida, tamién, a tramos correndera y otros más pindia hasta la Peñallonga, onde llaniaremos un pelín y tendremos per delantre la baxada más rápida que tengo alcordanza, na que doi tolo que tengo, con varies patinaes pel barru incluyíes.

Xubida y baxada pindia enforma al Visu

 

Al ser pocos kilómetros, nun m'esmolezo muncho por apretar a fueu na baxada, aportando de nuevu casi a Salas, onde magar d'un entamu más sele, tendríemos per delantre una xubida a pinchu per una trialera, que diba poniendo a la xente a preba, viendo camudar les cares de sufrimientu de tolos corredores, hasta aportar a la ermita, onde a la fín, cambiábemos el chip, pa garrar una baxada a fueu hasta Salas.

En poco menos d'una hora y media, tábemos na meta, llueu d'una carrerina pela senda pegada al ríu Nonaya, con un tastu dulce ya que pude dar tolo que tenía dientru, faciendo de xuru unos tiempos per kilómetru, a los que nun toi mui avezáu a facer y sobretou esfrutando de la carrera y como non de la post carrera, con unes cervecines de vermú soleyeru.

Camudando'l Camín per Salas