3 Febreru de 2024
Como tolos iviernos, la Canal ye un llugar clásicu pa escalar al solín nos díes fríos, pero esti añu, tamos teniendo que medir muncho, cuando xubir sinon queremos cocer, ya que les temperatures esti iviernu tan siendo anormalmente cálides, asína que xubir, xubimos unes cuantes vegaes, pero non tanto como otros años, nes que veíemos L'Aramo ñeváu demientres dábemos pegues.
Pel momentu, centréme en facer el segundu llargu de Barriscal (7b+) que ya probara la temporada anterior, pero como suele pasar con una vía tan a bloque, a los piquiñinos cuéstanos más y tuve que buscar milenta formes de facer el bloque, ya que'l pasu quedábame llargu perdiendo pie drechu, teniendo qu'aguantar una puerta enorme.
Asina que llueu d'alcontrar un feble pie que permitíame meter una rodiella nel techu pa frename y que nel pegue del posible d'encadene rompiérame'l pie, teniendo qu'aguantar la puerta a pelo y fundiéndome pa les siguientes secuencies, tuve que volver a restolar métodu pal pasu y tocó xubir un pie más entá, con una retrobici, pudiendo finalmente, encandenar la vía llueu d'unos pocos pegues más.
Al final, ruta fanática, que llevóme demasiaos pegues y darréu fuimos direutos a prebar Laguna Mental, demientres que Dani y Becky fulminen vía tres vía y Anna, fízose al fin con Promiscuidad Vertical (7b) dando muestres del so estáu de forma y cabeza y ya tien nel puntu de mira El Implacable L1 (7c), que de xuru, va poder no que queda de temporada dir a por ella con toles ganes.
-----------------------------------------------------------------------
22 d'Agostu de 2023
Entamamos la temporada del Callexón mui tarde esti añu, faciendo un primer intentu enantes de mayu pa tastiar el nuevu proyeutu pa esta temporada como ye Callejón Sin Salida L2 (7c+), pero la realidá fue qu'engorilámonos con otres escueles como la Cualladrona, La Carba nun tiempu frescu d'Abril y sobretou con un nuevu seutor, qu'en breve asoleyaremos pal esfrute de tol mundu.
Pente pitos y flautes, hasta finales d'Agostu, coincidiendo col retornu definitivu de Dani a Asturies, nun garramos el vezu de xubir hasta esti seutor nel que tantes hores pasáremos l'añu anterior, faciendo les dos variantes de Tritonita, dos rutes cincu estrelles del seutor y sobretou proyeutando como enxamás ficiera, cola Diagonal Directa, una vía que nun me venía especialmente bien, pol pasu llargu nel que quedaba crucificáu lliteralmente.
Esti añu, tornábemos más fuerte, con munches víes del mió másimu grau nel añu anterior encadenaes (7b+), con un 7c na Canal n'iviernu y con un 8a na Carba, poro tábemos nuna temporada bona, pa tornar a enfrentame al proyeutu que terminara por abandonar por desesperación a finales de setiembre, desmotivándome totalmente y cansáu de facer xubir al collaciu Santos hasta'l seutor pa nun ser a algamala.
Daquella desmontara y hasta que nun me comentó Dani que la tenía montada de nuevu, nun volví a dar unos pegues. Ya nel primer día, al segundu pegue, dexárala con una cayida práuticamente, poro tenía claro, que nun debía esperar más y dir a por ella, ensin mayores miramientos, faciéndola al segundu pegue del segundu día, dexando atrás la veintenta de pegues del añu anterior y lliberando un pocu esi pesu que cargaba dende l'añu anterior.
Lloñe del grau, pa mi estatura 7c camiento, la vía ye tamién un rutón y prestó pola vida encadenala, quedando ya la siguiente visita con Anna y Sandra, pa montar el siguiente proyeutu y ver l'encadene d'Anna a Tritornita Izquierda (7b+) que ya la tuviera trabayando perbien l'añu anterior.
Tamién Sandra, que nes sos visites a Asturies va faciéndose cola roca y estilu astur, llevóse la variante corta de Callejón Sin Salida (6c), hermana pequeña del marrón nel que metíme, xubiendo a montar los pasos más duros y probando sobretou, el bloque plaqueru superior, que da paso al posible encadene de la Diagonal (7b).
D'esti xeitu, quédome un proyeutu menor como ye la Diagonal (7b) y col oxetivu d'esti añu, como ye Callejón Sin Salida, que ver veremos si una seronda seca, déxanos trabayar adecuádamente durantes les tardes que resten d'esguilaes pela escuela d'Otura.
Otura (Seutores visitaos)
Croquis modificaos por mi de la escuela d'escalada d'Otura, por mor del trabayu de Asturvertical na so mayor parte. Gracies y col so permisu.
Iviernu 2022 - 2023
Como tolos iviernos, toca buscar proyeutu, na mió segunda casa, que ye Morcín y ye que nel valle de Riosa, aparte de quédame a 15 minutinos de casa, tengo de too pa esguilar, correr pel monte, buscar nuevos pateos per montes y senderos perdíos.
Y como non, pues tamién la escuela d'Otura, ye un referente pa mín y cláramente onde más tiempu esguilando pasé na mió vida. El casu, ye que tampoco tenía mui claro onde meteme na Canal, seutor d'iviernu por escelencia, pensando más en facer un par de víes de 7b que me quedaben pel desplome y si salíen probar dalgún 7c.
Pero, Santos, compañeru de mil batalles plaqueres nos últimos tiempos, dizme que metióse una reunión intermedia nel Implacable y que saldrá 7c o 7c+, así que nada, de perdíos al ríu, tirámonos en mediu la corriente y a ver que pasa, dando'l primer día un peguín o peguín y mediu, descubriendo dalgunes cosines, pero nun viendo muncho color al pasu clave a priori de la vía.
Fueron munchos los díes que xubimos y dependiendo del día, diben cayendo ún o un par de pegues por mor del desgaste de yemes al ser tan plaquera y los menos tres pegues, hasta que fueron filándose los movimientos, llegando al bloque encadenando, encontrando los chapaxes correutos y tamién como non, intentando alcontrar reposos, entre sección y sección.
A los pegues míos, de Santos y d'Anna, que tamién decidió proyeutar duro con ella, sumáronse, los de Suco, Ruben, Iso ya Iván, sacando caún sus métodos, dando a entender, que ye una vía afayaiza pa toles estatures y tipos d'escalador. Personalmente, costóme decidir como facer el bloque central, paso más duro de la vía, pero qu'una vegada matizáu, nun fue onde realmente me caí nos pegues d'encadene.
Pasaron los pegues y díes, dexando nos últimos dos díes con una caída la vía, teniendo claro que yera un bon 7c y qu'esta vegada nun se me diba escapar, anque lo que nun tenía tan claro, yera onde diba caeme cuando encadenase'l bloque, siendo'l primer día de pegues serios, xustu al salir del bloque, hacia un reposu mui agónicu.
Son d'esos reposos incómodos, nos que solo pienses en salir, ya que vas a otru reposu meyor, pero ye una travesía fina de placas sin pies, onde n'aislláu siempre sal, pero yendo petáu, ye lo suficiéntemente téunicu pa tirate si nun lo faes perfeutamente y eso fue lo que me pasó, nel día anterior al encadene y tamién, nel primer pegue pantera del día d'encadene, onde saliendo de la placa al reposu buenu, piróseme un pié y volátil al cantu.
Un vienres de tarde, tovía ceo pa trepar nun seutor como la Canal dempués del trabayu, pero teniendo collacios que te van a montar la vía, nun se puede fallar y con Dani, Santos y Anna que venía entá más tarde, tuviemos una tarde de tres primeros grandes pegues y d'unos segundos pegues terríblemente malos, pocu centraos, cayéndonse onde nun se debe, pensando más nos pasos más duros que n'esguilar bien tola vía.
Col día terminándos y Anna petadísima, metíme a la solombra a cambiar delles cintes cola idega de volver de sábadu con más tiempu y tranquilidá, pero con ganes de nun marchar col tastu permalo del pegue anterior, asina que plantéme nel bloque con xeitu, algamándolo como nos últimos 4 pegues, saliendo al reposu agónicu, onde tomélo con calma y salí pela plaquina ensin equivocame, aportando al reposu más cómodu por primer vegada nun intentu d'encadene.
Equí ya tocó tirar de serenidá y nun salir hasta que me doliesen les piernes d'aguantar el reposu espatarráu, saliendo al restu de la vía con fuercia, faciendo la increyible y guapa trave final, hasta les últimes tres cintes, onde tocó reposar bien, enantes del pasín final a la reunión que por suerte nun fallé, llevándome'l mió primer 7c col Implacable L1.
Mil gracies a los collacios qu'acompañaron les xubides a la Canal, espero qu'ellos tamién la faigan en breve y que compartamos más rises y pegues a muerte, nesti y notros proyeutos. Mil gracies Anna poles semeyes, aseguramientos, por too..., Pulguina por ser mayestru zen na escalada, Dani polos pegues a muerte en placa horrorosa que nun soportes jeje, Suco, Lau, Mario poles rises y bon rollu... siguiremos avanzando.
7 de Xunetu de 2022
Continuamos con tola motivación pel Callexón, xubiendo pente dos o tres díes al frescor de la so solombra, ya incluso, per primer vegada na mió vida, dexando cintes nel proyeutu de turnu, que nesti casu yera la variante a la manzorga de Tritonita.
Una vegada que teníemos nel tinteru la más mítica del seutor, metímonos el Pulga y yo a probar y llimpiar la so variante a la esquierda, alcontrándonos con un viote, que creyemos que yera meyor incluso que la propia Tritonita.
Dende'l primer pegue enganchónos enforma, xubiendo motivaos, hasta con díes de muncho calor o col paré moyáu, por mor de la selmana y picu de lluvies que tuvimos esti mes. El casu, ye qu'al igual que Tritonita, tenemos una parte desplomada con chorreres que suel tar húmeda o moyada direutamente, dando bastante pereza esti tramu, pa poder esfrutar de la increyible placa superior.
A la vuelta de les lluvies, cola vía nun estáu dafechu llamentable, teniendo que sacar agua de los cazos ya intentando secar les preses embarraes, al segundu pegue volví a cayer en cadena dos movimientos más arriba, desesperándome ya totalmente por mor de la mió inutilidá pa probar tolos pasos bien.
Al día siguiente, volviera ya cola intención d'encadenar o desmontar y dexala pal final del branu y llueu de matizar una tontería perimportante pa entrar a reunión, a la fín, pude encadenala, tornando una vegada más al másimu grau, cosa ya demasiáu davezu nesti añu... a ver si somos a dar un pasín más en breve.
26 de Mayu de 2022
Como siempre, tolos branos garramos un seutor como referente pa la escalada y si ya fae casi un añu, andábaemos desbrozando y xubiendo al Callexón tolo que podíemos, esti añu, entamamos la temporada un pelín antes y en mayu, ya tábemos dándo-y unos peguinos a Tritonita, vía que dexáremos vista pa sentencia la temporada pasada.
Como siempre, por dalgún motivu, tuve un día malu, de retropegues cayendo na parte baxa del desplomín y desmontela y nun torné per ellí en tol añu. Esta temporada, metímos-y un par de pegues en compañía del Pulga y Anna, viéndo-y munchísimu color, pa dexala montada pal día siguiente, nel que metí-y un pegue, faciendo tolo duro, equivocándome y quedando petadísimu cola chapa na cara en plena placa, lo que tornóse nun vuelu de díez metros y nel consiguiente desmontaxe de la vía, ya que nun díba volver a esguilar en tol finde, al tener el Desafíu Somiedu.
Esta selmana, dempués d'un par de díes de lluvia fuerte, xubimos hasta ellí a ver si taba seca, alcontrándola en bones condiciones, entrándo-y con ganes, cola compaña del Pulga que tuvo a bien montámela, faciendo un pegue d'esos enllenu de serenidá o lo que ye lo mesmu, cuando yes tan malu esguilando que ya encadenes les víes porque tas mui penriba de la vía y vas per raíles.
Coles mesmes, dediquéme a asegurar al Pulga que ya ta probando la variante de Tritonita a la manzorga, la que va ser el siguiente oxetivu miu tamién, mientres que Rubén metió-y dos pegazos a Tritonita al igual qu'Iso a la Diagonal, la cual nun me llama demasiáu, pero de xuru que nesta temporada fadré por meteme nella.
----------------------------------------------------------
13 de Xunu y 20 de Payares de 2021
Como siempre, munchos son los díes que vamos un seutor u otru d'Otura en Morcín, anque magar de dir llimpiando víes nos seutores más nomaos como Nuberu, dende'l branu a fin d'añu, tengo que dicir que mis visites céntrense nel Callexón y na Canal.
Durante'l branu tuvimos dando intentos con más o menos motivación a
Tritonita, quiciás de les meyores víes que probé nel so grau 7b y nel so
estilu, placa gris increyiblemente téunica y de resis. Sumando a esto,
un entamu con pasos de chorrera enantes d'entrar al placón calizu gris.
Nestos intentos, demientres esperábemos que metíerase la solombra, llimpiamos un pocu'l seutor de la manzorga del Callexón, faciendo dalgún sestu que faltaba y un 7a (Con el rabo ente las piernas), quedándonos namái qu'un 7b paralelu a esti 7a que tendremos qu'intentar ventilar un día.
Saliéndonos del Callexón y una visita a la Repisa, onde pude probar dalguna vía pero l'accesu fizo que se nos quitasen les ganes de volver, con primer llargu, bregada herbosa y un pie de vía imposible dafechu, ye un seutor al que se-y mete un menéu o difícilmente veremos xente nos sos víes.
Como siempre, cuando va refrescando la meteo, acabamos yendo pa la Canal, centrándonos estos primeros díes en Las Chapas de Ana, vía qu'intenté meté-y un pegue a vista cayendo quiciás nel pasu más finu de la vía, pero pudiendo ver que la ruta tien muncho más, tanto que maticé lo que pensaba que yera'l pasu y la so salida y cayime dos vegaes na parte alta xustu enantes de la reunión.
Asína que la vía, ye mui completina, con una primer parte que casi va pel 6b (Yohannes Gabriel) siempre chapando de llau, con males caídes y llueu la cosa meyora, con varies chapes disfrutones, un blocazu regleteru de placa d'un par de chapes pa salir a un regalín finu, de colocase bien y nun cagala pa dir a reu.
Continuaremos per Otura probando cosines nueves na temporada iverniega de xuru, porque tenemos un equipín d'entrenos nel One Move y de matase en roca bien prestosu, pasándolo podre tanto nos seutores como nel propiu roco.
Y al final, tar a gustu un grupu esguilando, nótase, ensin presiones siempre con ánimos los resultados van aportando, con munchos encadenes caún nel so grau, ya seya Mario, Suco, Anna, Andrea, Blas, Lau... siempre con grandes díes de rises y esguilada.
------------------------------------------------------------------
11 de Mayu de 2021
Cualesquiera que me conoza, sabe que préstame trepar víes nueves, tachar rutes que nun conozo y sólo proyeuto cuando nun me queda otra cosa por facer nesa escuela. Ye dicir, me la suda'l grau dafechu. Toos queremos avanzar y meyorar en tolos deportes que facemos pero'l grau como oxetivu, me da igual, poro, dexo proyeutos que me supondríen xubir grau por completar escueles o esguilar víes que nun tastié.
D'esti xeitu, nesti blogue, aparte d'amosavos esguilaes, rutes de monte, tamién aportamos llistaos con oxetivos futuros y llugares por conocer, lo qu'amuesa un sentir pa con tolo que faigo y ye que nun me presta repetir víes o repetir rutes de monte, siempre tengo la necesidá de conocer y descubrir coses nueves.
El procesu d'encadenar toles víes d'una escuela o un seutor podrá paecer llargu, pero con trepar cola mió xente, cola mió perrina, tranquilu y a poder ser probando dalgo nuevo, fai que'l restu seya migayes. Poro, nun soi de repetir una y otra vegada un seutor nin una vía, lo que llévame a conocer tantes escueles per Asturies y Cordal Cantábricu.
Si fai unos díes, dábemos por fináu, Afuega'l Pitu con Suco, esti martes, díbemos hasta Nuberu onde esperábame Precisión, la última vía del seutor Nuberu-Il Cavaliere, que faltábame por encadenar y taba dafechu atragantándoseme, por mor de nun llevar la precisión necesaria y a cada pegue camudaba un pelín de métodu, onde de primeres creía que nun yera tan dura la vía.
A la fin, cola compaña del Tres Pates pa un Bancu Team y enantes de qu'entamara a llover, pude encadenar Precisión, nun pegue d'esos tranquilu, precisu y hasta que paez que lo faes fácil, anque apretes como un xabalí.
3 de Mayu de 2021
Llunes, magar d'escalar per Teberga n'Entecampos pico a Suco pa dir hasta Afuega'l Pitu n'Otura. Les víes son curties y el pié de vía incómodu, poro nun ye fácil alcontrar xente cola que trepar. Quédenme dos víes por facer, Afuega'l Pitu (7a) y Oráculo, una de les últimes víes equipaes que tamién ye 7a, según ascensionistes en 8a.nu.
En Setiembre anduviera probando Oráculo, ensin saber nin el grau y
nun fuera a facela, un pocu por nun mirar bien los pasos de salida en
placa. Anna, sí se la llevara y mirando 8a.nu vieramos que dalguien la
tenía de 7a y paeciónos bien.
De la que baxa Suco, ponme les cintes d'Afuega'l Pitu y decídome a dar un peguín a vista a ver si tenemos suerte y sinon, pues tocará da-y otra visita. Chapo la primera que ta en Pimiangu más menos, munchu güeyu nestes coses, tamién n'Oráculo, nun dudéis en reunviar abaxo, qu'acabáis n'Otura los dos.
Aseguráu cola primera, nun te pues relaxar, porque tien una entrada apretona pa salir del techu hacia la segunda y tercera, onde ya garres aliendu y prepáraste pa facer maxa, porque ties una secuencia de regletes romes, que nun sé mui bien, que peripecies trombóliques fice pa salir, pudiendo esfrutar del restu la vía, pesie al apretonín siguiente nel techu y un chapaxe en bandexa de camareru al putu límite.
24 d'Abril de 2021
Otru día más d'escalada morciniega pasando'l finde bien a gustu pela Foz y Santolaya. La verdá ye que nun pueu disimular que ye'l llugar onde más esfruto esguilando. El sábadu, diónos por dir hasta la Canal a la gueta de tranquilidá perruna y de xentío pa trepar, alcontrándonos col seutor pa nós sólos, lo cual siempre ye d'agradecer.
Yo llevaba les idegues mui clares, quería facer Güelu Barrenista,
enantes de que llegase'l calor y xubir con un día nubláu fue una bona
idega. Metíme a poner cintes con xeitu, pero nel bloquín intermediu, nun
m'alcordaba mui bien del pasu y tuve que colgar.
El día turnaba dellos momentos de calorón con fresquín cuando entraba una ñube y aprovechando ún d'esos momentos, metíme a dar el segundu pegue al Güelu Barrenista, dando uno d'esos pegues dafechu imprescindibles nel que sabes que nun la vas fallar, asegurando pasu tres pasu.
Col trabayu fechu, dediqueme a asegurar a Anina, a la que convencí de dar otru pegue, mientres Iso ya taba aseguráu por Lau, que xubiera colos neños a pasar el restu la tarde. Como ya dixera, Iso siguió trabayando la vía, quedándo-y claru que ye una vía na que ties que ganá-y la resistencia ya que nun da tregua.
13 de Febreru de 2021
Nun tengo que dicir, que la Canal sigue siendo de los miós llugares favoritos pa trepar, ya seya dientro de Morcín y n'Asturies en xeneral, ya que teniendo la bayura de graos que tién, nun hai víes males en tol murazo que tan guapu vese a vista de páxaru.
Payares 2020
Continuábemos de vacaciones na selmana del puente de Tolosantos y con una meteo mediu inestable, anduvimos muncho yendo y viniendo a esguilar a Morcín, sabiendo que tando federáu podíemos facer actividá deportiva sin problemes.
Así lo ficimos y non poca xente alcontramos, siempre con respetu tol mundiu y ganes de tar al aire llibre, ya fuera xente corriendo, de monte tranquilu o trepando como nós. En total, nuna selmana, fueron tres vegaes les que xubimos hasta la Canal, un seutor que personalmente préstame pola vida, pero l'averamientu llargu y pindio echa a muncha xente p'atrás.
13 d'Agostu de 2020
Siguimos trabayando en dellos díes per Otura, siendo la tónica de los últimos tiempos, facer delles víes del Capitán Garfio con Nus, pa que vaya rodando y ponese a orbayar. Nun digo nin unu, nin dos... sinon tres o cuatru díes que tuviemos que colar dempués d'un par de pegues caún.
Ún de los díes, pude meteme con bien de ganes, al segundu llargu de MG85 (7a+), dempués de montar y qu'encadenase a vista Festival de Cantos nun día nel que la so escalada dió un pasu alantre perimportante.
El mió pegue al 7a+ quedó nun pegue perbono, cayendo enantes de chapar la cabera, poro al día siguiente día, magar d'intentala poniendo cintes y pringando al salir de la cabera chapa, pude encadenala al siguiente con bastante tranquilidá.
La verdá, ye que suel pesar facer estos segundo llargos, pero tengo que dicir que ye más afayaizu metese nesti segundu que nel d'Il Cavalieri, ya que como toos sabemos el primer llargu d'Il Cavalieri hai qu'esguilalu curiosu (6c+) y el primeru de MG85 (6b+), conociendo'l pasu ye muncho más seliquín.
Sicasí, ambes son dafechu encomendables y hai que faceles midiendo la llargura les cuerdes, ya que con cuerda de 80 Il Cavalieri L2 faise bien (siempre ñudu), pero pa MG85 L2, val más reenviar na reunión intermedia si nun queremos facer malabares col asegurador penriba la canal y l'escalador teniendo que destrepar la primer chapa.
------------------------------------------------------------------
Mayu 2020Pues sí, a la fin, nos dexaben tornar al monte pali, pali y les ganes yeren munches, magar de dos meses de confinamientu forzosu, nel que caltuvimos la motivación a bas d'entrenos caseros. Pero seamos serios, nin multiregleta, nin barra dominaes, nin hosties... lo que queremos ye tar nel monte.
Asina, que cuando pudimos al fin salir a esguilar, buscamos seutores onde caltener la distancia, poro, lo meyor yera pegar pateos curiosinos como hasta'l Callexón d'Otura, onde pocu tenía trepáu y pudimos esfrutar de víes llargues de 6a+, 6c y un 7a (Iván el Terrible) nel planchón de la manzorga'l callexón
La mayor parte los díes, averámonos per Otura, el Tres Pates pa un Bancu Team, onde como siempre, les rises, dalgún enfurruñamientu y los encadenes fueron la tónica davezu del día a día. Pela mió parte, ya punxe'l güeyu nes víes de la mandrecha'l callexón, picándome enforma prebar Tritonita y Callejón sin Salida... habrá que ponese a ello.
D'otra miente, pa volver a esguilar curioso lo meyor ye facer el másimu de metros en paré y como non, les víes d'Il Cavaliere, son de lo meyor pa volver al lío. Repeticiones a festival de Cantos yeren un clásicu, así como metese nel segundu llargu d'Il Cavaliere, un 7a que pude esfrutar enforma nel encadene, sacando tamién Anna el primer llargu nun pegue maraviyosu.
Pela so parte, Andrea tuvo su encadene reseñable con Heavy Metal, faciéndolo al segundu pegue, yendo con total soltura nesta y otres víes del callejón de 6a+, teniendo darréu que dir xubiendo la cota de graos y saliendo d'esi nivel de confort, ya que ta pa muncho más... prósima parada p'Andrea... Il Cavaliere.
Siguiremos avanzando na nuesa escalada nos próximos meses, pero sobretou siguiremos esfrutando de tar nel monte, d'animanos, de charrar cola xente que coincidimos y a la fín de facer esti deporte xuntos que tanto nos da nel día a día de la nuesa vida.
Un sábadu de marzu, quien diba dicir, que pudiera ser ún de los últimos díes de trepar en munchu tiempu. Nun atalantábemos lo que se nos venía enriba, pero'l coronavirus, quiciás camude'l nuesu sen de vivir que llevábemos nel intre.
Un día como otru cualesquiera, ya cola mosca tres la oreya, decidimos mui a sabiendes, xubir a trepar a Otura, aprovechando que durmiéramos en Santolaya, alcontrándonos dalgunes cordaes más con ganes de quitar el picor.
Nun ta'l patiu pa forzar muncho la máquina, ya qu'hai qu'evitar posibles cayíes, asina que facemos unes cuantes víes cencielles pa calecer y ya que taben unos collacios probando Onda Expansiva, un 7a+ de bloque pero mui bien protexía metémonos a ella.
Pringo'l bloque de la placa y sigo probando la vía de tranqui hasta'l final, aporto a cadena y al baxar la reviso un pelín. Colamos, la compañera y yo a facer dalguna vía más llarga en Capitán Garfio y a la vuelta, póngome a da-y un pegue pa desmontar, ya que la tiesta ta más pensando en que, de xuru, nun deberíemos tar esguilando.
Salgo del bloque de placa inicial y aporto al segundu, así que salimos al dinámicu ensín mayores problemes, aportando un bon reposu a la mandrecha. Reposo un bon ratín d'esti tramu más bloqueru, falando incluso cola xente que va colando del seutor y sigo hacia un tramu que nun tien mayor dificultá pero peta munchísimu.
Tamos falando d'entrar nuna fisurona roma, qu'hai que facer en babaresa y cuando me quiero dar cuenta llevo una petada de mandrecha brutal. Casi nun me lo p'aguantar d'un cazu cómodu, teniendo que salir per invertíos de manzorga lo antes posible hasta'l reposu nuna repisa.
Equí ya nun habia fallu, descansu de lo que faiga falta y a cadena cola calma, llevándonos al segundu pegue esta guapa vía, con movimientos y agarres bien prestosos. Una vía completa, con un par de bloquinos y un tramu de continuidá que si nun lo yes a xestionar, pue facete dir a la lona como ta mandáu.
Con esto y un bizcochu, esperamos a los collacios y colamos tamién del seutor a una hora ya casi tardía, quedándonos claro, qu'aprovechar, aprovechamos, pero na tiesta vienen pensamientos de que la diversión ye simplemente eso, diversión... toca quedar en casa a la espera de que la pandemia del coronavirus vaya retrocediendo nel so avance y de que toos faigamos les coses con cabeza y quedémonos en casa.
Branu 2019 y entamu del 2020
El Monsacru... quiciás mi llugar preferíu pa facer cualesquier tipu d'actividá de monte, ya sea esguilar o entrenar pa carreres pel monte. Y como non, la escuela d'Otura, onde por munchísimu que la visites, siempre acabes teniendo dalgo más pa trepar, víes que te van quedando nel tinteru y que ties ganes de dir tachando.
Esti branu, tuve la suerte de dir trepar en delles ocasiones con varios collacios y siempre fueron díes de rises, bonos pegues y cerveces posteriores. Nun sólo, fueron bonos pegues pa mín, sinon que pude esfrutar de la vuelta a la escalada de Vane, dempués de la so lesión y de la vuelta a la motivación de Carlina o de primeros graos de collacies como Andrea con Mg85 (su primer 6b+) o de compartir hores d'escalada con Anna, cola que siempre ye un placer trepar, faciendo una cordada bien guapa durante l'añu.
A Nuberu siempre me presta xubir en branu, ya qu'a partir de les 4 va entrando la solombra y se ta bien a gustu anque la xubida caminando faígase siempre con una solana d'afoginar. Na parte cimera del Cavaliere, tuve la suerte (más d'un pegue me llevó) de poder enchufar el segundu llargu de Festival de Cantos (6c+) que me faltaba saliéndose a la mandrecha.
Tamién esfruté una barbaridá faciendo la Cueña Les Cabres, un 7a perbono que tien el so problema en que suel tener dalguna sección moyadina davezu. Tamién, al sol llau me quitaba d'enriba Los valientes visten de negro (6c/+), vía a la que nun-y tengo muncho aprecio, siendo perra y con vuelos llaterales de continuu.
La mió idega yera facer los segundos llargos d'Il Cavaliere y de Mg85, pero los díes de solana, da pereza meterse en placa de tantos metros, asína que por dalgún motivu acabé metiéndome en tres víes curties a la drecha de la mítica Sonika.
La primera ye un 7a superintensu, que pola mió altura tenía que facer con un bloque estra na entrada de la vía. Tamién, mui intensa Workgroup con una salida d'un techu pelín dura de lleer y por últimu Ritmo Infinito, vía más de continuidá con una chorrera bien prestosa.
Como siempre, según fue averándose l'iviernu, tuvimos la oportunidá de xubir hasta la canal d'Otura, onde aparte de llugar de pelegrinación de corredores de monte, tenemos un sectorazu nel que pali pali, fuimos encadenando graos hasta tener en mente oxetivos mayores.
Nun día d'escalada bien motivante, pude enchufar poniendo cintes gris, azul y verde (6c+/7a) y repetir tamién Territoriu Mineru (6c+/7a), quedándome cola idega de dir a por Claveles de Enero, pero tuvo que ser pa otra visita.
Esa visita llegó un tiempu dempués, pero dalgún motivu, me decidí por probar Lametón al Sapu (7a+/b), un segundu llargu de desplome y movimientos dinámicos na qu'esfruté como un guah.e pequeñu, encadenándola al tercer pegue.
Como siempre, tornaremos en breve, ya que la fastera central d'Asturies ye onde más me presta esguilar, costándome un pelín más centrame en proyeutos duros nos valles del Trubia, onde al final vamos más a socializar qu'apretar más duro.
Finales del 2017 y Branu de 2018
Como non, la escuela d'escalada d'Otura ye un comodín pa toles dómines del añu, pudiendo asoleyar en díes fríos en casi tolos seutores o en aguantando'l calor en branu xubiendo a la parte más alta de Nuberu onde entra la solombra bien ceo pela tarde.
El casu ye que cuando hai dulda o quedo con xente pa trepar ensin mayores complicaciones que pasar la tarde y probar dalguna cosina, suelo acabar xubiendo hasta Otura. Durante casi un añu, nun fueron munches les visites pero sí que prácticamente tuviera per tolos seutores esistentes.
P'amuesa, tuve hasta un día n'Afuega'l Pitu, onde diba con intención de terminar les dos víes que me quedaben y alcontréme con dos nueves más. Poro, entretúveme con eses dos nueves, una a la manzorga de Jackeline Destivelle, que paecióme más dura qu'ésta pudiendo ser un 6b o pelín más duro y otra que probé mui al final del día, que comparte salida con Genesis, yéndose a la mandrecha que pudiera rondar un 6c durete y qu'apaez nuna piedrina como Oráculo.
La que sí que fice fué Génesis, quedándome pa otra visita esta nueva d'Oráculo y como non, el 7a que da nome al seutor y que tovía nun tuve la oportunidá de tastiar, colo que tocará volver a esti seutor, incómodu, pero con víes bastante guapes.
Tornar per Nuberu ye totalmente necesariu, ya sea pa facer metrinos anque repitas víes o pa probar cosines que diben quedando nel tinteru. En varios díes, pudimos probar los segundos llargos de Festival de Cantos, encadenando el 6b+ que paecióme una preciosidá y pringando nel caberu pasu la versión más dura de la mandrecha de 6c+.
Magar del primer pegue que-y diera cuando nin tan siquiera había croquis, a la fín encadené Il Cavaliere (6c+), paeciéndome totalmente imprescindible y quedando pendiente siguir pel segundu llargu qu'algama'l 7a.
Otres víes más cortines qu'encadenamos nos distintos díes fueron: Es divertido pero no es un juego (6c), Otura por un Tubo (6b), Amalia vete a currar a Somalia (6b+), que ye horrible de dura y Xomezana (6c) muncho más agradable que l'anterior.
L'otru seutor, que lo mesmu valte pa entrenar corriendo que pa trepar, ye la Canal d'Otura, mítica ascensión per onde trescurre'l Trail d'Afuega'l Pitu y onde abellugámonos a esguilar cuando'l sol nun ye mui cafiante.
Ellí tamién tenía cosines pendientes que fuimos tachando del llibretu, como Bertin Osborne (6b), Hirondelle (6c), L'Estorbín (6c), Yohanes Gabriel (6b), Territoriu Mineru (6c+/7a) y Gris, Azul y Verde (7a) bien guapu, quedándome probáu la so compañera Claridad que tendrá de quedar pa otru momentu.
21 d'Ochobre y 9 d'Avientu de 2016
Pues unos meses dempués tornamos hasta Otura en dos ocasiones realmente especiales, siendo la primera facer la vía de cuatru llargos Sin Perdón. Pa ello, xuntámonos Alberto, Marie y yo, nuna tarde de tiempu agradable, pero de lluz escasa.
D'esta manera, metímonos a trepar, magar de salir del trabayu, aportando al pié de vía y poniéndonos al llabor lo más apriesa posible. Preparamos trastos y salgo al primer llargu, esperando que'l dolor de pié nun fuera pa muncho.
Faigo'l primer llargu nun tris y sal Marie al ataque nel más duru (6a+) y como ta más fuerte que'l vinagre nun tien mayores problemes, saliendo dempués Alberto y yo, dándome cuenta que ye un llargazu guapísimu con metros y muncha calidá, poro, quiero repetir esta vía de xuru.
Llueu salgo al tercer llargu, de V+, mui curiosín, más navegable que'l primeru y al caberu llargu métese Marie, tamién mui entreteníu, pa montar el rapel y tirar p'abaxo col atapecer amenazando. Otru rapel más, na segunda reunión y hasta'l suelu, pa descender a pata per un camín que nun ye mui evidente pero faise mediánamente bien hasta'l seutor de Mar Antiguo.
Y per últimu, el segundu día que torné en 2016 per ellí, fué pa reecontrame con Silvia, la primer pareya de cordada cola qu'entamamos nesto de trepar, dempués d'un cursín de la Fempa allá pel 2009 lo menos.
Llevábemos ensín venos tres años y casi los mesmos ensin trepar ella, pero nun perdió res y merendóse tolos quintos de Capitán Garfio como si nun lo dexara enxamás. Prestó trepar de nuevu xuntos, relaxáu pela mió parte, al sol y cola calma, anque ella tuviera qu'apretar un pelín más.
Esti añu Otura tuvo más presencia nel propiu branu y eso que fué de los calurosos sobretou de Xunetu n'adelantre, pero bono como ye una escuela mítica y ta la xente con munches ganes fuimos dellos díes a trepar aprovechando díes pelín menos soleyeros.
Los primeros díes aprovechando que yeremos varios, demientres Zori y Richar, que tan entamando nesto a bon ritmu, dáben-y a les plaques de Capitan Garfio, Haritz y yo anduvimos faciendo dalguna dalgún llargu o visitando un seutor pelín escaecíu como Afuega'l Pitu nel que tien d'andar engoláu nel aéreu pie de vía.
Nesos díes prauticamos un pelín los varios llargos y con Alberto fice al fín, Querido Alcalde (6a) y la so compañera dalgo más durina (anque la marquen de 6a) que seríen un clásicu total si saliesen dende'l pie de vía... perbones.
N'Afuega'l Pitu aparte d'enchufar a vista toles víes pembaxo'l 6a mui prestoses toes, destacando los dos 6a, Matias Conery y sobretou Jackeline Destivelle, que ye fina, fina. Tamién cayó el Principe Valiente, que debió salir a vista, pero llancéme con demasiada confianza y pringué nun primer pegue.
Otru de los díes apaecimos pel Callejón, seutor nuevu, equipáu penriba de Il Cavalieri y Nuberu, enriba la canal y de los pocos llugares onde tenemos solombra n'Otura. Ficimos un par de 6a+ perbonos, llargos y perbon equipaos y tamién sacamos un 6b bastante gochu, Tryston, que quitónos les ganes de da-y más al so collaciu Leoncio, con entrada más gocha si cabe.
18 de Setiembre, 9, 16 d'Ochobre de 2015
Aportó la seronda y nun hai llugar como la faldera'l Monsacru pa tar esguilando nos sos parés. Nesti casu averarémonos hasta los seutores d'Otura y más en concretu a la canal de Nuberu y Capitán Garfio onde demientres dalgunos trepen, suelo escapame a probar cosines más dures.
Foron bonos díes, nos qu'enchufé a la fín, con mayor facilidá de la esperada, dempués de milenta pegues en munchos díes, Brutalidad Policial. Dicen dalgunos que si sales per nun se onde sal de 6b+ o si mides dos metros.
Pero pa min, salir pel desplome con una pinza mínima de dreches y una ñapa inesistente casi de manzorga, paezme mui merecedora d'un 7a bien curiosu. El casu ye que nesti día, too salió perfeutu, sentíame fuerte y fuí a moveme perfeutu pa salir del desplome.
Hai víes qu'atragántense pero al final gárres-yos cariñu y too. Pasóme con esta, anque otra cosa ye que vuelva a probala dalgun día jeje. Anda que nun hai víes pa siguir avanzando... por exemplu tol seutor de Nuberu.
Esti seutor, ta reciéntemente reequipáu y aparte equipáronse nueves víes, tan bones como les vieyes y que son una auténtica maraviya, con llargos percorríos de placa nos 30 m aprosimáu. D'éstes, cayeron nun bon día un par de 6b's (Nuberu y Banilla Vainilla) y quedóme nel tinteru Amalia vete a currar a Somalia... un 6b+ mui cachondu con unes primeres 4 chapes tremendes.
Pa otru día...
29 de Xunu de 2015
Casi un añu ensin volver a Otura... la razón pues tampoco ye que la sepa... en branu fai calor y n'iviernu tampoco ye qu'esguilase muncho, asina que'l tiempu pasa y los proyeutos escaécense. Non sólo por mí, sinon por muncha xente ya que Brutalidá Policial, esi 7a como un campanu yendo pol sitiu, taba col pie de vía imposible d'ortigues.
De toes formes, la intención yera trepar con Pau, Haritz y Pangua y César que tamién ficieron actu de presencia dende cuantayá sin esguilar. De xuru, que llevaben sin poner un arnés más d'un añu, ya que dende'l branu pasáu nel que teníen intenciones de xubir al Picu con un guía nun volvieren con nós a prauticar la escalada.
El casu ye que con un calor infernal, xuntámonos toos en Capitán Garfio, pa facer quintos a mamplén, sorprendiéndome muncho Pangua que fízose con 3 o 4 víes de V+ con cierta facilidá y muncha seguridá yendo de primeru.
Como siempre, cuando baxó'l calor fice una escapadina pa trepar dalgo nuevo y pa ello, o faigo varios llargos nesti seutor o avérome más hacia Nuberu. Ellí, la vía xemela de Brutalidá Policial, nómase Sweet Jane y sí una xube pela mandrecha de la covacha, la otra xube pela manzorga con un percorríu más continuu que la collacia... que ye cenciella hasta un pasu perduru de bloque.
Más que na, quise probala por conocer otra vía y nun llevaba intenciones d'un pegue a muerte col envís de sacar mi segundu 6c a vista. Asína que sin más, falando tranquilu con Pau, fuí aportando de chapa en chapa hasta que tuvi qu'apretar más de la cuenta.
Viendo qu'algamara'l pasu que yo camentaba duru, relaxeme, respiré y seguí p'arriba con enfotu, encadenando otru 6c a vista que costóme muncho menos de lo esperao. Como siempre, colos graos pocu hai que dicir, simplemente trepar y dalo too... si esta vía ye 6c... nun pue ser Brutalidá Policial 6c tamién... pa mí ye un bon 7a, si vamos de frente ensín llibrar a la mandrecha.
.
14 de Payares de 2014
Fae abondo que nun apaecemos per Otura y tuvo que ser un avisu de Vicen que diba averase per ellí, lo que motivó qu'Alberto y yo fuésemos hasta'l seutor de Capitán Garfio. La verdá ye que teníemos intenciones de visitar la Manza y aportando más tarde de les 4 pocu tiempu teníemos pa esguilar daqué ya que la lluz ye mui escasa nesta dómina del añu.
Al menos Alberto pudo conocer la escuela y esti seutor en cuestión, faciendo los dos primeros llargos de la mítica Enigma y yo tuvo pegándome polo menos en 4 pegues con Brutalidá policial, la cual cuanto más la intento y per onde yo pretendo sacar el techu tengo claru que ye un bon 7a.
A ver cuando soi a tornar per ellí... y algamo l'encadene tan naguao. Nesti día, al menos faláremos un bon ratu con Vicen, Conchi y Celso que va tiempu que nun veíemos al tar Vicen enfrascáu n'estudiar pa una oposición.
9 d'Abril de 2014
Aporta la primavera y tiramos pa llugares onde'l solín caleza, pesie a les baxes temperatures mañaneres. Como non, dir a la faldera'l Monsacru siempre ye ésitu garantizáu, o casi siempre, ya que nesti día, xubiéramos dende'l pueblu d'Otura al seutor cola borrina penriba la tiesta.
Nun día tan mitolóxicu no qu'al tiempu refierse, vamos dir a Nuberu, el cuál xunto col nuesu Xuan de la Borrina, nun va querer quitanos la ñeblina d'enriba, hasta bien pasada la mañana. Aún así, nun quisimos perder el tiempu y entamamos a calecer deos con Festival de Cantos (6a+).
La siguiente na que nos metimos fue Heavy Metal, que quedáranos nel tinteru n'anterior visita. Los collacios que taban aquel día dixeran que yera de 6b y nos croquis reciéntemente espublizaos, asína la coten tamién.
Pa nós, quiciás por un pasu en bavaresa, pelín llargu paeciónos más dura que 6b. Ye más, al otru llau del espolón pel que xubimos, hai otra vía, que ficiéramos a vista y cótenla de 6b+. Ya sabemos como va lo de los graos... caún ye caún y K2 una piragüa.
El resultáu... pues primer pegue míu, ensín encadene, dexando una cinta llarga nel pasu clave. Aún así, Vicen nun s'atreve y nun la mete nel bolsiellu. Al segundu pegue míu, ya sí que faigola apretando abondo nesi pasu tan llargu pa mió estatura.
13 de Xineru de 2014
Ún d'esos díes de bon tiempu de Xineru, tornamos al Monsacru, pa xubir hasta'l nuevu seutor d'Otura nomáu la Canal. El llugar como faláremos va tiempu ye preciosu y a pesar del solín, nótense los díes fríos de Xineru, y nun ta p'andar pocu abrigáu precísamente.
Magar de la sudada de rigor hasta'l paré, pusímonos a restolar pente los croquis, cuales yeren les víes más cencielles que mos quedaben por encadenar, y contando con un 6a d'entamu llevamos el chascu de comprobar que nun esistía tala vía.
Vicen encadenando'l 6b col nome de Hirondelle
Ensín más, paezme qu'entamé yo, aportando hasta la cadena, dempués de dalgún pille qu'otru. Ye una via llarga con un tramu d'aniciu tumbáu y llueu ponse la cosa tiesa, al travíes d'un canalizu con agarres de pinza grandes los cuales pétenme y muncho.
Tanto, que nos tres intentos que-y dí, nun fuí a encadenala, por mor d'un chapaxe espuestu. Pa quedar empataos, Vicen sí que fué a encadenala al segundu pegue, quedándome yo col tastiu amargu de nun ser a facela nel día de güei... pa otru quedará.
Como siempre... d'esti seutor nun pongo croquis, porque nun tan espublizaos n'interné per naide.
7 de Xineru de 2014
Un día más, col añu recién entamáu, tocaba dir a trepar y pasar la mañana al sol, n'Otura, na escuela d'esguilada del Monsacru.Sigo ensín una motivación fonda, así que préstame dir a los seutores a pasar la mañana sin mayores esixencies que tar al aire llibre y nun quedar en casa muertu d'ascu.
Nello tuviemos, Vicen, Celso, Kíla y yo, acompañaos esta vegada por Fabiu y el so fíu Xune. La verdá que fue un día tranquilu abondo, anque por suerte, dióme por probar una nueva vía, reciéntemente equipada a la manzorga d'Enigma.
Anda nel mesmu xeitu que'l primer llargu d'Enigma, pero con menos canalizos sacante del final, perguapa y mui d'encomendar pa xente aniciándose, ya que rondará'l IV+, al menos nós asina dexámoslo, comparando con Enigma.
El casu ye que va tiempu, que ta trabayando xente, nun desplome enorme a la manzorga de Capitán Garfio. Tienen que salir graos bien duros, y esta nueva vía, sirve d'accesu a él, poro nun vos asustar por ver cuerdes afitaes, ya que la vía, ta perbien equipada y con una reunión nueva, anque nun se vea dende baxo.
Tamién daría accesu, esta nueva, a otra vía de dos llargos de 6c y 6b, qu'antes sólo podíase llegar pel cable dende la segunda reunión d'Enigma. Pero como nun teníemos ganes de metenos en varios llargos quedará pa otru día.
Asína que, Vicen, mientres Fabiu quedaba con Xune y Celso xintando, tiróse a pol 6a+ de Nuberu que te pegáu a la cueva, algamándolo al fín y yo metí-y un pegue a Brutalidad Policial, que sigue sin salir pol pasu llargu pa mi estatura, pero como siempre aporto a la cadena, nun m'importa intentala siempre que voi, ensín dexar material.
Polo demás, otru día tranquilín, a la espera de tornar a sentime en bona forma p'apretar ya intentar si se puede, xubir un escalón más nesto de la esguilada deportiva.
27 d'Avientu de 2013
Otru gran día de sol, enantes del fín d'añu, poro aprovechamos pa dar una vueltina hasta'l Monsacru, al perconocíu seutor de Capitán Garfio, n'Otura. Apocayá, nun llevo grandes sensaciones p'apretar de más, asína que l'envís ye facer dalguna vía, tomar el solín y pasar la mañana.
Taremos un bon ratu nes víes de placa, esguilando Vicen, Pau, Celso y yo, pa cuando llega la hora de xintar, Pau, quédase con Celso y Vicen y yo, colamos a la cueva, onde quiero al menos da-y un pegue a Brutalidad Policial (6c/7a) y Vicen va a pol 6a+ que quedára-y nel tinteru'l día anterior.
Al final, un pegue caún y el mesmu resultáu: res. Vicen falló práuticamente nel mesmu llugar, y sacó sobráu'l restu la vía y a mí, el pasu del techu, sigue quedándome perlloñe. Paezme increyible, qu'haya xente que seya a cotala de 6b+, cuando yo personalmente, nin m'avero mínimamente a los bonos agarres.
En fín, a siguir trabayándola...
4 d'Avientu de 2013
Otru miércoles al sol del paru, y dempués d'una ñevada bien curiosa, tocaba dir a esguilar a la fastera d'Otura de la escuela d'escalada del Monsacru. Alborecemos con un día perfríu, pero confiamos que'l paré sur del seutor Nuberu, seya l'allugamientu perfeutu pa pasar una mañana de luxu.
P'allá que vamos como siempre Vicen, Kíla y yo, y según vamos xubiendo a esti seutor, vemos que'l solín calez y que nun vamos pasar el fríu que pasamos na visita a los seutores d'Alimoche y Madalena, va una selmanina.
Ye más, Nuberu al tar metíu nuna canal, t'abondo protexíu y nin siquiera'l vientu fai baxar les temperatures. Nunca nun esguiláremos equí, y andamos mirando varios croquis pa identificar les víes, por mor del nuesu xeitu conservador nes primeres visites.
Nun somos a pescanciar bien les víes, ya qu'hai nueves que nun apaecen nos croquis y enriba les que si tenemos tan equipaes con chapes ferruñoses y paez que nun mos dan muncho ánimu a faceles, poro a la escontra de lo que nunca facemos, metémonos nes nueves ensín saber grau dengún.
A lo xole, entamamos pola manzorga'l seutor, ye Vicen el primeru en metése y por suerte, facemos un viote llarguísimu, que cotamos como 6a más menos. Llueu aportaríen un par d'escaladores más y dícenmos que nos croquis que tienen, pelín probes nel móvil, pon de 6a+... vamos dexalo así.
D'esti vía, polo visto, salen otres dos, un 6b y un 6b+, anque nun toi seguru del too, si esi yera l'orde d'esquierda a drecha. Nós, llevamos cuerdes de 70 ms, y nun mos atrevemos a siguir, quiciás otru día taría bien intentales.
El siguiente en pringar nel primer pegue fuí yo... y como entá nun llegaran los que teníen croquis, metíme nun marroneti de los que faen hestoria. Aún así, unes cuantes pillaes y fuí a sacar tolos pasos, hasta la cadena.
Pero enantes de marchar, coles fuercies un pelín xustes ya, dímos-y a una vía que si teníemos nos croquis, al llau de la nuesa querida cueva pente Nuberu y Capitán Garfio. El croquis ponía de 6a+, y tenía dellos pasos en travesía, hasta metese nun desplome con salida pelín llarga.
Llueu dellos apretones más, pa salir de dalguna barriga y salió a vista por mi parte, quedándo-y pa otra a Vicen, que se-y atragantó la salida del primer desplomín, anque al siguiente aprete ya salió ensín problemes.
Bon día d'escalada con 3 víes a vista de 6a+ a 6b, y un pegue mui prestosu a 6c+, al que quiciás echándo-y un pelín de güevos, pudiera sacase a vista... pa otru día, de xuru que cae.
11 de Payares de 2013
Coles pates cansaes inda, de la ruta del día anterior en Casu, quedo con Vicen col envís de conocer un nuevu seutor na escuela d'Escalada del Monsacru. Defechu, esti nuevu paré t'allugáu en plena canal a la mandrecha de los seutores más míticos enriba del pueblu d'Otura.
El llugar ye guapísimu, anque l'ascensu ya seya dende Capitán Garfio, o dende'l camín que va pal repetidor, ye duru, duru asemeyándose a una canal de Picos, lo cual da-y un toque increyible esguilar nesti requexu del Monsacru.
Como non, siguimos col nuesu métodu, d'aniciar en cualesquier escuela de nueva visita, poles víes más cencielles. Pel momentu, nos añinos que llevo esguilando, va resultándome y préstame les primeres visites pola vida, ensín apretar a lo xole dende'l primer día.
D'esta miente, metímonos a la preba d'un V y V+ que comparten reunión, col que garrámos-y el tastu a la peña. Nel día de güei fuí faciendo yo casi toes les víes primeru, dexando-y a Vicen les cintes pa encadenales tamién.
En definitu, ablucante llugar y ablucante día, poro va ser que tar al paru, tien les sos coses bones... esguilar un llunes pela mañana, jaja. Colamos coles mesmes, pela canal p'abaxo, despidiéndonos de los otros collacios y con 7 víes nueves a vista nel bolsiellu.
9 de Payares de 2013
Como ya diba yo camentando, tamos en tiempu d'aselar una migayina los nuesos oxetivos. Nun se va poder tar xubiendo grau ya intentando víes complexes pa mí, cada día que voi a esguilar, poro tamién el cuerpu necesita esfrutar en víes más cencielles y nun sofrir tanto.
Como Mar Antiguo, téngolo dafechu completáu, dediqueme a esfrutar colos 6a's d'esti seutor, col envís de que Pau, que ya tien tolos V's encadenaos, entrenase ún tres d'otru pa dir garrándo-yos un puquiñín de collor.
Nesi sen, nun pudimos tener un día meyor, ya que Pau algamó la cadena en toles víes, y darréu tocará trabayales de primera, cola tiesta puesta nun nuevu 6a na so llibreta y lo más importante, tornar a sentir bones sensaciones na escalada, que ye lo más importante.
---------------------------------------------------------------
2 de Xunu de 2013
Al fín, un puquiñín de bon tiempu... y onde seca la roca primeru... pues n'Otura. Nes parés meridionales del Picu Llanu Los Bues y el Cantu La Sierra, la caliza suel secar bien ceo y eso que cuando tábemos xubiendo en coche aínda taba l'asfaltu húmedu.
Gran día d'escalada nel seutor Capitán Garfio, xuntándonos un bon garrapiellu xente: Celso y Vicen, Gus, Sonia, Berto, Natalia, Ana y Pau y yo, apaeciendo más tarde inclusu Pangua, dempués de correr una xubida vertical de montaña en Llaviana.
Como siempre, d'entamu, metióse tol mundiu a lluchar coles llargues víes de placa de la mandrecha, demientres Pau y yo, queremos garrar confianza caún no suyo: Pau na escalada de primera y yo, metiendo trastos n'autoprotección en Martes de Campos (V).
Magar de que Pau, recuperase sensaciones col primer llargu de Capitán Garfio (V+), demientres la xente descansa y xinta, metémonos Vicen y yo, a pol segundu llargu de Sensación de Morir (6b+), que teníemos por encadenar de la última vegada que colgámonos d'una reunión.
A por él fuimos, xubiendo yo'l primer llargu y asegurando a Vicen nel primeru y na apertura del segundu, qu'a sabiendes de como yera l'últimu pasu, sácalu ensín mayores problemes. Dempués tocóme a mí, da-y preste, pero al ser más pequeñu, tuve que llanzar al cazu d'esquierdes final, envede chapar dende baxo como Vicen. Al final, pa la saca los dos y a picar dalgo nel pie de vía.
La xente va cansando, casi llevamos tol día apretando y personalmente, toi reventáu de pies de tar colgáu, asína que tocaba quitar ferralla, quitar el trastéu nes reuniones y esfrutar apretando nuna vía d'un llargu y tenía que ser... Brutalidad Policial, de la cual, hai milenta versiones so la cotación d'esta.
Dende 6b+ pasando por 6c y 7a... lo cual ofende ya qu'acabamos de facer un 6b+, ensín problemes y les tentatives tanto de Vicen como míes son ermes d'ésitu nesta otra. Y non por un pelo, por munchos pegues más que necesitaremos pa sacala.
Lo más divertíu ye que nel últimu llibru d'Escalada Deportiva n'Asturies, el segundu llargu qu'acabamos d'encadenar, márcalu de 6c... lo mesmu que Brutalidad Policial, pa mexar y nun echar gota. En fín, les graduaciones son así... siempre habrá dalguien te dirá que ye un pasu, que si tal que si cual... será un pasu, pero mi estatura nun me fai llegar al agarre bono y pa mi esta vía, ye de 6c p'arriba pero bien... 7a de xuru.
Equí sí, n'Otura sí que pueu perder la cuenta de les vegaes que tuve esguilando nesta escuela de Morcín. Nun hai secretos, ye un sitiu perfeutu pal iviernu, pola so dimposición sur, porque con qu'haya cuatros rayinos de sol, tas ensín camiseta como si fuera branu... en fin, por too.
No deportivu, pues Pau, sigue avanzando ya qu'esta escuela-y presta muncho, poro tien tolos V+ de Mar Antiguo ventilaos y ya a piques de sacar su primer 6a. Tamién andamos, preparándonos colos varios llargos en Capitán Garfio de cara a una inminente ascensión al Urriellu, esti branu.
Personalmente, nel seutor de Mar Antiguo, tengo encadenaes toles víes esistentes, col preste increyible de sacar Ramapithecus (6c) como creo que tien de ser, ensín invertíos averándosese a la vía de la mandrecha, poro garrandose de les ñapes y colocándose de pies finu, finu.
Aparte, nun va muncho ficiéronos un gasayu, al equipar una vía nueva, a la esquierda de la propia Mar Antiguo. Ye perguapa, xubiendo per una placa, que magar d'una fisura ponmos nun descansu nel qu'hai que filar finu, p'alcontrar la secuencia de manes penriba d'una barriga.
Asína que, con Mar Antiguo completu, les visites pela mio parte, centraranse en delles víes de Capitán Garfio que me queden por facer. De les prebaes, tengo por encadenar el segundu llargu de Sensación de Morir (6b+) que tanto Vicen como yo, llegamos hasta riba, pero nun la encadenamos y mi segundu intentu de 7a, na cuevina de Capitán Garfio.
La vía, prebámosla Vicen y yo, y llegué hasta la cadena, dempués de caeme nel pasu clave. Pal mio tamañu, ye un pasu durísimu, ya que nun llego al agarre llateral, que da pasu a sacar la vía. Habrá que trabayalo, xubiendo pies a dolor y de xuru que con dalguna ñapa infima pa poder rebotar, así que será más cercano al 7a qu'al 6b+ pa mi altor.
La próxima vegada... a ver si sacamos dalgo curiosu
Hestoria na escuela de la Otura (Morcín)
El pueblu d'Otura ta nel conceyu de Morcín y p'aportar a esti guapu pueblu, hai que garrar la autovía Y pa continuar pola A-66 pasáu Uviéu hasta la salida de Sotu Ribera, na que garraremos la N-630 pa llueu tomar el crucie a Riosa pola As-231.
Dempués travesaremos los pueblos de Les Maces, La Puente y pasáu La Foz, tenemos el crucie hacia'l pueblu d'Otura, siguiendo una carreterina estrecha qu'en continua xubida va averános a esti pueblín, nel falderu del Monsacru.
La escuela consta de 4 seutores, a los qu'apórtase xubiendo pel pueblu hacia la mandrecha, hasta'l final del pindiu camín formigonáu onde tiraremos a la esquierda, saliéndonos a metá camín, hacia les parés p'aportar a los seutores de Capitán Garfio, Afuega'l Pitu y Nuberu y siguiendo hasta'l final daremos con Mar Antiguo.
Sonia asegurando y Gus, Dani y Pau trepando na parte drecha de Mar Antiguo
Ye'l seutor nel que más tuvimos el grupu collacios que solemos esguilar y sobre tou Pau y yo. La verdá ye que siempre pasamos mui bonos ratos, anque tamién hai que dicir que si pega'l solanu, nun hai quien pare, asína qu'en tola escuela, siempre llevar bien d'augua.
Pel momentu, tengo toles bien feches menos un 6c de placa, que me tien pola cai de l'amargura, ya que los agarres son invertios y de ñapes y los pies son práuticamente inesistentes... dalgún día cayerá, jeje.
Seutor de placa del Capitán Garfio
Esi día, tirámonos un par d'hores na paré, con tola tranquilidá del mundiu, pa facer los 4 llargos que tien la vía. Primeru, metíme los dos primeros xuntos (IV+ y IV) hasta'l cable de seguridá, onde camudamos xeres y Vicen fizo'l tercer llargu (V+) nel que la salida asusta un pocu, pa finiquitar yo l'últimu llargu de 6a.
Abriendo'l primer llargu d'Enigma, pa deprender cosines na reu
Muy chulo, Berto. ¡Vaya como le dais!
ResponderEliminarGracies Jose, ehí ties una escuela estupenda pa siguir dándo-y a la escalada.
EliminarUn saludu
Hola Berto, como me presta veros por ahí, en Otura y e un de los pocos sitios donde yo practiqué un poco la cuerda, y concretamente el sector Mar Antiguo es donde mas veces estuvimos.
ResponderEliminarEso si, con sol por la tarde pa achicharrar!
Un saludo
Jaja, si que-y pega fuerte'l sol n'Otura, ya vi a xente con sombrilles y too a pie de vía, jeje.
EliminarMonchu, anque-y dieses pocu a la cuerda, paezme que nun te fizo falta nunca pa les grandes ascensiones que ties por ahí... y de les que tengo una envidia sana tremenda, jeje
Un abrazu
Vete aprendiendo que hará falta.!!!!!
ResponderEliminarUn abrazu.
A partir d'agora llevo tolos cacharros pa entrenar l'alpina en víes de menos de V+ aprox. Hai qu'entrenar duru y tener experiencia cola autoprotección.
EliminarUn abrazu Fernan
La nuesa tierra tien la maxa de los sos paisaxes, la so xente y qu'anque seya una tierra que ta quedando probe nun-y falta amor. Saludos.
ResponderEliminarNello tamos Adivín, conociendo la tierra poquín a pocu y con ello amándola un pocu más cada día
EliminarBerto cawen to, llamame que hacemos una sesión de fotos oooh!, acabo de publicar en el blog , si te mola mándalo a los de piratas porque yo no atino con el contacto jajaja. Venga nos vemos!.
ResponderEliminartito, desearos a todo el grupo un feliz año nuevo y que pronto nos veamos.Saludos
ResponderEliminargracies Tito, ya me comenten que pronto tendrás a los neños corriendo pel monte jaja. Bon añu que vien y que sea muncho meyor, porque sinon habrá que salir a pegar tiros ya.
EliminarUn abrazu