Olba (Teruel)

Del 5 al 16 d'Abril 2025

Una vegada más, averámonos hasta Teruel, al Alto Mijares en Olba, a pasar semana y media escalando, andando en bici y sobretou descansando, que la vuelta al curro dempués de la baxa, fuera bastante dura. Como yera d'esperar, el primer finde, aportamos a Olba de sábadu a mediudía, llueu d'un viaxe con tranquilidá dende'l vienres con parada a sobar en Soria.

Esi mesmu dí, xubiéramos hasta'l Más Allá nel Palomarejas, aportando al seutor xusto a la entrada de la solombra, pudiendo llimpiar un sectorín bien guapu, plaqueru anque de furacos pa facese a la escalada, faciendo vies dende V+ a 6b+, perfeutu pa calecer deos, siguiendo hasta'l corner del Más Allá, onde ficiera GYC Seguridad (7a) al segundu pegue, alloriando col pire a cadena.

 

Resume de les vacaciones per Olba (conociendo más los cañones del Mijares y Palomarejas)

Al día siguiente, dempués de liala un pocu por Olba, tuviéramos esguilando en Sombra Perpetua, faciendo un par de 6bs pa controlar el nivel de resaca y dando un pegue final a vista Entretubo (6c+/7a), prestándome muncho, siendo una vía con muncha calidá de movese y escalar fino.

De Llunes, tiraríemos hasta Meteoblue, llimpiando un pocu la so parte esquierda y probando dalguna vía más nel Callejón, siempre sin apretar, nes plaques solombriegues, pal día siguiente de martes, averanos hasta Sombra Perpetua y Paraiso, onde pude facer al segundu pegue Atrapasueños (7a) una vía superdivertida de movimientos y probé un 7a hipersobáu en Sombra Perpetua, con munches ascensiones, pero mal equipada a mi entender, ya que lo más difícil ye chapar la tercera penriba del rampáu, dando bastante mal rollu la escalada.

Peguinos pel Más Allá nel Palomarejas nos primeros díes de tranquilidá de los collacios

Si'l Domingu, llegara Xavi y Nathalie a Olba, el miércoles pela mañana, Rubén y Ani, tamién completaben equipu con Dani, Becky y Silvia y pa cellebralo, xubiéramos hasta Obras Selectas, quiciás el  muru más impresionante d'Olba, teniendo un día potente, faciendo dos 6cs potentes a vista y llevándome la Sombra del Viento, nun pegue al corte, como pocos tuve na mió vida, dándome cuenta, que ya nun había piles y tocaba descansar un pocu.

De Xueves, fuéramos de nuevu hasta'l Más Allá, pa que Ani y Nathalie esfrutaran de víes más afayaices y Silvia y yo, dedicámonos a facer dellos 6b+ mui buenos, llargos, pero que ya nos dexaron claro, que nun teníemos nin fuercies nin yemes, poro al día siguiente, yo preferí salir a pegar una vuelta potente en bici y tan sólo, xubí de tarde a dar un par de pegues en Sol de Invierno a en Tu Sitio (7a), una placa de roxa collorada que me picaba dende'l viaxe anterior.

 

Más díes pel Mijares escalando a la solombra y al solano

Esi Vienres, tiráramos a cenar a Olba, al Mijares, con liada a posteriori nel Chicuto, asina que'l sábadu tan sólo xubí a asegurar a Sandra a Obras Selectas, qu'averóse per Olba tamién y el sábadu ya, tuviéramos per Sol de Invierno, faciendo un par de víes pelín perres pa calecer y ya encadenáramos dempués Nicosaurius Rex (7a), que peacía más fea dende baxo de lo que yera al final, con movimientos prestosos.

Nel intre, aparte de topanos una meteo más gafa, con tormentes de tarde, el parking entamaba a volvese una llocura de xente, poro mi cabeza ya me decía, que debía dir pensando en colar, ya que tenía tan bon tastu de los viaxes anteriores que nun quería garrá-y zuna a una escuela que tanto me gustaba.

 

Como siempre llevámonos pal bolsu munches víes divertides

Por suerte, dempués d'otru día de descansu obligáu pola lluvia, tendríemos la oportunidá al fin, de conocer el Imperio del Sol, que como'l so nome indica, nun ye fácil alcontrar el día pa poder esguilar nes ablucantes rutes. Pela mió parte, fue'l día que más pude esfrutar de la escalada, llevándome a vista, tres 6cs llarguisimos y guapísimos y My Friend Aspi (7a) tamién a vista, anque del día quédome con Camino al Cielo, una llarga y sicolóxica ruta, con placa y diedro, con unos pires brutales, teniendo qu'escalar muncho entre chapa y chapa... un placer pa tolos sentíos.

El miércoles ya, cola furgo preparada pa colar y el parking petáu enforma, xubiéramos nun día fríu al Callejón, quedándome pela mió parte nes víes solariegues de la morra del Callejón, pringando pa calecer un 6b+ bien cabrón, pero pudiendo encadenar a vista El Perro Andaluz (6c) mui guapu y sobretou faciendo al segundu, Illuminati (7a+), un ruta mui divertida con dos bloquinos separaos durante'l percorríu.

Con esto ya, Alón a Olba, hasta la prósima... qu'espero seya un viaxe pelín más tranquilu en tolos sentíos

----------------------------------------------------------------------------------

La Puente (Morcín)

1 d'Abril de 2025

Pues casi 5 añinos dempués, pasamos de nuevu pela Puente, una escuela pervisitada pelos escaladores asturianos y foriatos, pero pesie a quedame una vía por facer nel seutor principal de Placas y dalgún llarguín terceru o cuartu nel espolón esquierdu, nun me dió por volver, aparte de dalgún paséu pa ver el seutor de la Bóveda qu'equipóse nos últimos años.

Nun teníemos munches idegues Ana y yo pa escalar, así que diónos por volver, pero dime cuenta, que pa Kíla ya nun ye un accesu afayaizu, ya que'l pasu d'escaladores y lluvies ficieron l'escalón de la cuerda afitada per alto y toca porteala muncho, ya que la vieyera ya nun-y da pa estes xeres, asina que queda pa los díes que nun la lleve.

 

Vista del placón previu al techu en la Puente Esquierda

Aportamos con una sudada brutal de portear a Kilina tol camín hasta'l principal onde había xente, como non, escalado y siguimos hacia'l seutor a la manzorga, aposentándonos nel pie de vía y echando una güeyada a los croquis y les víes, decidiéndome a meteme a calecer nun 6b+ nomáu Sin paso atrás.

Allá que métome, xubiendo pela escalerina, asegurando dalgún peldañu y salgo hacia la repisa, tirando d'una cuerda podre y con tola repisa tomadísima per una yedra qu'envuelve tola cuerda afitada, qu'entama a tar tamién nun estáu cuanto menos revisable.

Anna solventando los pasos de Sin paso atrás (6b+)

D'esti xeitu, salgo como puedo pisando'l bardial, la cuerda y tolo que pillo, pa poder entamar a escalar y a partir de que chapo la segunda, entamo relaxame, por nun cayer contra'l burdiu y escayame entero, esfrutando d'una escalada recia pero mui buena, encadenando la vía y dexándosela chapada a Ana penriba'l bardial pa que la pruebe.

Nun tien suerte y nun pasu cabrón, líase y por nun volar hacia'l bardial píllase y ya resuelve dempués, paeciéndo-y dura tamién pa 6b+ pero ensin más desmonta y aldericamos si dir a un 7a con bona pinta o tirar a un 6c+ tamién que llama l'atención dende baxo.

 

Esfrutando d'A Primera Vista (6c+) imprescindible dafechu

A la fín, tiramos a Primera Vista, entrando pola so vía de la esquierda, pero lo mesmu, toca facer una travesía penriba de tola yedra pinchuda, fiándose d'una cuerda nun estáu "revisable" hasta plantase al entamu de la vía y ya sí, que tocó esfrutar d'un llargazu increyible con una calidá y variedá d'escalada guapísima.

Llueu tocó-y a Ana que tamién la enchufó nun pegue munchu más relaxáu y centráu, anque apretando, paeciéndonos un viote 5 estrelles, quedándonos con ganes de probar más, pero l'estáu del seutor, dexa muncho que deseyar y siendo sinceros, nun sé de que manera pudiérase caltener d'otra manera.

Quiciabes, lo meyor ye nestes víes de la esquierda, meter más entraes dende'l pie de vía y dexar la escalerina pa salir a la mandrecha namás, siendo amás les víes más cencielles que de tan sólo escalales, tendríemos la repisa llimpia de broza y al menos les 5 primeres víes se podríen escalar dende'l suelu.

----------------------------------------------------------------------------

Peña Manteca (Morcín)

30 de Marzu de 2025

Demientres tuviera rodando en L'Utiru, faciendo bastantes víes, otru collaciu andaba tirando de taladru, pela fastera inferior de L'Argayu, xustu a la mandrecha'l derrumbe, onde había un pañu roca, con perbona pinta, que pudiera dar delles víes llargues de grau afayaizu nel sétimu, a la manzorga de les últimes víes del Ramilleru.

Sicasí, había pasáu per ellí a veles, pero'l primer día xubiera hasta la parte superior, onde díera-y un peguín por facer dalgo a Ennio Morricone, ensin siquiera motivame a dar un segundu, ya que notábame percansáu de los díes anteriores nel Aviru Campón.

 

Seutor de L'Argayu

Asina qu'a finales de Marzu, si que dióme por averame con xeitu de tasttiar dalguna de les víes que taben terminaes, metiéndome a montar Dinamiza pa los Pollos, nome que-y dió l'equipador al veme facer los distintos pasos, que pa la mió altura, facíame llanzar tanto a la entrada como nun pasu superior de la vía.

A la fín, llueu d'un segundu pegue onde pringué onde nun debía, con una solana terrible, encadené la vía al tercer pegue, esperando a qu'entrase un pocu la solombra, ya que tamos a piques de los últimos díes nestos seutores tan Sur, más afayaizos pal iviernu.

El grau dexámoslu en 7a+ a la espera de más repetidores... que vos preste!!!

------------------------------------------------------------------------------

El Pumar (Cangas de Narcea) - Cazarnosa - Orúa - Liebres - Val.le Pumar

29 de Marzu de 2025

Track: El Pumar (Cangas de Narcea) - Carzanosa - Orúa - Las Llebres - Braniegu

Día de ruta del GM Xuan de la Borrina y como siempre, tuvimos restolando pa conocer un pocu más de la nuesa Asturies, yéndonos hasta Cangas del Narcea, onde teníemos pendiente rutes ya preparaes, Mario y yo, que somos un pelín más namoraos del suroccidente, que'l restu la xente montañero astur.

Pa ello, saldremos direción Cangas del Narcea, parando a almorzar en La Barca, pa siguir hacia la capital desviándonos na ponte L'Infiernu, pa siguir al traviés de Llinares hacia Bisuyu, onde garraremos la "pista de tierra" que tien de llevanos hasta'l Pumar, na parroquia de las Montañas.

Partimos d'El Pumar (593 m) na comarca Las Montañas

Dicir que la pista de 3,5 km ye guapa de caleyar, pero la circular dende Bisuyu, diba facésenos escesívamente llarga, asina qu'aparcaremos onde l'hotel rural d'El Pumar, recibiendo'l saludu de Pastor, un mastín mozu que tuvo pendiente de nós demientres preparámonos pa caleyar.

A la vera'l rigu Pumar, facemos semeya de rigor y entamamos a caleyar rigu arriba, hasta garrar al pocu un desvíu marcáu a la mandrecha. Digo marcáu, porque la xente del hotel rural, tien marcaos tres percorríos circulares pel val.le Pumar, anque dengún dellos llega a lo que nós teníemos na tiesta facer.